Pelianda Sehdan, E Ahpw Pahn Tangasang Uhk!

“Eri, kumwail peikiong Koht, oh pelianda Tepil, e ahpw pahn tangasang kumwail.”—SEIMS 4:7.

1, 2. (a) Irair en Tepil dahieu me ntingidi nan Aiseia irelaud 14? (b) Kitail pahn tehkpene mehnia peidek kan?

NI OARALAP, Tepil me kin wia kasalepen pohnmwahso. Ah pohnmwahso kin sansal nan mahsen akan en sapwellimen Koht soukohp Aiseia. Pohnangin sounpar epwiki mwohn Papilon ah wiahla wehi kehlail en sampah, sapwellimen Siohwa aramas akan wiahda kalohk wet en pelianda “nanmwarki en Papilon”: “Komwi koasoanedier me komwi pahn ketidahla nanleng oh ketikihda mwoalomwi pohnangin usu me keieu ileile kan en Koht [nanmwarki kan nan kahng en sapwellimen Depit elen soupeidi] komwi kupwukupwure me komwi pahn ket nin duwen nanmwarki men  . . komw mahsanih me komwi pahn ketidahla pohn depwek kan oh duwehla Wasa Lapalap.’” (Aiseia 14:3, 4, 12-15; Nempe 24:17) Madamadau en pohnmwahso me “nanmwarki en Papilon” wia kin duwehte ngehn en Sehdan, “koht en koasoandi suwed wet.” (2 Korint 4:4) Ahpw, ahn Sehdan aklapalap pahn imwila suwed, pahn duwehte kaunda en Papilon me imwila suwed.

² Erein Tepil ah wie mihmihseli, kitail pahn pwunodki soangen peidek me duwehte mepwukat. Kitail anahne masak Sehdan? Dahme kahrehda e kin kamwekid aramas akan en kaloke Kristian akan? Iaduwen atail pahn kak dehr mweidong Tepil en powehdi kitail?

Kitail Anahne Masak Tepil?

3, 4. Dahme kahrehda Kristian keidi kan oh iangarail akan sohte kin masak ki Tepil?

³ Mahsen en Sises pwukat kin inenen kakehlailih kapehden Kristian keidi kan me mahsanih: “Ke dehr masak dahme ke nektehn lokolongki. Kilang pwe Tepilo pahn kesehlong nan imweteng ekei kumwail, pwe en song amwail pwoson; oh erein rahn eisek kumwail pahn lokolongki. Ke en loalopwoatohng ie mehnda ma ke mehla, I ahpw pahn kihong uhk nihn en mour soutuk.” (Kaudiahl 2:10) Irail me keidi kan oh iengerail teikan me koapworopworki mour soutuk nan sampah, sohte kin masak Tepil. Sohte masak wet sohte kin kohsang ni lamalam kehlail me pein irail ipwikihdi. Met mih rehrail pwehki irail kin ahneki pepehm en dehr men kansensuwedihala Koht oh eri ‘diar silasil pahn mwetehn nin limwomwi kan.’—Melkahka 34:9; 36:7.

⁴ Sapwellimen Sises Krais tohnpadahk lamalam kehlail akan en mahs kin lelepek lel mehla mendahki kahpwal akan me re lelohng. Irail sohte kin pweiek pwehki arail masak dahme Sehdan kak wia, pwe irail ese me Siohwa sohte pahn likidmeliehla irail akan me kin lelepek ong Ih. Pil duwehte, nan kalokolok apwal akan en ahnsouwet, Kristian me keidi kan oh iengerail akan me pwoson kin koasoanedier teng nan kapehdarail me irail sohte pahn kauwehla arail lelepek ong Koht. Ahpw, wahnpoaron Pohl kadehdehda me Tepil kak kahrehda aramas en mehla. Met soh pahn kamasak kitail?

5. Dahme kitail sukuhliki sang Ipru 2:14, 15?

⁵ Pohl mahsanih me Sises ‘wia-aramasala’ pwe “eh pwoula en kauwehla Tepil, me kakaun mehla, oh pwe en ketin kasaledekihala irail kan me wiewie lidu erein ar mour pwehki ar masak mehla.” (Ipru 2:14, 15) Pwehki Sehdan me kin wia “kaunen mehla,” e pedolong nan kapehden Sudas Iskariot oh mwuri doadoahngki kaunen mehn Suhs akan oh mehn Rom akan pwehn kamatahla Sises. (Luk 22:3; Sohn 13:26, 27) Sang ni sapwellime matala, Sises ketin kasaledekihala tohnsampah dipan akan sang Sehdan pwehn kitail kak alehda mour soutuk.—Sohn 3:16.

