Kolokol Kanahieng Kilelepen Kristian Mehlel

“ Siohwa mahsanih me, ‘Kumwail me iei ei sounkadehde.’”​—AISEIA 43:10.

1. Soangen aramas dah me Siohwa kainangihedo reh?

NI AHNSOU me ke mih nan Kingdom Hall, kilang mwahu aramas akan me kin mih wasao. Ihs me ke kin kilang nan wasahn kaudok et? Mwein ele ke kilang irail me pwulopwul kan kin rongorong mwahu oh alehdi erpit me kohsang Pwuhk Sarawi. (Melkahka 148:12, 13) Mwein ke pil kin kilang tapwin peneinei kan me kin nantiong kaperenda Koht mendahki irail kin mih nan sampah wet me kin kaluwetala mour en peneinei. De mwein ke kin kilang kompoakpahmw kan me mahlahr, ahpw irail kin kolokolete arail inou ong Siohwa mendahki kahpwal akan. (Lepin Padahk 16:31) Koaros kin poakohng Siohwa. Oh Siohwa kin ketin perenki karanih kitail. Sapwellimen Koht Ohl mahsanih, “Sohte emen me pahn kak kohdo rehi, ma Semei me ketin kadariehdo sohte kainangihedo rehi.”​—Sohn 6:37, 44, 65.

2, 3. Dahme kahrehda e apwal en kolokol kanahieng kilelepen Kristian?

² Kitail soh kin peren me kitail iangehr pwihn en aramas ieu me kin kenikenla rehn Siohwa oh kin alehdi sapwellime kapai kan? Ahpw, e sohte pahn mengei en kolokol kanahieng atail kilelepen Kristian mehlel nan “ahnsou apwal akan.” (2 Timoty 3:1) Met pahn apwal ong irail me pwulopwul kan me kin keirida nan peneinei en Kristian. Emen pwulopwul kasalehda, “Mendahki I kin iang towehda mihding en Kristian kan, I sohte wiahda ai mehn akadei kan ni pali ngehn, oh pil sohte ai ineng en papah Siohwa.”

³ Ekei kin ni mehlel perenki papah Siohwa, ahpw mwuhr irail kin mweidong mehn kerempwa kan en kaluwetala irail duwehte iengerail tohnsukuhl akan, de iengerail tohndoadoahk kan, de irairen sampah wet, oh pein arail ineng suwed akan. Ni ahnsou me kitail kin lelohng kahpwal pwukat, e pahn kak ekis ekis kahrehong kitail en sohlahr kolokol atail kilelepen Kristian mehlel. Karasepe ieu, aramas tohto nan sampah wet kin kilangwong sapwellimen Pwuhk Sarawi kaweid kan me pid tiahk kan nin duwen kaweid kan ong aramas en mahs mahsie de kaweid pwukat sohte konehng ong atail ahnsou. (1 Piter 4:4) Pil ekei aramas kin lemeleme me e sohte kesempwal en kaudokiong Koht ni ahl me E ketin kupwurkin kitail en wia. (Sohn 4:24) Nan sapwellimen Pohl kisinlikou ong mehn Episos kan, e kasalehda me sampah wet kin ahneki “ngehn” ieu de madamadau kehlail ieu. (Episos 2:2) Ngehn wet kin kahrehong aramas akan en ahneki madamadau sampah ieu me sohte kin ese Siohwa.

