Kaukaule Kasalehda Kamwahu

“Pwe iei wahn marain mepwukat: soangen mwahu koaros, soangen pwung koaros, oh soangen mehlel koaros.”​—EPISOS 5:9.

1. Iaduwen aramas rar kei nan rahnwet kin kasalehda me re kin pwungki dahme Melkahka 31:19 mahsanih?

WIEWIA ehu me keieu mwahu me aramas akan pahn kak wia iei en kapinga Siohwa. Rahnwet, aramas rar kei kin wia met sang ni ahr kin kapingahki Koht sapwellime kamwahu. Nin duwen sapwellimen Siohwa Sounkadehde lelepek kan, kitail kin pwungki, sang nan mohngiongatail unsek, dahme sounmelkakaho koulki: “Meid kapwuriamwei soangen mwahu kan, me komwi ketin nekinekidohng irail me kin wauneki komwi!”​—⁠Melkahka 31:19.

2, 3. Dahme pahn kak wiawi ma atail tiahk kan sohte kin pahrekihong atail doadoahk en katohnpadahk?

² Lemmwin Siohwa kin kamwekid kitail en kapinga Ih pwehki sapwellime kupwur mwahu. E pil kin kamwekid kitail en ‘kapinga Siohwa, kasapahlkalahngan ong Ih, oh koasoia duwen lingan en sapwellime wehi.’ (Melkahka 145:10-​13) Ihme kahrehda, kitail kin ngoangki kalohki Rongamwahu en Wehin Koht oh iang doadoahk en katohnpadahk. (Madiu 24:14; 28:19, 20) Ahpw, kitail anahne en tiahk mwahu pwehn kak pahrekiong atail doadoahk en kalohk. Pwe ma kitail sohte pahn wia met, kitail pahn kak kasaminehla mwar sarawi en Siohwa.

³ Aramas tohto dene me re kin kaudokiong Koht, ahpw arail wiewia kan sohte kin pahrekiong koasoandi kan me mih nan sapwellime Mahseno. Wahnpoaron Pohl nting ohng ekei aramas me sohte kin kapwaiada dahme re dene me re kin wiewia: “Ke kin padahkih meteikan, a dahme ke sohte pil padahkihki pein kowe? Ke kin nda “Dehr pirap,” a ia duwe, ke sohte kin pirap? Ke pil kin nda, “Dehr kamwahl” a ia duwe, ke sohte kin kamwahl? . . . ‘Pwe Pwuhk Sarawi mahsanih, “Pwehki kumwail mehn Suhs akan me mwaren Koht wiemwahlkilahr rehn mehn liki kan.”​—Rom 2:21, 22, 24.

4. Dahme pahn wiawi ma kitail kin kaukaule kasalehda tiahk mwahu?

⁴ Kitail sohte men kauwehla mwaren Siohwa, eri kitail kin nantihong en kalinganahda mware sang atail tiahk mwahu kan. Met pahn kak kamwekid madamadau kan en aramas me mih likin mwomwohdiso en Kristian pwe re en ahneki madamadau mwahu kan me pid mwaren Koht oh mwomwohdiso en Kristian. Ehu, e kin sewese kitail en katokehdi ngihl en aramas akan me kin uhwong kitail. (1 Piter 2:15) Ahpw, keieu kesempwal, atail tiahk mwahu kan kin kahrehong aramas akan en men iang sapwellimen Siohwa pwihn, oh met pahn ritingada ong irail ahl en kalinganahda Ih oh ale mour soutuk.​—Wiewia 13:48.

5. Mehnia peidek kan kitail anahne en koasoiapene ni ahnsouwet?

⁵ Pwehki kitail aramas soh-unsek, iaduwen kitail kak liksang wiewia kan me pahn kak kauwehla mwaren Siohwa oh pil liksang wiewia kan me pahn kadipekelekelih aramas akan me kin rapahki padahk mehlel? Iaduwen kitail kak pweida ni atail kin kasalehda kamwahu?