6, 7. Ia uwen manaman me Sehdan ahneki ong wia kaunen mehla?

⁶ Ni soangen ahl dah me Tepilo wia kaunen mehla? Eri, sangete nin tepio ahn Sehdan alehda pwukoah en wia me suwed, ah likamw akan oh kaweid akan kahredahr mehla ah miehla rehn tohnsampah. Met pwehki Adam wiahdahr dihp oh eri kadauralahngehr dihp oh mehla lahng peneinei en tohnsampah. (Rom 5:12) Pil patehng met, nein Sehdan ladu kan nan sampah kin kaloke oh pil kemehla irail akan me kin kaudok Siohwa, duwehte dahme re wiahiong Sises Krais.

⁷ Ahpw, kitail en dehr medewehiong me Tepil kak kemehla aramas sohte lipilipil me e men kemehla. Koht kin ketin pere irail oko me sapwellime oh pahn sohte ketin mweidong Sehdan en kasohrala douluhl tohnkaudok mehlel koaros nan sampah. (Rom 14:8) Ni mehlel, Siohwa kin ketin mweidohng kamakam en lelohng sapwellime kan koaros, oh e ketin mweidong mehla en lelohng ekei kitail sang ni ahn Sehdan uhwong kan. Ahpw, Pwuhk Sarawi ketin kasalehda koapworopwor mwahu en iasada ong irail oko me adarail mih nan sapwellimen Koht “pwuhk en kataman”—oh Tepil sohte kak wia douluhl mehkot en irehdi koasoandi en kapwurupwurdong mour wet!—Malakai 3:16; Sohn 5:28, 29; Wiewia 24:15.

Dahme Kahrehda Sehdan kin Kaloke Aramas?

8. Dahme kahrehda Sehdan kin kaloke sapwellimen Koht ladu kan?

⁸ Ma kitail wia sapwellimen Koht ladu lelepek kan, mie kahrepen Tepil eh kin kaloke kitail. Mour en ah doadoahk iei en kaluwetala atail pwoson. Atail ehuong Samatail nanleng wia ire kesempwal mehlel ieu, oh Sehdan kin song en kauwehla. Met sohte pahn wia mehkot kapwuriamwei ong kitail. Nan Ihden, Siohwa ketin kohpadahr me pahn mie kailok nanpwung “lih” karasaraso oh “serpento” oh pil nanpwungen ‘kadaudokara kan.’ (Senesis 3:14, 15) Pwuhk Sarawi kasalehda me Tepil iei ih me “tepin serpent en kawao” oh kasalehda me ah ahnsou mwotomwotalahr oh e lingeringer kowahlap. (Kaudiahl 12:9, 12) Nin doken imwintihti nanpwungen ‘wah’ riau pwukat ah pahn doudoula mwowe, irail oko me kin lelepek ong Siohwa kak kasik ren lelohng kalokolok. (2 Timoty 3:12) Kumwail esehier kahrepen kalokolok me kohsang rehn Sehdan?

9, 10. Tepil pelianda ihs me kahrehda peidek dah pwarada, oh iaduwen atail wiewia ah pid ire wet?

⁹ Tepil kin pelianda Koht ma e sapwellimaniki pwung en kaunda lahng oh sampah. Ong me pid ire wet, Sehdan peidek ma tohnsampah pahn mehlel ong Sounkapikpatail. Sehdan kin kaloke ohl pwung Sohp. Pwekida? Pwehn kauwehla ahn Sohp mehlel ong Siohwa. Ahn Sohp pwoudo oh “soun kamweit likamw” silimeno kin weliwelian koasoandi en Tepil ni ahnsowo. Nin duwen me sansal nan pwuhken Sohp, Tepil uhwong Koht, kose me sohte tohn sampah pahn lelepek ong Koht ma E pahn ketin mweidohng Sehdan en kasonge ih. Ahpw, Sohp kolokol ah lelepek, oh ni ahl wet, e kasalehda me Sehdan likamw men. (Sohp 1:8–2:9; 16:2; 27:5; 31:6) Tepil pil kaloke Sounkadehdehn Siohwa kan nan rahnwet, ni ah kin songosong kauwehla arail lelepek oh kadehde me ih me pwung.

