Pere Iuk Sang Widing

“Kumwail kanahieng pwe emen de pitihkinkumwaildi loalokong widing mwahl en aramas akan.”​—KOLOSE 2:8.

1-3. (a) Karasepe dah kan me kin kasalehda me likamw oh widing reklahr ni mehkan koaros nan atail mour en ehuehu rahn? (b) Dahme kahrehda kitail en dehr pwuriamweiki likamw oh widing en sampah wet?

“MEH depe nanpwungamwail me saikinte aramas emen me kohdohn repen sawas en kosonned rehmw oh pitih iuk?” Nan pahr kei samwalahro, emen soun semenih kosonned wia roporop ehu ni a idek peideko. Ia pasapeng me e alehdi? E kawehwehda: “Sang nanpwungen sounsawas en kosonned kid kid kei, emente me nda me saikinte emen aramas me repen sawas en kosonned reh pitih ih.” Pwekihda? “Pwehki sounsawas menet ahpwtehn tepida doadoahk nan wasahn sawas en kosonned laud ehu oh e saikinte koasoiong emen me anahne sawas.” Met kin kasalehda ire mehlel kansensuwed ehu​—⁠likamw oh widing inenen rek nan sampah rahnwet.

² Widing kin pwarada nin mwohmw tohto ahpw doulahng kerenieng mehkoaros nan mour en rahnwet. Ripoht en nuhs kan kin dirkihla karasepen widing kan​—pwihn en politik kan kin wiahda koasoi likamw kan duwen arail wiewia kan, soun accounting oh sounsawas en kosonned kan kin kalaudehla wihn en pisnis kan, pwihn en advertize kan kin pitihdi soun netinet kan, irail pwihn en repen sawas en kosonned akan kin pitihedi kompani en insurens kan, ahpw met ekeite me sansaldahr. Oh pil, mie widing kan nan sarawi. Sounpadahk en sarawi kan kin pitihdiki tohnsarawi kan padahk likamw akan duwehte padahk me nda me soul sohte kak mehla, ehl, oh padahk en Trinity.​—2 Timoty 4:3, 4.

³ Iaduwen​—⁠kitail pahn pwuriamweikihla widing pwukat? Soh. Me pid “imwin rahn akan,” Paipel mahsanih: “Aramas suwed oh me likamw akan pahn nantihweite sang ni me suwed ong ni me suwedsang; re pahn pitipitihete meteikan, oh pein irail pahn pitida.” (2 Timoty 3:1, 13) Nin duwen Kristian kei, kitail anahne en pehmitikiong soangen lamalam likamw akan me kak kahrehong kitail en sohpeiweisang me mehlelo. Peidek riau me kak pwarada: Dahme kahrehda widing inenen rek rahnwet, oh iaduwen kitail kak kaleke kitail pwe kitail dehr pitida pahn likamw kan?

Dahme Kahrehda Likamw oh Widing Inenen Rek Rahnwet?

4. Dahme Paipel kawehwehda duwen kahrepen likamw oh widing ah inenen rek nan sampah wet?

⁴ Paipel kin kawehwehda ni sansal kahrepen widing oh likamw kin inenen rek nan sampah rahnwet. Wahnpoaron Sohn ntingihdi me “sampah pwon mih pahn manaman en Me Suwedo.” (1 Sohn 5:19) “Me Suwedo” iei Sehdan me Tepil. Me pid Sehdan, Sises mahsanih: “E sohte kin miniminiong me mehlelo, pwehki me mehlelo sohte mi reh. Ni ahnsou me e kin koasoia likamw, e kin wiewiahte me e ahnlahr, pwehki ih likamw men, oh pil semen soangen likamw koaros.” E soh sohte kapwuriamwei me iei sampah wet kin kasalehda ngehnohte, kesempwaliki soangohte, oh pil kasalehda soangen irair kohte me kaunen sampah wet kin ahneki?​—Sohn 8:44; 14:30; Episos 2:1-3.

5. Iaduwen Sehdan ah kin kalaudehla ah likamw oh widing kan nan ahnsou en imwi wet, oh ihs me e kin keieu rapahki en kauwehla?

