Mahsen en Siohwa Kin Ieias
Ire Kesempwal akan Sang nan Pwuhken Koulen Kedepwidepw kan
SOUKOHP Seremaia kilangehr pweidahn kokohp en kadeik me e kin pakpakairki erein sounpahr 40. Ia mwomwen pepehm en soukohp menet ni ahnsou me e pein kilangada ohlahn kahnimw me e uhdahn kesempwalki? Ehu kawehwehn Paipel me ong ni lokaiahn Krihk me adaneki Septuagint tepikihda koasoi pwukat mwohnte pwuhken Koulen Kedepwidepw kan: “Seremaia mwohndi sengiseng oh pahtoukihla Serusalem.” Pwuhk wet wiawihdahr nan pahr 607 B.C.E., ahnsou me soukohpo tamatamante kapilpene en kahnimwo me reireiki sounpwong 18 oh mwasikala en Serusalem. Kahrehda pwuhken Koulen Kedepwidepw kan kin uhdahn kasalehda ahn Seremaia nsensuwed loal. (Seremaia 52:3-5, 12-14) Sohte ehu kahnimw mie me aramas kasalehdahr soangen pahtou oh nsensuwed duwehte kahnimw wet.
Pwuhken Koulen kedepwidepw kan kin wiawihkihda koul limau. Keieu lel kapahieu wia koul en kedepwidepw kan; kelimau wia pekipek, de kapakap. Keieun koul lel kapahieu wia soangen sidail teieu, ehu ehu iretikitik kin tepikihda mesen nting en alphabet 22 en lokaiahn Ipru. Mendahki kelimaun koul wiawihkihda iretikitik 22 me pahrekiong nempe en mesen nting en alpahbet en lokaiahn Ipru, e sohte wiawihda nin duwen koasoandi en alphabet kan.
‘PWOAREN MESEI KAT MEDENGKILAHR EI SENGISENG’
(Koulen Kedepwidepw kan 1:1–2:22)
“Meid kansensuwed eh solahr tohn Serusalem, kahnimw me kin diren aramas mahs! Sampah pwon kin wauneki mahs, met e duwelahr liohdi men; Kahnimw keieu wauno wialahr lidu met.” Ih duwen soukohp Seremaia tepikihda koulen kedepwidepw kan duwen Serusalem. Soukohpo kasalehda kahrepen imwila suwed wet oh mahsanih: “KAUN-O ketin kaloke pwehki dihp tohto me e wiadahr.”—Koulen Kedepwidepw kan 1:1, 5.
Serusalem kin rasehng liohdi men me ah pwoud mehlahr, oh e koasoia: “Sohte emen me ahneki medek duwehte ngehi.” E kapakap ong Koht duwen ah imwintihti kan: “Komwi ketin kerieirailla pwehki ar wiewia suwed kan; Komw ketin kalokehkin irail diparail kan duwehte omwi ketin kalokehkinieier dipei kan. I wie weiweirek nan ei apwal, oh mohngiongi weikeklahr.”—Koulen Kedepwidepw kan 1:12, 22.
Seremaia uhdahn pahtoukihla oh mahsanih: “Nan sapwellime engieng [Siohwa] ketin kauwehla kehlail en Israel; E ketin soikala oh sohte kupwurki sewesei kitail ni ahnsou me imwintihtio leledo. E ketin engiengda pahtail rasehng kisiniei, me kamwomwala mehkoaros.” Pwehn kasalehda ah pahtou laud, soukohpo mahsanih: “Pwoaren mesei kat medengkilahr ei sengiseng; ngeni tihwolahr. Solahr angihki ei pahtouki mwomwlahn nei aramas akan.” Aramas akan me kin alu seli wasao pil kin kasalehda arail pwuriamwei oh koasoia: “Ih kahnimw kaselelo met? Ih kahnimwo met me sampah kin pohnmwahsohki?”—Koulen Kedepwidepw kan 2:3, 11, 15.