4. Iaduwen Sises kawehwehda duwen uwen kesempwal kitail en kolokol kilelepen Kristian mehlel akan?

⁴ Ahpw, nin duwen sapwellimen Siohwa ladu kan me inoukihda atail mour ong Ih kitail pohnese me e pahn imwikihla suwed ong kitail​—pwulopwul de mah​—ma kitail pahn kesehla atail kilelepen Kristian mehlel. En ahneki madamadau pwung ong kilelepen Kristian kak wiawi ma e pahn poahsonda pohn sapwellimen Siohwa kaweid kan oh dahme E kin kasik kitail en wia. Met konehng pwe kitail koaros wiawihda rasehng Koht. (Senesis 1:26; Maika 6:8) Pwuhk Sarawi kin karasaiong atail kilelepen Kristian ong likou pwe koaros pahn kak kilang. Nan atail ahnsou, Sises mahsanih: “Kumwail mwasahn, pwe I pahn kohdo duwehte lipirap emen. Meid pai me kin pepehd oh mwasamwasahn, oh kin apwalih eh likou kan pwe en dehr kin kilisou kohkohseli oh namenekla mwohn aramas akan.”a (Kaudiahl 16:15) Kitail sohte men ni karasaras kihsang atail likou kan oh met kin wehwehki dehr kesehla atail irair akan oh tiahk en Kristian, oh dehr mweidong ahn Sehdan sampah en kaunda kitail. Pwe, ma met pahn wiawi, kitail kin mwomwen kesehla atail “likou kan.” Soangen irair wet pahn kanamenek.

5, 6. Dahme kahrehda en kehlail ni pali ngehn inenen kesempwal?

⁵ Ma emen pahn kolokol kilelepen Kristian mehlel, met pahn kak wia mehn kaweid ong eh mour. Dahme kahrehda kitail kin nda met? Ma emen tohnkaudok en Siohwa pahn sohlahr kolokol kilelepen Kristian, e pahn kak wiahla aramas emen me sohte kin ahneki mehn akadei mwahu kan. Pwuhk Sarawi kin pwurpwurehng kaweidkin kitail duwen aramas kohwei kohdo. Tohnpadahk Seims kihda kaweid wet, “Pwe me kin peikasal rasehng iloak en nan madau kan me kin pwungupwungudengkiseli kisinieng. Soangen aramas menet sohte kak koasoanehdi eh lamalam, oh pil aramas kohweikohdo ni eh mwekid koaros, eri, en dehr lemehiong me e pahn kak ale mehkot sang rehn Kauno.”​—Seims 1:6-8; Episos 4:14; Ipru 13:9.

⁶ Iaduwen kitail kak pere atail kilelepen Kristian? Dahme pahn kak sewese kitail en kamwahuwiala atail pwais kaselel en wiahla tohnkaudok en Wasa Lapalahpie? Menlau tehk duwen ekei kahk pwukat.

Kakehlahda Omw Kilelepen Kristian Mehlel

7. Dahme kahrehda e pahn mwahu kitail en peki rehn Siohwa en kasawiahda kitail?

⁷ Kakehlahda omw nanpwungmwahu rehn Siohwa. Mehkot me keieu kesempwal emen Kristian kin ahneki iei ah nanpwungmwahu rehn Koht. (Melkahka 25:14; Lepin Padahk 3:32) Ma kitail kin peikasalki atail kilelepen Kristian, kitail anahne kasawiahda mwahu duwen ia uwen kehlail atail nanpwungmwahu rehn Koht. Sounmelkahkao wie pekipek wet: “Maing Kaun, komw ketin sohng ie oh kasawih ie; komw ketin kadeikada duwen ei ineng kan oh lamalam akan.” (Melkahka 26:2) Dahme kahrehda soangen keseu wet me kesempwal? Pwehki pein kitail sohte kak kasawih atail pepehm loal kan ni ahl me pwung. Ihte, Siohwa kin kak wehwehki duwen loalatail kan​—atail madamadau kan oh pepehm akan.​—Seremaia 17:9, 10.

8. (a) Pwehki Siohwa kin ketin mweidong kitail en lelong kasongosong kan, iaduwen kitail kin paiekihda? (b) Dahme kin sewese iuk en kekeirada nin duwen Kristian emen?

⁸ Sang ni atail kin peki rehn Siohwa en kasawihada pein kitail, kitail kin luhke ih en song kitail. E kak mweidong kitail en lelong kahpwal akan pwe met pahn kasansalehda atail ineng kan oh irairen mohngiongitail kan. (Ipru 4:12, 13; Seims 1:22-​25) Kitail anahne kasik soangen kasongosong kan pwe kahpwal pwukat kin kihong kitail ahnsou en kasalehda ia uwen loal atail lelepek ong Siohwa. Met pahn kak kasalehda ma kitail kin “unsengkihla mehlel oh sohte pahn anahne mehkot.” (Seims 1:2-4) Oh ni atail kin lelong kasongosong kan, iei ih ahnsou kitail kak kekeirada ni pali ngehn.​—Episos 4:22-​24.

