Neitail Seri Kan —Sohso Kesempwal Ehu
“Seri kan, iei kisakis ehu sang rehn Siohwa, uhdahn kapai ehu sang reh.”—MELKAHKA 127:3, NW.
1. Iaduwen keieun seri wiawihda oh ipwidi?
MEDEWEHLA soangen manaman kan me Siohwa kahrehda en kak pweida ki ah kapikada tepin ohl oh lih. Ira koaros, Adam, pahpa men, oh pil Ihp, nohno men, kihda mehkot sang paliwarara me uhd wiawihda nan kapehden Ihp oh wiahla aramas emen—iei tepin seri. (Senesis 4:1) Leledo atail ahnsou, kitail kin inenen pwuriamweikihla duwen mwomwen seri wiawihda nan kapehden nohno men oh ipwidi en seri men oh aramas tohto kin nda me mehpwukat kin wia manaman kapwuriamwei ehu.
2. Dahme kahrehda ke pahn kak nda me dahme wiawi nan kapehden nohno liseian emen kin wia manaman ieu?
2 Erein rahn 270, tepin war me wiawihda nan kapehden nohno men pwehki eh ehuiongehr ah pwoud ohl, kin wia kekeirada lao e wiahla seri men me wiawihkihda kisin war (cell) trillion kei. Tepin war kin audaudkihda mwomwen kaweid kan me pahn kak wiahda tohto sang soangsoangen kisin war 200. Aramas sohte kak wehwehki ahpw kaweid pwukat me mih nan tepin waro kin kak wiawihda ni soandi pwung oh oaretik pwen wiahla mour kapw ehu!
3. Dahme kahrehda aramas tohto me kin ahneki madamadau pwung kin kamehlele me Koht kin ketin kapikada koasoandi en ipwidien aramas emen?
3 Ahpw, ihs me uhdahn wiahda serio? Iei Ih me tepin kapikada mour. Sounmelkahka en Pwuhk Sarawi koulki: “Dehr manokehla me Siohwa iei Ih Koht. Ih me ketin wiaikitailda, kaidehn pein kitail.” (Melkahka 100:3, NW) Pahpa oh nohno, kumwa ese me kaidehn amwa koahiek de loalokong me kahrehong kumwa en kak wiahda kisin mour kesempwal ehu me iei noumwa seri. Ihte emen Koht me kin sapwellimaniki erpit laud me kak wia manaman en wiahda aramas emen. Erein sounpar kid kid kei, aramas tohto kin ahneki madamadau loal kin pohnesehki me Koht, Sounkapikpatail Lapalap, me ketin koasoanehdi wiawihdahn seri emen nan kapehden ah nohno. Ke pil kin kapinga Siohwa Koht, Sounkapikpatail, pwehki sapwellime manaman kapwuriamwei wet?”—Melkahka 139:13-16.
4. Sapwung en aramas dahieu me Siohwa sohte kak wia?
4 Iaduwen—Siohwa kin wia Sounkapikpatail me sohte kin nsenohki aramas akan, oh ihte wiahda koasondi ieu ong ohl oh lih en wiahda seri kan? Ekei aramas sohte kin nsenohki aramas teikan, ahpw Siohwa kin weksang met. (Melkahka 78:38-40) Pwuhk Sarawi mahsanih nan pwuhken Melkahka 127:3: “Seri kan, iei kisakis ehu sang rehn Kauno [“Siohwa,” NW]; uhdahn kapai ehu sang reh.” Ni ahnsouwet, kitail pahn sukuhliki ia wehwehn sohso oh dahme met kin kadehde ong kitail.
