“Met I Uhdahn Perenki Kalohk!”

I SOHLA AHNEKI PEREN

E kansensuwed me ni ei sounpar eisek samwa, ahi nanpwungmwahu rehn Siohwa tepida luwetala. I kin medewe me iengei tohnsukuhl kan mwomwen ahneki saledek laud, oh I pil men ahneki soangen saledeko. I medewe me koasoandi kan me ei pahpa nohno wiahda oh pil koasoandi kan me Kristian kan anahne idawehn kin nohnla kakos, oh en kaudokiong Siohwa wia doadoahk laud. I sohte kin peikasalki me Siohwa ketin ieias, ahpw I sohla karanih ih.

I sohte uhdahn uhdihsang iang kalohk, ahpw I kin iangete ekei pak. Ni ahnsou me I kin iang kalohk, I sohte kin kaunopada, eri e kin apwal ong ie en tapiada koasoiong tohnihmw kan de pil koasoakoasoiong irail. Met kahrehda sohla aramas me I kin pwurehng pwurala rehrail de pil onop Paipel rehrail, oh met kalaudehla ei sohla perenki kalohk. I kin medewe, ‘Ia duwen emen eh kak perenki kalokalohk wihk koaros oh pil sounpwong koaros?’

Ni ahnsou me I sounpar 17, I uhdahn men uhtohrda. Eri I kihpene ei kepwe kan oh keseula Australia. Ei pahpa nohno uhdahn nsensuwedkihla ei kohkohsang ira. Ira pwunodkihda met, ahpw ira koapworopworki me I pahn pousehlahte papah Siohwa.

Ni ei mihmi Australia, ei papah Siohwa pil ehute tikitikla. I tepida sohla iang mihting. I kompoakepahnkihla irail kan me uwe ie me kin itarkihte towehda mihting ehu nipwong ahpw ehu nipwong, kohla niminim oh kahkahlek nan wasahn sakau kan. Ni ei kin medewehla ahnsowo, I ese me I kin iang padahk mehlel, ahpw ni ahnsowohte ieiang tiahk en sampah, oh I sohte nsenamwahu ni wasa riau pwukat.

MEHN KASUKUHL KESEMPWAL EHU ME I SOHTE KASIK

Mpen sounpar riau mwuri, I tuhwongada emen sister me, ni eh sohte medewe, kahrehiong ie en tepida medemedewe mwomwen ei mour. Ahnsowo I kin mi rehn sister kiripw limmen. Se lukehdo sounapwalih me kin seiloako oh eh pwoudo, Tamara, en mi reht erein wihk ehu. Ni ahnsou me eh pwoudo kin soupisengki pwukoa kan nan mwomwohdisou, Tamara kin iang kiht perenpene oh kouruhrpene. I uhdahn perenki. E uhdahn mengei en koasoi ong Tamara. E kapwuriamwei en kilang emen me kin soupisengki eh papah Siohwa pil kin ahnsowohte kaperen en iangih.

Tamara wia aramas ngoang oh peren men. Eh poakohng padahk mehlel oh doadoahk en kalohk uhdahn kamwakid ie. E kin perenki kihong Siohwa uwen eh kak koaros, ahpw I kin nsensuwed pwehki I sohte kin wia uwen ei kak. Eh mehn kahlemeng mwahwo katamankihong ie iren Paipel kesempwal ehu: Siohwa kin ketin kupwurperenki kitail koaros en “pereperen” papah ih oh ‘ngisingiski atail koul!’​—Mel. 100:2.

IA DUWEN EI PWUREHNG TEPIDA PERENKI KALOHK

I men ahneki soangen perenohte me Tamara ahneki, ahpw pwe ien ahneki soangen peren wet, I anahne wiahda wekidekla laud kan. Erein sounpar siluh, I sohte mwadang wekila, ahpw I ekisekis wiahda wekidekla kan. I tepida kaunopada ong kalohk, oh I iang sawasepen pioneer ekei ahnsou. Met sewese katikala ei kin saloh oh pil kalaudehla ei eimah. Pwehki I kin kalapw doadoahngki Paipel nan kalohk, met ekisekis kalaudehla ei perenki kalohk. Sohte pwand, I wiahla sawasepen pioneer men sounpwong koaros.

I tepida kompoakepahnkihla irail kan me perenki papah Siohwa ni uwen arail kak, sohte lipilipil irail sounpar depe. Arail mehn kahlemeng mwahu sewese ie en medewe dahme keieu kesempwal nan ei mour oh tepida wadek Paipel ehuehu rahn. Ei perenki kalohk laudla, oh kedekedeo I tepida papah nin duwen pioneer men. Sang mahs kohdo, ehdin ei pahn uhdahn peren oh nsenamwahu nan mwomwohdiso.

I PWOUDKIHLA EMEN PIONEER

Mwurin sounpar ehu, I tuhwong Alex. E wia aramas mwahu oh kadek men me kin poakohng Siohwa oh doadoahk en kalohk. E kin papah nin duwen emen sounsawas oh pioneerki sounpar weneu. Erein ahnsou ehu, e pil iang kalohk nan Malawi ni wasa kan me mie anahn laud ong sounkalohk. E kin iang misineri ko kalohk wasao, oh irail wia mehn kahlemeng mwahu ong ih oh kangoange ih en pousehlahte mwohneki mahs Wehin Koht.

