Sewese Aramas Akan En Karanih Siohwa

“Sohte me kak kolahng Semei ma soh ngehi.”​—SOHN 14:6.

1. Kehkehlik dahieu me Sises ketikihong sapwellime tohnpadahk kan ni ahnsou me e iasadahr, oh nin duwen Sounkadehdehn Siohwa kan kin kapwaiada kehkehlik wet, met imwikihla dah ong irail?

SISES KRAIS kehkehlikiong sapwellime tohnpadahk kan en “kohwei wasa koaros oh padahkiohong tohn wehi kan koaros; pwe re en wiahla nei tohnpadahk: papidaisihirailla ni mwaren Sahm oh Sapwellime oh Ngehn Sarawi.” (Madiu 28:19) Sangete sounpar eisek samwalahr oko leledo met, Sounkadehdehn Siohwa kan sewesedahng rehn Koht aramas daulih meh silirar, oh papidaisirailla oh met kin wia kasalepen arail inoukihong Koht arail mour en wia kupwuren Koht. Ia uwen laud atail peren en sewese aramas akan en karanih Koht!​—Seims 4:8.

2. Edetehn aramas kapw tohto kin papidaisla, dahme wiawiehr?

² Nan ekei sahpw kan, aramas kapw tohto kin papidaisla, ahpw sohte kekeirada laud mie ong tohtohlahn sounkalohk kan. Ni mehlel, ekei kin mehla. Nan ehu ehu sounpar, persent 1 en sounkalohk kan kin mehla. Ahpw, sangehr sounpar kei samwalahro, me tohto kin pwupwuweisang padahk mehlel. Dahme kahrehda? Nan artikel wet oh pil iangahki artikel en mwuhr pahn koasoiada iaduwen aramas akan kin kohdohng Siohwa oh pil kahrepe kan me kin kahrehda en pwupwuweisang pwoson.

Kahrepen Atail kin Kalohk

3. (a) Iaduwen pwukoah ehu me kohwong tohnpadahk kan en Sises kin pid dahme tohnlengo lohkseli nan pwuhken Kaudiahl 14:6? (b) Dahme kin pweida mwahu ong sewese aramas akan en perenki rong duwen rongamwahu en Wehio, ahpw kahpwal dahieu kin pwarada?

³ Nan “imwin ahnsou” wet, tohnpadahk kan en Sises kin ahneki pwukoah en lohkiseli “loalokong mehlel” me kin pid “rongamwahu en Wehio.” (Daniel 12:4, New World Translation; Madiu 24:14) Arail pwukoah kin pid dahme tohnleng men “me weuwa rongamwahu poatopoat ehu me e pah lohkihong tohnsampah kan, wehi koaros, kadaudok koaros, lokaia koaros, oh sahpw koaros.” (Kaudiahl 14:6) Nan sampah wet me aramas akan kin kedirepwki wiahda pein ahr pwukoah kan ni ehu ehu rahn, ahl me keieu lipwalipw en kahrehong aramas akan en perenki rong duwen Wehin Koht oh sewese irail en karanih Siohwa iei en padahkiong irail duwen koapworopwor en mour soutuk nan paradais nin sampah. Eri, irail aramas akan me kin werekiong sapwellimen Koht aramas akan pwe ihte re men iang mihmi nan Paradais, irail sohte kin tengidiong nan ahl tehtik me pahn kaluhwairaillahng mour soutuk.​—Madiu 7:13, 14.

4. Nin duwen Sises oh tohnlengo me pipihr nanleng mahsanih, ia kahrepe kitail kin wia atail doadoahk en kalohk?

⁴ Sises mahsanih: “Oh iet mour soutuk: aramas akan en eseikomwihla, me komwihte Koht mehlel, oh pil esehla Sises Krais me komw ketin poaronedohr.” (Sohn 17:3, NW) Tohnlengo me pipihr nan wehwe kin pakairki “rongamwahu poatopoat” oh e padahkiong aramas akan me mihmi nin sampah: “Kumwail lemmwiki Koht oh kapinga sapwellime roson lapalahpie! Pwe e lelehr ahnsoun eh pahn ketin kadeikada tohn sampah kan. Kumwail poaridi mwohn silangi oh pwongih me ketin kapikada nanleng, sampah, madau, oh utuhnpihl kan!” (Kaudiahl 14:7) Eri, kitail kin kalohki rongamwahu pwehn sewese aramas akan en karanih Siohwa ki Sises Krais.

