“Siohwa Ketin Mahkohngkumwailehr”

Emen ohl en poadopoad nan Britain, Edward Herbert, me momour mpen sounpar 400 samwalahro koasoia: “Mehmen me sohte kak mahkohng meteikan kauwelahr piris me pein ih anahne kotehla.” Ohl menet kasalehda kahrepe kesempwalo me kitail anahne mahkohng meteikan, me iei: Ehu rahn, ele kitail anahne peki meteikan ren mahkohng kitail. (Madiu 7:12) Ahpw mie ehu kahrepe me kesempwal sang met me kitail en kasalehda mahk. Tehk dahme wahnpoaron Pohl koasoia nan Kolose 3:13.​—Wadek.

Pwehki kitail koaros soh unsek, ele ekei pak kitail kin kalingeringerihada de kasarowehdi meteikan oh mwein re pil kin wiahiong kitail. (Rom 3:23) Ia duwen atail kak kolokol popohl rehn meteikan me pil soh unsek? Koht ketin doadoahngki Pohl en padahkihong kitail en mendahkihla sapwung en meteikan oh kasalehda mahk. Kaweid wet uhdahn konehng rahnwet duwehte ahnsowo me e tepin ntingdi kereniong sounpar riekid samwalahro. Kitail tehk mwahu dahme Pohl koasoia.

“Kumwail en sawaspene.” Lepin lokaia pwukat “kumwail en sawaspene” iei kawehwehpen lepin lokaiahn Krihk me dokedoke en mendahkihla sapwung en meteikan. Ehu kawehwehn Paipel koasoia me Kristian kan kin kasalehda irair wet ni arail “men mendahkihla sapwung de soahng kan me ekei wia me kin kalingeringerihrailda.” Eri, kitail en kanengamahiong meteikan duwehte atail men irail en kanengamahiong kitail. Met wehwehki me ni atail tamanda me mie soahng kan rehtail me kin kalingeringerih meteikan, kitail sohte pahn mweidohng soahng kan kitail sohte mwahuki rehn meteikan en kauwehla popohl nanpwungatail. Ahpw ia duwen ma meteikan wiahiong kitail sapwung?

“Mahkpene nanpwungamwail.” Nin duwen emen me samanih Paipel koasoia, lepin lokaiahn Krihk me kawehwehdi ni Pohnpei “mahkpene” kin “kasalehda laud duwen emen eh kasalehda mahk kalahngan.” Emen pil nda me lepin lokaia wet kak wehwehki “en wia mehkot me kansenamwahwih, sewese oh wia kamwahu ong meteikan.” Kitail kin kasalehda mahk kalahngan sang ni atail men mahkohng meteikan ‘ni emen rehtail eh pahn kin kaulime emen.’ Ahpw dahme kahrehda kitail en men mahkohng meteikan? Pwehki ehu rahn ele kitail anahne meteikan ren mahkohng kitail.

“Nin duwen [Siohwa] eh ketin mahkohngkumwailehr.” Kahrepe keieu kesempwal me kitail anahne mahkohng meteikan iei: Siohwa Koht ketin mahkohngkitailehr. (Maika 7:18) Medewehla duwen mahk kalahngan me Siohwa ketin kasalehiong me dipan kan me koluhla. Weksang kitail, Siohwa sohte kin ketin wiahda dihp. Ahpw e ketin kupwurki oh kin ketin mahkohng ni unsek me dipan kan mendahki e ketin mwahngih me e sohte pahn ketin anahne ren kasalehiong ih soangen mahk kalahngan wet. Ei, Siohwa iei me keieu ketikihda mehn kahlemeng mwahu en mahkohng me dipan kan me koluhla!

Sapwellimen Siohwa kalahngan kin kahrehda kitail en karanihala ih oh kamwakid kitail en alasang ih. (Episos 4:32–5:1) E mwahu kitail en pein idek rehtail, ‘Siohwa kin ni kalahngan ketin mahkohng ie, eri ia duwen ei sohte kak mahkohng emen me soh unsek oh me uhdahn koluhkihla eh wiahiong ie sapwung?’​—Luk 17:3, 4.