Tepil Kaidehn Madamadau Likamw
“Wasa koaros nan Kadehde Kapw, uhpene laud kin mie nanpwungen wiewia mwahu oh sapwellimen Koht kehl akan oh pali teio mie irail aramas suwed akan me mih pahn kaweid en Sehdan. Met kaidehn madamadau en soun nting kan en Paipel, ahpw mehkot me aramas tohto kin kamehlele. . . . Mehn kadehde me mih nan Kadehde Kapw me sansal mwahu. Sehdan wia mehmen me uhdahn mie, oh kin pelian Koht oh sapwellime aramas akan.”—“The New Bible Dictionary.”
ERI, dahme kahrehda aramas tohto me kose me irail Kristian—oh dene re kamehlele Paipel—kin uhwongki madamadau me mie Tepil? Pwehki, ni mehlel, re sohte kamehlele me Paipel iei sapwellimen Koht Mahsen. (Seremaia 8:9) Aramas tohto me dene irail Kristian nda me soun ntingihada Paipel akan kin kasalehda madamadau en wehi kan me pidakihirailpene kan oh kahrehda irail sohte uhdahn pousehdo padahk mehlel sang rehn Koht. Karasepe ieu, emen semen en Pwuhk Sarawi me iang pelien lamalam Kadolik, Hans Küng, ntingihdi: “Soi likamw akan duwen Sehdan iangahki poadoapoad likamw akan duwen ngehn saut akan . . . kin kadirehla soi en mehn Papilon oh pil lelohng kaudok en mehn Suda kan kawao, oh sang wasao leledohr nan Kadehde Kapw.”—On Being a Christian.
Ahpw, Paipel kaidehn ahn aramas koasoi; e uhdahn wia Mahsen en Koht. Kitail pahn loalokong ma kitail kamehlele dahme e koasoiahki duwen Tepil.—2 Timoty 3:14-17; 2 Piter 1:20, 21.
Dahme Sises kin Kamehlele?
Sises Krais kin kamehlele me Tepil uhdahn mie. Sises sohte ale kasongepe sang lamalam suwed ieu me mih loale. Aramas tohrohr men me uhwongada ih me mwuhr e kahdaneki “kaunen sampah.” (Sohn 14:30; Madiu 4:1-11) Sises pil kamehlele me mie ngehn teikan me kin sewesehda Sehdan nan eh wiewia mwersuwed akan. E pil kin kausasang ngehn saut akan sang rehn aramas akan. (Madiu 12:22-28) Ni ahnsou me Sises koasoia duwen Tepil oh nah ngehn saut akan, e sohte kin alasang padahk likamw en mehn Papilon kan. E uhdahn kamehlele me irail uhdahn mie.
Nin duwen Sohn 8:44 kin kasalehda, Tepil, me wehwehki “sounlikamw,” iei ih “sounlikamw men oh semen soangen likamw koaros.” Ih me tepin ngehn me wiahda likamw me pid Koht oh e wia met nan mwetuwel en Ihden. Siohwa mahsanih me tepin atail pahpa oh nohno pahn “uhdahn mehla” ma ira kang wahn tuhkehn kehsehki aramas dahme mwahu oh dahme suwed. Sehdan doadoahngki ewen serpent (sineik) men oh ndaiong Ihp me mahsen pwuko me likamw. (Senesis 2:17; 3:4) Kahrehda, e konehng en adaneki “serpent en mahso, me adaneki Tepil de Sehdan.”—Kaudiahl 12:9.
Nan Sohn 8:44, Sises pil mahsanih me Tepil “sounkam aramas emen [sangete nin tepio]” oh “e sohte kin miniminiong me mehlelo.” Met sohte wehwehki me Siohwa wiahdahte Tepil nin tepio pwehn wia “sounkam aramas emen.” E sohte wiawihda en wia mehkot kamasepwehk oh emen kin apwahpwalih wasahn kisiniei oh kin kaloke aramas akan me kin pelianda Koht.
Nin tepio, Tepil kin “mih nan padahk mehlel.” E wia emen kisehn sapwellimen Siohwa peneinei en nanleng oh ih unsek. Ahpw, e sohte “tengedi nan padahk mehlel.” E pein pilada ah elen mour oh ah elen wiahda likamw. “E tepida wiahla Tepil,” kaidehn ahnsou me e kepikpikda wia emen sapwellimen Koht tohnleng, ahpw ahnsou me pein ih pein medewehda en pelianda Siohwa oh ih eri wiahda likamw ong Adam oh Ihp. Sehdan eri wiahla “sounkam aramas emen” ni ahnsou me e uhwongada oh kahrehong Adam oh Ihp en mehla, oh pil iangahki mehlahn tohn sampah.—Rom 5:12.
Tepil—Imwintihti Kehlail men
Tepil kin wia imwintihti kehlail men. E kin “kohkohseli duwehte laion emen me kin weriwer, raparapahki ihs me e pahn kadallehla.” (1 Piter 5:8) Tepil kaidehn madamadau suwed ieu me mih loalen aramas soh unsek kan. Mehlel, ehu ehu rahn, kitail kin pil nannanti pwehn powehdi atail luwet en uduk kan. (Rom 7:18-20) Ahpw, dahme keieu apwal iei en “pelian ngehn suwed akan nan wehwe.”—Episos 6:12.
Ia uwen laud en ahn Tepil kehl? Wahnpoaron Sohn mahsanih: “Sampah unsek mi pahn manaman en Me Suwedo.” (1 Sohn 5:19) Mehlel, kitail sohte men lemmwiki Tepil de pil mweidohng masak ih en kauwekitailla. Ahpw, e kin wia elen loalokong ma kitail pahn pepehd ong kasongosong kan me Sehdan kin wia oh dehr mweidohng ih en karotongehla atail madamadau ong padahk mehlel oh pil dehr mweidohng ih en kauwehla atail lelepek ong Koht.—Sohp 2:3-5; 2 Korint 4:3, 4.
Dehr mweidohng Sehdan en pitih kitailedi sang atail kin pwupwudi ong soahng kan me pid wunahni. (Deuderonomi 18:10-12) Ken wia tohnsukuhl mwahu en Mahsen en Koht, oh tamataman me Sises Krais kin kalap doadoahngki Mahsen en Koht ni ah kin ale kasongosong kan sang Tepil. (Madiu 4:4, 7, 10) Oh pil, kaukaule kapakap ong Siohwa ma ke kehn me ke mihla pahn kasongosong en Tepil oh nah ngehn saut akan.—Pilipai 4:6, 7.
Kitail sohte anahne masak Tepil. Siohwa inoukihda me e pahn uhdahn sinsile kitail sang dahme Sehdan kak wia. (Melkahka 91:1-4; Lepin Padahk 18:10; Seims 4:7, 8) Wahnpoaron Pohl mahsanih: “Kumwail kehlailkihda amwail miniminiong Kauno oh manaman en sapwellime roson.” Kahpw pahn “kak pelianda kehlail Tepil eh widing suwed kan.”—Episos 6:10, 11.