Wahn Maraino

6. Ia ekei “wiewia tiahk en rotorot,” ahpw wah dahieu anahne en sansalda rehn Kristian akan?

⁶ Nin duwen Kristian akan me inoukihong Koht arail mour, kitail kin paiekihda mehkot me kin sewese kitail en liksang “wiewia tiahk en rotorot.” Met kin pidada wiewia kan me kin kasaminehla mwaren Koht, duwehte: likamw, pirap, lokaia kamedek kan, koasoi samin kan me pid dipen nenek, tiahk samin kan, kamwan suwed, oh kamamsakau. (Episos 4:25, 28, 31; 5:3, 4, 11, 12, 18) Kitail sohte kin iang wiewia pwukat, ahpw ‘kitail en kin mourki mouren aramas marain.” Wahnpoaron Pohl mahsanih: “Pwe iei wahn marain mepwukat: soangen mwahu koaros, soangen pwung koaros, oh soangen mehlel koaros.” (Episos 5:8, 9) Ma kitail pahn mourki mouren aramas marain, met pahn kak sewese kitail en kaukaule kasalehda kamwahu. Ahpw soahngen marain dah kei met?

7. Dahme kitail anahne wia ma kitail men kaukaule kasalehda wahn kamwahu?

⁷ Mendahki kitail soh-unsek kan, kitail kak kasalehda kamwahu ma kitail kin kekeid nan marain en pali ngehn. Sounmelkahkao koulki met: “Sapwellimomwi mahsen, iei serepei, mehn kaweid ie, oh kamarainpen elei kan.” (Melkahka 119:105) Ma kitail men kaukaule kasalehda “wahn maraino” sang “soahngen mwahu koaros,” kitail anahne ahnsou koaros en isaneki marain en pali ngehn me kin dierek nan Mahsen en Koht, oh nan neitail pwuhken Kristian kan me kin kawehwehda duwen marain wet ni oaritik, oh kin ahnsou koaros pwarada nan atail mihding en kaudok kan. (Luk 12:42; Rom 15:4; Ipru 10:24, 25) Kitail pil anahne nsenohki mehn kahlemeng mwahu kan oh padahk kan en Sises Krais, iei “marain me mih nin sampah wet” oh “lingan en [Siohwa] kin dakedaker.”​—Sohn 8:12; Ipru 1:1-3.

Wahn Ngehn

8. Dahme kahrehda kitail kak kasalehda kamwahu?

⁸ E sansal mwahu me marain en pali ngehn kin sewese kitail en kasalehda kamwahu. Oh pil, kitail kak kasalehda irair wet pwehki kitail kin mweidong sapwellimen Koht ngehn sarawi, de manaman, en kahrekitailla. Kamwahu kin wia kisehn “wahn ngehn akan.” (Kalesia 5:22, 23) Ma kitail kin mweidohng sapwellimen Siohwa ngehn sarawi en kaweid oh kahre kitail, e pahn sewese kitail en kasalehda wahn ngehn kaselel iei irair en kamwahu.

9. Iaduwen kitail kak kapwaiada mahsen en Sises me ntingihdi nan pwuhken Luk 11:9-​13?

⁹ Atail ineng en men kaperenda Siohwa sang ni atail kin men kasalehda wahn ngehn en kamwahu, pahn kamwekid kitail en kapwaiada mahsen en Sises: “Kumwail peki, e ahpw pahn kohieng kumwail; kumwail rapahki, kumwail ahpw pahn diar; kumwail letelet, e ahpw pahn ritidahng kumwail. Pwe koaros me kin peki pahn ale; oh me kin rapahki, kin diar; oh me kin letelet, e pahn ritidahng. Mie rehmwail sahm emen, me ni nah seri men eh pahn peki kene kisin mwomw, e ahpw pahn kihong sineik? De ni eh peki kene kutohr, e ahpw pahn kihong [skorpian]? Eri, mehnda ma kumwail aramas sapwung kei, a kumwail ese kihong noumwail seri kan dahme mwahu ong irail. Eri, Samamwail me ketiket nanleng soh pahn ketikihong ngehn sarawi irail kan me kin peki reh!” (Luk 11:9-​13) Kitail en kapwaiada kaweid en Sises ni atail kin kapakapki sapwellimen Siohwa ngehn pwehn sewese kitail en kaukaule kasalehda wahn kamwahu.

