Kumwail Medemedewehte Duwen Soahng kan me Mi Nanleng

1, 2. (a) Dahme kahrehda mwomwohdisohn Kolose mihlahr nan keper? (b) Kaweid dahieu me sewese brother kan nan Kolose en wiahte kompoakepahn Koht?

MINIMINPENEHN mwomwohdisohn tepin Kristian ko nan Kolose mihlahr nan keper. Ekei brother ko ndinda me koaros anahne kapwaiada Kosonned en Moseso. Meteikan ndinda me e sapwung en perenki mour nsenamwahu. Pohl katamankihong irail duwen keperpen lamalam pwukat oh nda: “Kumwail kanahieng pwe emen de pitihkinkumwaildi loalokong widing mwahl en aramas akan, me re kin alehdi sang ni padahk kodoudou en mehn kawa ko, oh sang rehn ngehn suwed akan me kin kakaun wasa nin sampah, a kaidehn sang rehn Krais.”​—Kol. 2:8.

² Ma Kristian keidi pwukat idawehn madamadau en aramas, re pahn soikala pwais kaselel en wia sapwellimen Koht seri kan. (Kol. 2:20-23) Pwehn sewese irail en kolokol arail nanpwungmwahu rehn Koht me kesempwal, Pohl padahkihong irail: “Kumwail perenki medemedewe duwen soahng kan me mi wasao, kaidehn mehkan me mi sampah wet.” (Kol. 3:2) Kristian pwukat anahne tamataman arail koapworopwor tohrohr en mour kohkohlahte nanleng.​—Kol. 1:4, 5.

3. (a) Koapworopwor dahieu me Kristian keidi kan ahneki? (b) Peidek dah kan me kitail pahn koasoiapene nan iren onop wet?

³ Kristian keidi kan rahnwet kin pil medemedewehte duwen Wehin Koht oh arail koapworopwor en “iang Krais” nanleng. (Rom 8:14-17) Ahpw ia duwen irail me ahneki koapworopwor en mour nin sampah? Ia duwen dahme Pohl koasoia eh dokedoke irail? Ia duwen arail kak medemedewehte duwen soahng kan me mi nanleng? (Sohn 10:16) Eipraam oh Moses kin medemedewehte duwen soahng kan me mi nanleng pil erein ahnsou apwal akan. Ia duwen atail kak alasang ira?

IA WEHWEHN EN MEDEMEDEWEHTE DUWEN SOAHNG KAN ME MI NANLENG

4. Ia duwen Kristian kan me ahneki koapworopwor en mi sampah ar kak medemedewehte duwen soahng kan me mi nanleng?

⁴ Irail kan me ahneki koapworopwor en mour nin sampah anahne medemedewehte duwen soahng kan me mi nanleng. Re kin wia met sang ni arail kin mwohneki Siohwa oh sapwellime Wehi nan arail mour. (Luk 10:25-27) Ih met me Krais ketin wia oh ihme kitail pil anahne wia. (1 Pit. 2:21) Madamadau sapwung kan, loalokong widing mwahl en aramas akan oh men kepwehpwehla kin rek ni mwehin tepin Kristian ko. Kitail pil kin kilang soahng pwukat rahnwet nan ahn Sehdan koasoandi. (Wadek 2 Korint 10:5.) Kitail anahne alasang Sises oh pere kitail sang soahng koaros me kak kauwehla atail nanpwungmwahu rehn Siohwa.

5. Dahme kitail kak pein idek rehtail me pid atail madamadau duwen mwohni oh kepwe kan?

⁵ Ia duwe, kitail kin mweidohng madamadau en sampah me pid mwohni oh kepwe kan en kamwakid kitail? Dahme kitail kin medemedewe oh dahme kitail kin wia kin kasalehda dahme kitail uhdahn poakohng. Sises ketin kawehwehda met ni eh mahsanih: “Pwe ahnsou koaros kapehdamwail kin uhlahng wasa me amwail dipwisou kesempwal kan kin mi ie.” (Mad. 6:21) Kitail anahne pein idek rehtail dahme keieu kesempwal ong kitail. Ia duwe, kitail kin doadoahngkihla ahnsou laud pwunupwunodki duwen mwohni, medemedewe en alehdi doadoahk ehu me mwahusang atail doadoahko, de songosong en kalaudehla atail mourki mour ehu me uhdahn kansenamwahu? De kitail kin song en ahneki mour ehu me sohte kin kedirepwki soahng kan me sohte uhdahn kesempwal oh kilangwohngete atail nanpwungmwahu rehn Siohwa? (Mad. 6:22) Sises mahsanih me ma kitail kilangwohngete en “kepwehpwehkihla kepwehn sampah,” kitail kakete sohla ahneki nanpwungmwahu rehn Siohwa.​—Mad. 6:19, 20, 24.