¹⁰ Ni atail esehier me Tepil kin kaloke kitail pwehki e ngoangki en kauwehla atail mehlel ong Koht kak sewese kitail en eimah oh kehlail. (Deuderonomi 31:6) Atail Koht me Kaunepen Lahng oh Sampah, oh e pahn ketin sewese kitail en kolokolete atail lelepek ong Ih. Kitail en kin rapahki en kaperenda kupwuren Siohwa ni atail kin kolokol atail mehlel, oh kihda mehn pasapeng mwahu ong soun karaun likamw Sehdan me Tepil.—Lepin Padahk 27:11.

“Nekid Kiht Sang Me Suwedo”

11. Ia wehwehn pekipek wet, “Komw dehr mweidohng kiht se en kin lelohng nan songosong laud”?

¹¹ Kolokol atail lelepek sohte wia mehkot mengei, e anahne kitail en poaden kapakap. Karasepen kapakap me Sises ketikihda wia elen sawas sang nan mahsenpe kan. Sises mahsanih: “Komw dehr ketin mweidohng kiht se en kin lelohng nan songosong laud, a komw ketin nekid kiht sang ni me suwed en Sehdan.” (Madiu 6:13) Siohwa sohte kin kasonge kitail en wiahda dihp. (Seims 1:13) Ahpw, iren Pwuhk Sarawi kan ekei pak kin kasalehda me e kin ketin wia de kahrehiong mehkan en wiawi, ahpw ni mehlel e kin ketin mweidohng mepwukat en wiawi. (Rud 1:20, 21) Ni atail pahn kin kapakap nin duwen me Sises ketin kaweidki, eri kitail kakehr peki Siohwa en dehr ketin likidmelieikitailla nan ahnsou en songosong. Oh e sohte pahn wiahiong kitail met pwe mie mahsen en kamweit nan Pwuhk Sarawi me mahsanih: “Koht me uhdahn mehlel, oh e sohte pahn ketin mweidohng kumwail en ale songosong me kumwail sohte kak powehdi.”—1 Korint 10:13.

12. Dahme kitail kin kapakapki: “Nekid kiht sang me suwedo”?

¹² Mwurin Sises ah mahsanih duwen kasongosong nan sapwellime karasepen wia kapakapo, e mahsanih: “Nekid kiht sang me suwedo.” Ekei kawehwehn Paipel kin mahsanih: “Nekid kiht sang me suwed.” (King James Version; Revised Standard Version) de “Pere kiht sang nan me suwed.” (Contemporary English Version) Nan iren Pwuhk Sarawi kan, lepin mahsen ‘nekid’ kin kalap doadoahk ong aramas, oh Rongamwahu en Madiu kin mahsanih me wia “Soun Kasongosong.” (Madiu 4:3, 11) Kahrehda, e kesempwal kitail en kapakapki en pere kitail sang “me suwedo,” Sehdan me Tepil. Sehdan kin song en widingei kitail pwe kitail en wiahda dihp ong Koht. (1 Deselonika 3:5) Ni atail kin wia pekipek, “Nekid kiht sang me suwedo,” wasaht kitail kin pekipekih Samatail nanleng en kahluwa kitail oh sewese kitail pwe kitail en dehpa lohdi pahn kasongosong sang Sehdan.

Dehr Mweidohng Tepil en Poweikitaildi

13, 14. Dahme kahrehda mehn Korint kan anahne wekidala arail wiewia ong ohl emen nan arail mwomwohdiso me wiahdahr dihp kasaut ahpw mwuri koluhla?

¹³ Ni ahnsou me Pohl kangoange Kristian akan nan Korint en kin mahkpene, e ntingihdi: “Ma kumwail pahn kin mahkikihong emen mehkot, I pil pahn mahkohng. Pwe ni ei kin mahkohng emen—ma mie kahrepen ei pahn mahkohng—I kin mahkohng pwehki kumwail mwohn silangin Krais, pwe Sehdan en dehr poweikitaildi; pwe kitail esehier duwen eh koasoandi kan.” (2 Korint 2:10, 11) Tepil kak poweikitaildi ni soangsoangen ahl akan, ahpw dahme kahrehda Pohl wia mahsen pwukat me sansal powe?