⁵ Nan imwin rahn pwukat, Sehdan kin nanti laudsang mahso. E piskendihdohngehr sampah. E wehwehki me ah ahnsou mwotomwotlahr, oh met kin kahrehong en “lingeringer kowahlap.” E kin koasoanehdi teng en kauwehla uwen aramas tohto me e kakong, sang ni ah kin “pitipitih sampah pwon.” (Kaudiahl 12:9, 12) Sehdan sohte kin pitih aramas akan ekei pakte. Ahpw, e sohte kin uhdi de wawaila ni a kin songosong en pitih aramas akan.a E kin doadoahngki elen widing koaros​—me iangahki pitihdi aramas oh mwersuwed​—en karotongehla madamadau en irail mehn liki kan oh koliraildi sang Koht. (2 Korint 4:4) Semen widing menet kin keieu mwahuki kauwehla irail akan me kin kaudokiong Koht “ni ngehn oh mehlel.” (Sohn 4:24; 1 Piter 5:8) Dehr manokehla me Sehdan dene met: ‘I kak kasohpeiwei sohte lipilipil emen sang rehn Koht.’ (Sohp 1:9-​12) Kitail tehk ekei en Sehdan “elen widing kan” oh iaduwen kitail kak pereikitailsang mepwukat.​—Episos 6:11, Jewish New Testament.

Pere Kitail Sang Widing me Kohsang Irail me Kin Lahlahwe Padahk Mehlel

6, 7. (a) Dahme irail me mahs iang sapwellimen Koht pwihn ahpw met lahlahwe padahk mehlel kin nda? (b) Iaduwen iren Paipel kan kin kasalehda duwen dahme irail me lahlahwe padahk mehlel kin mwahuki?

⁶ Ahnsou reirei Sehdan kin doadoahngki irail akan me mahs iang sapwellimen Siohwa pwihn ahpw me lahlahwe padahk mehlel pwe irail en kin kesehdi sapwellimen Siohwa ladu kan. (Madiu 13:36-​39) Irail me lahlahwe padahk mehlel ele kin nda me irail kin kaudokiong Koht oh kamehlele Paipel, ahpw re kin soikala sapwellime pwihn sansal. Ekei ele pwurehng padahk likamw kan en “Papilon Lapalap,” minimin en kaudok likamw akan koaros. (Kaudiahl 17:5; 2 Piter 2:19-​22) Koht kamwekid irail soun nting en Paipel kan en doadoahngki lokaia kehlail kan me pahn kasalehda dahme irail me lahlahwe padahk mehlel kin mwahuki oh arail elen widing kan.

⁷ Dahme irail me lahlahwe padahk mehlel kin mwahuki? Pali laud en irail sohte itarki en uhdahte pidoisang nan pwoson me irail mahs kin kamehlele. Pak tohto, irail pil kin mwahuki wahda ekei en iang irail. Irail sohte kin kohla oh rapahki pein iengerail kan ahpw me tohto kin “songosong pwe irail tohnpadahk kan [sapwellimen Krais tohnpadahk kan] en idawehnirailla.” (Wiewia 20:29, 30) Me pid sounpadahk likamw akan, wahnpoaron Pohl wia kehkehlik karuwaru wet: “Kumwail kanahieng pwe emen de pitihkinkumwaildi loalokong widing mwahl en aramas akan.” (Kolose 2:8) Met soh kin kawehwehda dahme irail me lahlahwe padahk mehlel kin songosong en wia? Duwehte emen me kin tangahki aramas emen me sohte kin kasik me emen pahn tangahkihsang ah peneinei, irail me lahlahwe padahk mehlel​—⁠me wehwehki irail me mahs kin iang sapwellimen Koht pwihn ahpw met uhwongada​—⁠irail pahn songen koledi irail me pwoson kan nan mwomwohdiso, raparapahki en wairailsang nan pwihno.

