Watchtower ONLINE LIBRARY
Watchtower
ONLINE LIBRARY
Ponapean
  • PAIPEL
  • SAWASEPEN PAIPEL KAN
  • MIHTING KAN
  • w16 January pp. 3-6
  • Toukihda Irail ni Peren​—Nan Oceania

Sohte kasdo ong met

Kupwurmahk, mehkot sapwung en kihda kasdo

  • Toukihda Irail ni Peren​—Nan Oceania
  • Kahn Iroir Pakpakairki Wehin Siohwa (Ong Onop)—2016
  • Wadek nan Kahn Iroir (Ong Onop)
  • Sawaspen Oaralap kan
  • Ire kan me Duwehte Met
  • RAPAHKI AHL TEIKAN EN PAPAH SIOHWA NIN DUWEN PENEINEI EHU
  • KAUKAUNOP EN KESEU
  • DADAURETE KAHPWAL KAN
  • “I UHDAHN PERENKI AT KESEUDO WASAHT!”
  • Dahme Pahn Seweseiuk en Ahnla Mwomwohdiso Kapw Ehu
    Kahn Iroir Pakpakairki Wehin Siohwa (Ong Onop)—2024
  • “Met I Uhdahn Perenki Kalohk!”
    Kahn Iroir Pakpakairki Wehin Siohwa (Ong Onop)—2021
  • Ia Duwen Omw Kak Wiahda Wekidekla Kan nan Mwomwohdiso me Ke Keseula Ie?
    Kahn Iroir Pakpakairki Wehin Siohwa (Ong Onop)—2017
  • Sukuhlki Mehn Kahlemeng Mwahu kan Kin Wahdo Kapai Laud Sang Siohwa
    Kahn Iroir Pakpakairki Wehin Siohwa (Ong Onop)—2020
Kilang Pil Ekei
Kahn Iroir Pakpakairki Wehin Siohwa (Ong Onop)—2016
w16 January pp. 3-6
Burnett, Simone, Eston, oh Caleb

Burnett, Simone, Eston, oh Caleb

Toukihda Pein Irail ni Peren​—nan Oceania

RENEÉ, emen sister me sounpar 35 de daulih, tikida Australia nan peneinei ehu me wia Sounkadehde ngoang kei. E nda: “Pak tohto se kin keseula wasa kan me mie anahn laud ong sounkalohk en Wehio pwehn iang sawas. Pahpa oh Nohno kin wia soahng kan pwehn uhdahn kaperen! Ahnsou me I nainekihda seri riemen, I men ira en pil ahneki soangen mourohte me I ahneki.”

Ahn Reneé pwoudo, Shane, me kereniong sounpar 40, ahneki soangen mehn akadeiohte. E nda: “Mwurin nait seri keriemeno ipwidi, se wadek nan Kahn Iroir duwen peneinei ehu me wia Sounkadehde kei me dake wararail pwohto kohla palieir en Pacific pwehn kalohk ni deke kan en Tonga.a Koasoipen peneineio kamwakid kiht en ntingla ni ohpis en Sounkadehdehn Siohwa kan en Australia oh New Zealand pwehn idek ia wasa me mie anahn laud ong sounkalohk en Wehio.b Re sapengala oh luke kiht en keseula Tonga, wasaohte me se wadek duwen peneineio!”

Jacob, Reneé, Skye, oh Shane

Jacob, Reneé, Skye, oh Shane

Mwurin Shane, Reneé, oh neira seri riemeno, Jacob oh Skye, ar kousoan Tonga mpen sounpar ehu, pei kalapw wiawi wasao kahrehda re anahne pwurala Australia, ahpw re kin kolokolte arail mehn akadei en kalaudehla arail doadoahk en kalohk. Nan pahr 2011, re keseula Norfolk Island, kisin deke ieu nan Pacific me mi mpen mwail 900 palimese en Australia. Ia imwilahn arail keseula wasao? Rahnwet, Jacob me sounparehr 14 nda, “Siohwa sohte ihte ketin apwalih kiht ahpw e pil ketin kahrehiong at doadoahk en kalohko en kaperen!”