Atail Pwukoah nan Sapwellimen Siohwa Doadoahk

5. Dahme Pohl oh Sises mahsanih me kin kasansalehda me kitail kin wia sapwellimen Siohwa doadoahk, ah kaidehn pein atail doadoahk?

⁵ Wahnpoaron Pohl ntingwong ienge Kristian keidi kan duwen “kohwa doadoahk pwe aramas teikan en pil wiahla kompoakepah” oh me Koht ketin wekidkitailla rehn Krais sang ni imwintihti ong ni kompoakepah kei pwehki meirong tomw en Sises Krais. Pohl koasoia me “Koht me ketin panapanawih kumwail” oh nin duwen “meninkeder en Krais kei, se peki rehmwail ngidingid, ni mwaren Krais: kumwail en wekila sang ni imwintihti ong ni kompoakepahn Koht”. Ia uwen kaselel! Mendahki kitail kin iang pwihn en “meninkeder kan en Krais kei” de iang pwihn me ahneki koapworopwoar en mihmi nin sampah, kitail en dehr manokehla me met kaidehn atail doadoahk ahpw sapwellimen Siohwa doadoahk. (2 Korint 5:18-20) Ni mehlel, Koht me kin kahrehdo aramas akan oh padahkih irail me kin kohla rehn Krais. Sises mahsanih: “Sohte emen me pahn kak kohdo rehi, ma Semei me ketin kadariehdo sohte kainangihedo rehi; oh I pahn komourada ni imwilahn rahn. Soukohp ako ntingihedier, ‘Irail koaros pahn ale padahk sang rehn Koht.’ Emenemen me rong Sahmo oh padahngkihsang, e kin kohdo rehi.”​—Sohn 6:44, 45.

6. Iaduwen Siohwa kin, ni karasaras, itikada wehi kan, oh ni ahnsowohte, ihs me kin diarada meleilei nan sapwellime “Tehnpas Sarawi” en kaudok mehlel?

⁶ Nan imwin rahn akan, iaduwen Siohwa kin kahrehdohng reh aramas akan oh “ritingadahng mehn liki kan elen pwoson”? (Wiewia 14:27, footnote; 2 Timoty 3:1) Ehu ahl e kin ketin wia met iei sang ni e kin doadoahngki sapwellime Sounkadehde kan en lohkiseli sapwellime rohng en komour kan oh kadeik kan ong koasoandi suwed wet. (Aiseia 43:12; 61:1, 2) Rohng wet me kin wiawi nin sampah pwon kin, ni karasaras, itikada wehi kan​—met kin wia kilel ehu en kadeik laud me pahn kohwong irail ni ahnsou keren. Ahpw ni ahnsouwet, aramas akan me “kesempwal” mwohn silangin Koht kin alehdi sawas en pedoisang koasoandi suwed wet oh irail kin diar meleilei nan sapwellimen Koht “Tehnpas Sarawi” en kaudok mehlel. Siohwa kin ketin kahrehong sapwellime mahsen en kokohp kan me Akkai ntingihdi en pweida: “I pahn kauwehla wehi koaros, oh ar dipwisou kesempwal akan pahn wisikdohng wasaht, oh Tehnpas Sarawi wet pahn direkihla dipwisou kesempwal.”​—Akkai 2:6, 7, footnote; Kaudiahl 7:9, 15.

7. Iaduwen Siohwa kin ritingada mohngiong en aramas akan oh kahrehdohng aramas akan en karanih ih oh sapwellime Ohl?

⁷ Siohwa kin ketin ritingada mohngiong kan en aramas pwukat me kin lemmwin Koht​—“dipwisou kesempwal akan sang wehi kan”—​pwe ren kak “rong kanahieng” dahme sapwellime Sounkadehde kan kin koasoia. (Akkai 2:7, Jewish Publication Society; Wiewia 16:14) Duwehte nan tepin senturi, ekei pak, Siohwa kin doadoahngki sapwellime tohnleng kan en kahre sapwellime Sounkadehde kan en sewese aramas mehlel akan me kin likweriong Siohwa. (Wiewia 8:26-31) Ni ahnsou me aramas akan kin sukuhliki duwen sawas kaselel kan me Koht ketikihong irail ki sapwellime Ohl, Sises Krais, sapwellimen Siohwa limpoak me kin kahrehda irail ong karanih Siohwa. (1 Sohn 4:9, 10) Ei, Koht kin kahrehdohng aramas akan reh oh sapwellime Ohl pwehki sapwellime “limpoak-kadek” oh “limpoak lelepek.”​—Seremaia 31:3, NW, footnote.