8. Soangen ahl dah kan me irail me lahlahwe padahk mehlel kin doadoahngki pwe lel arail mehn akadei?

⁸ Soangen ahl dah kan me irail me lahlahwe padahk mehlel kin doadoahngki pwe en lel arail mehn akadei? Pak tohto, irail kin wekidala lokaia kan de nda mehkan me sohte uhdahn pwung, de pil likamw douluhl. Sises wehwehki me sapwellime werek ko pahn lelohng widing kan me kin kohsang irail akan me pahn karaunki irail soangen likamw koaros.” (Madiu 5:11, Today’s English Version) Soangen soun uhwongada widing pwukat pahn nda dahme likamw pwe en kak pitihdi meteikan. Wahnpoaron Piter kalekehkin kitail duwen irail me lahlahwe padahk mehlel arail pahn doadoahngki “lokaia likamw akan,” lohki “padahk en widing kan,” oh ‘wekidala iren Pwuhk Sarawi kan’ ong ni soahng kan me pein irail nsenohki. (2 Piter 2:3, 13; 3:16) E kin kansensuwed ni irail me lahlahwe padahk mehlel arail kin pweida oh “kauwehla pwoson en ekei.”​—2 Timoty 2:18.

9, 10. (a) Iaduwen atail kak pere kitail en dehr pitida pahn widing en irail me lahlahwe padahk mehlel? (b) Dahme kahrehda kitail sohte kin pwunodki ma atail wehwehki duwen kupwuren Koht kan kin wekidekla ekei pak?

⁹ Iaduwen atail kak kalekeikitail sang dehr pitida pahn widing en irail me lahlahwe padahk mehlel? Sang ni atail pahn kin tehk kanahieng kaweid me kohsang Mahsen en Koht me mahsanih: “Kaleke kumwail sang irail kan me kin kahrehda liaktohrohr oh kin kauwehla pwoson en Kristian kan, aramas pwukat pil kin uhwong padahk me kumwail aleier; kumwail dehr keiong mparail.” (Rom 16:17) Kitail kin “kaleke kitail sang irail” sang ni atail kin soikala arail kawehwe kan​—sohte lipilipil ma kitail uhdahn tuhwong irail de pil nan nting, de pil nan Internet. Dahme kahrehda kitail anahne wiahki met? Keieu, pwehki Mahsen en Koht kin kaweidki kitail en wia met, oh kitail likih me Siohwa kin ahnsou koaros kupwurki dahme pahn keieu mwahu ong kitail.​—Aiseia 48:17, 18.

¹⁰ Keriau, kitail poakohng pwihno me padahkiong kitail padahk mehlel kesempwal me ni sansal katohreikitail sang Papilon Lapalap. Ni ahnsowohte, kitail kin pohnese me atail loalokongkihla kupwuren Koht kan sohte unsek; atail wehwehki kin maramarainla ni sounpahr kei me dauliher. Irail Kristian lelepek kan kin itarki awiawih Siohwa en ketikihdo mehn kamarain kan. (Lepin Padahk 4:18) Ni ahnsowohte, kitail en dehr kesehla pwihn me Siohwa kin kupwurki oh doadoahngki, pwe kitail kak kilang ni sansal sapwellime kapai kan pohn pwihn wet.​—Wiewia 6:7; 1 Korint 3:6.

Pere Iuk Sang Dehr Pein Pitihiukdi

11. Dahme kahrehda aramas soh-unsek kan kin mengeiong pein pitih iraildi?

¹¹ Aramas soh-unsek kan kin ahneki pepehm me Sehdan kin wia mwekid en roporop kan ni karuwaru​—pein pitih irail. Seremaia 17:9 mahsanih: “Mohngiong me keieu en widing oh weikekla.” Oh Seims ntingihdi: “Aramas kin lelohng nan songosong sang ni pein eh ineng suwed eh kin kainangiong pein ih oh kahrehiong nan dihp.” (Seims 1:14) Ma atail mohngiong pahn lohdiong pahn songosong, e pahn kak uhd kasonge kitail en wiahda dihp sang ni ah kin wia mehkan en mwomwen kaperen oh sohte keper. Soangen lamalam wet me widing, pwe imwilahn mweidala kitail nan dihp iei kasohrala.​—Rom 8:6.