¹⁴ Pohl kihda kaweid kehlail ong mehn Korint kan pwehki irail mweidohng ohl mour suwed emen en mihmihte nan mwomwohdiso. Irair wet ele inenen kaperenda Sehdan, pwehki keriahpen met mihla pohn mwomwohdiso pwehki arail mweidohng soangen “tiahk me sohte pil kin wiawi rehn me rotorot akan” en mihmi rehrail. Ni imwila, ih me wiewia me sapwungo eri pisikensang nan mwomwohdiso. (1 Korint 5:1-5, 11-13) Mwuri, ohlo eri koluhla. Ma tohn Korint kan kahng mahkohng oh kapwurehdo ohlo, Tepilo pahn powehdi irail nan ehu ahl tohrohr. Iaduwe? Irail pahn lemei oh soh mahk duwehte Sehdan. Ma ohl koluhlao pahn “nsensuwed laudla” oh kesehla mehkoaros ahpw mehlel ma elder kan iang pwukoahki ekei soahng kan edetehn Siohwa Koht ketin mahkohngiher. (2 Korint 2:7; Seims 2:13; 3:1) Ni mehlel, sohte Kristian mehlel emen men alasang Sehdan me kin lemei, serekeileng, oh soh mahk.

Pere Pein Kitail ni Atail Doadoahngki Tehtehn Mahwen Sang Koht

15. Soangen mahwen dah me kitail wiewia, oh dahme pahn kihong kitail kana?

¹⁵ Pwe kitail men pitsang Sehdan, kitail uhdahn anahne wia mahwen en pali ngehn oh pelianda kehl kan sang ngehn suwed kan. Kana nan soangen irair wet kin kohsang atail likoukihda “kapwat en mahwen unsek sang rehn Koht.” (Episos 6:11-18) Kapwat en mahwen wet kin pidada atail kin “perehki mwaremwaratail kan perehpen pwung.” (Episos 6:14) Nanmwarki Sohl en Israel en kawao sapeikiong Koht oh lelohng apwal en pali ngehn laud ehu. (1 Samuel 15:22, 23) Ahpw, ma kitail wia me pwung oh kapwatikihda kapwat unsek en mahwen en pali ngehn, eri kitail pahn ale sapwellimen Koht ngehn sarawi oh mehkan koaros me kitail anahne pwehn pelianda Sehdan oh nah tohnleng suwed akan, me iei ngehn saut akan.—Lepin Padahk 18:10.

16. Iaduwen atail kak kolokolete perepe mwahu sang kehl kan en ngehn suwedo?

¹⁶ Pwehn kolokol ong kitail perepe mwahu sang kehl akan en ngehn suwed akan, kitail anahne wadek oh onop Mahsen en Koht kaukaule, pwerisek wadek pwuhk kan me “ladu lelepek oh loalokong” kin kihda. (Luk 12:42) Kitail eri pahn kadirehkihla atail madamadau mehkan me ngenen oh katapan, me duwehte dahme Pohl kaweidkin kitail mahsanih: “Eri, sapwellimen Koht popohl, me inenen laudsang uwen atail dehdehki, ahpw pahn nekinekid mohngiongimwail oh pil amwail lamalam rehn Krais Sises.”—Pilipai 4:8.

17. Dahme pahn sewese kitail en idipek nan atail lohki Rongamwahu?

¹⁷ Siohwa ketin sewese kitail en “suhtihada kupwur en ngoang en waseli Rongamwahu en popohl.” (Episos 6:15) Kaukaule towehda mihding en Kristian akan kin kaiahne kitail ohng kalohki Rongamwahu en Wehin Koht. Kitail kin diar peren laud ni atail kin sewese meteikan en sukuhliki sapwellimen Koht padahk mehlel oh ale saledek en pali ngehn! (Sohn 8:32) “Kedlahs en ngehn sarawi, iei Mahsen en Koht,” kin inenen kesempwal pwehn kihweisang padahk likamw akan oh “kamwomwala mehkan me tengala.” (Episos 6:17; 2 Korint 10:4, 5) Doadoahngki pwung Mahsen en Koht, me iei Paipel, kin sewese kitail en padahkiong aramas padahk mehlel oh pere kitail sang pwupwudiong pahn widing en Sehdan akan.

