Kapinga Koht “Ni Ngihlteieu”

“Kumwail koaros en ehupene kapinga Koht, Semen atail Kaun Sises Krais ni ngihlteieu.”​—⁠ROM 15:6.

1. Soangen iren mehn kasukuhl dah me pid madamadau wekpeseng kan me Pohl ehukihong ienge me pwoson teiko?

KAIDEHN Kristian koaros kin ahneki soangen pilipil ehute oh soahng kan me re mwahuki sohte kin duwepene. Ahpw Kristian koaros anahne ehupene ni ahr kekeid kohwei nan elen mour. Met kak wiawi? Ei, ma kitail sohte kin wiahkihda mehkot laud soangen kisin pilipil kan me wekpeseng. Iei iren kasukuhl wet me wahnpoaron Pohl ehukihong ienge me pwoson kan nan senturi keieu. Iaduwen ah kawehwehda irair kesempwal wet? Oh iaduwen kitail kak kapwaiada sapwellimen Pohl iren kaweid wet nan rahn pwukat?

Kesempwalpen Miniminpenehn Kristian

2. Iaduwen Pohl kasalehda anahnepen miniminpene?

² Pohl ese me miniminpenehn Kristian kan inenen kesempwal, oh e kihong kaweid kaselel ong Kristian kan en kin ehupene ni limpoak. (Episos 4:1-3; Kolose 3:12-​14) Mendahki met, mwurin eh sewese tapiada mwomwohdiso tohto oh kin pwarpwarek irail erein sounpar 20 samwa, e ese me e sohte mengei en kin kaminiminirailpene. (1 Korint 1:11-​13; Kalesia 2:11-​14) Kahrehda e kin kangoange irail me pwoson kan nan Rom: “Eri, Koht me tepin kanengamah oh kakehlepen loaletail . . . pwe kumwail koaros en ehupene kapinga Koht, Semen atail Kaun Sises Krais ni ngihlteieu.” (Rom 15:5, 6) Rahnpwukat, kitail anahne en pil duwe met oh kapinga Siohwa Koht “ni ngihlteieu” ehupene nin duwen sapwellime aramas minimin kei. Ia uwen atail kin kapwaiada met?

3, 4. (a) Soangen wekpeseng dah kan me Kristian en nan Rom ko ahneki? (b) Iaduwen Kristian en nan Rom ko ahr kak papah Siohwa “ni ngihlteieu”?

³ Kristian tohto nan Rom wia kompoakpen Pohl. (Rom 16:3-​16) Mendahki ahr tiahk oh mour kan wekpeseng, Pohl kin wiahki rie kan koaros nin duwen “sapwellimen Koht me kompoak kei.” E ntingihdi: “Mwohn mehkoaros I kin kapingkihong ei Koht rehn Sises Krais pwehki kumwail koaros; pwehki amwail pwoson eh kalohkselier wasa koaros nin sampah.” E sansal me mehn Rom ko kin wia mehn kahlemeng mwahu kei ni ahl tohto. (Rom 1:7, 8; 15:14) Ni ahnsowohte, ekei tohnmwomwohdiso kan kin ahneki soangen madamadau wekpeseng kan me pid ekei irair. Pwehki Kristian kan nan rahnpwukat keirda ni soangen irair wekpeseng kan oh ahr tiahk kan pil wekpeseng, onopki kaweid en Pohl me pid duwen arail pahn kak ehupene menda ma arail irair wekpeseng kak sewese irail en kak lokaia “ni ngihlteieu.”

⁴ Nan Rom mie mehn Suhs oh mehn liki kan me wiahla Kristian. (Rom 4:1; 11:13) Ekei mehn Suhs me Kristian kan kin apwalki uhdihsang ekei tiahk kan me irail kin idawehn pahn kosonned en Moses, mendahki irail anahne en wehwehki me soangen tiahk pwukat sohte anahn pwe ren kak kamourla. Ni pali teio, tohto Kristian mehn Suhs akan wehwehkiher me tomw en Krais kasaledek irail sang ekei tiahk kan me irail kin wia mwohn arail wiahla Kristian kei. Imwilahn met, irail wekidala ahr tiahk kan. (Kalesia 4:8-​11) Mendahki met, nin duwen me Pohl kasalehda, irail koaros wia “Sapwellimen Koht me kompoak kei.” Koaros kak kapinga Koht “ki ngihlteieu” ma irail kin ahneki madamadau pwung nanpwungarail. Kitail rahnpwukat mwein pil ahneki soangen madamadau wekpeseng kan ong ekei irair kan, kahrehda e pahn mwahu kitail en tehk kanahieng duwen Pohl eh kawehwehda ire kesempwal wet.​—Rom 15:4.

