Uhdahn Mie Tepil?
“Ahnsou kis, nan poadoapoad en Sarawi en Kristian kan, Tepil, Peelsepwul de Sehdan, me wia nanmwarki en me suwed, kin inenen mehlel rehn irail oko oh e kin kehlail duwehte “Koht” rahnwet ong aramas malaulau; oh Sehdan kin wiawihda nan medemedewehn mehn Suhs oh tepin Kristian akan me kin wia mehkot me elep-aramas, elep-mahn pwehn pahrekiong uwen suwed me kapilirailpene. Mwurihdo, Kristian akan eri diarada me met madamadau likamw ehu me sohte mehkot me pahn kadehde oh irail eri kesehla madamadau wet ahpw sohte mweseiki.”—“All in the Mind—A Farewell to God,” me Ludovic Kennedy ntingihdi.
NIN DUWEN me soun nting oh sounpakair nan wehwe, Ludovic Kennedy koasoia, pahr ngeder sohte emen nan Kristendom kelikamwe me mie Tepil. Ahpw, nin duwen Professor Norman Cohn koasoia, me Kristian akan ekei pak “kin mihla pahn kehl en Sehdan oh ngehn saut akan.” (Europe’s Inner Demons) Kaidehn aramas saloalokong de aramas mwahl kante me kin mihla pahn kehl wet. Kamehlele me Tepil kin pwarada ni mwomwen mahn pwe en kaweid wiewia suwed oh wiewiahn kaudok mwahl, ni karasepe, “sohte kin mihte rehn aramas pweipwei kan, ahpw e pil kin mih rehn irail me ndandki ahr loalokong,” iei me Professor Cohn koasoia. “Irail me ndandki loalokong”—iangahki irail kaun en pelien lamalam kan me loalokong—iei irail me kin wiewia wunahni me rekla nan Iurop nan pahr akan mpen pahr 1400 samwa lel pahr 1700, ahnsou me pelien lamalam oh kaun en koperment akan kin kemehla oh pil kaloke aramas mpen 50,000 me dene irail sounwunahni kei.
E sohte kapwuriamwei me aramas tohto sohte pwungki soangen madamadau en rotorot kan me pid Tepil. Pil sangete nan pahr 1726, Daniel Defoe sapwungki ahn aramas madamadau me Tepil wil mehkot mwohmw kamasepwehk me “mie ah pehnpihr me duwehte pwehk, mie kode, sendin neh kasang riau, mie iki me reirei, lowe me kasang oh soahng teikan.” E pil koasoia me soangen madamadau pwukat “kasalehda lamalam rotorot me irail aramas me kin men aramas en lemehiong me Tepil mwomwen kamasepwehk” kin likamwkihda.”
Iaduwe—met duwen me ke kin iang medemedewe? Ke kin kamehlele me “Tepil pein ahn aramas madamadau pwehn kapwukoahki ih me kahrehda ke wiahda dihp akan”? Madamadau wet pwarada nan The Zondervan Pictorial Encyclopedia of the Bible, oh aramas tohto me dene irail Kristian kin ahneki madamadau wet. Irail me kin iang sukuhl en Pwuhk Sarawi kan nan Kristendom, nin duwen me Jeffrey Burton Russell koasoia, kin “kasalonge madamadau me pid Tepil oh ngehn saut akan pwe dene madamadau likamw ekei met.”
Ahpw, ong ekei aramas, Tepil wia mehkot me mehlel rehrail. Irail medemedewe me uhdahn pahn mie mehkot me manaman sang aramas me kin kaukaule kamwekid suwed akan me aramas kin wiewia kohdo nan poadoapoad en aramas. Russell koasoia me “irair kamasepwehk me wiawihda nan senturi 20” iei ehu kahrepen “kamehlele duwen Tepil pil pwurehng pwarapwarada mwadang.” Nin duwen soun nting Don Lewis ah koasoia, aramas tohto me iang sukuhl laud kin “kouruhrkin irail akan me kin kamehlele ngehn akan” oh masak “ngenen arail peneinei en kawa kan me sohte sukuhl laud” met “pwurehngehr kamehlele ngehn suwed akan.”—Religious Superstition Through the Ages.
Eri, dahme mehlel? Tepil madamadau likamw ieu? De iei ih emen me kitail en dehr mwamwahleki nan senturi 21 wet?
[Kilel nan Pali 4]
Mahs, aramas tohto kin kamehlele me Tepil wia emen me elep-aramas oh elep-mahn oh met sansal nan kilel wet me Gustave Doré wiahda
[Credit Line]
The Judecca—Lucifer/The Doré Illustrations For Dante’s Divine Comedy/Dover Publications Inc.