18. Iaduwen atail pahn kak “kesihnenda teng oh pelianda kehlail widing kan en Tepil”?

¹⁸ Pohl tepikihda ah kawehwehpen tehtehn mahwen en Koht ni ah mahsanih: “Eri, kumwail kehlailkihda amwail miniminiong Kauno oh manaman en sapwellime roson. Kumwail pwuhriong nan tehtehn mahwen koaros me Koht ketikihong kumwail, pwe kumwail en kak kesihnenda teng oh pelianda kehlail widing kan en Tepil.” (Episos 6:10, 11) Lokaiahn Krihk me kawehwe “kesihnenda teng” kin pidada ahn sounpei men ah mihmihte nan dewe. Kitail kin mihmi nan dewetail nan mahwen en pali ngehn, edetehn Sehdan a kin doadoahngki soangsoangen widing kan pwe en kauwehla atail miniminpene, kauwehla atail padahk kan, de pil kauwehla atail lelepek ong Koht. Ahpw, lel met, ahn Sehdan elen kalokolok kan saikinte pweida—oh re sohte pahn pweida!a

Pelianda Tepil, E Ahpw Pahn Tangasang Uhk

19. Ia ehu ahl en pelianda Tepil?

¹⁹ Kitail kak kana nan atail mahwen en pali ngehn ong Tepil oh kehl en ngehn suwed akan me mih pahn ah kaweid. Sohte kahrepen kitail en masak Sehdan pwe tohnpadahk Seims ntingihdi: “Kumwail peikiong Koht, oh pelianda Tepil, e ahpw pahn tangasang kumwail.” (Seims 4:7) Ehu ahl en pelianda Sehdan oh ngehn suwed akan me kin iang ih iei kitail en dehr iang wia mehkot me pidada wunahni oh dehr patehng irail akan me kin wia mehpwukat. Iren Pwuhk Sarawi kan kasalehda mwahu me sapwellimen Siohwa ladu kan en dehr kilang kilel akan de usu de mesenlahng kan pwe en wia keseu, oh dehr wunahni. Ma kitail kin kehlail ni pali ngehn oh pwerisek, kitail sohte anahne masak me aramas emen pahn wie wunahni ong kitail.—Nempe 23:23; Deuderonomi 18:10-12; Aiseia 47:12-15; Wiewia 19:18-20.

20. Iaduwen atail kak pelianda Tepil?

²⁰ Kitail kak “pelianda Tepil” sang ni atail kin tengediong atail kapwaiada kaweid kan en Paipel oh padahk mehlel akan oh kesihnenda teng nan atail pelianda ih. Sampah kin miniminiong Sehdan pwehki ih iei ah koht. (2 Korint 4:4) Kitail en dehr iang wia tiahk kan en sampah me duwehte aklapalap, roporop, tiahk samin, lemei, oh noahrok kepwe. Kitail ese me Tepil tangasang Sises ni ah pelianda ih ni ah doadoahngki iren Pwuhk Sarawi kan nan sapwtehno. (Madiu 4:4, 7, 10, 11) Pil duwehte, Sehdan pahn ‘tangasang kitail’ ma kitail kin peikiong Siohwa ni mehlel oh ni kapakap kehliki Ih. (Episos 6:18) Sang ni utuht en Siohwa Koht oh sapwellime Ohl, sohte aramas emen kak kauwekitailla douluhl, Tepil pil sohte kak!—Melkahka 91:9-11.

[Nting tikitik me mi pah]

Iaduwen Ahmw Pahn Sapeng?

• Kitail uhdahn anahne masak Sehdan me Tepil?

• Dahme kahrehda Sehdan kin kaloke Kristian akan?

• Dahme kahrehda kitail kin peki ni kapakap kitail en pitsang “me suwedo”?

• Iaduwen atail kak pweida nan atail mahwen en pali ngehn?

[Kawehwehpen kilel kan nan ehu ehu pali 8]

Sapwellimen Krais tohnpadahk kan me nan kapehd kehlail kin kasalehda mwahu arail lelepek lel mehla

[Kawehwehpen kilel kan nan ehu ehu pali 9]

Tepil sohte kak irehdi iasadahn irail oko me pato nan sapwellimen Siohwa kataman

[Kawehwehpen kilel kan nan ehu ehu pali 10]

Ke kin kapakapki ken pitsang “me suwedo”?

[Kawehwehpen kilel kan nan ehu ehu pali 11]

Ke kin kapwatkihda “tehtehn mahwen unsek en Koht”?