12. Ahl dah kan me kitail kakete pwupwudiong nan songosong en pein pitih kitail?

¹² Pein pitih kitail kak mengei en kaloweikitaildi. Atail mohngiong widing kak en songen pein rapahki kamwahu kan nan atail irair suwed ehu de pil dihp laud ehu. (1 Samuel 15:13-​15, 20, 21) Atail mohngiong widing ele pahn song en pein rapahki kamwahupen wiewia sohte konehng kan. Karasepe ehu, song tehk duwen mehn kamweit kan. Ekei mehn kamweit kan kin mwahu oh kaperen. Ahpw, pali laud en mehn kamweit kan me sampah wet kin kasalehda​—nan kasdo, TV, oh Internet​—lokaia suwed oh wiewia suwed kin mihmi loale. E mengei en kamehleleiong pein kitail me kitail kak kilang mehn kamweit suwed oh samin kan ahpw e sohte pahn wia keper ehu. Ekei pil kin nda: “E sohte uhwong ahi nsen mwakelekel, eri dahme sapwung?” Ahpw, soangen aramas pwukat kin ‘pein pitih iraildi ki soangen madamadau likamw wet.’​—Seims 1:22.

13, 14. (a) Karasepe dah nan Paipel me kin kasalehda me atail nsen mwakelekel sohte kin ahnsou koaros pwung oh likilik? (b) Iaduwen atail kak pere kitail sang pein pitih kitail?

¹³ Iaduwen atail kak pere kitail pwe en dehr pein pitihkitaildi? Keieu, kitail anahne en tamataman me en aramas nsen mwakelekel (de kadeikpen loaletail) sohte kin ahnsou koaros pwung. Tehk dahme wiawiong wahnpoaron Pohl. Mwohn e wiahla Kristian emen, e kin kaloke sapwellimen Krais tohnpadahk kan. (Wiewia 9:1, 2) Ah nsen mwakelekel mwein sohte kin kedirepwe ih ahnsowo. Ahpw, e sansal me e sapwung. Pohl mahsanih: “I sohte wehwehki oh mwekid ni sohte ahi pwoson.” (1 Timoty 1:13) Eri, me pid duwen atail nsen mwakelekel sohte kin lidere kitail ki ekei soangen mehn kamweit kan, met sohte wehwehki me dahme kitail wia me pwung. Soangen nsen mwakelekel keng oh sukuhl sang Mahsen en Koht ni pwung me kak kahluwa kitail ni soh keper.

¹⁴ Mie soangen kaweid katapan kan me kitail anahne en tamataman pwe en sewese kitail en liksang pein pitih kitail. Kasawih pein kowe iangahki kapakap. (Melkahka 26:2; 2 Korint 13:5) Ni ahmw pahn kin pein kasawih kowe oh ahmw mour ni mehlel, ke pahn kak diarada anahnepen wiahda wekidekla kan nan ahmw elen madamadau oh wiewia kan. Rong meteikan. (Seims 1:19) Pwehki pein kasawih kitail kin kahrehiong kitail en pein poupalihki atail iren madamadau kan, e pahn wia elen loalokong en rong mahsen kan me sohte poupali me kin kohsang iengetail Kristian mah kan. Ma ke diarada me ke wiewia koasoandi kan de wiewia mwekid kan me sohte pwung mwohn mesen ekei riatail me toupahrek oh mahla nan pwoson, ele ke kak pein idek rehmw: ‘Sou ahi nsen mwakelekel me sohte kaiahnda ni pwung de mwein ahi mohngiong me kin pitipitih ie?’ Kaukaule wadek Paipel oh sawaspen Paipel kan oh doudouloale duwen audepe kan. (Melkahka 1:2) Ni ahmw pahn wia met, e pahn sewese iuk en katengehdi ahmw madamadau kan, wiewia kan, oh pepehm kan en pwungiong koasoandi en Koht.

Pere Iuk Sang en Sehdan Likamw akan

15, 16. (a) Ni a kin song en pitih kitail, soangen likamw dah kan Sehdan kin doadoahngki? (b) Iaduwen atail kak soikala soangen likamw pwukat?

¹⁵ Sehdan kin doadoahngki soangsoangen likamw kan uwen ah kak en pitihkitaildi. E kin songen kamehlelehiong kitail me ahneki kepwe tohto me kak wahdohng kitail peren oh nsenamwahu ahpw kitail wehwehki me met sohte kak wiawi. (Eklesiasdes 5:10-​12) E song kitail en kamehlele me sampah suwed wet pahn mihmi kohkohlahte, mendahki mie mehn kadehde sansal kan me kitail memour nan “imwin rahn akan.” (2 Timoty 3:1-5) Sehdan kin kangoange soangen madamadau kan me e sohte keper en mourki mour suwed kan, mendahki irail me kin rapahki pein nsenarail kan kin kalapw imwila suwed. (Kalesia 6:7) Iaduwen kitail kak kalekehkin kitail soangen likamw pwukat?