Pasapengpen Peidek kan me Pid Duwen Iren Paipel kan:
1:15—Iaduwen Siohwa ketin “tiakpeseng [nein Suda] aramas akan rasehng wahn wain ni wasahn tiak wain”? Ni arail kauwehla kahnimwo, mehn Papilon kan kin kakerehdi uwen lauden nta me duwehte tiakpeseng kreip ni wasahn tiak wain. Siohwa ketin kohpadahr ire wet oh ketin mweidong met en wiawi, kahrehda iren Paipel wet kak mahsanih me ih me ketin ‘tiakpeseng aramas akan rasehng wahn wain ni wasahn tiak wain.’
2:1, NW—Iaduwen ‘ahn Israel lingan koskosla sang nanleng ong sampah’? Pwehki “nanleng eh ileilesang sampah,” ekei pak “koskosla sang nanleng ong sampah” kin wehwehki kasohrlahn mehkan me kin ahneki lingan. “Ahn Israel lingan”—lingan oh manaman me e ahneki ni ahnsou me Siohwa ketin kapaiada ih—sohrala ni ahnsou me Serusalem ohla oh Suda tehnla.—Aiseia 55:9.
2:1, 6, NW—Dahkot “utupen aluweluwen Siohwa” oh sapwellime “impwal”? Sounmelkahka men me koulki: “Kitail patohlahng nan sapwellime impwal lapalapo; kitail eri wia atail kaudok mwohn utupen sapwellime aluweluwe kan.” (Melkahka 132:7, NW) Kahrehda “utupen aluweluwe” me kileldi nan Koulen Kedepwidepw kan kin wehwehki sapwellimen Siohwa tehnpas en kaudok, de tehnpas sarawio. Mehn Papilon kan ‘isikala tehnpas sarawi en Siohwa’ likamwete impwal ieu de kisin wonuhmw ieu nan mwetuwel.—Seremaia 52:12, 13.
2:17—Dahme Siohwa “kupwuredahr” en ketin wia me pid duwen Serusalem? Ire wet kin dokedoke pwuhken Lipai 26:17 me mahsanih: “I pahn sohpeisang kumwail pwe kumwail en lohdi oh irail me kin kailongkin kumwail re pahn kaunkumwailda; kumwail pahn masepwehkada kowahlap oh pahn tang ni eh sohte mehmen me pwakipwakih kumwail.”
Mehn Kasukuhl kan ong Kitail:
1:1-9. Serusalem kin wia sengiseng pwohng ehu pwon, oh pilen mese kin kerekeredi likinsepe. Ewen kelen kahnimwo tehnlahr, oh nah samworo kan kin weiweirek. Nah serepein kan mihlahr nan lokolok, oh pein ih pil wie weiweirekehr. Pwekida? Pwehki Serusalem wiadahr dihp tohto. Ah samin me inenen sansal mehlel. Imwilahn dipe kan iei kaidehn peren; ahpw e wia sengiseng, lokolok, oh weiweirek.
1:18. Siohwa me ketin pwung ahnsou koaros ni ahnsou me e ketin kaloke me dipan akan.
2:20. Siohwa ketin padahkiong mehn Israel kan me ma re sohte pahn peikiong ih, re pahn lelong paisuwed kan duwehte ‘kangala uduk en neirail seri kan.’ (Deuderonomi 28:15, 45, 53) Ia uwen arail pweipwei ni ahr piladahr en sapeikiong Koht!
“KOMW KETIN KARONGE EI PEKIPEK”
(Koulen Kedepwidepw kan 3:1–5:22)
Nan Koulen Kedepwidepw kan irelaud 3, wehin Israel kin rasehng “ohl kehlail men.” Mendahki ah kin lelong kahpwal akan, ohl menet koulki: “KAUN-O kin ketin kupwuramwahu ong koaros me kin likih.” Nan ah kapakap ong Koht mehlel, e peki reh: “Ni ei peki komwi en ketin karonge ie, komwi ahpw ketin karonge ei pekipek.” E peki rehn Siohwa en ketin tehk kanamenek me ah imwintihti kan wiahda, oh patohwan: “Maing KAUN, komwi ketin kalokehkin irail ar wiewia kan.”—Koulen Kedepwidepw kan 3:1, 25, 56, 64.