Sohso oh Kisakis Ehu
5. Dahme kahrehda seri kan iei sohso ieu?
5 Sohso ieu kin duwehte kisakis. Pahpa oh nohno kan kin doadoahk laud oh nantihong kihong neirail seri kan sohso ieu. Ekei ahnsou, e pid mwohni, sahpw, de mehkot me kesempwal. Sohte lipilipil soangen dipwisou dah kei, pwe met iei kasalepen limpoak en pahpa de nohno men. Pwuhk Sarawi mahsanih me Koht kin ketikihong pahpa oh nohno kan neirail seri kan nin duwen sohso ieu. Seri kan iei kisakis limpoak ieu me kohsang rehn Koht. Ma ke wia emen pahpa de nohno, ke lemeleme me ahmw wiewia kan kin kasalehda me ke kin kilangwong noumw seri kan nin duwen kisakis ieu me Sounkapikadahn lahng oh sampah ketikihong uhk en apwalih?
6. Ia kupwuren Koht ong aramas akan en naineki seri kan?
6 Kahrepe Siohwa ketikihda kisakis wet iei met: E kupwurki sampah wet en direkihla kadaudok kan en Adam oh Ihp. (Senesis 1:27, 28; Aiseia 45:18) Siohwa ketin kapikada emen emen tohnleng rar rar kei, ahpw e sohte kapikada emen emen aramas koaros. (Melkahka 104:4; Kaudiahl 4:11) Weksang met, Koht ketin pilada en kapikada aramas akan pwe irail pahn kak wiahda seri kan me pahn ahneki irair akan duwehte arail pahpa oh nohno kan. E kin wia pwais kaselel ong emen nohno oh emen pahpa en wiahda oh apwalihada seri kapw emen! Nin duwen pahpa oh nohno kan, kumwail kin kalahnganki Siohwa pwe E ketikihong kumwail sohso kesempwal me kumwail en perenki?
Sukuhlikihsang Mehn Kahlemeng Mwahu en Sises
7. Weksang dahme ekei pahpa oh nohno kan kin wia, iaduwen Sises kasalehda me e kin nsenohki oh poakpoake “aramas akan”?
7 E inenen kansensuwed en kilang me kaidehn pahpa oh nohno koaros kin kilangwong seri kan nin duwen kisakis ieu. Pahpa oh nohno tohto sohte kin poakpoake neirail seri kan. Pahpa oh nohno pwukat sohte kin alasang Siohwa oh Sapwellime Ohl. (Melkahka 27:10; Aiseia 49:15) Weksang pahpa oh nohno pwukat, kilang ia uwen laud Sises kin poakpoake irail me pwulopwul kan. Mwohn Sises ketidihdo sampah wia aramasala—ih emen tohnleng kehlail nanleng—Pwuhk Sarawi mahsanih me “I perenkihda aramas akan koaros.” (Lepin Padahk 8:31) Sapwellime limpoak ong aramas akan me inenen laud pwe e pein ketikihda ah mour nin duwen tomw ehu pwe kitail kak alehdi mour soutuk.—Madiu 20:28; Sohn 10:18.
8. Iaduwen Sises wia mehn kahlemeng mwahu ong pahpa oh nohno kan?
8 Ni ahnsou Sises ketiket nin sampah, e wia mehn kahlemeng mwahu ong pahpa oh nohno kan. Tehk duwen dahme e ketin wia. E isaneki ahnsou en mihmi rehn seri kan, edetehn e kedirepw oh pwunod laud. E kin kilang irail mwadomwadong nan wasahn netinet kan oh e kin doadoahngki dahme e kilang ong ah padahk kan. (Madiu 11:16, 17) Ni kaimwiseklahn ah seiloak ong Serusalem, Sises ese me e pahn lelohng kalokolok oh kamakamala. Ni ahnsou me aramas akan kin kahrehlahng Sises kisin seri kan, sapwellimen Sises tohnpadahk kan kidahwekihda seri pwukat, pwen dehr kapwunodih Sises. Ahpw Sises kapwungala sapwellime tohnpadahk kan. E kin kasalehda ah kin “perenkihda” seri kan, e mahsanih: “Kumwail pweisang kisin seri kan pwe re en kohdo rehi. Kumwail dehr ireiraildi.”—Mark 10:13, 14.