RAPAHKI AHL TEIKAN EN PAPAH SIOHWA NIN DUWEN PENEINEI EHU

Duwehte Shane, Reneé oh neira seri ko, peneinei tohto teikan me wia Sounkadehde kei kin toukihda pein irail en papah wasa kan me mie anahn laud ong sounkalohk. Dahme kin kamwakid irail en keseula wasa ko?

“Aramas tohto perenki duwen rongamwahwo. Se men kihong irail ahnsou mwahu en kaukaule onop Paipel.”​—Burnett

Burnett oh Simone, pwopwoud ehu me sounpar 35 de daulih, oh neira pwutak ko, Eston oh Caleb, me sounpar 12 oh 9, keseula Burketown nan Queensland, Australia me dohsang kahnimw kan. Burnett nda, “Sounkadehde kan kin kalohk wasao mwurin sounpar siluh de pahieu koaros. Aramas tohto perenki duwen rongamwahwo. Se men kihong irail ahnsou mwahu en kaukaule onop Paipel.”

Jim, Jack, Mark, oh Karen

Jim, Jack, Mark, oh Karen

Mark oh Karen, me met sounpar 50 samwa, iangehr papah nan ekei mwomwohdiso nan Sydney, Australia, mwohn ira oh neira seri silimeno, Jessica, Jim, oh Jack, keseula Nhulunbuy, wasa doh ehu me kin weirada takai kesempwal kan nan Northern Territory. Mark nda: “I poakepoake aramas, ihme kahrehda I men mi wasa ieu me I kak wia soahng tohto nan mwomwohdiso oh nan kalohk.” Ahpw, Karen pweiek en keseula. E nda: “Ahpw mwurin Mark oh meteikan ar kangoange ie, e kahrehiong ie en men song. I perenkihda ei wia met!”

Benjamin, Jade, Bria, oh Carolyn

Benjamin, Jade, Bria, oh Carolyn

Nan pahr 2011, Benjamin oh Carolyn oh neira serepein tikitik ko, Jade oh Bria, keseusang Queensland, Australia, kohla Timor-Leste, kisin sahpw ehu me mi pohn dekehn Timor nan Indonesia. Ben nda: “Mahso ngehi oh Carolyn kin wia doadoahk en pioneer tohrohr nan Timor-Leste. Kalohk wasao uhdahn kaperen oh riatail ko mwo uhdahn kin sawas laud. Se uhdahn nsensuwedla ni at mweselsang wasao. Se koasoanehdi teng sen pwurala. Ni ahnsou me nait seri ko ipwidi, se keseula at pilahn ko ahpw sohte wekidala.” Carolyn kapatahiong: “Se men nait seri ko en mi nanpwungen misineri kan, tohn Pedel kan oh pioneer tohrohr kan oh paiekihda ara werekiong irail ni uwen me ira kak.”

KAUKAUNOP EN KESEU

Sises mahsaniong sapwellime tohnpadahk ko: “Ihs rehmwail, nan eh koasoakoasoane en kauwada eh imwen doulik ehu, e soh pahn mwohndi mahs oh medemedewe uwen pweine”? (Luk 14:28) Pil duwehte, ni peneinei ehu ar medewehda en keseula ehu wasa tohrohr, e kesempwal ren pilahnehda mwahu. Soangen anahn dah me kesempwal en medemedewe?

NANPWUNGMWAHU REHN SIOHWA: Ben nda: “Se men papah meteikan ahpw kaidehn en katoutouwihala irail. Eri mwohn at keseula, se tehk mwahu me sen kalaudehla at nanpwungmwahu rehn Siohwa. Se pil kalaudehla at doadoahk en kalohk oh doadoahk teikan nan mwomwohdiso.”