Seremaia kasalehda ah pepehm duwen imwila suwed en kapilpene en Serusalem me reireiki sounpwong 18 oh pahtouki: “Nei aramas akan aleier lokolok me laudsang lokolok en tohn Sodom, kalokolok ehu me lelohng irail ni ahnsou mwadang sang nin limen Koht.” Seremaia pousehla oh mahsanih: “Irail kan me mehla nan mahwen paiamwahusang irail kan me mehla mwuhr, me wie luhluwetala oh mehkihla duhpek, me sohte kisin tungoal kis mehn komourirailla.”—Koulen Kedepwidepw kan 4:6, 9.
Kelimau en koul kin kasalehda tohn Serusalem kan me kin koasoakoasoi. Irail koasoia: “Maing KAUN, komwi ketin tamanda dahme wiawihong kiht. Komwi ketin mahsendohng kiht, oh mahsanih duwen at sarohdier.” Ni arail kin kasalehda arail kahpwal akan, irail peki oh patohwan: “Komwi, Maing KAUN, me wia nanmwarki kohkohlahte, oh pahn kakaun erein dih koaros kohkohlahte. Maing KAUN, komwi kasapahlkitewei pahn kupwuromwi! Komwi kasapahlkitewei! Komwi kasapahldohng kiht at lingan en mahs.”—Koulen Kedepwidepw kan 5:1, 19, 21.
Pasapengpen Peidek kan me Pid Duwen Iren Paipel kan:
3:16—Ia wehwehn mahsen pwukat: “E ketin . . . kauwehkihla ngih kat takai”? Ehu pwuhk kin kawehwehda: “Ni ahnsou me irail kalipilipala, mehn Suhs akan anahne umwunda kenerail pilawa nan pwoar me re weirda nan pwehl, kahrehda pihk mih loale nan kenerail pilawa.” Arail kin kang soangen pilawa kak kauwehla ngih.
4:3, 10—Dahme Kahrehda Seremaia karasahiong “[nah] aramas akan” ong “mahn en nan sapwtehn kan [‘ostris,’ NW]”? Pwuhken Sohp 39:16 kin kasalehda me ostris “sohte kin tehk kutohre kan, oh sohte kin nsenohki ma sohte epwelparail.” Karasepe, mwurin ah kasawada kutohr, nohno ostriso kin iang ostris lih teikan kohkohla wasa kis oh pahpa ostriso me kin apwahpwalih pwurok kan. Ahpw dahme pahn wiawi ni ahnsou me re lelong mehkot keper? Pahpa oh nohno ostris ko koaros pahn tangasang pahs, kesehla pwurok kan. Erein ahnsou me mehn Papilon kan kapilpene, lehk me wiawi nan Serusalem inenen apwalla oh nohno kan me kin kadek uhd lemeila ong pein neirail seri kan, duwehte ostris en wel kan. Met inenen weksang duwen mwomwen ahn kidi en wel kan kin apwalih neirail kan.
5:7—Siohwa kin ketin kapwukoahki aramas akan dipen arail pahpa kahlap akan? Soh, Siohwa sohte ketin kaloke aramas akan pwehki dipen arail pahpa kahlap akan. Paipel mahsanih: “Emenemen kitail uhdahn pahn wehkohng Koht duwen pein ih.” (Rom 14:12) Ahpw imwilahn diparail kan kak mihmihte oh lelong kadaudokarail kan. Karasepe, mehn Israel en mahs ko kin iang kaudok en dikedik kan oh met kin kahrehda kahpwal laud ong mehn Israel lelepek kan en mwurio me kin kolokol arail mour pwung.—Eksodus 20:5.