¹⁶ Sukuhliki sang mour en aramas akan nan Paipel. Paipel kin audaudki koasoipen mour en aramas me kin pitida pahn en Sehdan likamw akan. Irail kin poakohng dipwisou kan oh sohte kin tehk mwahu soangen ahnsou me re mihmi loale, de irail mourki mour suwed oh samin​—oh ahnsou koaros soangen mour pwukat kin imwila suwed. (Madiu 19:16-​22; 24:36-​42; Luk 16:14; 1 Korint 10:8-​11) Sukuhliki sang mour en aramas akan nan rahnwet. E kin kansensuwed ni ekei Kristian kan kin kesehla arail lamalam en karuwaru oh uhd kamehlele me ni arail kin papah Koht, irail kin luhs sang soahng mwahu kan. Ekei irail kin kesehla padahk mehlel pwe irail en uhd rapahki mehkan me irail leme pahn wahdohng irail peren​—⁠peren en sampah. Ahpw, aramas pwukat kin mih pohn “wasa likekiris” pwe, ni ahnsou keren de mwuhr, irail pahn anahne dolung wahn arail wiewia kan me sohte pwungiong kupwuren Koht oh met pahn kansensuwed ong irail. (Melkahka 73:18, 19) E wia elen loalokong en sukuhliki sang sapwung kan en meteikan.​—Lepin Padahk 22:3.

17. Dahme kahrehda Sehdan kin wiahda likamw me Siohwa sohte kin poakohng de kesempwaliki kitail?

¹⁷ Mie pil ehu likamw me Sehdan kin doadoahngki me pil doadoahk​—likamw me Siohwa sohte kin poakohng kitail de kesempwaliki kitail. Sehdan sukuhlikier duwen aramas soh-unsek kan erein sounpahr kid kid kei. E kin wehwehki me kaluwetehla ahn emen lamalam kak kaluwetala ah pali ngehn. (Lepin Padahk 24:10) Ihme kahrehda, e wiahda likamw me kitail sohte katepe mwohn silangin Koht. Ma kitail pahn “pwupwudi” oh uhd kamehlele me Siohwa sohte kin katapankin kitail, eri kitail kak lelohng kasongosong en kesehla atail pwoson. (2 Korint 4:9) Iei met me Soun Widing Lapalapo, Sehdan, kin mwahuki! Eri, iaduwen kitail kak pere kitail sang pitida pahn likamw wet en Sehdan?

18. Iaduwen Paipel kin kamehlelehiong kitail duwen sapwellimen Siohwa limpoak?

¹⁸ Pein doudouloale dahme Paipel mahsanih duwen sapwellimen Koht limpoak ong kitail. Sapwellimen Koht Mahsen kin doadoahngki lokaia kan me pahn kamwekid atail lamalam en wehwehki pwe en kamehlelehiong kitail me Siohwa kin nsenohki oh poakohng emen emen kitail. E ketin ketikihong pilen mesomw kan nan sapwellime “edin nimpil,” wehwehki me e kin mahsanih oh tamataman pilen mesomw koaros me ke kin kakerehdi pwehki omw weikekihla songosong en kolokol ahmw lelepek. (Melkahka 56:8) E mwahngih ni ahmw kin “kapehd tikitikla” oh E kin karanih iuk nan soangen ahnsou kan duwehte met. (Melkahka 34:18) E mwahngih mengihtik koaros duwen kowe, me iangahki “uwen tohto en piten moangomw kan.” (Madiu 10:29-​31) Pohnangin mehpwukat koaros, Koht “ketikihdo sapwellime Iehros” pwehki kowe. (Sohn 3:16; Kalesia 2:20) Ekei pak, ele ke kin apwaliki kamehlele me soangen iren Paipel pwukat dokedoke iuk. Ahpw, kitail anahne en kamehlele mahsen en Siohwa. E kupwurki kitail en kamehlele me e poakohng emen emen kitail ahpw kaidehn ihte nin duwen pwihn ehu.