“Kasamwo Emenemen”

5, 6. Dahme kahrehda mie soangen madamadau wekpeseng kan nan mwomwohdiso en Rom?

⁵ Nan sapwellime kisinlikou ong mehn Rom ako, Pohl kasalehda duwen ire me pid wekpeseng en madamadau kan. E ntingihdi: “Mie ekei me kin tungoale soahng koaros sang ni ar pwoson, a ekei mie, me luwet nan ar pwoson, me kin tungoalehte wahntuhke.” Dahme kahrehda? Pwehki pahn Kosonned en Moses, e sohte mweimwei en kang uduk en pwihk. (Rom 14:2; Lipai 11:7) Ahpw, Kosonned wet solahr doadoahk mwurin Sises pwoula. (Episos 2:15) Ihme kahrehda, sounpar silu elep mwurin Sises pwoula, tohnleng men padahkihong wahnpoaron Piter me, sohte ehu soangen mwenge me irairdi de samin mwohn silangin Koht. (Wiewia 11:7-​12) Pwehki met, ekei mehn Suhs Kristian akan mwein ele pahn pehm me re kak kang pwihk​—de pil kang ekei soangen mwenge kan me keinapwidi pahn Kosonnedo.

⁶ Ahpw, ekei mehn Suhs Kristian ako kin medewehlahte kang soangen mwenge kan me mahs wia mehkot samin oh nan kapehd suwedla. Soangen aramas pwukat mwein ele pahn suwedki kilang riarail mehn Suhs Kristian teikan ahr pahn kang soangen mwenge pwukat. Patehng met, ekei mehn liki Kristian akan, me tikada nan pelien lamalam kan me sohte kin kalikedi dahme ren kang, ele pahn pwonopwonki dahme mwenge pil wia mehkot laud ehu ong ekei aramas. Ni mehlel, sohte sapwung ma emen pilada en liksang kang ekei soangen mwenge, ahpw kaidehn en medewehiong me liksang soangen mwenge ko pahn kamourla ih. Mendahki met, soangen madamadau wekpeseng kak mengei en kahrehda pingiping nan mwomwohdiso. Kristian en nan Rom ko pahn anahne kanahieng pwe soangen madamadau oh irair wekpeseng kan me re ahneki de ireiraildihsang en kalinganahda Koht “ki ngihlteieu.”

7. Ia soangen madamadau wekpeseng kan me re ahneki me pid kasarawipen ehu rahn nan ehu ehu wihk?

⁷ Pohl pil kihda keriaun karasaras: “ekei kin wiahki me rahn ehu me kesempwalasang rahn teikan, oh pil ekei kin wiahki me rahn koaros duwepenehte.” (Rom 14:5a) Pahn Kosonned en Moses, sohte doadoahk pahn kin wiawi ni rahn en Sapad. Pil, alu reirei sohte mweimweida en wiawi rahno. (Eksodus 20:8-​10; Madiu 24:20; Wiewia 1:12) Ahnsou me Kosonnedo katoktokdi, soangen keinapw pwukat pil sohlahr. Ahpw, mwein miehte irail Kristian mehn Suhs kan me soansuwedkihte doadoahk de alu reirei ni rahn me mahs wia rahn sarawi ehu ong irail. Mendahki irail wiahlahr Kristian kei, irail mwein ele kin koasoanehdi rahn keisuh ongete kaudok oh soang ngenin kan mendahkihte ma ong Koht, Sapad sohlahr doadoahk. Re sapwung ni ahr wia met? Soh, ma irail sohte koasoia me Sapad wie doadoahkte rehn Koht. Ihme, pwehki e kin medemedewe nsen mwakelekel en rie Kristian ko, Pohl ntingihdi: “Emenemen en pein koasoanehdi nan kapehde dahme pwung.”​—Rom 14:5b.

8. Ni ahr pahn kin medemedewe nsen mwakelekel en meteikan, kehkehlik dah me konehng irail Kristian en nan Rom en dehr wia?