Ihs me Siohwa kin Kahrehdohng Reh?

8. Soahngen aramas dah kei me Siohwa pahn kahrehdohng reh?

⁸ Siohwa kin kahrehdo aramas akan me kin rapahki ih oh sapwellime Ohl. (Wiewia 17:27) Met kin pidada aramas akan me kin “pahtoulahr oh mihlahr nan apwal pwehki soahng saut akan me wiewiawi” nan Kristendom oh, ni mehlel, nan sampah pwon. (Esekiel 9:4) Re kin “nsenohki arail anahn akan ni pali ngehn.” (Madiu 5:3, NW) Ni mehlel, irail pwukat me kin wie aramas “opampap” [“mpahi,” footnote] oh irail me pahn kousoan nan paradais nin sampah kohkohlahte.​—Sepanaia 2:3.

9. Iaduwen Siohwa kak ese ma aramas akan “me konehng ale mour soutuk,” oh iaduwen e kin kahrehdohng aramas pwukat reh?

⁹ Siohwa ketin mwahngih audepen mohngiong en aramas akan. Nanmwarki Depit padahkiong nah pwutak Solomon: “E ketin mwahngih audepen atail lamalam oh ineng koaros. Ma ke pahn sohpeiong, e pahn ketin kupwurperenkinuhkala.” (1 Kronikel 28:9) Sang ni irair en loalen aramas oh eh madamadau, Siohwa kak ese ma aramaso pahn kak mwekidki sawas akan ong mahkepen dipe oh alehda koapworopwor en mour soutuk nan sapwellimen Koht koasoandi kapw. (2 Piter 3:13) Sang ni sapwellime Mahsen me Sounkadehde kan kin kalohki, Siohwa kin luhkehdohng pein ih oh sapwellime Ohl ‘irail kan me konehng ale mour soutuk,’ oh irail pwukat wiahla aramas ‘pwosonla’ kei.​—Wiewia 13:48.

10. Dahme kin kadehde me Siohwa kin kahrehdohng reh ekei aramas ah ekei soh, sohte kin pid padahk me Koht ketin koasoanehdier mouren emen mwohn ah ipwidi?

¹⁰ Pwehki Siohwa kin kahrehdohng reh ekei aramas oh ekei soh, met soh kin pid duwen padahk me Koht ketin koasoanehdier mouren emen mwohn ah ipwidi? Uhdahn soh! Koht kin kahrehdohng reh aramas akan me kin wiahda pein ahr pilipil en pahpa ih. Siohwa kin wauneki ahr pwung en wiahda pein ahr pilipil kan. Siohwa kin mweidong aramas akan nan rahnpwukat en wiahda pein arail pilipil kan duwehte irail mehn Israel kan nan sounpahr 3,000 samwalahro, ni ahnsou me Moses koasoia: “Rahnwet I kihong kumwail en pilada nanpwungen me mwahu oh me suwed, oh nanpwungen mehla oh mour. . . . Eri, met sampah oh nanleng en wia ei sounkadehde me I kihongkumwailehr, kumwail en pilada nanpwungen mour oh mehla, nanpwungen sapwellimen Koht kupwuramwahu de sapwellimen Koht keria. Eri, pilada mour. Poakohng Kauno [“Siohwa,” NW], amwail Koht, kapwaiada sapwellime mahsen oh loalopwoatohng, pwe ih me pahn kahrehiong kumwail oh kadaudokamwail kan mour werei nan sahpw me Kauno ketin inoukihong amwail pahpa kahlap ako, Eipraam, Aisek oh Seikop.”​—Deuderonomi 30:15-20.