9. Dahme kahrehda e kesempwal kitail en kamehlele me padahk kan en Pwuhk Sarawi me mehlel? Kawehwe.

⁹ Onop Pwuhk Sarawi pwen sewese kamehlelehiong uhk me met iei padahk mehlel. Atail kilelepen Kristian mehlel nin duwen sapwellimen Siohwa ladu kan pahn kak luwetala ma e sohte kin poahsoanda pohn loalokong en Pwuhk Sarawi. (Pilipai 1:9, 10) Kristian koaros​—pwulopwul de mah​—anahne kamehlele dahme e kin pwoson iei padahk mehlel me kohsang Pwuhk Sarawi. Pohl kin kangoange ienge tohnpadahk kan: “Kumwail kasawih mehkoaros; kumwail eri kolokol me mwahu kan.” (1 Deselonika 5:21) Kristian pwulopwul kan me kin keirda nan peneinei me kin lemmwiki Koht anahne en wehwehki me irail sohte kak wiahla Kristian mehlel akan pwehki ahr pahpa oh nohno kan kin iang padahk mehlelo. Semen Solomon, Depit, kin kangoange ih en “pohnese Koht en semomw oh papah ni mohngiong unsek.” (1 Kronikel 28:9) E sohte pahn itar pwulopwul menet, Solomon en kilang ah pahpa pwoson Siohwa. Pein ih anahne en pohnese Siohwa, oh Solomon kin wia met. E peki rehn Koht: “Komwi kupwurehkin ie kupwurokong oh erpit me I anahne pwe I en apwalih mwahu sapwellimomwi aramas pwukat.”​—2 Kronikel 1:10.

10. Dahme kahrehda e sohte sapwung en wia peidek inen kan ki mongiong mwakelekel?

¹⁰ Pwoson kehlail kin wiawihkihda loalokong. Pohl mahsanih, “Eri, pwoson kin pwilsang ni rong mahsen en Koht, oh rong mahsen en Koht kin pwilisang ni padahk duwen Krais.” (Rom 10:17) Ia wehwehn met? Met kin wehwehki ma kitail pahn momourki sapwellimen Koht Mahsen, met pahn kakehlahda atail pwoson en likih Siohwa oh sapwellime inou kan, oh sapwellime pwihn. Atail kin wia peidek inen kan duwen Pwuhk Sarawi pahn kak imwikihla pasepeng kan me pahn kak kakehlada atail pwoson. Oh pil, nan pwuhken Rom 12:2, kaweid en Pohl: “Eri, kumwail ahpw pahn esehda dahme kupwur en Koht-dahme mwahu, oh dahme e kin ketin kupwurperenki, oh dahme unsek.” Iaduwen kitail kak wia met? Sang ni atail kin alehda “loalokong pwung en padahk mehlelo.” (Taitus 1:1) Sapwellimen Siohwa ngehn sarawi kak sewese kitail en wehwehki padahk apwal akan. (1 Korint 2:11, 12) Kitail anahne kapakapki sapwellimen Koht sawas ni ahnsou me kitail kin apwaliki wehwehki mehkot. (Melkahka 119:10, 11, 27) Siohwa kin kupwurki kitail en wehwehki oh kamehlele sapwellime Mahsen, oh pil kapwaiada. E kin perenki kitail en wia peidek inen kan ki mongiong mwakelekel.

Nantiong en Kaperenda Koht

11. (a) Mehnia ineng me kitail kin ipwikihdi pahn kak kalidipih kitail? (b) Dahme pahn kak sewese kitail en pelianda kasongosong kan me kin kohsang iengatail kan?