“Kaukaule Wia Dahme Mwahu”

10. Ia ekei irair akan en sapwellimen Siohwa kupwur mwahu kan me ntingihdi nan pwuhken Eksodus 34:6, 7?

¹⁰ Ki marain en pali ngehn me kin pwilsang rehn Mahsen en Koht oh pil sawas sang rehn sapwellimen Koht ngehn sarawi, kitail kak “kaukaule wia dahme mwahu.” (Rom 13:3, New World Translation) Sang ni atail kin kaukaule onop Paipel, kitail kin kalaudehla atail sukuhliki iaduwen kitail kak kahlemengih sapwellimen Siohwa kupwur mwahu. Artikel en mwowe koasoiada duwen irair akan en sapwellimen Koht kupwur mwahu me mih nan audepen mahsen en Koht ong Moses me ntingihdi nan pwuhken Eksodus 34:6, 7: “Siohwa, Siohwa, Koht emen me diren mahk-kalahngan oh kadek, me sohte kin mwadang lingeringerda, oh me diren limpoak-kadek oh direki padahk mehlel, kolokolte oh kasalehda limpoak-kadek ong aramas kid kei, kin mahkohng me suwed kan oh me dipan akan, ahpw e uhdahn pahn kalokehki seri kan oh nein neirail kan lel ni dih kesiluh oh kapahieu pwehki dipen samarail kan.” Ma kitail pahn kasawihada mwahu irair pwukat en sapwellimen Siohwa kupwur mwahu, eri met pahn kak sewese kitail en “kaukaule wia dahme mwahu.”

11. Pwehki kitail kin wehwehki me Siohwa kin kasalehda mahk-kalahngan oh kadek, e pahn kamwekid kitail en wia dah?

¹¹ Mahsen wet kin kohsang rehn Koht oh padahkiong kitail duwen kesempwalpen atail en kahlemengih Siohwa ni atail kin kasalehda mahk-kalahngan oh kadek. Sises mahsanih, “Meid pai me kin [mahk-kalahngan], pwe re pahn diar mahk.” (Madiu 5:7; Luk 6:36) Atail kin wehwehki me Siohwa kin kadek pahn kamwekid kitail en pil kadek ong aramas teikan, pil irail akan me kitail kin kalohk ong. Met kin pahrekiong kaweid en Pohl: “Amwail koasoi mwohn aramas en katapan oh kansenamwahu; oh kumwail uhdahn pahn ese duwen amwail pahn sapeng koaros ni pwung.”​—Kolose 4:6.

12. (a) Pwehki Koht sohte kin mwadang lingeringerda, ia mwomwen atail wiewia ong meteikan? (b) Dahme sapwellimen Siohwa limpoak-kadek kin kamwekid kitail en wia?

¹² Pwehki Koht sohte kin mwadang lingeringerda, atail inengieng en “kaukaule wia dahme mwahu” pahn sewese kitail en kanengamahiong iengetail pwoson akan ahnsou me re kin wia sapwung tikitik kan oh nantiong en medemedewe duwen arail irair mwahu kan. (Madiu 7:5; Seims 1:19) Sapwellimen Siohwa limpoak-kadek kin kamwekid kitail en kasalehda limpoak, mendahki kitail kin lelohng kasongosong laud kan. Ni mehlel, met kin wia mehkot me kitail kin inenen inangih.​—Lepin Padahk 19:22.

13. Dahme kitail anahne en wia ma kitail men kasalehda me kitail men kaperenda Siohwa me kin ‘direki padahk mehlel’?

¹³ Pwehki Samatail nanleng me ‘direki padahk mehlel,’ kitail kin nantiong en ‘kasalehda ni mehkoaros me [kitail] kin wia, me [kitail] ladun Koht kei ni atail kin lokaia mehlel.’ (2 Korint 6:3-7) Kisehn irair suwed isuh me Siohwa kin ketin kalahdeki mehlel, iei mehkan: “au likamw” oh “sounkadehde me kin kalap lokaia likamw.” (Lepin Padahk 6:16-​19) Kahrehda, atail ineng en men kaperenda Koht kin kamwekid kitail en ‘kesehla likamw akan, oh emenemen [kitail] en kin lokaia mehlel.’ (Episos 4:25) Ahnsou koaros kitail en kasalehda kamwahu ni ahl kesempwal wet.