9. Dahme kahrehda atail wiewia kan kin wia mehkot kesempwal sang atail lokaia kan?
9 Kitail kak sukuhliki sang mehn kahlemeng mwahu en Sises. Ni ahnsou me irail pwulopwul kan kin kohdo rehtail, dahme kitail kin wia—edetehn kitail kin kedirepw? Duwehte Sises wia? Dahme seri kan keieu anahne sang arail pahpa oh nohno kan, iei dahme Sises perenki kihong seri kan—sapwellime ahnsou oh nsenoh. Ni mehlel, lepin lokaia pwukat “I poakohng uhk” inenen kesempwal. Ahpw, wiewia kan kin kesempwalsang lokaia kan. Limpoak kin sansalkihda kaidehn sang atail lokaia kante ahpw keieu sang atail wiewia kan. Ahnsou, nsenoh, oh epwel mwahu me kitail kin kihong neitail seri kan kin kasalehda me kitail kin poakong irail. Edetehn pahpa oh nohno kan pahn wia met, mwein e sohte pahn mwadang pweida. Kitail anahne kasalehda kanengamah. Kitail kak sukuhliki duwen kanengamah ma kitail pahn kahlemengih sapwellimen Sises wiewia ong sapwellime tohnpadahk kan.
Sapwellimen Sises Kanengamah oh Limpoak Mehlel
10. Iaduwen Sises padahkiong sapwellime tohnpadahk kan duwen irairen aktikitik, oh e pweida nin tapio?
10 Sises kin wehwehki me sapwellime tohnpadahk kan kin ahnsou koaros siaipene nanpwungarail duwen ihs me pahn keieu lapalap rehrail. Ehu rahn, irail mihmi nan Kapernaum, oh Sises idek rehrail, mahsanih: “ ‘Dahme kumwail akahkamaiki kohdo nanialo?’ A irail nennenlahte, sohte sapeng; pwe re akahkamaiki kohdo ihs me keieu lapalap rehrail.” Ahpw Sises sohte lipwoare irail, ahpw ni kanengamah e kihda karasaras pwe en padahkiong irail duwen irairen aktikitik. (Mark 9:33-37) E pweida? E sohte mwadang pweida. Pwe sounpwong weneu mwurin met, Seims oh Sohn kangoange ara nohno en peki rehn Sises en ketikihong ira pwais laud kan nan Wehio. Ahpw, Sises pwurehng ni kanengamah kapwungala ara madamadau sapwung kan.—Madiu 20:20-28.
11. (a) Tiahk dahieu me sapwellimen Sises wahnpoaron akan sohte men wia ni ahnsou me irail oh Sises lellehr nan ehu pere? (b) Dahme Sises wia, oh ah mehn kasukuhlih irail pweida ni ahnsowo?
11 Rahn en Pahsohpa en pahr 33 C.E. leledohr, oh Sises oh sapwellime wahnpoaron kan kohpene pwehn kasarawi Pahsohpa. Ni ahnsou me irail kohpene nan pere ieu, sohte emen sang rehn irail wahnpoaron 12 men wia tiahk en widen patehnehn meteikan—iei doadoahk en ladu emen de lih emen nan peneinei. (1 Samuel 25:41; 1 Timoty 5:10) Ia uwen laud met kin kansensuwedihala Sises en kilang me sapwellime tohnpadahk kan kin pousehlahte rapahki pwukoa laud ong pein irail! Eri, Sises widen patehnehn sapwellime wahnpoaron kan oh peki rehrail en kahlemengih ih ni ah kin papah meteikan. (Sohn 13:4-17) Iaduwen—irail idawehn Sises? Pwuhk Sarawi kasalehda me mwuhr—ni soutik—“tohnpadahk ko ahpw akamaikihda ihs me pahn lapalap rehrail.”—Luk 22:24.