¹¹ Kaperenda Koht, kaidehn aramas. Kitail kin ipwikihdi ineng en men kisehn pwihn en aramas ehu. Aramas koaros anahne kompoakepah kan, pwe met kin kahrehong kitail en nsenamwahu oh peren. Ni ahnsoun pwulopwul​—oh pil ni ahnsou kan mwurin mwo​—iengatail kan kin kak kahrehong kitail en ahneki ineng kehlail ieu en men alasang de kaperenda irail. Ahpw kompoakpatail kan oh iengetail kan sohte kin ahnsou koaros nsenohkin kitail. Ekei pak irail mwahuki emen en iangete irail pwen kak wia mehkot sapwung. (Lepin Padahk 1:11-​19) Ni ahnsou me Kristian emen kin lohdi pahn ienge kan, e kin kalapw song en ekihla ah kilelepen Kristian mehlel. (Melkahka 26:4) Wahnpoaron Pohl kihda kaweid wet, “Kumwail dehr kahlemengih wiewia kan en sampah wet.” (Rom 12:2, The Jerusalem Bible) Siohwa kin kakehlahda loalatail kan unsek pwen sewese kitail en uhwong kasongosong kan.​—Ipru 13:6.

12. Me pid duwen atail kin likih Koht, mehnia kaweid oh mehn kahlemeng dahieu pahn kak sewese kitail en kolokol atail pwoson?

¹² Ni ahnsou me iengatail kan kin song en kawehla atail kilelepen Kristian, kitail anahne tamanda atail lelepek ong Koht kin kesempwal sang madamadau en aramas akan de wiewia kan en pali moron en aramas akan nin sampah wet. Mahsen kan nan Eksodus 23:2 kin kihda kaweid mwahu ieu: “Pil dehr idawehn pali moron en aramas pwe met pahn imwikihla suwed.” Ni ahnsou me pali moron en mehn Israel akan tepida peikasalki sapwellimen Siohwa kehl me e kak kapwaiada sapwellime inou kan, Kalep kahng iang wiewia kan en pali moron en mehn Israel akan. E kin kamehlele me sapwellimen Koht inou kan kin likilik, oh e alehdi kapai kan. (Nempe 13:30; Sosua 14:6-​11) Ke pil pahn kak soikala madamadau de wiewia kan en pali moron en aramas akan pwen kak perehla ahmw nanpwung mwahu rehn Koht?

13. Dahme kahrehda elen loalokong en padahkiong mehteikan duwen atail kilelepen Kristian?

¹³ Padahkiong mehteikan me ke wia emen Kristian mehlel. Kitail anahne ni eimah pein uhkihda kilelepen me kitail wia Kristian mehlel akan. Ni mwehin Esra, mehn Israel lelepek kan wia met ni ahnsou me irail lelohng kalokolok kan pwe irail kasalehda met: “Kiht sapwellimen Koht en nanleng oh sampah ladu.” (Esra 5:11) Ma kitail kin mweidong madamadau oh kaweid kan en aramas suwed kan en kaun kitail, met pahn kak kahrehong kitail en masapwehkada. Ma kitail kin song en kaperenda aramas koaros, met pahn kak kaluwetekitailla. Eri, dehr mweidong aramas teikan en kamasak kitail. E pahn mwahu ahnsou koaros ken padahkiong meteikan me ke iang Sounkadehdehn Siohwa kan. Ni elen wahu ahpw inen, ke kak kawehwe ong meteikan soahng kan me ke kin kesempwaliki, ahmw pelien lamalam, oh pil ahmw pwukoa nin duwen Kristian emen. Padahkiong meteikan me ke wiahda ahmw inou me ke pahn kolokolete sapwellimen Siohwa koasondi ileile kan me pid tiahk mwakelekel. Kawehwe ni sansal me ahmw pilipil en kolokolete lelepek nin duwen Kristian mehlel men sohte kak wekidala. Kasalehda me ke kin perenki oh sohte namenengki ahmw tiahk mwakelekel. (Melkahka 64:10) Ni ahmw kin kasalehong aramas teikan duwen omw kin perenki kolokolete tiahk en Kristian, ke kin kak kakehle oh pere pein kowe, oh pil ke pahn kak kamwekid ekei aramas en wia peidek kan duwen Siohwa oh sapwellime aramas akan.