Jacob, me kitail koasoiapene mwoweo, nda: “Mwohn at keseula Norfolk Island, se wadek soahng tohto nan Kahn Iroir oh Awake! (lokaiahn wai) duwen peneinei kan me kin papah wasa kan me anahn laud mie ong sounkalohk. Se koasoiapene duwen kahpwal kan me re lelohng oh ia duwen Siohwa eh ketin apwalihala irail.” Rie serepeino, Skye, me sounpar 11 nda: “I kapakap pak tohto, ahnsou me I kin kelehpw oh pil rehn Nohno oh Pahpa!”

PEPEHM KAN: Reneé nda: “Pwehki se kousoan karanih at peneinei oh kompoakepaht keren kan nan wasa ieu me I mwahuki, e pahn mengei en mihmihte. Ahpw I medewe ia duwen at keseula eh pahn wia kamwahu ehu ong at peneinei a kaidehn soahng kan me I pahn pwilikihdi.”

TIAHK EN WASAO: Peneinei tohto kin wia roporop pwehn kaunopada irail ong wasa me re pahn keseula ie. Mark nda: “Se wadek soahng koaros me se kak duwen Nhulunbuy. Riatail Kristian kan wasao kin ni kadek kadarodo doaropwehn nuhs en wasao, me sewesei kiht en ekis wehwehkihla aramas en wasao oh arail tiahk.”

Shane, me keseula Norfolk Island, nda: “Keieu, I kin medemedewehte en kasalehda ei irair en Kristian. I ese me ma I kin mehlel, aktikitik, oh doadoahk laud, I kak mi wasa sohte lipilipil nan sampah.”

DADAURETE KAHPWAL KAN

Irail kan me kin pweida ni arail keseula wasa kan me mie anahn laud ong sounkalohk kin kasalehda kesempwalpen en materek oh ahneki madamadau pwung ni arail kin lelohng kahpwal kan me soh kasikpe. Tehk ekei karasepe kan:

Reneé nda: “I sukuhlki en wia soahng kan ni soangsoangen ahl akan. Karasepe, ni ahnsou me nansed kin engimahda nan Norfolk Island, sohp me kin wahdo kepwe kan sohte kak peidi oh kepwehn sidohwa kan malaulaula oh pweilaudla. Eri ni ei kin wia mwenge, I sukuhlki en doadoahngki sohte lipilipil dahme mie.” Eh pwoudo, Shane, kapatahiong: “Se pil koasoanehdi nait sent pwe en kak itarohng ehuehu wihk.”

Neira pwutako, Jacob, kasalehda pil ehu kahpwal tohrohr. E nda: “Aramas laud isimente likin kiht nan at mwomwohdiso kapwo. Eri sohte kompoakepahi me uwe ie! Ahpw ni ei kin iang me mah kan nan kalohk, se kin kedekedeo kompoakepahnkihla emenemen.”

Jim, me met sounpar 21, lelohng soangen irairohte. E nda: “Mwomwohdiso me keieu karanih kiht iei Nhulunbuy me mwail 450 samwa dohsang kiht, eri se kin isaneki ahnsoun mihting tohrohr kan. Se kin mwadang lel wasao oh kesempwalki at ehuong brother oh sister ko. Se kin kilangwohng ahnsou pwukat nin duwen ahnsou me keieu kaperen nan sounparo pwon!”

“I UHDAHN PERENKI AT KESEUDO WASAHT!”

Paipel mahsanih: “Iei kupwuramwahu en KAUN-O me kahrehda omw kepwehpwe.” (Lep. Pad. 10:22) Nan sampah pwon, me tohto me kin keseula wasa kan me mie anahn laud ong sounkalohk kin pein esehda mehlelpen iren Paipel wet.

Mark nda: “Nait seri ko ar mwekidki at keseulao iei kapai me keieu laud. Me laud riemeno kin uhdahn kamehlele me Siohwa pahn ketin apwalih irail kan me kin mwohneki mahs Wehio nan arail mour. Soangen likilik wet kesempwalsang mehkoaros.”