12. Iaduwen pahpa oh nohno kan kin kak kahlemengih Sises ni ahr kin nantiong kaiahne neirail seri kan?
12 Ni ahnsou me noumwail seri kan sohte kin kapwaiada amwail kaweid kan, kumwail pahpa oh nohno kan kin wehwehki duwen pepehm en Sises? Tamanda me Sises sohte uhdi sang sewese sapwellime wahnpoaron kan, edetehn irail pwand en kapwungala pein arail sapwung kan. E sansal me mwuhr, sapwellime kanengamah pweida. (1 Sohn 3:14, 18) Pahpa oh nohno kan, ke pil anahne kahlemengih sapwellimen Sises limpoak oh kanengamah, dehr uhdi sang amwail nantiong kaiahne noumwail seri kan.
13. Dahme kahrehda pahpa de nohno men en dehr lemeiong nah seri men me wia peidek rehrail?
13 Irail me pwulopwul kan anahne kehn limpoak oh nsenoh sang arail pahpa oh nohno kan. Sises men wehwehki dahme sapwellime tohnpadahk kan kin medemedewe, eri e kin rong ni ahnsou irail kin wia peidek kan reh. E pil kin peidek rehrail pwen kahrehong irail en kasalehong ih duwen arail madamadau kan. (Madiu 17:25-27) Ei, ma aramas emen men wiahla sounpadahk mwahu, e anahne rong kanahieng oh nsenohki pepehm en aramas teikan. Pahpa de nohno men anahne kanahieng pwe irail sohte pahn nda met ma neirail seri men me kohwei rehrail oh wia peidek: “Kohkohla! Ke sohte kak kilang me I kedirepw?” Ma pahpa de nohno men uhdahn kedirepw, e anahne padahkiong serio me e pahn koasoiong ih mwuhr. Ahpw, pahpa oh nohno kan en dehr manokehla koasoiong neirail serio mwuhr. Ni ahl wet, serio pahn kak kilang oh kehn me ah pahpa de nohno kin nsenohkin ih, oh met pahn kahrehong seri menet en mengeiki likih ah pahpa de nohno.
14. Dahme pahpa oh nohno kan kak sukuhliki sang rehn Sises me pid duwen kasalehda limpoak ong neirail seri kan?
14 E konehng irail pahpa oh nohno kan en kasalehda arail limpoak ong neirail seri kan sang ni ahr kin pwoalehdi irail? Ehi, pahpa oh nohno kan kak sukuhliki sang rehn Sises. Pwuhk Sarawi mahsanih me Sises ketin “pwoalehdi seri ko oh ketikidahng lime ko pohn emen emen irail oh kupwuramwahuwihirailla.” (Mark 10:16) Iaduwen irail seri ko mwekidki met? Irail nsenamwahula oh irail men karanih Sises! Ma mie limpoak mehlel nanpwungen kumwail oh noumwail seri pwulopwul kan, e pahn mengeiong irail en mwekidki omw kin nantiong kaiahne oh kaweid irail.
Ia Uwen Laud Ahnsou Ke Pahn Mih Rehn Noumw Seri kan
15, 16. Ia madamadau ieu me pahpa oh nohno tohto kin ahneki me pid kekeirada seri kan, oh dahme kahrehda madamadau wet pwarada?
15 Ekei aramas kin medemedewe ma pahpa oh nohno kan anahne kihong neirail seri kan arail ahnsou oh limpoak. Utuht en madamadau ieu kin kohda me pid duwen kekeiradahn seri kan, oh irail kin kadanehkihla madamadau wet ahnsou mwahu. Irail akan me kin utungada madamadau wet, dene me seri kan sohte anahne arail pahpa oh nohno kan en mihmi rehrail ahnsou koaros, ahpw keieu kesempwal pahpa oh nohno kan en koasoanehdi mwahu dahme irail pahn koasoiong neirail seri kan ni ahnsou mwotomwot. Eri, madamadau wet en mih rehn seri kan ni ahnsou mwotomwot ahpw ahnsou mwahu iei kin medemedewe duwen irail me pwulopwul kan?