14. Kitail pahn mworusala ma aramas akan pahn kauwe de uhwong kitail? Kawehwe.

¹⁴ Ei, ekei aramas mwein pahn kauwe de uhwong uhk. (Sud 18) Ma mehteikan sohte kin perenki omw kin nantiong kawehwehong irail dahme ke kin kesempwaliki, eri, ken dehr mworusala. (Esekiel 3:7, 8) Sohte lipilipil uwen laud omw kin nantiong kawehwehong aramas teikan, ke sohte pahn kak kawekila ahr madamadau kan ma irail sohte inangih en kamehlele padahk mehlel. Tamanda Parao. Kalokolok ehu de manaman​—de mehlahn sapwellime mesenih​—sohte kak kawekila ahn Parao madamadau en kamehlele me Siohwa kin ketin doadoahngki Moses en mahsanihong ih. Ihme kahrehda dehr masak aramas. Likih oh pwoson Koht pahn kak sewese kitail en powehdi masak aramas.​—Lepin Padahk 3:5, 6; 29:25.

Sukuhliki sang Dahme Wiawi Mahs, oh Kaunopada ong ni Ahnsou Kohkohdo

15, 16. (a) Dahkot atail sohso en pali ngehn? (b) Oh iaduwen kitail kak paiekihda sang ni atail kin doudouloale duwen atail sohso ni pali ngehn me pid Mahsen en Koht?

¹⁵ Kesempwaliki ahmw sohso en pali ngehn. Me pid Mahsen en Koht, Kristian akan kin ale kapai kan ni arail kin doudouloale duwen ahr sohso en pali ngehn. Sohso wet kin pid padahk mehlel en Sapwellimen Siohwa Mahsen, koapworopwor en mour soutuk, oh pwais kaselel en wiliandi Koht nin duwen sounkalohk kan en Rongamwahuo. Ke kak medemedewe duwen omw pwais nin duwen sapwellime Sounkadehde kan, nan pwihn en aramas me alehdi pwais kaselel en kalohki Rongamwahu en Wehio pwen komourala aramas akan? Tamanda, Siohwa kin kamehlelehiong kitail: “Kumwail nei sounkadehde kan.”​—Aiseia 43:10.

¹⁶ Ke kak pein idek rehmw soangen peidek pwukat: ‘Ia uwen laud I kin kesempwaliki ahi sohso en pali ngehn? Uwen ahi kin kesempwaliki sohso wet kin kamwekid ie en keieu kesempwaliki wia kupwuren Koht nan ei mour? Ai kin kesempwaliki sohso wet kin sewese ie en pelianda kasongosong kan me pahn kak kahrehong ie en kesehla ahi sohso?’ Atail sohso en pali ngehn pil kak kihong kitail meleilei ni pali ngehn, oh met pahn kak wiawi ihte nan sapwellimen Siohwa pwihn. (Melkahka 91:1, 2) Kousapahlih wiewia kaselel kan me kohsang poadoapoad en sapwellimen Siohwa pwihn en nan rahn pwukat pahn kak kamehlelehiong kitail me aramas de mehkot sohte kak kasohrehla sapwellimen Siohwa aramas akan.​—Aiseia 54:17; Seremaia 1:19.

17. Dahme anahn laudsang ihte likih atail sohso en pali ngehn?

¹⁷ Ni mehlel, kitail sohte kak likihte pein atail sohso en pali ngehn. Pein emen emen kitail anahne nantiong kakehlailihala atail nanpwungmwahu rehn Koht. Mwurin Pohl doadoahk laud en kakehlahda pwoson en irail Kristian akan nan Pilipai, e nting ong irail: “Eri kompoakepahi ko, kumwail kin peikiong ie ahnsou koaros ni ei mihmi rehmwail, ahpw e pahn keieu mwahu ma kumwail peikiong ie ahnsou wet ni ei dohsang kumwail. Kumwail nantihong doadoahk ni lemmwin oh poadidi pwe kumwail en kaunsekala komourpamwail.” (Pilipai 2:12) Kitail sohte kak likih aramas teikan en kaunsekala komourpatail.