14. Dahme kahrehda kitail anahne en mahk ohng aramas teikan?

¹⁴ Sapwellimen Koht mahsan kan ong Moses pil anahne kamwekid kitail en mahk ohng aramas teikan, pwe Siohwa kin ahnsou koaros onopada pwehn kasalehda mahk. (Madiu 6:14, 15) Ahpw, Siohwa pahn kadeikada aramas akan me sohte kin koluhla mehlel. Kitail anahne utungada sapwellime koasoandi kan en kupwur mwahu ni ahnsou e kin pid kolokolete mwakelekel ni pali ngehn en mwomwohdiso.​—Lipai 5:1; 1 Korint 5:11, 12; 1 Timoty 5:22.

“Kumwail Kanahieng Duwen Amwail Mour me Kumwail kin Weweidki”

15, 16. Iaduwen sapwellimen Pohl kaweid me ntingihdi nan pwuhken Episos 5:15-​19 kin sewese kitail en nantihong kasalehda irairen kamwahu?

¹⁵ Ma kitail men pousehla kasalehda kamwahu mendahki irair suwed akan me kin kapilpene kitail, kitail anahne audaudkihda sapwellimen Koht ngehn sarawi oh kanahieng duwen atail mour me kitail kin weweidki. Ihme kahrehda, Pohl kangoange irail Kristian akan nan Episos: “Eri, kumwail kanahieng duwen amwail mour me kumwail weweidki. Kumwail dehr duwehte aramas me loalopwon kan, ahpw kumwail duwehla me loalokong kan. Kumwail isaneki ahnsou mwahu koaros, pwe ahnsou pwukat ahnsou suwed kei. Kumwail dehr pweipwei, a kumwail song rapahki dahme Kauno ketin kupwukupwure kumwail en kin wia. Kumwail dehr kin sakaukihla douluhl wain, pwe e pahn kaweikumwailla; a kumwail en kin direkihla ngehn sarawi. Kumwail sawaskipene mahsen en koulen kaping kan, melkahka oh koul sarawi kan; kumwail koulki melkahka ong Kauno, kapikapinga nan kapehdamwail kan.” (Episos 5:15-​19) Ni imwin rahn suwed akan, kaweid wet inenen konehng ong kitail.​—2 Timoty 3:1.

¹⁶ Ma kitail men kaukaule kasalehda kamwahu, kitail anahne kanahieng duwen atail mour me kitail weweidki oh doadoahngki erpit me kohsang Koht. (Seims 3:17) Kitail anahne liksang dihp laud kan oh audaudkihda ngehn sarawi, oh mweidong ngehn sarawi en kahre kitail. (Kalesia 5:19-​25) Kitail pahn kak wia dahme mwahu ma kitail pahn kapwaiada kaweid ni pali ngehn me kohsang mihding en Kristian akan oh kapokon kan. Mahsen kan en Pohl ong mehn Episos kan pil pahn katamankinkitail me nan pali laud en ahnsou me kitail kin pokonpene ong kaudok, kitail kin paiekihda sang atail kin koulki “melkahka ngehnen kan”​—oh koul tohto kin pid irair akan en pali ngehn duwehte irairen kamwahu.

17. Dahme irail Kristian akan me ahneki soumwahu laud oh sohte kak kaukaule iang towehda mihding kan kak kamehlele oh likih?

¹⁷ Ahpw, iaduwen iengetail pwoson akan me sohte kak kaukaule iang towehda mihding en Kristian akan pwehki soumwahu laud? Mwein irail kin loaltikla pwe irail sohte kak ahnsou koaros iang riarail brother oh sister kan ni pali ngehn en kaudokiong Siohwa. Ahpw, irail kak likih me Siohwa kin ketin mwahngih duwen kahpwal akan me re kin lelohng, oh E pahn sewese irail en mih nan padahk mehlelo, ketikihong irail sapwelliime ngehn sarawi, oh sewese irail en pousehla wiewia dahme mwahu.​—Aiseia 57:15.

18. Dahme pahn sewese kitail en nantihong wia dahme mwahu?

¹⁸ Nannanti en wiewia dahme mwahu kin wehwehki me kitail anahne en kanahieng ihs me kitail pahn werekiong oh soikala irail akan me kin “kailongki dahme mwahu.” (2 Timoty 3:2-5; 1 Korint 15:33) Ma kitail pahn kapwaiada kaweid wet, e pahn sewese kitail en “dehr kasensuwedihada sapwellimen Koht ngehn sarawi” oh dehr uhwong e sawas de kaweid kan. (Episos 4:30) Oh pil, kitail kin ale sawas en wia dahme mwahu ma kitail pahn karanih aramas akan me kin kasalehda sang arail mour me re kin poakohng dahme mwahu oh kin mweidong sapwellimen Siohwa ngehn sarawi en kahrehirailla.​—Eimwos 5:15; Rom 8:14; Kalesia 5:18.

