Dahme Kahrehda Ke Anahne Kapakap?

“A ni amwail kin peki kumwail sohte kin ale, pwehki amwail lamalam eh sohte kin pwung . . . Kumwail keido mpen Koht, oh e pahn keiong mpamwail.” (Seims 4:3, 8) Mahsen pwukat en sapwellimen Sises tohnpadahk Seims kin kamwekid kitail en medemedewe kahrepe kan me kitail kin kapakap.

Kapakap kaidehn ihte ahl en padahkiong Koht dahme kitail anahne. Nan sapwellime Kapahrek en Pohn Dohl, Sises mahsanih: “Samamwail kin ketin mwahngih duwen ahmw anahn akan mwohn ahmw saikinte peki mehkot.” Ahpw, Sises pil mahsanih: “Kumwail peki, kumwail ahpw pahn ale.” (Madiu 6:8; 7:7) Ihme kahrehda, e sansal me Siohwa kin kupwurki kitail en padahkiong Ih dahme kitail pehm me kitail anahne. Ahpw, kapakap kin laud sang ihte met.

Kompoakepah mehlel kan sohte kin ihte koasoipene ni ahnsou me re anahne mehkot. Re kin perenki emen emen, oh ara pirienpene kin kekeirada ni ahnsou me re kin kasalehda ara pepehm kan. Me duwehte met, kahrepen kapakap kin laud sang ihte peki mehkan me kitail anahne. Kapakap kin kihong kitail ahnsou mwahu en kakehlailda atail nanpwung mwahu rehn Siohwa ni atail kasalehong Ih atail loalopwoat sang nan mohngiongatail.

Ehi, Koht ketikihong kitail kapai kaselel en kapakap pwe kitail en karanih Ih. Met kak wiawi ihte ma kitail kasalehda pein atail pepehm akan ong Koht ni atail sohte pahn doadoahngki kapakap kan me re kin wadlikihla kapwukapwurehong. Ia uwen kaperen en patohong Siohwa ni kapakap! Me laud sang met, ehu lepin padahk en Paipel mahsanih: “Kauno kin ketin kupwurperenki en aramas mwahu kan ar kapakap.”​—Lepin Padahk 15:8.

Sounmelkahka Asap koulki: “A duwen ngehi, ia uwen kesempwal en ei karanih Koht.” (Melkahka 73:28) Ahpw, pwehn karanih Koht, kitail anahne wia laud sang ihte kapakap. Tehk duwen dahme wiawi me ntingdi nan Paipel kin kasalehda duwen met:

“Emen sapwellimen [Sises] tohnpadahk ko ahpw patohwanohng: ‘Maing at Kaun, komw ketin padahkihong kiht duwen at kin kapakap.’” Sises ahpw mahsanihong irail: “Eri, iet duwen amwail pahn kin kapakap, ‘Samat, mwaromwi en sarawihla, wehiomwi en pweida.’” (Luk 11:1, 2) Pahn mie wehwehn atail kapakap ma kitail sohte pahn mahs sukuhliki ia mwaren Koht oh iaduwen mwaren Koht pahn sarawihla? Oh pil, kitail kak kapakap pahrekiong mahsen pwukat en Sises ma kitail sohte wehwehki dahkot Wehin Koht? Kitail kak wehwehkihla ire pwukat ma kitail pahn kasawihada Paipel ni keneinei. Loalokong me kitail alehsang met pahn sewese kitail en esehla Koht oh wehwehkihla sapwellime ahl akan. Pil laud sang met, esehla Siohwa Koht pahn sewese kitail en karanih Ih oh kahrehong atail loalopwoat on Ih en laudla. Met pahn uhd sewese kitail en patohwong Ih ni saledek nan kapakap.

Kapakap Kak Kamwahuwihala Kahpwal kan

Kekeirada nanpwung keren rehn Siohwa pahn sewese kitail en kamwahuwihala kahpwal kan. Tehk duwen mehlel en met nan ehu ehu irair pwukat. Irair pwukat kin karasahda me kapakap ko me aramas pwukat wia kakehlailla arail nanpwung mwahu rehn Siohwa.

Nan Brazil, emen lih me adaneki Maria kapakap peki sawas sang rehn Koht. Lih menet men uhwong koasoandi pwung kan pwehki mwalaun me e kin kilang nan koasoandi en mour en aramas. Maria pil kesehla eh pwoud, nah seri kan, oh imwe. E pil tepiada doadoahngki wini suwed kan. Ahpw, ni ahnsou me e sohte kak diarada nsenamwahu, e ritingada mohngiongih ong Koht oh kapakapki sawas.