Shane nda: “I uhdahn karanihala ei pwoudo oh nait seri ko. Ni ei kin rong arail ehukihong ie dahme Siohwa ketin wiahiong irail, I kin uhdahn nsenamwahu.” Nah pwutako, Jacob, pwungki met. E nda: “Erein ei mi me uhdahn kaperen. I uhdahn perenki at keseudo wasaht!”

a Menlau kilang Kahn Iroir (lokaiahn wai) en December 15, 2004, pali 8-11 me oaralape koasoia “Friends of God in the ‘Friendly Islands.’”

b Nan pahr 2012, ohpis en Australia oh New Zealand kohpene oh wiahla ohpis en Sounkadehdehn Siohwa kan en Australasia.

KAIAHN​—Kisakis Kesempwal Ehu

Benjamin lokaiahiong brother men ni wasahn keseng oh microphone nan Wasahn Kaudok

MA KOWE emen me keseula sahpw tohrohr ehu pwehn papah, kakairada omw kalahnganki tohn wasao oh arail tiahk kan oh pil perenki wiahda wekidekla kan me pahrekiong wasao pwe tohn wasao en poakohng oh waunekin uhk. Elder kan me kin papah wasa kan me anahn laud mie ong sounkalohk kin kihda kisakis kesempwal ehu ong mwomwohdiso me re kin papah ie, me iei kisakis en kaiahne meteikan. Ni elder pwukat ar sewese brother en wasao en wiahla sounsilepen sihpw kei nan mwomwohdiso, tohn mwomwohdiso pwon pahn pousehlahte paiekihda doadoahk en elder pwukat pil mwurin ar keseula ni ehu mwomwohdiso tohrohr. Ma kowe emen elder nan soangen irair wet, iet ekei iren sawas me ke ele pahn men doadoahngki ni omw kaiahne meteikan:

DAHME KE PAHN WIA:

Shane lokaiahiong brother men ni wasahn pwuhk nan Wasahn Kaudok

“Kihong meteikan pwukoa kan me re kakohng. Kasalehiong irail dahme ren wia oh kasalehda omw koapworopworki arail koahiek en pweida.”​—Mark.

“I kedekedeo kawehwehdi ekei iren kaweid ni lokaiahn wasao. Met wia mehkot laud pwe e sewese brother ko en wehwehki mwahu arail pwukoa kan.”​—Benjamin.

“Ma ke kin tehk dahme mwahu rehn emen oh pil nan mwomwohdiso, kowe oh meteikan pahn peren.”​—Burnett.

DAHME KEN SOIKALA:

“Dehr song en kaunda meteikan. Aramas kin men uhdihsang dahme e wiewia ma e pehm me emen kin ahnsou koaros mwasamwasahn oh kaukauwe dahme e wia. Oh pil, dehr kapahrekihpene mwomwohdiso me ke mi loale ahnsou wet ong omw mwomwohdisohn mwoweo. Ma emen kin pwurepwurehng nda, ‘Nan mwomwohdiso me I iang mwoweo . . . ,’ e kin kalapw kahrehda meteikan en sohte perenki rong.”​—Mark.

“Soikala medemedewehte duwen pein kowe, me dene ke loalokongsang de omw elen wia soahng kan kin mwahusang brother kan en wasao. Ahpw, doadoahngki Mahsen en Koht oh kaweid kan me sapwellime pwihn kin ntingihedi. Met kin kalaudehla miniminpene oh sewese koaros en kilang me Siohwa me kin ketin kaiahne kitail.”​—Shane.

    Pwuhk kan en lokaiahn Pohnpei (1987-2025)
    Log Out
    Log In
    • Ponapean
    • Share
    • Me Ke Mwahuki
    • Copyright © 2025 Watch Tower Bible and Tract Society of Pennsylvania
    • Terms of Use
    • Privacy Policy
    • Privacy Settings
    • JW.ORG
    • Log In
    Share