Paipel Iei Mahsen en Koht?
“Pwe audepen Pwuhk Sarawi unsek pwilisang rehn Koht, oh e mwahu ong atail doadoahk en padahkihong aramas akan me mehlelo, ong atail peneu ong tiahk sapwung, ong atail kapwungala wiewia sapwung kan, oh pil ong atail padahk duwen mour lelepek; pwe irail kan me kin papah Koht en kak wia oh koahiekla ni soangen wiewia mwahu koaros.”—2 TIMOTY 3:16, 17.
IA UWEN kehlail mahsen en wahnpoaron Pohl me pid kesempwalpen Paipel! E kin koasoia duwen palien Paipel me mi ni ahnsowo, me aramas kin ekei pak kahdaneki Kadehde Mering. Ahpw e pil kak kadoadoahk ong pwuhk 66 kan koaros en Paipel iangahki pwuhk kan me sapwellimen Sises tohnpadahk kan ntingihdi nan mwehin tepin Kristian akan.
Ke pil kin uhdahn kesempwalki Paipel duwehte Pohl? Ke kamehlele me Koht me uhdahn ketin kamwakid sounnting kan en Paipel? Tepin Kristian akan kamehlele met. Ih me Kristian mehlel kan kin ahnsou koaros kamehlele. Karasepe, John Wycliffe iei emen sounpadahk en Paipel nan England me momour mpen sounpar 600 samwalahro, oh e kilangwohng Paipel nin duwen “koasoandi ehu me mehlel me sohte kak sapwung.” Duwen mahsen en Pohl me kileldi powe, ehu dikseneri koasoia me Paipel “kohsang rehn Koht, kahrehda soahng koaros me Paipel kin mahsanih me mehlel.”—The New Bible Dictionary.
Wekideklahn Madamadau ong Paipel
Ahpw pali laud en aramas solahr kin likih Paipel. Ehu pwuhk koasoia: “Kristian kan koaros kin nda me re pwungki Paipel en kaweid arail wiewia kan oh en pil wia poahsoanpen dahme re kin kamehlele.” (The World’s Religions) Ahpw, arail wiewia kan sohte kin kasalehda met. Aramas tohto kin kilangwohng Paipel nin duwen “madamadau en aramas me sohte kin likilik.” Mendahki re kin pwungki me sounnting kan en Paipel kin ahneki pwoson kehlail, irail kin wiahki sounnting pwukat ohl soh unsek kei me kin apwalki kawehwehda duwen padahk loal kan en Koht oh sohte ese soahng kan me kitail ese rahnwet.
Ni mehlel, me malaulaute rahnwet me kin uhdahn mweidohng Paipel en kaweid arail madamadau oh wiewia kan. Karasepe, pak depe ke kin rong aramas kin nda me kaweid en Paipel duwen tiahk me mering oh solahr katepe? Me tohto kin medewe me re kak padahngki ekeite kosonned kan en Paipel me aramas kin men rong de re kin pilada en pohnsehsehla kosonned kan pwe ren kak wia dahme re mwahuki. Ekei me dene irail Kristian kin pohnsehsehla dahme Paipel kin mahsanih duwen nenek, kamwahl, likamw oh kamamsakau.—1 Korint 6:9, 10.
Dahme kahrehda? Mpen sounpar epwiki samwalahro, emen ohl me kin kasawih mouren aramas kan mahs me adaneki Sir Charles Marston kasalehda ehu kahrepe nan nah pwuhk. E koasoia me aramas kin mwadangete “pwungki ahpw sohte kin kasawih dahme sounnting kan en rahnwet kin nda,” irail sounnting pwukat kin uhwong mehlelpen Paipel. (The Bible Is True) Met pil kin wiawi nan atail ahnsou? Ia duwen omw pahn kilangwohng madamadau en soun roporop kan me kin katikihala en aramas arail kin likih Paipel? Kilang dahme iren mwuri pahn koasoia.