⁸ Mendahki met, ahnsou me e kangoange rie Kristian ko en kanengamahiong irail ko me kin pepeiong irair kan me pid arail nsen mwakelekel, Pohl kin kaweidih irail ko me kin idingkiong Kristian teiko en idawehn Kosonned en Moses me dene ihme pahn wahdo kamour. Karasepe, mpen pahr 61 C.E., Pohl ntingihda pwuhken Ipru, kisinlikou kehlail ehu me kawehwehda ni sansal me kapwaiada Kosonned en Moses sohlahr katapan pwe Kristian akan ahneki koapworopwor me inenen kesempwal me pid tomwpen meirong en Sises.​—Kalesia 5:1-​12; Taitus 1:10, 11; Ipru 10:1-​17.

9, 10. Dahme Kristian kan en dehr wia? Kawehwehda.

⁹ Nin duwen me kitail kilanger, Pohl kasalehda me pilipil wekpeseng kan sohte anahne en wia kerempwa ehu ong miniminpene ma pilipil pwukat sohte pahn uhwong Kosonned kan en Kristian akan. Ihme kahrehda Pohl idek rehn Kristian akan me ahr nsen mwakelekel kehlail sohte nohn kehlail: “Dahme kahrehda ke kin kadeik riomw akan?” Oh e idek rehn irail akan me ahr nsen mwakelekel kehlail (mwein ele irail akan me ahr nsen mwakelekel mweidada irail en kang ekei mwenge kan me mahs sohte mweimweida pahn Kosonnedo de doadoahk rahnen Sapad): “Dahme kahrehda kumwail kin kauwehki riamwail Kristian kan?” (Rom 14:10) Nin duwen me Pohl kasalehda, Kristian akan me ahr nsen mwakelekel luwet en dehr kadeikada riarail kan me madamadau kehlail. Pil ni ahnsowohte irail Kristian akan me kehlail en dehr kilangdiong irail akan me arail nsen mwakelekel luwet ni ekei irair kan. Koaros anahne wauneki poahsenpen pilipil en mehteikan oh en dehr “medemedewe me kumwail me lapalap.”​—Rom 12:3, 18.

¹⁰ Pohl kawehwehda duwen madamadau me konehng ni ahl wet: “Me kin tungoale soahng koaros en dehr kauwe me kin tungoalehte wahntuhke; oh me kin tungoalehte wahntuhke en dehr kadeikada me kin tungoale soahng koaros, pwe Koht ketin kupwurperenki ih.” E pil doula mahsanih: “Krais eh ketin kasamwokumwailehr nan kupwure.” Pwehki koaros me ahneki nsen mwakelekel me kehlail oh me luwet kin pwung mwohn Koht oh Krais, kitail anahne en ehuiong koaros oh “kasamwo emenemen.” (Rom 14:3; 15:7) Ihs me pahn kak kasapwunge met?

Limpoak en Pirien kin Kahrehda Miniminpene Rahnwet

11. Soangen irair tohrohr dah ehu me mie ni mwein Pohl?

¹¹ Nan sapwellime kisinlikou ong mehn Rom ko, Pohl koasoakoasoia irair tohrohr ehu. Ahnsowo, Siohwa ahpwtehn kasohrehla kosonned en mahso oh ketin wiahda ehu me kapw. E wia kahpwal ehu ong ekei me wekidala arail irair kan oh alehda kosonned kapwo. Soangen irairo sohlahr rahnwet, ahpw ekei irair kan me duwehte met kin pwarada ekei pak.

12, 13. Ia soangen ekei irair kan me Kristian kan nan rahnwet anahne en kasalehda ahr nsenohki nsen mwakelekel en riarail kan?

¹² Karasepe ehu, ele mwein emen lih Kristian kin iang ehu pelien lamalam mahs me kin koasoanediong irail en dehr doadoahngki kapwat. Ahnsou me e iangala padahk mehlel, ele mwein e pahn apwal ong ih en mwadangete pwungkihla me sohte kosonned me irehdi en dehr likauwih likou lingan kan de pil doadoahngki makeup. Pwehki sohte iren Pwuhk Sarawi me pid met, e sohte pahn konehng emen en song idingki emen lih Kristian en uhwong kadeikpen ah nsen mwakelekel. Oh pil ni ahnsowohte, lih menet en dehr kauwe irail lih Kristian teikan me ahr nsen mwakelekel mweidala irail en doadoahngki kapwat me konehng Kristian.

