Ni Ahnsou me Emen me Kitail Poakohng Uhdihsang Papah Siohwa

¹ Mark oh Louise wia Sounkadehdehn Siohwa kan. Ira kin ni limpoak oh keneinei padahkihong neira seri kan iren Pwuhk Sarawi kan, nin duwen me Paipel padahkihong nohno oh pahpa Kristian kan. (Lep. Pad. 22:6; 2 Tim. 3:15) Ahpw e kansensuwed pwe ni ahnsou me irail laudla, kaidehn koaros pilada en doulahte papah Siohwa. Louise nda: “Ei mohngiong kin medekla ni ekei nei seri kan kin uhdihsang arail papah Siohwa. Iaduwen ei pahn kak mwomwehda me e sohte kamedek laud ong ie nan ehuehu rahn? Ni ahnsou me meteikan kin koasoia duwen neirail seri kan, I kin medekla oh nantihong dehr sengiseng.”

² Ei, ni ahnsou me emen kin pilada en sohpeisang Siohwa oh soangen mour me iren Paipel kan kin kangoange, kisehn arail peneinei me lelepek kan kin ahneki kansensuwed laud. Irene nda: “I uhdahn poakepoake riei serepeino. I pahn wia soahng koaros pwe en kak pwurodo rehn Siohwa!” Maria, me rie pwutako sohpeiweisang Siohwa pwe en kak mourki mour saledek, nda: “Met inenen apwal ong ie pwe ni soahng teikan koaros, e wia riei me inenen mwahu men. I kin loaleidki ih mehlel ni at peneinei kin pokonpene.”

³ Dahme Kahrehda E Nohn Apwal? Dahme kahrehda peneinei Kristian kan kin nohn nsensuwedla ma emen kisehn arail peneinei de kompoakparail kin sohla nsenohki arail nanpwungmwahu rehn Siohwa? Pwehki irail wehwehki me Paipel inoukihong irail kan me kin lelepekiong Siohwa me irail pahn ahneki mour soutuk nan paradais nin sampah. (Mel. 37:29; 2 Pit. 3:13; Kaud. 21:3-5) Irail kin kasikasik irail en iang kompoakparail kan, neirail seri kan, riarail kan, oh pil nein neirail seri kan perenki soangen kapai pwukat. Ia uwen eh kin kamedek ong irail ni ahnsou me emen me irail kin poakepoake kin uhdihsang papah Siohwa oh ele pahn katihasang soangen kapai pwukat! Pil duwehte rahnwet, Kristian kan kin wehwehki me sapwellimen Siohwa kosonned kan kin wia pein kamwahuparail ma irail pahn idawehn. Ihme kahrehda Kristian kan kin inenen nsensuwedkihla ni ar kilang irail akan me re kin poakohng ar kin padokedi soangen war akan me pahn imwikihla irail en dolung nsensuwed laud.​—Ais. 48:17, 18; Kal. 6:7, 8.

⁴ E pahn apwal ong ekei me saikinte lelong nan soangen irair wet en wehwehki ia uwen met eh inenen kansensuwed. Met kin kamwakidada soahng koaros nan mour. Louise nda: “E kin apwal ong ie ni ei kin kilang pahpa oh nohno kan arail kin pereperen oh koasoakoasoiong neirail seri kan nan mihding en Kristian kan. I kin uhd loaloid ni ahnsou me pokonpene kaperen kan kin wiawi pwehki irail kan me sohte kin iang.” Kristian elder men kin tamanda erein sounpar pahieu ahnsou me nein eh pwoud serepein sohla men patehng ira. E nda: “Pak tohto, pil ‘ahnsou mwahu kan’ kin wia ahnsou apwal kei. Ma I kin kihong ei pwoud kisakis ehu de wahla ih mwemweit wasa kis ni imwin wihk kan, e kin sengiseng pwehki e kin tamanda me nah serepeino sohte iang ih perenki met.”

⁵ Ei, ni en emen me kitail kin poakepoake kin kesehla arail nanpwungmwahu rehn Siohwa, met kin wia ehu songosong keieun apwal ong tohnkaudok mehlel kan. (Wiewia 14:22) Sises mahsanih me alehda sapwellime padahk kan pahn wahdo liaktohrohr nanpwungen peneinei kan. (Mad. 10:34-38) Met sohte wehwehki me padahk en Paipel kan kin kahrehda kailok nan peneinei. Ahpw, kisehn atail peneinei kan me sohte kin pwoson de lelepek kin kahrehda katohrohr nanpwungen peneinei pwehki arail kin soikala, kesehla de pil uhwongada elen Kristian kan. Ahpw, kitail kak kalahnganki Siohwa eh sohte kin ketin mweidohng sapwellime aramas lelepek kan en lelohng nan lokolok ahpw sohte ale sawas me pahn kak sewese irail en dadaurete pahn kalokolok kan. Ma met ke kin nsensuwedki emen me ke poakohng me kesehla eh nanpwungmwahu rehn Koht, soangen padahk en Paipel dah me kak sewesei komwi en dadaur nan ahmw nsensuwed pwe ken kak diar peren oh nsenamwahu?