16 Soun nting men me koasoiongehr seri tohto, oh e diarada me irail “keieu mwahuki sang arail pahpa oh nohno kan iei arail ahnsou,” oh pil “arail pahpa oh nohno kan en rong kanahieng dahme irail kin koasoia.” Emen professor en ehu college koasoia: “Lepin lokaia pwukat [ahnsou mwahu] kin wiawihda pwehki pahpa oh nohno kan ahr kin wehwehki me irail sohte kakohng wia ahr pwukoa. Aramas akan kin wiahda kahrepe likamw akan pwe irail pahn mih rehn neirail seri kan ni ahnsou mwotomwot te.” Ia uwen laud ahnsou pahpa oh nohno kan anahne mih rehn neirail seri kan?
17. Dahme seri kan anahne sang arail pahpa oh nohno kan?
17 Pwuhk Sarawi sohte kin kasalehda ni oaritik. Ahpw, mehn Israel pahpa oh nohno kan kin ale kangoang en koasoiong neirail seri kan ni ahnsou me irail kin mihmi nan imwarail kan, ni ahnsou me irail kin alialuseli nanial, oh ni ahnsou me irail kin kommoal oh ni ahnsou me irail kin pirida. (Deuderonomi 6:7) Met kin kasalehda me irail pahpa oh nohno kan en wia uwen arail kak en ahnsou koaros koasoiong neirail seri kan oh padahk ong irail rahn koaros.
18. Iaduwen Sises kin isaneki ahnsou mwahu kan ong kaiahne sapwellime tohnpadahk kan, oh dahme pahpa oh nohno kan kak sukuhliki sang met?
18 Sises kin kasukuhlih sapwellime tohnpadahk kan ni ahnsou me e kin mwengemwenge rehrail, iang irail seiloak kan, oh pil ni ahnsou me irail kin kommoal. E kin isaneki ahnsou mwahu en padahk ong irail. (Mark 6:31, 32; Luk 8:1; 22:14) Duwehte irail Kristian pahpa oh nohno kan, irail anahne en doadoahngki mwahu ahnsou kan en koasoiong neirail seri kan oh kaiahne irail ni sapwellimen Siohwa ahl akan.
Dahme Kitail Pahn Padahkiong Irail oh Iaduwen Kitail Pahn Wia Met
19. (a) Dahme pil anahn likin atail kin mih rehn neitail seri kan? (b) Dahme pahpa oh nohno kan anahne padahkiong neirail seri kan?
19 E sohte pahn pweida ma pahpa oh nohno kan pahn ihte mihmi rehn neirail seri kan oh padahk ong irail. Dahme irail pahn padahkiong neirail seri kan pil kesempwal. Tehk dahme Pwuhk Sarawi kin kawehwehda duwen audepen ahn pahpa/nohno arail padahk kan ong neirail seri kan. E mahsanih, “Mahsen pwukat me I padahkiong kumwail rahnwet, kumwail anahne padahkihong . . . noumwail seri kan.” “Mahsen” en ihs me seri kan anahne en sukuhliki? E sansal duwen pasapengpen peidek wet pwe e ntingihdi mwowe: “Eri, ke en poakohng Kauno [“Siohwa,” NW] omw Koht sang nan mohngiongomw unsek, ni ngenomw unsek, oh ni omw kehl koaros.” (Deuderonomi 6:5-7) Sises mahsanih me kosonned wet iei me keieu kesempwal sang rehn sapwellimen Koht kosonned koaros. (Mark 12:28-30) Pahpa oh nohno anahne ni keieu padahkiong neirail seri kan duwen Siohwa, kawehwehda dahme kahrehda Ih kelepw me warohng atail limpoak oh kaudok sang atail mohngiong unsek.
20. Dahme Koht padahkiong pahpa oh nohno kan en ni ahnsou mahs en kasukuhliki neirail seri kan?
20 Ahpw, kangoang kohwong pahpa oh nohno kan en padahkiong neirail seri kan “mahsen pwukat” kin wehwehki kaidehn ihte limpoak ong Koht oh pein kitail. Pwe nan irelaud en mwowe nan pwuhken Deuderonomi, Moses pwurehng kasalehda duwen kosonned akan me Koht ntingihdi nan takai ko—iei Kosonned Eiseko. Audepen kosonned pwukat kin pid dehr likamw, dehr pirap, dehr kamaramas, dehr kamwahl. (Deuderonomi 5:11-22) Eri, pahpa oh nohno kan en mahs kin ale kangoang en padahkiong neirail seri kan duwen tiahk mwakelekel kan. Kristian pahpa oh nohno kan en rahnwet pil anahne kihong neirail seri kan soangen kaweidohte ma re men sewese irail en ahneki koapworopwor meleilei oh peren.