¹³ Medewe ehu karasepen met. Emen ohl Kristian mwein tikida ehu wasa me sohte mweimweida en nim sakau en wai. Oh mwurin eh iangalahr padahk mehlel, e sukuhlikiher sang nan Pwuhk Sarawi me wain wia kisakis ehu sang rehn Koht oh Kristian kan kak doadoahngki ni ahl me sohte daulihla. (Melkahka 104:15) E pwungkihier met. Ahpw, pwehki irair en wasa me e tikida ie, e pilada en dehr nim sakau en wai, ahpw e sohte kin kauwe irail kan me pilada en nim ni ahl me sohte daulihala. E kin kapwaiada mahsen en Pohl: “Eri, kitail uhdahn pahn ngoangki ahnsou koaros mehkan me kin kahrehiong kitail popohl, oh pil kin kakehlakaikitailla.”​—Rom 14:19.

14. Nan soangen irair dah kan me re kak doadoahngki kaweid en Pohl ong men Rom ko?

¹⁴ Ekei pak, irair kan me kin pwarada kin anahne kadoadoahkpen kaweid en Pohl ong mehn Rom akan. Mwomwohdiso en Kristian kin wiawihkihda aramas tohto, oh irail pil kin ahneki pilipil wekpeseng kan. Kahrehda, irail ele mwein pahn wiahda soangen pilipil wekpeseng kan me pid ahr likou oh kapwat. Ei, ni mehlel Pwuhk Sarawi kin kasalehda ni sansal kosonned kan me Kristian mehlel kan kin idawehn. Sohte emen rehtail anahne en doadoahngki likou de soangen wie moahng me sohte konehng me pahn kasalehda me kitail kisehn sampah suwed wet. (1 Sohn 2:15-​17) Kristian kan anahne en tamataman me ahnsou koaros, mehnda ma irail wie komkommoal, irail welwelian ih me ketin wia Kaunepen Lahng oh Sampah. (Aiseia 43:10; Sohn 17:16; 1 Timoty 2:9, 10) Mendahki met, Kristian kan ahneki pilipil tohtohie me re kak wia.a

Liksang Kadipekelekelih Meteikan

15. Nan soangen ahnsou dah kan me Kristain men pahn liksang wia soahng kan me e ahneki pwung en wia?

¹⁵ Mie ehu kaimwiseklahn ire me kitail en tehkada nan iren kaweid en Pohl ong Kristian en Rom. Ekei pak, Kristian men me kaiahnehda mwahu ah nsen mwakelekel mwein pahn pilada en dehr wia ehu pilipil mehnda ma met sohte sapwung. Pwekihda? Pwehki e diarada me pilipil wet ele mwein pahn suwed ong mehteikan. Dahme kitail en wia? Pohl mahsanih: “Dehr tungoale uduk, de wain, de wiahda mehkot me pahn kahrehiong riamwail en pwupwudiong nan dihp.” (Rom 14:14, 20, 21) Kahrehda, “kitail . . . kan me kehlail ni atail pwoson, kitail uhdahn pahn sewese me luwet akan ni arail katoutou kan. Ahpw, emenemen kitail uhdahn pahn kaperenih meteikan ni wiewia mwahu ong irail, pwe kitail en seweseirailda nan ar pwoson.” (Rom 15:1, 2) Ma riatail Kristian men pahn dipekelikelki dahme kitail wia, limpoak en Kristian pahn kamwekid kitail en kin medemedewe meteikan oh tehk kanaiehng atail pilipil kan. Ehu karasepen met iei doadoahngki sakau en wai. Kristian men mweimweida en nim wain ni uwen me konehng. Ahpw, ma ah wia met pahn kadipekelekelih emen, ah ieremen e nim, mendahki ma e sohte keinapwidi.

16. Ia duwen atail pahn kak kasalehda atail nsenohki meteikan nan atail wasahn kalohk?

¹⁶ Iren kaweid wet pil kak doadoahk nan mwomwohdiso en Kristian. Karasepe ehu, kitail ele mwein mih wasa ehu me sarawi kehlail kan kin wiahda kosonned me ehu rahn en nan ehu wihk pahn wia rahn en kommoal. Pwehki met, kitail en dehr kadipikelekelih mehn mpatail kan oh kauwehla atail doadoahk en kalohk, kitail en liksang wia soahng kan me pahn kadipekelkelih mehn mpatail kan. Pil nan ehu irair, mwein emen Kristian kepwehpwe men pahn soulahng wasakis me aramas akan semwehmwe. Mwein ele e pahn konehng en medewe mehn mpe ko oh sohte nohn kapwatada daulihala de mourki mour me daulihala mendahte ma e kakohng soangen mouro.