6. Ia duwen atail kak kana ni atail pelianda atail irair en soh unsek?

⁶ Kitail sohte unsek, eri e mengei ong kitail en wia soahng kan me sapwung. (Wadek Rom 7:21-25.) Ma kitail sohte kin koapworopworki sapwellimen Koht manaman, ele kitail pahn iang “weweidki kamamsakau, de sakaula,” de pil “weweidki mour suwed de samin” oh sohte wauneki sapwellimen Koht kosonned kan. (Rom 13:12, 13) Kitail kin pelipelian atail irair en soh unsek ahnsou koaros. Kitail kak kana ihte ma kitail kin medemedewehte duwen soahng kan me mi nanleng. Kitail anahne doadoahk laud, ihme kahrehda Pohl nda: “I kin kaloke paliwereiet oh irehdi pein ngehi.” (1 Kor. 9:27) Kitail pil anahne irehdi pein kitail. Kitail pahn koasoiapene mehn kahlemeng en ohl lelepek riemen me wia uwen ara kak en kaperenda Koht.​—Ipru 11:6.

EIPRAAM “LIKIHALA” SIOHW

7, 8. (a) Soangen kahpwal dah kan me Eipraam oh Sara ahneki? (b) Dahme Eipraam kin ahnsou koaros medemedewe?

⁷ Ni Siohwa eh ketin padahkihong Eipraam en keseula nan sapwen Kenan iangahki eh peneineio, Eipraam perenki kapwaiada. Pwehki ahn Eipraam pwoson oh peik, Siohwa ketin katingih ni eh ketin wiahda inou ehu reh. Siohwa ketin mahsanihong: “I pahn kihong uhk kadaudok ngedehrie, me pahn wiahla wehi lapalap ehu. I pahn kapaiaiukada.” (Sen. 12:2) Sounpar tohto douwehr powe ahpw Eipraam oh Sara saikinte nainekihda seri. Ia duwe, Eipraam medewe me Siohwa ketin manokehla sapwellime inowo? Ni ahnsowo, mour en Eipraam sohte mengei. E pwilikihdi eh mour nsenamwahu nan kahnimw kepwehpwe en Ur oh seiloangki mwail daulih 1,000 kohlahng sapwen Kenan. Ih oh eh peneinei kousoan nan impwal kan, ekei pak sohte itar kanarail mwenge, oh ekei pak re pil kin lelohng apwal sang rehn lipirap akan. (Sen. 12:5, 10; 13:18; 14:10-16) Ahpw, Eipraam oh eh peneinei sohte men pwuralahng arail mour nsenamwahu nan Ur.​—Wadek Ipru 11:8-12, 15.

⁸ Eipraam “likihala KAUN-O” oh sohte medemedewehte “mehkan me mi sampah.” (Sen. 15:6) E kin ahnsou koaros medemedewe duwen sapwellimen Koht inou kan ong ih. Siohwa mwahngih ahn Eipraam eh pwoson oh mahsanihong: “Kilengdalahng pahnlahng, oh wadek usu kan, ma ke kak; pwe iei pahn duwen ngeder en kadaudokomw kan.” (Sen. 15:5) Ni Eipraam eh rongada met, e esehda me Siohwa sohte ketin manokehla ih. Ahnsou koaros me e kilengdalahng usu kan, e pahn tamanda sapwellimen Siohwa inou en ketikihong ih kadaudoke tohto. Ni eh lel ahnsou me Siohwa ketin koasoanehdi, Eipraam nainekihda pwutak emen, duwehte dahme Siohwa ketin inoukihda.​—Sen. 21:1, 2.