Nan pahr 2003, ngehi oh Alex pwopwoudla. Oh se kin pousehlahte doadoahngki pali laud en at ahnsou ong papah Siohwa. Se sukuhlki mehn kasukuhl tohto, oh Siohwa ketin kapaikitda ni ahl tohto.

SIOHWA PIL KAPAIKITDA LAUD

Nan pahr 2009, se alehdi luhk en kohla papah nin duwen misineri kei nan Timor-Leste, kisin sahpw ehu nan Indonesia. Se uhdahn pwuriamweikihla, perenkihda, oh ekis saloh. Mwurin sounpwong limau, se lella Dili, capital en wasao.

Se anahne wiahda wekidekla kan mwurin at keseula wasao. Se anahne ahnla tiahk, lokaia, mwenge, oh mwomwen mour en wasao. Nan kalohk se kin tuhwong aramas akan me uhdahn semwehmwe, sohte iang sukuhl, oh me kin lelohng tiahk lemei sang meteikan. Oh se pil kilang me aramas tohto ohkihla lipwen mahweno oh tiahk lemei.a

At doadoahk en kalohko uhdahn kaperen! Karasepe, mie pak ehu me I tuhwong serepein men me nsensuwed me adaneki Maria.b E sounpar 13. Eh nohnou mehla sounpar kei mwoweo, oh e sohte kin kalapw kilang eh pahpao. Duwehte seri tohto me wehte ih, Maria sehse dahme e men wia nan eh mour. I tamanda ehu rahn me e sengiseng oh koasoiahda eh pepehm. Ahpw I sehse dahme e ndinda pwehki I saikinte esehla lokaiahn wasao. I kapakapohng Siohwa pwehn ketin sewese ie kangoange ih. Ngehi eri wadekohng iren Paipel kan me kansenamwahwihala ih. Erein sounpar kei mwuhr, I kilang me padahk mehlel wekidala mwomwen Maria, eh likou, oh eh mour. E papidaisla oh met e kin wia onop en Paipel rehn meteikan. Rahnwet, Maria pehm me e wiahla kisehn sapwellimen Siohwa peneinei oh e pehm me irail poakohng ih.

Siohwa uhdahn ketin kapaiahda doadoahko nan Timor-Leste. Mendahki pali laud en sounkalohk ko papidaisla erein sounpar eisekte, tohtohn irail wia pioneer kei, sounsawas kei, de elder kei. Ekei kin iang doadoahk nan ohpis en kawehwe oh sewese wiahda sawaspen Paipel kan ni lokaiahn wasao. I uhdahn perenki rong arail kin koul nan mihting kan, arail kin sirei, oh kilang arail wiahla kompoakepahn Siohwa.

I SOHTE KAK MEDEWEHDA EHU MOUR ME KAPEREN SANG MET

At doadoahko nan Timor-Leste uhdahn weksang mwomwen at mouro nan Australia, ahpw I sohte kak medewehda mour ehu me kaperen sang met. Ekei pak, se kin iang bus ehu me diren aramas, oh re kin wahda mwahmw oh wahntuhke kan pwehn netiki nan market. Ekei pak, se kin wia onop en Paipel nan kisin ihmw ehu me uhdahn karakar oh tahto sohte siment oh malek kin tangatangseli. Ahpw mendahki kahpwal pwukat, se kin kalapw nda, ‘Met uhdahn kaperen!’

Ni ei kin medewehla mahso, I uhdahn kalahnganki me ei pahpa oh nohno wia uwen ara kak en padahkihong ie kupwuren Siohwa oh sewese ie, pil ni ahnsou me I pwulopwul. Lepin Padahk 22:6 kasalehda me met mehlel. Pahpa oh nohno koaros kalahnganki ngehi oh Alex. Ira perenki kilang at kin papah Siohwa. Sangete pahr 2016, se kin papah nin duwen sounapwalih me kin seiloak nan wasahn kalohk kan me mi pahn epwelpen ohpis en Sounkadehde kan nan Australasia.

E mwomwen apwal en kamehlele me mie pak me I sohte perenki doadoahk en kalohko. Met I uhdahn perenki doadoahk en kalohko! I esehda me sohte lipilipil dahme wiawi nan at mour, peren mehlel kin kohsang atail kin papah Siohwa sang mohngiongitail unsek. Ni mehlel, erein sounpar 18 me ngehi oh Alex kin papahki Siohwa uhdahn wia ahnsou me keieu kaperen nan ei mour. Met I wehwehki mehlelpen dahme sounmelkahkao Depit patohwanohng Siohwa: “Koaros me kin diar arail wasahn ruk rehmwi pahn kin pereperen; re kak kokoulki ar peren ahnsou koaros. . . . Irail kan me kin poakohng komwi; re kin nsenamwahu pwehki komwi.”​—Mel. 5:11.