17. Dahme karehda e konehng en medemedewe mehteikan ni atail wia atail pilipil?

¹⁷ E konehng en kasikasik me irail “me kehlail kan” en wia soangen tohnmetei pwukat? Eri, medemedewe karasaras wet: Ni ahnsou me kitail tangatang pohn elen sidohsa ehu, kitail kilangwong mwohtail me seri kei mwadong limwahn ahlo. Kitail pahn nannantihweite oh tangatang uk ki sipihd me mweimweida pwehki kitail ahneki pwung en wia met? Soh, kitail pahn ekis wawaila pwe en dehr keper ong seri ko. Ekei pak, soangen irairohte me en wawaila oh pil ekis uhdi kin anahn ni ahnsou me kitail kin ehuiong riatail kan oh pil meteikan. Kitail ele mwein wiewia soahng kan me kitail ahneki pwung en wia. Sohte iren Pwuhk Sarawi kan me kitail uhwongada. Mendahki met, ma kitail pahn kadipekelekelih meteikan, limpoak en Kristian pahn kamwekid kitail en kanahieng atail wiewia kan. (Rom 14:13, 15) Kolokol ehupene oh wia kalohk mwahu kesempwal sang atail pwung kan.

18, 19. (a) Ni atail kasalehda nsenohki mehteikan, iaduwen atail kahlemengih sapwellimen Sises mehn kahlemeng? (b) Ni irair dah kan me kitail kin ehupene, oh dahme kitail pahn koasoia nan artikel en mwuhr?

¹⁸ Ma kitail kin kapwaiada met, kitail kin idawehn mehn kahlemeng keieu mwahu. Pohl mahsanih: “Pwe Krais sohte ketin kupwurohkihte pein ih. Ahpw, nin duwen Pwuhk Sarawi eh mahsanih, ‘Ngehi me pwukoahkidier en aramas akan ar lahlahwei komwi.’ ” Sises inengiong en tohnmeteikihla moure pwehki kitail. Met kahrehda kitail en pil men tohnmeteikihla atail pwung kan ma e pahn kahrehong “irail me luwet akan” en iang kitail oh kalinganahda Koht. Ni mehlel, en kasalehda soangen tohnmetei wet oh kadek ong me ahneki nsenmwakelekel luwet​—de pein pilada en irekitaildihsang soahng kan me kitail ahneki pwung en wia⁠—kasalehda “lamalamteieu ni atail kin kahlemengih Krais Sises.”​—Rom 15:1-5.

¹⁹ Mendahki atail madamadau ong soahng kan me iren Pwuhk Sarawi sohte pidada, de pil irair en kaudok, kitail kin doadoahkpene ni minimin. (1 Korint 1:10) Soangen ehupene wet kin sansalda, karasepe ehu, ni mwomwen atail wiewia ong emen me kin uhwong kaudok mehlel. Sapwellimen Koht Mahsen kin kahdanekihla soun uhwong pwukat mehn liki oh kin kehkehlik ong kitail en kaleke “ngilen mehn keiru kan.” (Sohn 10:5) Iaduwen kitail pahn kak ese irail pwukat? Ia pahn mwomwen atail madamadau de wiewia ong soangen irail pwukat? Kitail pahn tehk peidek pwukat nan artikel en mwurin met.

[Nting tikitik me mi pahs]

Iaduwen Ahmw Pahn Sapeng?

• Dahme kahrehda kitail en dehr mweidong wekpeseng en madamadau kan en kauwehla atail ehupene?

• Dahme kahrehda kitail Kristian kan anahne en kin kasalehda nsenohki emen emen?

• Ia ekei ahl akan me kitail kak kapwaiada en Pohl kaweid me pid miniminpene nan rahnwet, oh dahme pahn kin kamwekid kitail en wia met?

[Kilel nan Pali 22]

Sapwellimen Pohl kaweid me pid miniminpene inenen kesempwal nan mwomwohdiso

[Kilel nan Pali 24]

Kristian kan kin ehupene mendahki wekpeseng en mwomwen ahr tikida

[Kilel nan Pali 25]

Dahme soun diraip menet anahne wia met?