9. Ia duwen atail kak alasang Eipraam?

⁹ Duwehte Eipraam, kitail pil awiawih sapwellimen Siohwa inou kan en pweida. (2 Pit. 3:13) Ma kitail sohte medemedewehte duwen soahng kan me mi nanleng, kitail kakete leme me inou pwukat pwand oh ele kitail sohla kin nohn ngoangki papah Siohwa duwen me kitail kin wia mahso. Mwein mahs ke wiahda tounmetei kan ong Siohwa pwe ken kak wiahla pioneer men de papah ni soangen ahl tohrohr teikan. Ahpw dahme ke wiewia ahnsou wet? Ke duwehte Eipraam me wia uwen eh kak ong Siohwa oh kilangwohngete kapai kan en ahnsou kohkohdo? (Ipru 11:10) Eipraam “pwoson Koht” oh wia emen kompoakepahn Koht.​—Rom 4:3.

MOSES KILANG “KOHT ME SOH SANSAL”

10. Ia mwomwen ahn Moses eh tikida?

¹⁰ Moses wia emen ohl me kin medemedewehte duwen soahng kan me mi nanleng. E tikida wia kisehn peneinei en nanmwarki en Isip ni ahnsou me Isip wia wehi keieu kehlail nan sampah. Paipel mahsanih me e “audaudkidahr soangen loalokong koaros en mehn Isip.” Soangen kasukuhl laud wet kahrehiong Moses en “wiahla ohl koahiek nin lokaia oh wiewia kan.” (Wiewia 7:22) Pwehki mwomwen eh tikida, Moses ahneki ahnsou mwahu tohto en wiahla emen ohl kesempwal nan Isip. Ahpw ong Moses, mie ehu soangen kasukuhl me kesempwal sang met.

11, 12. Soangen kasukuhl dahieu me keieu kesempwal ong Moses? Ia duwen atail ese met?

¹¹ Ni ahnsou me Moses tikitik, eh nohno, Sokeped, kasukuhliong ih duwen Koht en mehn Ipru kan. Kasukuhl wet duwen Siohwa kin kesempwal ong Moses laudsang soahng teikan. E pwilikihdi eh ahnsou mwahu en kepwehpwehla oh lapalapala pwehn kak wia kupwuren Koht. (Wadek Ipru 11:24-27.) En Moses eh kaiahnda sang eh tikitik oh sang eh pwoson Siohwa sewese ih en medemedewehte soahng kan me mi nanleng.

¹² Mendahki Moses alehdi kasukuhl me keieu mwahu ahnsowo nan Isip, e sohte doadoahngki met pwehn wiahla emen me keieu lapalap, ndand, de kepwehpwe. Ni mehlel, Paipel mahsanih me e “sohte men inanki sapwellimen Parao serepeino. E pilada iang sapwellimen Koht aramas akan lokolok sang perenki dihp ahnsou mwotomwot.” Mwuhr, Moses doadoahngki dahme e sukuhlki duwen Siohwa pwehn kahluwa sapwellime aramas akan.

13, 14. (a) Mwohn Moses eh kak kapitala sapwellimen Siohwa aramas akan, dahme e anahne sukuhlki? (b) Dahme kitail pil anahne sukuhlki?

¹³ Moses poakohng Siohwa oh sapwellime aramas akan, me wia lidu kei nan Isip ahnsowo. Ni Moses eh sounpar 40, e medewe me e kak kasaledekihirailla. (Wiewia 7:23-25) Ahpw Siohwa mwahngih me Moses saikinte kak wia met. E pil anahnehte sukuhlki en aktikitik, kanengamah, mpahi, oh kak kaunda pein ih. (Lep. Pad. 15:33) Moses anahne kaiahn me pahn kaunopada ih ong kahpwal laud kan me pahn kohdo. Erein sounpar 40 me Moses wia sounsilepen sihpw men kin sewese ih en kakairada irair pwukat.

¹⁴ Ia duwe, kasukuhl wet katapan ong Moses? Ei, Paipel mahsanih me e wiahla “ohl aktikitik men, me keieu aktikitik rehn aramas en sampah kan.” (Nemp. 12:3) Pwehki e sukuhlkihdi en aktikitik, e kak kasalehda kanengamah ong soangsoangen aramas oh arail kahpwal kan. (Eks. 18:26) Kitail pil anahne irair kan me pahn sewese kitail en pitsang kahn kamakam kowahlap oh pedolong nan sapwellimen Koht sampah kapw. (Kaud. 7:14) Ia duwe, kitail kin ehuong meteikan, iangahki irail kan me kitail medewe kin mwadang nsensuwedla? Dahme wahnpoaron Piter koasoia kak sewese kitail ni eh nda: “Kumwail wauneki aramas koaros, poakohng riamwail” Kristian kan koaros.​—1 Pit. 2:17.