11. Iaduwen mehn Israel kan kin kasalehda me re kin pilada mour?

¹¹ Tehk wasaht me mehn Israel kan pahn pilada mour ni ahr kin ‘poakohng Kauno [“Siohwa,” NW], kapwaiada sapwellime mahsen oh loalopwoatohng.’ Ni ahnsou me mahsen wet wiawiehr, mehn Israel kan saikinte sapwenikihla Sapwen Inou. Re mihmi nan mohs en Moap kan, kaukaunop en kotehla Pillap Sordan oh pedolong nan sapwen Kenan. E mengeiong irail en medemedewe duwen “sahpw kaselel oh pwelmwahu ehu, sahpw ehu me reken mwenge oh kepwe” me irail pahn kereniong sapwenikihla, ahpw met pahn pweida ihte ma irail kin poakohng Siohwa, kapwaiada sapwellime mahsen kan oh loalopwoatohng ih. (Eksodus 3:8) Moses kasansalehda met: “Ma kumwail pahn kapwaiada kosonned akan en Kauno [“Siohwa,” NW], amwail Koht, me I padapadahkihong kumwail rahnwet, eri, kumwail poakohng ih, oh peikiong, oh kapwaiada sapwellime kosonned kan koaros, kumwail eri pahn mourla oh keirda, oh e pahn kupwuramwahwih kumwail nan sahpw me kumwail kohkowohng loale pwe kumwail en sapwenikihla.”​—Deuderonomi 30:16.

12. Mehn kahlemeng en mehn Israel kan kin padahkiong kitail duwen dah me kin pid atail doadoahk en kalohk oh padahk kan?

¹² Met soh pahn padahkiong kitail mehkot duwen atail doadoahk en kalohk oh padahk kan nan imwilahn ahnsou wet? Kitail kin medemedewe duwen Paradais nin sampah me pahn kohdo oh koasoiong meteikan duwen paradais wet. Ahpw kitail oh pil iangahki irail me kitail kin onop Paipel rehrail kan sohte pahn kilang pweidahn inowo ma kitail koaros kin papah Koht sang ni atail kin roporop ong pein kitail. Duwehte mehn Israel kan, kitail oh pil iangahki irail kan me kitail kin padahk ohng pahn anahne sukuhliki en ‘poakohng Siohwa, kapwaiada sapwellime kosonned akan oh loalopwoatong.’ Ma kitail pahn tamanda met ni ahnsou me kitail kin wia atail doadoahk en kalohk, kitail pahn wia iengen Koht tohndoadoahk kan oh kak sewese aramas en karanih Koht.

Iengen Koht Tohndoadoahk kan

13, 14. (a) Nin duwen 1 Korint 3:5-9, iaduwen kitail kak wiahla iengen Koht tohndoadoahk kan? (b) Ni ahnsou me sounkalohk kan kin tohtohla, kaping pahn kohwong ihs, oh dahme kahrehda?

¹³ Pohl karasahda atail iang Koht doadoahk ni ah kin koasoia duwen wiahda mwetuwel ehu. E ntingihdi: “Pwe ihs me Apolos? Oh ihs me Pohl? Kiht uhdahn ladun Koht kei, me kahluweikumwaildohng nan pwoson. Emenemen kiht kin wiewia doadoahk me Koht ketikihong kiht se en kin wia: Ngehi kin kamwarek kisin werentuhke, a Apolos kin kalamwurehki pihl; ahpw Koht me kin ketin kakairada tuhkeo. Sohte katepen me kin kamwarak de kalamwur kisin tuhkeo; a Kohtete me kesempwal, pwe ih me kin ketin kakairada tuhkeo. Me kin kamwarak oh me kin kalamwur werentuhkeo sohte wekpeseng; oh Koht pahn ketikihong ketingpen emenemen ira, nin duwen doadoahk me ira wiadahr. Pwe kiht tohndoadoahk kei me kin iang Koht ketin wiewia sapwellime doadoahk, a kumwail me sapwellime mwaht.”​—1 Korint 3:5-9.

¹⁴ Nin duwen tohndoadoahk kei me kin iang Koht wiewia sapwellime doadoahk, kitail anahne ni lelepek kamwarek “mahsen en Wehio” nan mohngiong en aramas akan, oh mwuri kalamwurih, ni atail pahn kaunopada mwahu atail koasoi de padahk kan mwohn kitail pahn pwurehng pwurala rehrail oh onop Paipel rehrail. Ma pwehlo, mohngiong en aramas, me mwahu, Siohwa pahn kakairada padahk mehlel en Paipel nan mohngiong en aramaso. (Madiu 13:19, 23) E pahn kahrehdohng reh oh sapwellime Ohl aramaso. Eri, e sansal me kekeiradahn de tohtohlahn sounkalohk kan en Wehio kin pweida pwehki Siohwa kin kamwekidada mohngiong en aramas akan, kakairada padahk mehlel nan mohngiongarail oh kahrehdohng reh oh sapwellime Ohl aramas pwukat.

