Pelien Lamalam Koaros Pwung?
KITAIL kousoan nan sampah ehu me direkihla pelien lamalam wekpeseng kan. Ehu roporop kasalehda me pelien lamalam laud 19 mie oh me tikitik 10,000. Met kahrehda aramas en kak pilada pelien lamalam sohte lipilipil me irail men iang. Eri ia duwe, e kesempwal mehnia pelien lamalam me ke iang?
Ekei aramas nda me pelien lamalam wekpeseng kan kin duwehte soangsoangen ahl akan me kohdalahng pohn nahna ehu. Ong irail e sohte lipilipil mehnia me re pilada, pwehki ahl oko koaros pahn kahluwa irail lahng wasa tehieu. Irail kin medewe me Koht tehmen mie, kahrehda pelien lamalam koaros pahn pil kohlahng ihete kelehpw.
Ia Duwe, Ahl Pwukat Koaros Kin Kohlahng Rehn Koht?
Dahme Sises Krais me wia sounpadahk me keieu wahu nan poadopoad mahsanihki duwen met? E mahsanih ong sapwellime tohnpadahngko: “Kumwail keid nan ewen kehl wetikitik.” Dahme kahrehda? “Pwe elen kolahng nan ehl [“kasohrala,” NW] me tehlap oh mengei, oh aramas ngeder kin keid ie. A wenihmw me kolahng mour me wetikitik oh elen kolahng ie me apwal, eri, me malaulau me kin diar.”—Madiu 7:13, 14.
Ia duwe, Sises mahsanih me ekei pelien lamalam pahn kasohrala? E kin ketin padahngki me irail kante me sohte kamehlele Koht me kin weweid pohn ahl tehlap? E kin ketin padahngki me irail akan me kamehlele Koht, sohte lipilipil mehnia pelien lamalam me re iang iei irail akan me kin weweid pohn ahl wetikitik me kohlahng mour?
Mwurinte e ketin mahsanih me ahl rioapwoatte me mie, Sises mahsanih: “Kumwail kalekeikumwailsang soukohp likamw akan, me kin pwarodohng kumwail ni mwomwen sihpw, a loalarail re uhdahn rasehng kidien wel kan.” (Madiu 7:15) Mwuri e pil mahsanih: “Kaidehn aramas koaros me kin likwerih ie, ndinda, ‘Maing ei Kaun, Maing ei Kaun,’ me pahn pedolong nan Wehin Koht, pwe irail kan me kin kapwaiada kupwur en Semei me ketiket nanleng.” (Madiu 7:21) Ma emen wia soukohp emen de e kin nda me Sises iei eh “Kaun,” e konehng en nda me aramaso poadidi. E sansal me Sises ketin kaweidki me kaidehn koaros pelien lamalam me pwung oh kaidehn koaros sounpadahk en pelien lamalam kitail kak likih.
Kitail kak Kasawihada Ahl Tehtik?
Pwehki ahl koaros sohte kohlahng rehn Koht, eri, a ia duwen atail pahn kak diar ahl tehtik nanpwungen ahl kid kei pwe kitail en kak kolahng mour? Nna medewehla karasaras wet: Mwein ke seiloak oh kowe salongala nan kahnimw laud ehu. Kowe eri repen sawas. Emen aramas kamehlele me ke anahne kohla pali mese. Emen kangoange iuk en kohla pali kapi. Ah emen tohrohr nda me ken pilada mehnia ahl me ke mwahuki. Eri ahpw emen me kin iang seiseiloak kihda ehu map me uhdahn pwung oh kasalehiong uhk ahl me pwungo. Ih eri kihong uhk mapo pwe ken kak doadoahngki nan omw seiloak. Ke sou pahn koapworopworki me ke pahn lella wasa me ke kohkohlahng ie?
Eri met pil duwehte ni omw pahn pilada ahl me pwung ong pelien lamalam mehlel. Ke anahne mehn kaweid me ke kak likih. Eri ia duwen, mie mehn kaweid me kitail kak likih? Ei mie. Mehn kaweid wet iei Paipel. Paipel kin mahsanih: “Pwe audepen Pwuhk Sarawi unsek pwilisang rehn Koht, oh e mwahu ong atail doadoahk en padahkihong aramas akan me mehlelo, ong atail peneu ong tiahk sapwung, ong atail kapwungala wiewia sapwung kan, oh pil ong atail padahk duwen mour lelepek.”—2 Timoty 3:16.
Mwein mie Paipel me kawehwehdieonger ni pein omw lokaia me kak wia omw mehn kaweid. Sounkadehdehn Siohwa kan me wiahda makasihn wet oh irail me pil wiahda New World Translation of the Holy Scripture (ni lokaiahn Wai). Ma kaidehn kowe emen Sounkadehdehn Siohwa, eri mwein ke pahn men doadoahngki pein noumw Paipel pwehn wia omw mehn kaweid ong diarada pelien lamalam me mehlel de likamw. Ihme kahrehda, oaralap akan nan makasihn wet kin doadoahngki iren Pwuhk Sarawi kan sang Pwuhk Sarawi ni mahsen en Pohnpei.
Ni omw kin wadek oaralap pwukat, tehk ma dahme ke ese kin duwehte dahme Paipel mahsanih. Tamataman dahme Sises mahsanih me pid atail pahn kak ese mehnia me pwung de likamw. E mahsanih: “Tuhke mwahu kin wa mwahu, a tuhke sakanakan kin wa suwed. Tuhke mwahu sohte kin kak wa suwed, oh tuhke sakanakan sohte kak wa mwahu.” (Madiu 7:17, 18) Kitail kak tehkpene soangen wa mwahu siluh me Paipel mahsanih me pahn kasalehda “tuhke mwahu.”
[Kawehwehpen kilel kan nan ehu ehu pali 3]
Paipel kin duwehte mehn kaweid likilik ehu me kak sewese emen en diarada pelien lamalam mehlel