18. Iaduwen atail kin iang doadoahk en Kristian akan pahn kak kalaudehla atail kilelepen Kristian mehlel?

¹⁸ Iang wiewia kan en Kristian ni uwen me ke kak. Aramas akan kin nda me “doadoahk kin kak wiahda kasalepen aramas emen.” Rahnwet, Kristian akan aleier pwais en wia doadoahk kesempwal en kalohkiseli Rongamwahu en Wehin Koht me kaundahr nanleng. Pohl mahsanih: “Erein ei pahn pwaisanki pwukoahn wahnpoaron en mehn liki kan I pahn kin suweiki doadoahk wet.” (Rom 11:13) Atail doadoahk en kalohk kin katohrohr kitail sang sampah wet, oh atail kin iang wia doadoahk wet kin kasansalehda atail kilelepen Kristian mehlel. Ma kitail pahn wia uwen atail kak en iang wia doadoahk en Kristian mehlel akan duwehte iang towehda mihding en Kristian akan, oh iang koasondi en kauwada wasahn kaudok kan, oh pil nantiong sewese aramas teikan me kin anahne sawas, soangen wiewia pwukat pahn kin kak kaloalehla kilelepen atail wia Kristian mehlel akan.​—Kalesia 6:9, 10; Ipru 10:23, 24.

Kilel Sansal en Kristian Ehu Kin Wahdo Kapai Mehlel akan oh Kamwahu kan

19, 20. (a) Pwehki omw kin wiahla Kristian mehlel emen, soangen kapai dah kan ke alehdier? (b) Dahme kin ketikihong kitail poahsoan kehlail ong ihs kitail?

¹⁹ Medemedewe duwen kapai tohto kitail kin paiekihda pwehki kitail wiahla Kristian mehlel akan. Kitail kin paiekihda Siohwa kin pohnese emen emen kitail. Soukohp Malakai mahsanih: “Eri, aramas akan me kin lemmwiki Koht ahpw koasoakoasoiapene nanpwungarail, oh Kauno ketin karonge oh kupwure duwen me re koasoia. Mwohn silangi, e ntingdier nan pwuhk ehu duwen irail kan me lemmwiki oh wauneki Kauno.” (Malakai 3:16) Koht kin kilangwong kitail nin duwen sapwellime kompoake kan. (Seims 2:23) Atail mour pahn kekeirkihda ma mie kahrepen atail mour, ma mie wehwe loal en atail mour, oh ma mehn akadei konehng oh katepe kan mie. Oh kitail pil kin ahneki koapworopwor en mour soutuk.​—Melkahka 37:9.

²⁰ Eri, tamataman me kilelepen ihs kitail oh ia uwen katepe emen emen kitail kin poahsonda pohn sapwellimen Koht kupwur, kaidehn dahme aramas akan kin medemedewehkin uhk. Aramas akan mwein pahn kasawihkin kitail ki arail koasondi soh unsek kan. Ahpw, sapwellimen Koht limpoak oh nsenohki emen emen kitail me kin poahsoanehda kehlail kitail en ese me kitail katapan mwohn Koht​—kitail iei sapwellime. (Madiu 10:29-​31) Atail limpoak ong Koht pahn kak kamehlelehda ihs kitail oh wia mehn kaweid keieu mwahu nan atail mour. “Me kin limpoakohng Koht, iei ih me Koht kin ketin mwahngih.”​—1 Korint 8:3.

[Nting tikitik me mi pahs]

Ke Tamatamante?

• Dahme kahrehda e kesempwal ong Kristian akan en perehla pein kilelepen ni pali ngehn?

• Iaduwen kitail kak kakehlada atail kilelepen Kristian mehlel?

• Ni ahnsou me kitail kin anahne pilada ihs me kitail pahn kaperenda, ia ekei irair akan me pahn kak sewese kitail en wiahda pilipil pwung?

• Iaduwen ma kitail pahn wehwehki ihs kitail pahn kak sewese dahme pahn wiaiong kitail nin duwen Kristian akan?

[Kilel nan Pali 19]

Wia uwen atail kak en iang wia doadoahk en Kristian mehlel akan kak kaloalehla atail kilelepen Kristian mehlel