Doadoahk en Kokou Ehu me Sohte Pahn Ohla

15. Karasaras dahieu me Pohl doadoahngki ong kasalehda iaduwen kitail kak sewese aramas teikan en kakehlada pwoson?

¹⁵ Kitail kin perenki kilang tohtohlahn sounkalohk kan, oh ni mehlel, kitail men kilang aramas pwukat kolokolte ahr kin poakohng Siohwa, kapwaiada sapwellime mahsen kan oh loalopwoatong. Kitail kin nsensuwedkihla kilangada ekei aramas me kin pwupwuweisang padahk mehlel. Kitail kak wiahda mehkot pwehn irehdi irail kan en dehr pwupwla? Ni pil ehu karasaras, Pohl kin kasansalehda iaduwen kitail kak sewese aramas teikan en kakehlada ahr pwoson. E ntingihdi: “Pwe sohte ehu poahsoan kak koasoandi likin me Koht ketin koasoanedier, iei Sises Krais. Ni kokoupen tehnpas wet pohn poahsoan wet, ekei kak doadoahngki kohl, de silper, de takai kesempwal akan; a ekei pahn kin doadoahngki tuhke, de dihpw, de tehntuhke meng. Ahpw iren doadoahk en emenemen sounkou ihmw pahn sansalda mehlel ni Rahnen Krais. Pwe Rahno pahn tepkihda kisiniei; oh ih kisiniei me pah sohng oh kasalehda iren en emenemen eh doadoahk.”​—1 Korint 3:11-13.

16. (a) Iaduwen karasaras riau me Pohl doadoahngki kin wekpeseng? (b) Iaduwen atail doadoahk en sewese emen en wiahla tohnpadahk men ele sohte pahn pweida mwahu oh pahn kak imwila suwed?

¹⁶ Karasaras en Pohl me kin pid mwetuwel, pweidahn doadoahk wet kin poahsoankihda pohn doadoahk mwahu en kamwarek, kalamwuhr ahnsou koaros, oh sapwellimen Koht kapai kan. Karasaras teio me wahnpoarono kihda kin kasansalehda duwen sounkalohk Kristian men pahn pwukoahki imwilahn eh doadoahk. E kauwada pohn poahsoan kehlail ehu oh doadoahngki dipwisou mwahu kan? Pohl kihda kaweid wet: “Ahpw sounkou ihmw koaros uhdahn pahn kanahieng ar doadoahk.” (1 Korint 3:10) Nin doken atail kin kamwekid kapehden aramas akan ni atail kin padahkiong irail duwen koapworopwor en mour soutuk nan Paradais, atail padahk kan kin tepikihda poahsoanen padahk mengei kan en Pwuhk Sarawi, ahpw mwuri, kitail kin kalaudehki atail padahk dahme aramaso pahn wia pwehn ale mour soutuk? Atail padahk kan kin duwehte met: ‘Ma ke men ale mour soutuk nan Paradais ehu rahn, ke anahne onop Paipel, iang towehda mihding kan, oh iang kalohk’? Ma kitail kin wia met, kitail sohte kin sewese aramaso en kauwada eh pwoson pohn poahsoan kehlail ehu oh dahme kitail kin kauwada ele mwein sohte pahn kak dadaurete pahn kasongosong kan. En sewese aramas akan en karanih Siohwa ki koapworopwor en mour nan Paradais ni sounpar kei en papah ih kin duwehte koukihda ihmw ehu “tuhke, de dihpw, de tehn tuhke meng.”

Kakairada Limpoak ong Koht oh Krais

17, 18. (a) Dahme inenen kesempwal ma atail pwoson pahn kak dadaurete? (b) Iaduwen kitail kak sewese emen en mweidong Krais en ketiketki nan kapehdarail kan?

¹⁷ Pwe pwoson en emen pahn kak dadaurete, pwoson pahn anahne poahsoanda pohn eh nanpwungmwahu rehn Siohwa Koht ki Sises Krais. Nin duwen aramas sohunsek kan, kitail kak ahneki nanpwungmwahu rehn Koht ihte sang sapwellime Ohl. (Rom 5:10) Tamanda me Sises mahsanih: “Sohte me kak kolahng Semei ma soh ngehi.” Pwehn sewese meteikan en kakehlada pwoson, kitail en tamanda me “sohte ehu poahsoan kak koasoandi likin me Koht ketin koasoanedier, iei Sises Krais.” Met kin pidada dah?​—Sohn 14:6; 1 Korint 3:11.

