Mie Pelien Lamalam Ehu me Ke Kak Likih?

Ma pelien lamalam ehu sohte kin wia dahme ke kasik, ele e pahn apwal ken likih pelien lamalam koaros. Ahpw ken kamehlele me mie pelien lamalam ehu me ke kak likih. Ni Sises eh ketiket sampah, e ketikihpene pwihn en tohnpadahk lelepek kei oh padahkihong ren mourki sapwellimen Koht koasoandi kan. Miehte sapwellimen Krais tohnpadahk mehlel kan, de irail me kin uhdahn kanahieng pwe arail mour en pahrekiong mouren Kristian. Ia wasa ke kak diar irail?

Estelle me kitail koasoiapene mwoweo, nda: “I tepida sukuhlki Paipel ni ahnsou me I tepida onop rehn Sounkadehdehn Siohwa kan. Sohte pwand I wehwehkihda dahme Sohn 8:32 mahsanih: ‘Kumwail pahn dehdehki dahme mehlel, oh me mehlelo pahn kasaledengkumwailla.’”

Ray me kitail pil koasoiapene mwoweo, nda: “Ni ahi kin onop Paipel rehn Sounkadehdehn Siohwa kan, I sukuhlki me kaidehn Koht me ketin kahrehda ahn tohnsampah lokolok. I kalahnganki ahi ese me mehnda Koht sapwellimanki kahrepe mwahu en ketin mweidohng suwed en wiawi ahnsou wet, e pil ketin inoukihda en kasohrehla mepwukat ahnsou keren.”

E sansal me e apwal en wia dahme pwung ni pali laud en aramas akan ar kin wia dahme sohte konehng. Ahpw met kak pweida. Aramas tohto men ale sawas pwe ren wehwehkihla oh doadoahngki Paipel. Ihme kahrehda Sounkadehdehn Siohwa kan kin onop Paipel rehn me rar kei sampah pwon ni soh isepe. Wihk koaros, me tohto kin sukuhlki dahme Paipel uhdahn padahngki. Met imwikihla arail karanihala Sounkapikparail oh ahneki mour nsenamwahu.a

Ma ke tuhwong Sounkadehdehn Siohwa kan, ke sou idek rehrail dahme kahrehda re likih arail pelien lamalam? Kasawih arail padahk kan oh ma re kin mour nin duwen Kristian kan. Kowe eri pein pilada ma miehte pelien lamalam ehu me ke kak likih.