Mehn Kasukuhl kan ong Kitail:
3:8, 43, 44. Erein ahnsou me kahpwal kin wiawiong Serusalem, Siohwa sohte kin ketin karonge ahn tohnkahnimwo kan pekipeki sawas. Pwekida? Pwehki aramas pwukat ahr sapeik oh sohte koluhla. Ma kitail men Siohwa en ketin sapeng atail kapakap kan, kitail anahne peikiong ih.—Lepin Padahk 28:9.
3:21-26, 28-33. Iaduwen kitail kak dadaurete pahn lokolok laud? Seremaia padahkiong kitail. Kitail en dehr manokehla me Siohwa kin ketin diren wiewiahn limpoak kadek oh mahk. Kitail pil anahne tamanda me atail kin momour kin kihong kitail kahrepe laud en dehr kesehla koapworopwor. Kitail pil anahne tamanda me kitail anahne kanengamah oh awiawih sapwellimen Siohwa komour oh en dehr kaulim. Kapatahiong met, kitail anahne “nennenla ni kanengamah,” me wehwehki, ni lamalam en aktikitik, kitail pahn dadaurete pahn lokolok kan, oh tamataman me dahme Koht kin ketin mweidong en wiawi mie kahrepe mwahu.
3:27. En lelong kasongosong kan en pwoson ni ahnsoun pwulopwul kakete wehwehki en dadaurete pahn kahpwal akan oh kapailok. Ahpw ‘me mwahu emen en esehla soangen kanengamah wet ni ah wie pwulopwulte.’ Pwekida? Pwehki en sukuhliki dadaurete pahn lokolok kan ni ahnsou me emen wia pwulopwul kak kaunopada ih en powehdi kahpwal kan me pahn wiawi nan ah mour mwuhr.
3:39-42. E sohte wia elen loalokong en ‘kaulimki’ kalokepen dipatail kan. Kitail en dehr kaulimki imwila suwed en wiewia sapwung kan, “kitail en kasawih atail wiewia kan oh sohpeiong KAUN-O.” E pahn wia elen loalokong kitail en koluhla oh kapwungala alatail kan.
Wiahki Siohwa Ahmw Koapworopwor
Pwuhken Koulen Kedepwidepw kan kin kasalehda ia sapwellimen Siohwa madamadau duwen Serusalem oh sapwen Suda mwurin mehn Papilon kan isikala kahnimwo oh kauwehla sahpwo. Pepehm en pohnese diparail me kileldi nan pwuhk wet kin kasansalehda me sapwellimen Siohwa madamadau duwen kahrepen kahpwalo iei dipen aramas pwukat. Koul kan nan pwuhk wet pil kin kasalehda koapworopworki Siohwa oh ineng en pwurehng pwurala nan ahl pwung. Mendahki pali laud en aramas akan nan mwehin Seremaia sohte kin ahneki soangen pepehm ahpw Seremaia oh luhwen me koluhla kan kin ahneki soangen pepehmohte.
Sapwellimen Siohwa madamadau duwen irair en Serusalem me kileldi nan pwuhken Koulen Kedepwidepw kan kin padahkiong kitail iren mehn kasukuhl kesempwal riau. Keieu, ohlahn Serusalem oh tehnlahn Suda kin kamwekid kitail en peikiong Siohwa oh en dehr pohnsehse kupwure. (1 Korint 10:11) Keriaun iren mehn kasukuhl kohsang mehn kahlemeng en Seremaia. (Rom 15:4) Mendahki ah irair mwomwen sohte koapworopwor, soukohp menet me inenen pahtoula kin sohpeiong Siohwa ong komour. E inenen kesempwal kitail en uhdahn likih Siohwa oh sapwellime Mahsen oh wiahki atail koapworopwor!—Ipru 4:12.
[Kawehwehpen kilel kan nan ehu ehu pali 9]
Soukohp Seremaia kilangada pweidahn ah kokohp en kadeik
[Kawehwehpen kilel kan nan ehu ehu pali 10]
Pwoson en irail sounkadehde en Korea pwukat kin lelong kasongosong me pid duwen iren soupoupali en Kristian