21. Ia wehwehn kaweid wet “padahkiong” sapwellimen Koht mahsen ong irail me pwulopwul kan?
21 Tehk me pahpa oh nohno kan kin ale kaweid me pid iaduwen irail pahn padahkiong “mahsen pwukat,” de kosonned akan, ong neirail seri kan: “Padahkiong noumwail seri kan.” Lepin lokaia wet “padahkiong” kin wehwehki “pwurpwurehng kaweid seri kan: kangoange de katengehdi nan arail madamadau.” Eri, Koht kin padahkiong pahpa oh nohno kan en wiahda koasondi ieu ong kihda kaweid en Pwuhk Sarawi me pahn kak katengehdi mehkan ni pali ngehn nan madamadau en neirail seri kan.
22. Kaweid dahieu kohwong irail mehn Israel pahpa oh nohno kan me pid duwen ahr pahn kaweid neirail seri kan, oh ia wehwehn kaweid wet?
22 Soangen koasoandi wet kin kahrehong pahpa oh nohno kan en nannanti. Pwuhk Sarawi mahsanih: “Salihediong padahk pwukat [“mahsen pwukat,” de kosonned kan en Koht] ni pehmwail oh nin temwamwail pwehn wia mehn kataman ong kumwail. Ntingihediong ni uhren imwamwail kan oh pil ni amwail ewen kehl akan.” (Deuderonomi 6:8, 9) Met sohte kin wehwehki me pahpa oh nohno kan anahne ntingihdi sapwellimen Koht kosonned akan ni uhren imwarail kan, de saliehdiong mahsen pwukat ni pehrail kan, oh nin temwarail kan. Ahpw, mouren padahk pwukat kin wehwehki me irail pahpa oh nohno kan anahne ahnsou koaros katamankin neirail seri kan duwen padahk kan en Koht. Irail anahne padahkiong neirail seri kan ahnsou koaros, pwe mwomwen sapwellimen Koht padahk kan kin mih mwohn neirail seri kan ahnsou koaros.
23. Dahme kitail pahn sukuhliki nan artikel en mwurin met?
23 Ia ekei padahk kesempwal kan me irail pahpa oh nohno kan anahne padahkiong neirail seri kan? Dahme kahrehda e kesempwal ong seri kan en rahnwet en sukuhliki iaduwen irail pahn kak perehla pein irail? Ni ahnsouwet, sawas dah kei kin kohwong pahpa oh nohno kan en padahkiong neirail seri kan ni ahl me pahn pweida mwahu? Peidek pwukat oh pil peidek teikan me pahpa oh nohno kan kin wia pahn pwarada nan artikel en mwurin met.
Iaduwen Ke Pahn Sapeng?
• Dahme kahrehda pahpa oh nohno kan anahne kesempwaliki neirail seri kan?
• Dahme pahpa oh nohno kan oh pil mehteikan kak sukuhliki sang rehn Sises?
• Ia uwen laud en ahnsou me irail pahpa oh nohno kan anahne mih rehn neirail seri kan?
• Dahme kitail anahne padahkiong seri kan, oh iaduwen padahk kan pahn kohwong irail?
[Kilel nan Pali 19]
Dahme pahpa oh nohno kan kak sukuhliki sang ni ahl me Sises wia sapwellime padahk kan?
[Kilel nan Pali 20]
Iahd oh iaduwen irail mehn Israel pahpa oh nohno kan kin padahkiong neirail seri kan?
[Kilel nan Pali 21]
Pahpa oh nohno kan anahne en padahkiong neirail seri kan sapwellimen Koht padahk kan ahnsou koaros