⁶ Dadaurete: “Kumwail wiewiahte uwen me kumwail kak . . . , dadaurete ni limpoak en Koht.” (Sud 20, 21) Nan ekei irair kan, ele sohte mehkot ke pahn kak wia pwe en sewese emen tohn ahmw peneinei me kin uhdihsang papah Siohwa. Ahpw, ke kak oh anahne en kakehle pein kowe oh kisehmw me lelepek kan. Veronica, me naineki pwutak silimen oh meh riemen eri kesehla padahk mehlel, koasoia: “Ngehi oh ei pwoud kin ale mehn kataman me ma se pahn kolokolete at nanpwungmwahu rehn Siohwa, se pahn kak pil ehu kasamwohdo nait pwutak ko ni ara pahn pwurehng marainla. Ia pahn mwomwen pwutak me salongalahro ma eh pahpao sohte mih nan soahng irair me eh mih loale ni ahnsou me e pil ehu pwuredo?”

⁷ Pwe ken kak kehkehlailte ni omw nanpwungmwahu rehn Koht, ke anahne pwerisekiong wiewia mehkan me pid kupwuren Koht. Met pahn wehwehki ken wiahda oh kapwaiada koasoandi en onop Paipel oh iang towehda mihding en Kristian kan. Wiahda ahmw ahnsou pwe ken kak iang sewese meteikan nan mwomwohdiso ni uwen me ke kak. Mehlel, nin tapio e pahn apwal ong uhk. Veronica kin tamanda duwen met oh koasoia: “Ihme I tepin medewehda iei en katohreiehlahsang meteikan duwehte mahn emen me medekla oh men tohrohrala. Ahpw ei pwoudo kin koasoanehdi me se pahn wonlahte nan at koasoandi kan en at nanpwungmwahu rehn Koht. E kin tehk kanaiehng sen iang towehda mihding kan. Ni ahnsou eh leledo pwe sen kohla ni ehu kapokon, I uhdahn kin anahne kakehle pein ngehi pwe I en kak pwarala oh tuhwong meteikan. Ahpw, prokramo kin sewesei kiht en karanihala Siohwa. Nait pwutak me kolokolete eh lelepek pil inenen alehdi mehn kakehl laud sang ni kapokono.”

⁸ Maria, me kitail wadekehr duwen koasoiepe nin tepio, kin pil diarada me e inenen kin wia sawas laud ni ahnsou me e kin ngoangki iang kalohk oh ahnsouwet e kin onop Paipel rehn aramas pahmen. Me duwehte met, Laura pil koasoia: “Mendahki I kin sengiseng rahn koaros, I kin kalahngankihong Siohwa me mendahki I sohte pweida mwahu duwehte pahpa oh nohno teikan me kin pweida mwahu nan arail kakairada neirail seri kan, ahpw I kin ale padahk unsek kan sang nan Paipel, me kin sewese peneinei kan ni rahn en imwi pwukat.”

⁹ Dehr kesehla ahmw koapworopwor. Limpoak kin “likih mehkoaros.” (1 Kor. 13:7, NW) Ken nda: “Ni ahnsou me nei seri kan kesehla padahk mehlel, I kin medemedewe me met duwehte me re mehla. Ahpw mwurin riei serepeino mehla, ei madamadau wekila. I kalahnganki me nei seri kan saikinte uhdahn mehla oh Siohwa kin ketin mweidohng irail ahnsou pwe irail en kak pwurodo reh.” Ei, ekspiriens kan kin kasalehda me mie irail me tohto me kesehla padahk mehlel me kin mwuhr pwurodo rehn Siohwa.—Luk 15:11-24.

¹⁰ Dehr kapwukoahkin uhk. Pahpa oh nohno kan kin kalapw medewehla duwen mehkan me wiawi mahs oh kin uhd kaulimkihla ara sohte apwalihala irair kan ni ehu irair tohrohr. Ahpw, mouren padahk me dierek nan Esekiel 18:20 iei me Siohwa kin kapwukoahki ih me wiahda dihpo pein eh pilipil sapwung kan a kaidehn eh pahpa oh nohno. Mendahki pwuhk en Lepin Padahk kin pak tohto koasoia duwen ahn pahpa oh nohno pwukoa en kakairada seri kan ni ahl pwung, ahpw pak pahieu tohto sang met, e kin kihda kaweid kan ong seri kan en peikiong arail pahpa oh nohno kan. Ei, seri kan ahneki pwukoa en rong kaweid en Paipel kan me irail pahpa oh nohno soh unsek kan kin padahkiong irail. Mehnda ma ke pehm me ke wiahda sapwungala kei oh kowe me sapwung, met sohte wehwehki me ahmw sapwung kan pahn kahrehda irail akan me ke poakohng en kesehla padahk mehlel. Sohte lipilipil dah, e sohte pahn wia kamwahu ehu en “kolkoluhki dahme wiawi mahs.” Sukuhl sang ahmw sapwung kan, koasoanehdi nan kapehdomw ken dehr pwurehng wiahda sapwung pwukat, oh kapakapkiong Siohwa en mahkohng uhk. (Mel. 103:8-14; Ais. 55:7) Eri kilangwohng ahnsou kohkohdo ahpw kaidehn mehkan me wiawiher mahs.