MEDEMEDEWEHTE DUWEN SOAHNG KAN ME MI NANLENG

15, 16. (a) Dahme kahrehda kitail anahne medemedewehte duwen soahng kan me mi nanleng? (b) Dahme kahrehda Kristian kan anahne kolokol arail wiewia mwahu?

¹⁵ Kitail mihmi ni “ahnsou apwal ekei.” (2 Tim. 3:1) Ihme kahrehda kitail anahne medemedewehte duwen soahng kan me mi nanleng pwehn karanih Koht. (1 Des. 5:6-9) Kitail pahn kilang ahl siluh me kitail kak wia met.

¹⁶ Atail wiewia: Piter kawehwehda me wiewia mwahu uhdahn kesempwal ni eh nda: “Amwail tiahk kan nanpwungen me rotorot akan en kin mwahu.” E kapatahiong me irail kan me sehse Siohwa ele kilang mwomwen atail wiewia kan oh kakete “kapingahki Koht.” (1 Pit. 2:12) Kitail anahne wia soahng koaros me kitail kak pwe atail wiewia kan en kak kalinganahda Siohwa, mehnda ma kitail mi ni imwatail, wasahn doadoahk, wasahn sukuhl, wasahn mwemweit, de ni ahnsoun kalohk. Mehlel, kitail koaros sohte unsek oh kitail koaros kin sapwungala. (Rom 3:23) Ahpw kitail en dehr nsensuwed. Sapwellimen Siohwa sawas kak sewese kitail en ‘tangowei uwen atail kak nan weirentang en pwoson.’​—1 Tim. 6:12.

17. Ia duwen atail kak alasang sapwellimen Krais elen madamadau? (Menlau kilang tepin kilel.)

¹⁷ Atail madamadau: Pwehn kolokol wiewia mwahu, kitail anahne ahneki madamadau pwung. Wahnpoaron Pohl nda: “Kumwail uhdahn pahn ahnekihla soangen lamalamohte me Krais Sises ketin sapwellimanki.” (Pil. 2:5) Soangen madamadau dah me Sises ketin sapwellimanki? E ketin aktikitik, oh met kahrehiong ih en men patohwanohng Siohwa dahme keieu mwahu. Ahnsou koaros e kin ketin medemedewe duwen kalohki rongamwahu en Wehin Koht. (Mark 1:38; 13:10) Ong Sises, Mahsen en Koht iei kaweid me keieu kesempwal. (Sohn 7:16; 8:28) E kin ketin pwerisekiong eh onopki Paipel pwehn kak ketin doadoahngki, uhki oh kawehwehda ire kan. Ma kitail ahneki soangen madamadau me Krais sapwellimanki, kitail pil pahn kasalehda aktikitik oh ngoang nan atail kalohk oh pwerisekiong atail onop en Paipel.

18. Ni ahl kesempwal dah kan me kitail kak utung sapwellimen Siohwa doadoahk?

¹⁸ Atail utuht: Kupwuren Koht iei me “mehkoaros me momour nanleng, oh nin sampah” en uhpahiong Sises. (Pil. 2:9-11) Mendahki Sises sapwellimanki pwukoa me uhdahn kesempwal, e ketin uhpahiong Semeo ni aktikitik. Kitail en pil wia duwehte. (1 Kor. 15:28) Kitail iang wia sapwellimen Siohwa doadoahk ni atail kin ‘padahkihong tohn wehi kan koaros; pwe re en wiahla sapwellime tohnpadahk.’ (Mad. 28:19) Kitail en pil “wia mwahu ong aramas koaros” me wia mehn mpatail oh pil riatail Kristian kan.​—Kal. 6:10.

19. Dahme kitail anahne koasoanehdi teng en wia?

¹⁹ Kitail uhdahn kalahnganki me Siohwa ketin padahkihong kitail en medemedewehte duwen soahng kan me mi nanleng. Kitail anahne “tang kehlail” oh medemedewehte dahme pwung. (Ipru 12:1) Kitail en koasoanehdi teng en ‘loalenohng duwehte ma kitail wie doadoahk’ ong Siohwa, oh ese me Samatail nanleng pahn ketin kapaikitailda laud.​—Kol. 3:23.