Irairen Kamwahu kin Kahrehda Imwila Mwahu kan

19-21. Kawehwehda duwen imwila mwahu kan me kohsang kasalehda kamwahu ong aramas teikan.

¹⁹ Ma kitail pahn weweid nan marain ni pali ngehn, oh kapwaiada kaweid en sapwellimen Koht ngehn sarawi, oh kanahieng duwen atail mour me kitail kin weweidki, eri, mehpwukat koaros pahn sewese kitail en liksang dahme suwed oh “kaukaule wia dahme mwahu.” Met pahn kak kahrehda imwila mwahu kan. Menlau tehk duwen irair me lelohng Zongezile, emen Sounkadehdehn Siohwa nan South Africa. Ni menseng ehu, mwohn e kohla sukuhl, e men tehk nah kisin mwohni me mih nan pangk. Doaropwe me kohsang misihn me kihiei mwohni kasalehda me mwohni me nan nah pwuhken pangk me R42,000 ($6,000, U.S.) oh e wehwehki me met sapwung pwe uhdahn nah mwohni me mihmi nan pangk me tikitik. Aramas emen me kin sinsile pangko, iangahki aramas teikan, kangoange ih en kihsang mwohni wet oh uhd kihong nan ehu pangk tohrohr. Ihte pwopwoud en Sounkadehde me e kin kousoanla reh me kapinga ih pwe e sohte kihsang mwohni wet.

²⁰ Ni tepin rahn me pangk pahn pwurehng ritidahng doadoahk, Zongezile padahkiong irail akan me kin doadoahk nan pangko duwen sapwungo. Re diarada me nempe en nah pwuhken pangk ekis duwehte emen ohl en pisnes kepwehpwe me sapwungala kihong nah mwohni nan nempe en pwuhken pangk me kaidehn nah. Ohl en pisnes menet pwuriamweikihla pwe Zongezile sohte doadoahngkihla mwohni wet, oh e idek reh: “Mehnia pelien lamalam me ke kin iang?” Zongezile kawehwe ong ohlo me ih emen Sounkadehdehn Siohwa kan. Kaun akan en pangk wet kapinga ih oh koasoia: “Se men aramas koaros en duwehte Sounkadehdehn Siohwa kan.” Ni mehlel, wiewia mehlel kan oh kamwahu pahn kak kahrehong aramas teikan en kapinga Siohwa.​—Ipru 13:18.

²¹ Wiewia mwahu en kamwahu sohte anahne en wia mehkot me laud pwehn kamwekid madamadau en aramas teikan. Karasepe ieu: Sounkadehde pwulopwul emen me kin papah nin duwen emen sounkalohk kaukaule nan ehu dekehn Samoa, anahne kohla ni imwen wini. Aramas akan awiawih pwehn tuhwong toahkte, oh Sounkadehde menet kilangada me emen lih laud me mwohndi limwah me inenen soumwahu. E koasonehdi pwe liho en uhd wiliandi ih pwe liho kak mwadang tuhwong toahkte. Ehu ahnsou mwurin rahno, Sounkadehde menet tuhwong lih laudo nan wasahn netikihla uduk. Lih menet tamanda ih oh wiewia mwahu me e wia ong ih nan imwen wini. E koasoia, “Met I ese me Sounkadehdehn Siohwa kan kin poakohng mehn mparail kan ni mehlel.” Ni mehlel, mwohn rahno me re tuhpene nan imwen wini, lih menet sohte kin perenki rong Rongamwahu en Wehio, ahpw wiewia mwahu en Sounkadehde menet imwikihla mwahu. E pwungkihda en onop Paipel oh tepida sukuhliki loalokong pwung me kohsang Mahsen en Koht.