¹¹ Wauneki Sapwellimen Siohwa koasoandi en kaiahn. Ma ahmw peneinei men ale kaiahn sang mwomwohdiso, tamataman me met iei kisehn sapwellimen Siohwa koasoandi oh ih me mwahuong koaros, iangahki me wiahda sapwungo. (Ipru 12:11) Eri, dehr song en kilang sapwung en elder kan me kin iang wiahda koasoandi kan. Tamataman, e kin keieu imwila mwahu ma ke kin idawehn kupwuren Siohwa kan, ahpw ma ke pahn uhwongada met, e pahn kalaudehlahte ahmw kahpwal kan.

¹² Mwurin mehn Israel kan pwurasang arail sella nan Isip, Moses kin kalapw wia arail sounkopwung. (Eks. 18:13-16) Pwehki soangen kopwung kan me emen kin pwung oh meteio sapwung, ke kak medewehla me ekei kin sapwungki ahn Moses koasoandi kan. Ni arail kin song en kilangada en Moses eh sapwung kan, ele met kin kahrehda ekei en kin uhwongada ahn Moses kaunda. Ahpw, Siohwa kin doadoahngki Moses en kahluwa Sapwellime aramas akan, oh E ketin kaloke irail akan me kin uhwong Moses iangahki arail peneinei kan me kin iang utung irail, ah kaidehn Moses. (Nemp. 16:31-35) Kitail kak sukuhliki sang met ni atail pahn song en wauneki oh utungada koasoandi kan en irail me kin apwalih koasoandi en Koht nan rahnwet.

¹³ Me pid met, Delores tamanda duwen eh inenen apwal ong ih en kolokol madamadau pwung ni ahnsou me nah serepein ale kaiahn sang mwomwohdiso. E nda: “Dahme sewese ie iei ni ei kin pwurepwurehng wadek artikel kan me pid duwen ahneki madamadau konehng me pid duwen koasoandi en Siohwa. I katohrehla ehu pwuhk tohrohr me I kin kilelehdi ire kesempwal kan sang nan padahk oh artikel me pahn sewese ie en kak kehlail oh wonoweite.” Met uhd doulahng ehu ahl kesempwal en kak dadaur.

¹⁴ Kasalehda ahmw pepehm kan. Ke kak diarada me e kin sawas en kak ehukihong emen de riemen me ke kin kak likihong ahmw pepehm loal kan. Ma ke pahn wia met, pilada kompoakepahmw me pahn sewese iuk en ahneki lamalam pwung ong irairo. E uhdahn pahn sawas ma ke pahn ‘kasalehiong ahmw apwal kan koaros’ ong Siohwa ni ahnsou me ke kin kapakap. (Mel. 62:7, 8) Pwekida? Pwehki e kin mwahngih uwen loal en ahmw pepehm kan. Karasepe, ele ke kin pehm me e sohte pwung ahmw lelohng soangen irair en pepehm wet. Ni mehlel, ke sohte kesehla Siohwa. Kasalehda ahmw pepehm ong Siohwa, oh peki en ketin sewese iuk en kak kilangwohng irairo ni ahl me sohte pahn nohk kamedek ong uhk.​—Mel. 37:5.

¹⁵ Ni ahnsou eh pahn dower powe, ele ke pahn kakehr koasoanehdi ahmw pepehm kan. Ahpw ni ahnsouwet, dehr uhdihsang nantihong kaperenda Samatail nanleng, oh dehr pehm me ahmw nanti sohte katepe. (Kal. 6:9) Tamataman, ma kitail pahn kesehla Siohwa, kitail pahn lellelohngete kahpwal kan. Ni pali teio, ma kitail pahn kolokol atail lelepek ong ih, e pahn sewese kitail ni ahnsou me kitail kin lelohng nan apwal. Ke kak koapworopworki me Siohwa kin ketin mwahngih irair me ke mihmi loale oh pahn kaukaule ketikihong uhk kehl me ke anahne ni ahnsou konehng.​—2 Kor. 4:7; Pil. 4:13; Ipru 4:16.

Ia Duwen Ahmw Pahn Dadaur

◆ “Kumwail wiewiahte uwen me kumwail kak . . . , dadaurete ni limpoak en Koht.”​—Sud 20, 21.

◆ Dehr kesehla ahmw koapworopwor.​—1 Kor. 13:7.

◆ Dehr kapwukoahkin uhk.​—Esek. 18:20.

◆ Wauneki Sapwellimen Siohwa koasoandi en kaiahn.​—Ipru 12:11.

◆ Kasalehda ahmw pepehm kan.​—Mel. 62:7, 8.