Sukuhlki Sang Mahsen en Koht

Dahme Kahrehda Koht Kin Ketin Sapwellimanki Pwihn Ehu?

Ire wet pahn koasoia peidek kan me ke kak ahneki oh e pahn kasalehda ia wasa nan Paipel me ke kak diarada pasapeng kan. Sounkadehdehn Siohwa kan pahn perenki iang uhk koasoiapene pasapeng pwukat.

1. Dahme Kahrehda Koht Ketin Koasoanehdi Mehn Israel kan nin Duwen Pwihn Ehu?

Koht ketin koasoanehdi kadaudoken Eipraam nin duwen wehi ehu oh ketikihong irail kosonned kan. E ketin kahdaneki irail wehin Israel oh ketin kapwukoahki irail ren pere kaudok mehlel oh sapwellime Mahsen. (Melkahka 147:19, 20) Met kahrehda aramas en wehi koaros en paiekihda.​—Wadek Senesis 22:18.

Koht ketin pilada mehn Israel kan ren wia sapwellime sounkadehde kan. Ni ahnsou me re kin peik, re kin paiekihda sapwellime kosonned kan. (Deuderonomi 4:6) Sang ni atail kin sukuhlki poadopoad en mehn Israel kan, kitail kak kalaudehla atail wehwehki duwen Koht mehlelo.​—Wadek Aiseia 43:10, 12.

2. Dahme Kahrehda Kristian Mehlel kan Kin Wia Pwihn Ehu?

Mwuhr Koht solahr ketin kupwurki wehin Israel oh Siohwa ketin wiliankihdi wehio mwomwohdisohn Kristian. (Madiu 21:43; 23:37, 38) Mahso, mehn Israel kan kin wia sounkadehdehn Koht. Ahpw met, Kristian mehlel kan kin papah nin duwen sounkadehdehn Siohwa kan.​—Wadek Wiewia 15:7-9, 14, 17.

Sises ketin koasoanehdi sapwellime tohnpadahk kan pwe ren kadehde duwen Siohwa oh wia katohnpadahk nan wehi koaros. (Madiu 10:7, 11; 24:14; 28:19, 20) Doadoahk wet kin inenen laudla nan rahnpwukat. Ehdin Siohwa eh ketin kaminiminpene aramas rar kei sang wehi koaros ong kaudok mehlel. (Kaudiahl 7:9, 10) Sises ketin padahkihong Kristian akan ren pil doadoahkpene nin duwen pwihn ehu pwe ren kak kangoange oh sewese emenemen. Nan sampah pwon irail kin paieki koasoandi tehieu en padahk en Paipel nan arail mihting kan.​—Wadek Ipru 10:24, 25.

3. Ia Duwen Sounkadehdehn Siohwa kan Arail Tepida nan Atail Ahnsou?

Pwihn en Sounkadehdehn Siohwa kan nan atail ahnsou tepida nan pahr 1870 samwa. Pwihn tikitik ehu en tohnsukuhl en Paipel kan tepida diarada padahk mehlel kan en Paipel me salongala ahnsou reirei. Irail ese me Sises ketin koasoanehdi mwomwohdisohn Kristian pwe ren kalohk. Eri re tapihada doadoahk en kalohki Wehin Koht nan sampah pwon. Nan pahr 1931 re alehda ahd wet, Sounkadehdehn Siohwa kan.​—Wadek Wiewia 1:8; 2:1, 4; 5:42.

4. Ia Duwen Sounkadehdehn Siohwa kan Arail Kin Wia Pwihn Ehu Rahnwet?

Nan mwehin wahnpoaron ko, mwomwohdisohn Kristian kan nan sahpw tohto kin ale sawas sang pwihn ehu en ohl mah kan me kin pohnese me Sises iei Tapwin mwomwohdiso. (Wiewia 16:4, 5) Duwehte met, rahnwet Sounkadehdehn Siohwa kan pil kin pohnese me Sises iei arail Kaun. (Madiu 23:9, 10) Irail pil kin ale sawas sang Pwihn me Kin Apwalih Mwomwohdiso nan Sampah Pwon me wiawihkihda elder koahiek kan me kin kihda mehn kangoang kan oh kaweid kan sang Paipel ong mwomwohdiso daulih 100,000. Nan ehuehu mwomwohdiso, ohl koahiek kan kin papah nin duwen elder kan de sounapwalih kan. Ohl pwukat kin apwalih sapwellimen Koht pelin sihpw ni elen limpoak.​—Wadek 1 Piter 5:2, 3.

Sounkadehdehn Siohwa kan kin wia pwihn ehu pwe ren kalohki rongamwahu oh katohnpadahk. Pwe ren sewese aramas wasa koaros, re kin kawehwe, wiahda oh kihseli sawaspen Paipel kan ni lokaia daulih 500. Duwehte wahnpoaron ko, re pil kin kalohk ni ihmw lel ihmw. (Wiewia 5:42) Re kin kangoange irail akan me kin kesempwalki padahk mehlel ren onopki Paipel. Pwehki sapwellimen Siohwa aramas kan kin keieu kesempwalki kaperenda Koht oh sewese meteikan, re kin wia pwihn en aramas peren kei.​—Wadek Melkahka 33:12; Wiewia 20:35.

Pwehn kalaudehla omw wehwehki ire wet, menlau kilang irelaud 19 en pwuhk wet, Dahme Paipel Uhdahn Padahngki?, me Sounkadehdehn Siohwa kan wiahda.