22. Ia ehu ahl me kesempwal en “kaukaule wia dahme mwahu”?

²² Ke pil kak koasoia duwen imwila mwahu kan me kin kasansalehda duwen kesempwalpen kasalehda kamwahu. Ehu ahl kesempwal pwen sewese kitail en “kaukaule wia dahme mwahu” iei en kaukaule iang kalohkiseli Rongamwahu en Wehin Koht. (Madiu 24:14) Kitail en ngoangki iang wia doadoahk kesempwal wet, pwe kitail wehwehki me met kin wia ahl ehu en wia dahme mwahu, keieu ong irail akan me kin mwekidkihda padahk mehlelo. Keieu kesempwal, atail doadoahk en kalohk oh tiahk mwahu kin kapinga Siohwa, me kin wia utupen kupwur mwahu.​—Madiu 19:16, 17.

Kaukaule “Wia Dahme Mwahu”

23. Dahme kahrehda doadoahk en Kristian doadoahk mwahu ieu?

²³ E sansal me atail doadoahk en kalohk kin wia doadoahk mwahu ieu. E kak imwikihla atail kak ale mour soutuk iangahki irail akan me kin rong Rongamwahu en Paipel oh sewese irail en kekeid nan ahl me pahn kahluwairaillang mour soutuk. (Madiu 7:13, 14; 1 Timoty 4:16) Ni ahnsou me kitail anahne wiahda atail pilipil kan, atail kin perenki wia dahme mwahu pahn kamwekid kitail en idek rehtail peidek pwukat: ‘Iaduwen ai pilipil wet a pahn imwila ong ahi doadoahk en kalohki Wehio? Dahme I pilahn en wia​—⁠e pahn katapan ong ahi mour? Ai pilipil pahn sewese ie en sewese meteikan en rong oh mwekidki “Rongamwahu poatopoat” oh karanih Siohwa Koht?’ (Kaudiahl 14:6) Peren laud pahn kohsang pilipil ieu me kin utungada koasoandi me pahn mweidong kitail ahnsou laud ong mehkan me pid Wehio.​—Madiu 6:33; Wiewia 20:35.

24, 25. Ia ekei ahl akan en wiahda me mwahu nan mwomwohdiso, oh dahme kitail kak likih ma kitail pahn kaukaule wia dahme mwahu?

²⁴ Kitail en dehr mwamwahleki kapai kan me kin kohsang irairen kamwahu. Kitail kak kaukaule kasalehda irair wet sang ni atail kin utungada koasoandi en mwomwohdisohn Kristian oh nsenohki riatail kan. Kitail kin wia dahme mwahu ni ahnsou me kitail kin kaukaule iang towehda mihding en Kristian akan oh iang pasepeng kan. Atail kaukaule iang towehda mihding kan kin wia mehn kangoang laud ong iengetail tohnkaudok akan, oh pasepeng kan me kitail kin kaunopada mwahu oh wia kin pil kakehle irail. Kitail pil kin wiahda me mwahu ni ahnsou me kitail kin doadoahngki neitail mwohni kan ong anahn akan en Kingdom Hall oh ni ahnsou kitail kin apwaliahda mwahu. (2 Nanmwarki 22:3-7; 2 Korint 9:6, 7) Ni mehlel, “nin dokon eh mie atail ahnsou, kitail en wia mwahu ong aramas koaros; ahpw mehlel ong irail kan me kisehn atail pwoson.”​—Kalesia 6:10.

²⁵ Kitail sohte kak wehwehki iahd me soangen irair kan pahn pwarada me kitail pahn anahne kasalehda kamwahu. Ni ahnsou me kahpwal kapw kan pahn pwarada nan atail mour, kitail en rapahki sawas sang Pwuhk Sarawi, kapakapki sapwellimen Siohwa ngehn sarawi, oh wia uwen me kitail kak en kapwaiada sapwellime kupwur mwahu oh unsek. (Rom 2:9, 10; 12:2) Kitail kak likih me Siohwa pahn ketin kapaiada kitail ni unsek nin duwen kitail kin nantihong wia dahme mwahu.

Iaduwen Ke Pahn Sapeng?

• Iaduwen kitail kak wia dahme keieu mwahu ong meteikan?

• Dahme kahrehda irairen kamwahu kin adanekihla ‘wahn maraino’?

• Dahme kahrehda irairen kamwahu kin adanekihla ‘wahn ngehn akan’?

• Atail tiahk mwahu kan kin imwikihla dah?

[Kilel nan Pali 17]

Mahsen en Koht oh sapwellime ngehn sarawi kin sewese kitail en kasalehda kamwahu

[Kilels nan Pali 18]

Kasalehda kamwahu kin imwila mwahu