PEIDEK KAN SANG SOUNWADAWAD KAN
Ia duwe, dahme Depit kasalehda nan Melkahka 37:25 oh dahme Sises mahsanih nan Madiu 6:33 kin wehwehki me Siohwa sohte pahn ketin mweidohng Kristian men en sohla itar kene mwenge?
Depit ntingihdi me e “saikinte kilang aramas mwahu men me KAUN-O ketin likidmeliehla, de nah seri kan pekipeki ar tungoal kisin mwenge.” Wasaht e kawehwehda duwen dahme pein ih lelohng. E wehwehki mwahu duwen Koht eh kin ahnsou koaros ketin apwalih ih. (Mel. 37:25) Ahpw dahme Depit nda sohte wehwehki me sohte pak ehu sapwellimen Siohwa tohnkaudok men lelohng kahpwal en sohla itar soahng kan me e anahne, de e sohte pahn lelohng soahng pwukat.
Mie ahnsou me pein Depit kin lelohng soangen irair kan me inenen apwal. Ehu soangen ahnsowo iei ni eh tangasang Sohl. Solahr itar kenen Depit oh ienge ko kanarail mwenge, ih eri kohla oh peki kanarail pilawa. (1 Sam. 21:1-6) Eri ni ahnsowo, Depit wie “pekipeki ar tungoal kisin mwenge.” Ahpw ni soangen ahnsou apwalo, e ese me Siohwa sohte ketin likidmeliehla ih. Ni mehlel, sohte wasa kis kitail wadek me Depit wiahla emen me kin kalapw pekipekih kene mwenge pwehn wie momour.
Nan Madiu 6:33, Sises kamehlelehiong kitail me Koht pahn ketin kaitarala anahn en sapwellime ladu lelepek kan me kin mwohneki mahs Wehio nan arail mour. Sises mahsanih: “Kumwail rapahki mahs Wehin Koht oh dahme e kin ketin kupwurki, a soahng teikan koaros [iangahki mwenge, pihl, oh likou] e ahpw pahn ketikihong kumwail.” Ahpw, Sises pil kasalehda me pwehki kalokolok, rie kan ele pahn lelohng duhpek. (Mad. 25:35, 37, 40) Met wiawihong wahnpoaron Pohl. Ekei pak e kin duhpekla oh men nimpilda.—2 Kor. 11:27.
Siohwa ketin mahsanihong kitail me kitail pahn lelohng soangsoangen kalokolok kan. Ele e pahn ketin mweidohng kitail en lelohng apwal pwehn sapengala karaun kan me Tepil wiahda. (Sohp 2:3-5) Karasepe, ekei riatail Kristian kan, duwehte irail ko me selidi nan imweteng en mehn Nazi kan, mihla nan kahpwal pwehki kalokolok. Ehu wiepen kalokolok me uhdahn suwed me sounpei ko doadoahngki pwehn kauwehla lelepek en Sounkadehde ko iei en kihsang kanarail mwenge. Sounkadehde lelepek kan kolokolte arail peik ong Siohwa oh E sohte ketin likidmeliehla irail. E ketin mweidohng irail en mihla pahn kasongosong wet, duwehte e ketin mweidohng Kristian koaros en lelohng soangsoangen kasongosong kan. Ahpw, Siohwa kin ketin sewese koaros me kin lokolok pwehki mware pwe ren dadaurete. (1 Kor. 10:13) Kitail kak tamanda dahme Pilipai 1:29 mahsanih: “Koht ketikihongkumwailehr kalahngan ehu—iei en papah Krais, kaidehn sangete ni amwail pwoson ih, ahpw pil sang ni amwail lokolongki ih.”
Siohwa ketin inoukihda me e pahn ketin ieiang sapwellime ladu kan. Karasepe, Aiseia 54:17 mahsanih: “Sohte tehtehn mahwen ehu pahn kak kauweiukala.” Inou wet oh inou teikan me duwehte met kin kamehlelehiong kitail me Koht pahn ketin pere sapwellime aramas akan nin duwen pwihn ehu. Ahpw, emenemen Kristian ele pahn lelohng kasongosong me e pahn kakete mehkihla.