Iren Mehn Kasukuhl 14
Iaduwen Sounkadehdehn Siohwa kan ar kin Koasonehdi Arail Koasondi kan
Iahd Sounkadehdehn Siohwa kan nan atail ahnsou tepiada? (1)
Ia mwomwen mihding kan en Sounkadehdehn Siohwa kan? (2)
Iaduwen mwohni kan ong pwainda mehkan me anahn ong mwomwohdiso? (3)
Ihs me kin apwapwalih ehu ehu mwomwohdiso? (4)
Mihding laud dah kei kin wiawi nan ehu ehu sounpahr? (5)
Soahngen doadoahk dah kin wiawi nan arail poasen kaun oh branch ohpis kan? (6)
1. Sounkadehdehn Siohwa kan nan rahnpwukat tepiada miehla nan pahr kan mwurin 1870. Nin tepio, re adaneki Bible Students. Ahpw nan 1931 re alehdi ahd me kin kohsang Paipel, Sounkadehdehn Siohwa kan. (Aiseia 43:10) Irail tepida malaulau nin tepio, irail kekeirada lel Sounkadehde rar kei, me kin soupisengki kalakalohk nan sahpw daulih meh 230.
2. Pali laud en mwomwohdiso kan en Sounkadehdehn Siohwa kan kin tuhpene pak silu ehu ehu wihk. Luk kohwong kowe en iangala mihding pwukat. (Ipru 10:24, 25) Padahk kan kin poahsoanda pohn Paipelo. Mihding kan kin tepida oh imwikihla kapakap kan. Pali laud en mihding pwukat, irail kin koulki, “koul ngenen kan.” (Episos 5:18, 19) Sohte pweinen iang mihding kan, oh pil sohte dalen meirong kin wisikseli nan wasahn mihding.—Madiu 10:8.
3. Pali laud en mwomwohdiso kan kin wia arail mihding kan nan Kingdom Hall. Ihmw pwukat kin kalapw sohte pweilaud oh Sounkadehde kan kin pein toukihda ahr ahnsou en kawada ihmw en tuhpene pwukat. Ke sohte pahn kilang mehn sansal kan, lohpwu kan, de mehkan me duwehte met, nan Kingdom Hall. Aramas akan kin pein toukihda ahr sawas en mwohni en pwainda anahn akan de dipwisou kan en mwomwohdiso. Ong irail kan me men pil kihda ahr sawas, mie ehu koakon en sawas.—2 Korint 9:7.
4. Nan ehu ehu mwomwohdiso, mie elder kan, de sounapwalih kan. Irail kin tiengki oh padapadahk nan mwomwohdiso. (1 Timoty 3:1-7; 5:17) Ministerial servant kan kin sewese irail. (1 Timoty 3:8-10, 12, 13) Ohl pwukat kaidehn siksang de kesempwalsang mehteikan nan mwomwohdiso. (2 Korint 1:24) Re sohte alehdi daidel tohrohr kan. (Madiu 23:8-10) Arail likou kan sohte kin wuksang mehteikan. Irail pil sohte kin ale pweipwei ong ahr doadoahk. Elder kan kin perenki apwalih anahn en pali ngehn en tohnmwomwohdiso. Re kak kihda kamweit oh kaweid nan ahnsou apwal kan.—Seims 5:14-16; 1 Piter 5:2, 3.
5. Sounkadehdehn Siohwa kan kin wiahda kapokon laud kan nan ehu ehu sounpahr. Ni ahnsou pwukat, tohto mwomwohdiso kan kin kohpene oh rong prokram tohrohr en kaweid en Paipelo. Pepdais en irail sounkalohk kapw kan kin ahnsou koaros wiawi nan ehu ehu kapokon.—Madiu 3:13-17; 28:19, 20.
6. Poasen kaun en Sounkadehdehn Siohwa kan mih nan kanihmw en New York. Governing Body kin mihmih wasao, iei pwihn en elder ieu me mah oh koahiek kan me kin apwapwalih mwomwohdiso nan sampah pwon. Pil mie branch ohpis kan me daulih 100 nan sampah pwon. Nan wasa pwukat, aramas akan kin pein toukihda ahr ahnsou en sewese wiahda oh kadarpeseng sewesepen Paipel kan. Kaweid pil kin kohda ong koasonehdi doadoahk en kalohk. Dahme ke sohte koasoakoasoane mwemweitla nan ehu branch ophis me karanih iuk?