Ia Duwe, Siohwa Uhdahn Ketin Nsenohkin Uhk?

Emen lih me apwalki kamehlele me Siohwa kak ketin nsenohkin ih koasoia: “Pepehm me sohte katepei iei me kin keieu kerempwa ahi pahn karanihala Koht oh me I kin songosong en powehdi.” Ke kin ahneki soangen pepehm wet? Ma ei, ele ke kin medewe, ‘Ia duwe, Siohwa uhdahn ketin nsenohki emenemen sapwellime tohnkaudok kan?’ Ei, uhdahn! Kitail kin diar mehn kadehde duwen Siohwa eh ketin nsenohkin kitail nan sapwellimen Sises mahsen.​—Wadek Sohn 6:44.

Dahme Sises, me mwahngih laudsang koaros duwen kupwuren Siohwa oh sapwellime irair kan, mahsanih? (Luk 10:22) Sises ketin mahsanih: “Sohte emen me pahn kak kohdo rehi, ma Semei me ketin kadariehdo sohte kainangihedo rehi.” Eri, kitail sohte kak wiahla tohnpadahk en Krais oh tohnkaudok kan en Samatail nanleng Siohwa, ma Siohwa sohte ketin kainangihkitaildo reh. (2 Des. 2:13) Ma kitail wehwehki dahme Sises mahsanih, eri kitail pahn kilang mehn kadehde laud nan sapwellime mahsen duwen Koht eh ketin nsenohkin kitail.

Ia wehwehn Siohwa eh ketin kainangihkitaildo reh? Met sohte wehwehki me Siohwa kin ketin idingkihong kitail en papah ih. Siohwa ketikihong kitail saledek en wiahda pilipil, eri e sohte ketin idingkihong kitail en karanihala ih. (Deud. 30:19, 20) Siohwa ketin mwahngih audepen mohngiong en aramas tohto nan sampah oh kin ketin rapahki irail kan me kin sohpeiong ih. (1 Kron. 28:9) Ni eh ketin diarada soangen aramas duwe met, e kin ketin mwekidki ni ahl kaselel ehu. Ia duwen?

Siohwa kin ketin kainangihedo reh emenemen irail me ahneki mohngiong “peik oh mwakelekel.” (Luk 8:15) Siohwa ketin wia met ni ahl riau. Keieu iei sang ni eh ketin doadoahngki rongamwahu sang nan Paipel me emenemen kitail kin alehdi. Keriau iei sang ni eh ketin doadoahngki sapwellime manaman. Ni Siohwa eh ketin mwahngihada emen me eh mohngiong kin mwekidkihda padahk mehlel en Paipel, e kin ketin doadoahngki sapwellime manaman pwehn sewese aramaso en wehwehkihla oh doadoahngki padahk mehlelo nan eh mour. (1 Kor. 2:11, 12) Ma sohte sawas sang rehn Koht, kitail sohte kak wiahla tohnpadahk en Sises oh pil sapwellimen Siohwa tohnkaudok poadidi kan.

Eri, dahme sapwellimen Sises mahsen nan Sohn 6:44 padahkihong kitail duwen Siohwa Koht? Siohwa ketin kainangihedo aramas akan reh pwehki e ketin mwahngih mehkot mwahu nan mohngiongirail oh ketin nsenohki emenemen irail. Ni en liho me kitail koasoiapene ni tapio wehwehkihla padahk mehlel wet, e kamweitala ih. Lih menet koasoia: “En wia emen sapwellimen Siohwa ladu iei pwais keieu kaselel me emen kak ahneki. Oh ma Siohwa ketin pilada ien wiahla sapwellime ladu, eri e kin ketin kesempwalkin ie.” Ia duwen kowe? Omw esehla me Siohwa kin ketin nsenohki emenemen sapwellime tohnkaudok kan kin kamwakid uhk ken men karanihala ih?