¹⁸ Kauwada atail poahsoan pohn Krais kin wehwehki me kitail pahn wia atail padahk ni ahl ehu me pahn sewese irail akan me kin onop Paipel rehtail en kakairada eh limpoak loal ong Sises oh esehla ni unsek duwen sapwellimen Sises pwukoah nin duwen emen me tomwki dipatail kan, tapwin mwomwohdiso, Samworo Lapalap limpoak men, oh Nanmwarki me kin kakaun. (Daniel 7:13, 14; Madiu 20:28; Kolose 1:18-20; Ipru 4:14-16) E kin wehwehki me irail kin kamehlele Sises oh likamwete Sises kin “ketiket” nan mohngiongarail. Atail kapakapkin irail pahn anahne en duwehte sapwellimen Pohl kapakapki rie Kristian kan nan Episos. E ntingihdi: “Ihme kahrehda I kelehpwikihdi mwohn Samatail, . . . pwe e kak ketikihong kumwail . . . Krais en ketiketki nan kapehdamwail kan pwoson; I kapakapki amwail mour en poahsoankihda [Krais].”​—Episos 3:14-17.

19. En kakairada limpoak ong Krais nan mohngiong en irail kan me kitail kin wia onop Paipel rehrail kin imwikihla dah, ahpw dahme kitail anahne padahkiong irail?

¹⁹ Ma kitail men sewese irail akan me kin onop Paipel rehtail en poakohng Krais sang nan kapehdarail kan, met pahn uhd sewese irail en kasalehda limpoak ong Siohwa Koht. Limpoak me Sises kaselehda kin kasansalehda sapwellimen Siohwa irair kan. (Madiu 11:28-30; Mark 6:30-34; Sohn 15:13, 14; Kolose 1:15; Ipru 1:3) Ni en aramas akan kin esehla oh poakohng Sises, re pil pahn esehla oh poakohng Siohwa.a (1 Sohn 4:14, 16, 19) Kitail anahne padahkiong irail akan me kitail kin onop Paipel rehrail me Siohwa kin ketin utung Krais ni soahng koaros me e wiaiong aramas akan oh ihme kahrehda kitail anahne kalahngankihong Siohwa, kapinga Ih, oh kaudokiong “Kohto me kin ketin komourkitailla.”​—Melkahka 68:19, 20; Aiseia 12:2-5; Sohn 3:16; 5:19.

20. (a) Iaduwen kitail kak sewese aramas akan en karanih Koht oh sapwellime Ohl? (b) Dahme kitail pahn sukuhliki nan artikel en mwuhr?

²⁰ Nin duwen tohndoadoahk kan me kin iang Koht wia sapwellime doadoahko, kitail en sewese aramas akan en karanih Koht oh sapwellime Ohl, oh sewese irail en kakairada limpoak oh pwoson sang nan kapehdarail kan. Met pahn sewese irail en uhdahn kamehlele Siohwa. (Sohn 7:28) Ki Krais, re pahn kak karanih Koht, oh re pahn poakohng ih oh loaloapwoatong ih. Arail papah Siohwa ni limpoak sohte poahsoankihda erein ahnsou, ahpw re kin pwoson me sapwellimen Siohwa inou kaselel kan pahn pweida ni pein sapwellime ahnsou. (Koulen Kedepwidepw kan 3:24-26; Ipru 11:6) Ni ahnsou me kitail kin sewese meteikan en kakehlada ahr pwoson, koapworopwor, oh limpoak, kitail pil anahne kakehlada pein atail pwoson pwehn duwehte sohp kehlail me kak tangatang mendahki melimel laud kin wiawi. Kitail pahn koasoaiada duwen met nan artikel en mwuhr.

[Nting tikitik me mi pah]

Kousapahl

◻ Iaduwen kitail kin kalapw sewese aramas akan en perenki rong duwen rongamwahu en Wehio, ahpw keper dahieu kin wiawi?

◻ Soahngen aramas dah kei me Siohwa kin kahrehdong reh oh sapwellime Ohl?

◻ Dahme mehn Israel kan anahne wia ma re men pedolong nan Sapwen Inou, oh dahme kitail kak sukuhliki sang met?

◻ Pwukoah dahieu kitail kin wia ong sewese aramas akan en karanih Siohwa oh sapwellime Ohl?

[Kilel nan Pali 10]

Mendahki kitail kin ehukihong aramas akan koapworopwor en mour soutuk nan Paradais, atail mehn akadei iei en sewese irail en karanih Siohwa

[Kilel kan nan Pali 13]

Ma kitail pahn kaunopada mwahu, kitail kak pweida mwahu ni atail pahn pwurehng pwurala rehrail