19, 20. (a) Dahme kahrehda e kesempwal kitail en tehk oh soikala ahn Sehdan likamw me Siohwa sohte poakohng uhk? (b) Iaduwen emen soundoulik kin sewese ekei me nan kapehd tikitiklahr?

¹⁹ Tehk oh soikala likamwo. Ma ke ese me emen kin likamw, ke kak pere iuk sang pitida pahn ah likamw. Eri, pil duwehte met, en esehte me Sehdan kin mwahuki ke en kamehlele likamw me Siohwa sohte poakohng uhk kak pil sewese iuk laud. Emen lih Kristian wadek artikel nan Kahn Iroir me kalekehkin kitail duwen ahn Sehdan lidip kan oh e koasoia: “I sohte wehwehki me Sehdan kin doadoahngki ahi pepehm kan pwe en katikihala ahi lamalam. Sukuhliki oh esehla met kin kihong ie kehl en kak powehdi soangen pepehm pwukat.”

²⁰ Menlau tehk ekspiriens en emen soundoulik nan sahpw ehu nan South America. Ni a kin mwemweitla rehn irail me pwoson me nan kapehd tikitiklahr kan, e kin kalapw idek rehrail, ‘Ke kin kamehlele padahk en Trinity?’ Me kapehd tikitiklahro kin kalapw sapeng, ‘Soh’ pwe irail wehwehki me met iei ehu ahn Sehdan likamw. Soundoulik kin pil uhd idek reh, ‘Ke kin kamehlele padahk en ehl?’ Pasapengo pil, ‘Soh!’ Soundouliko uhd kin ndaiong irail me mie pil ehu ahn Sehdan likamw me kitail sohte nohn kin tehkada mwahu. E kin kihong arail lamalam ong pwuhken Draw Close to Jehovah,b pali 249, parakrap 21 me kin kasalehda me Sehdan kin likamw dene me Siohwa sohte kin poakohng emen emen kitail. En soundoulik kin song en sewese irai me nan kapehd tikitikla kan en tehkada oh soikala ahn Sehdan likamwo.

Pere Iuk Sang Widing kan

21, 22. Dahme kahrehda kitail sohte mih nan rotorot en ahn Sehdan elen widing kan, oh dahme kitail anahne en katengehdi mwahu nan atail madamadau?

²¹ Ni imwilahn rahn en imwi pwukat, kitail en kasik me Sehdan pahn doulahte oh kihda likamw oh widing tohtohie. Kitail kak kalahnganki pwe Siohwa sohte kin keseikitailla nan rotorot en ahn Sehdan elen widing kan. Paipel oh sawaspen Paipel kan me kohsang “ladu lelepek oh loalokong” kin kasalehda ni sansal duwen lidip kan en Tepil. (Madiu 24:45) Ma kitail wehwehki duwen ahn Sehdan likamw oh widing kan, kitail kak kaunopada pwe en dehr mweidohng Sehdan en poweikitaildi.​—2 Korint 2:11.

²² Eri, kitail en tehk oh pere kitail sang soangen kawehwe likamw en irail me kin lahlahwe padahk mehlel. Kitail en katengehdi mwahu nan atail madamadau me kitail pahn soikala soangen lidip kan me sohte nohn sansal me duwehte pein pitih kitaildi. Kitail en tehk oh soikala ahn Sehdan likamw kan koaros. Ni atail kin wia met, kitail pahn peren atail nanpwung mwahu rehn “Koht en me mehlelo,” me kin kalahdeki widing oh likamw.​—Melkahka 31:5; Lepin Padahk 3:32.

[Nting tikitik me mi pahs]

Ke Tamataman?

• Dahme kahrehda widing inenen rek rahnwet?

• Iaduwen atail kak kaleke kitail sang pitida pahn widing en irail me mahs iang pwihn en Siohwa ahpw met lahlahwe padahk mehlel?

• Iaduwen atail kak pere kitail sang pwupwudiong lamalam en pein pitih kitail?

• Iaduwen atail kak soikala widing en ahn Sehdan likamw akan?

[Kilel nan Pali 12]

Dehr pitihiukedi duwen mehn kamweit kan

[Kilel nan Pali 13]

Pwehn pere iuk sang pein pitihiukedi, ke anahne tehk kanahieng kowe ni ahmw kapakap, oh rong meteikan, oh kaukaule audaudki Mahsen en Koht