Mwurinte met, Sounkadehdehn Siohwa riemen pwarek rehn Maria oh pwilikihdi reh The Watchtower me audaudki ire kan me pid duwen kesempwalpen kapwaiada kaweid sang rehn Koht. Met kamwekid mohngiong en Maria, oh Maria tepiada onop Paipel rehn Sounkadehde ko rahnohte. Met imwikihla eh peneinei pwurpene. Nin doken e sukuhliki duwen Siohwa, e men kasalehda eh limpoak ong Ih. Maria koasoia: “I wiahda wekidekla mwahu kan nan ahi mour. Nin tepio, ahi pwoud oh ahi peneinei kin uhwong ahi onop en Paipel. Ahpw, ni ahnsou me re kilang wekidekla kan me I wiahda, re tepiada kangoange ie en kaukaule onop.” Mwuri, Maria inoukihong Sounkaronge kapakap (Siohwa) eh mour pwehn papah Ih.

Mendahki ahn José pwoud lih masamwahu oh e kin ahneki pisnis me pweida mwahu nan Bolivia, Jose sohte nsenamwahu. Jose wia dipen kamwahl eri met kahrehong eh pwoud en kesehla ih. E kin kamamsakau oh e pehm me e sohte katepe. José koasoia: “I tepida kapakap sang nan mohngiongih, pekipekih dahme I anahne wia pwehn kaperenda Koht. Mwurinte met, Sounkadehdehn Siohwa kan pwarek ahi wasahn pisnis oh men onop Paipel reh ni soh isepe, ahpw I nda ‘soh.’ Met wiawi pahn pak siluh. Ahnsou koaros me I kin kapakap peki sawas, re kin kohdo. Eri, I koasoanehdi nan kapehdei me I pahn rong irail ma re pwurehng pwurodo rehi. I wadekla Paipel pwon oh mie ahi peidek tohto, ahpw pasapeng kan me re kin kihda kin kansenamwahuwiehla. Sukuhliki duwen Siohwa kihong kahrepen ahi mour, oh kompoakepahi kan nanpwungen Sounkadehde kan kin wia mehn kahlemeng kangoang ong ie! I kesehla serepein me I kin ieiang oh kompoakepahi ko me se kin sakau. Sohte pwand, I pwurala rehn ahi pwoud oh nei seri kan. I papidaisla nan tepin pahr en 1999.”

Nan Italy, en Tamara pwopwoud mihla nan apwal, eri, e kapakapki erpit. Tamara ahneki irair en lemei pwehki eh peneinei kin keme ih oh re kesehla ih ni ahnsou me e sounpahr 14. Tamara koasoia: “I diarada Paipel ehu oh tepiada wadek. Ehu ni soutik, I wadekada ireo me koasoia ‘rapahki erpit kin rasehng rapahki kepwe kesempwal rir kan.’ I kapakapki erpit wet me iretikitik wet koasoia. (Lepin Padahk 2:1-6) Mandahn rahno, Sounkadehdehn Siohwa kan pwaredo ni imweo. I tepiada onop Paipel rehrail, ahpw mwurin sounpahr tohto me I tepiada kapwaiada dahme I sukuhliki. Mwurin mwo, I koasoanehdi nan kapehdei en idawehnla elen mour en Kristian oh papidaisla. Ahnsouwet, ngehi oh ahi pwoud kin sewese meteikan en paiekihda erpit en Koht.”

Beatriz kin kousoan nan Caracas, Venezuela oh kin iang kisehn koasoandi en pwihn en aramas kan me ilesang pwihn teikan. Ahpw, e mweisangehr eh pwoudo oh e kin nsensuwed laud. Ni eh pwunod, e kin kapakap reirei awa tohto. Mandahn rahno, pehl en eh wenihmwo sek. Ni eh lingeringerki met, e kilangweisang nan kisin pwoahr nan eh wenihmwo oh kilangada aramas riemen me weuwa ehd kei. Beatriz mwomwehda me sohte tohnihmwo, ahpw mwohn aramas riemeno mwesel, re nihdolong pahn wenihmwo kisin doaropwe ehu. Oaralap en doaropwe koasoia: “Esehla Noumw Pwuhk Sarawi.” Ara pwarek imweo kin pid kapakap pwohngo? E eker ira en pwurodo. Sohte pwand, e kin wie onohnop Paipel, oh mwuri, e papidaisla. Met Beatriz nsenamwahulahr oh e kin padahkiong meteikan iaduwen ren kak diarada nsenamwahu mehlel.

Carmen kin kapakapki eh kahpwal en semwehmwe. E naineki seri ehk oh eh pwoud, Rafael, kin wia emen sounkamamsakau. Carmen koasoia: “I song en koadoahkehda mwohni ni ahi kin lopwolopw ong meteikan.” Ahpw, en Rafael kamamsakau wie susuwedla. “E sohte mwahula lao lel se tepida onop Paipel rehn Sounkadehdehn Siohwa kan me ahi pwoudo tepiada wekila. Se sukuhliki duwen sapwellimen Siohwa inou me pid Wehin Koht​—me Siohwa pahn ahnsou keren kihsang nan sampah mouren semwehmwe oh lokolok. Ahi kapakap ong Koht eri pasapengla!” Sukuhliki duwen elen Siohwa kan sewese Rafael en uhdi sang kamamsakau, oh e pwuhriong “irair en aramas kapw.” (Episos 4:24) Ih oh eh peneinei kakehr kamwahuwihala arail elen mour. Rafael koasoia: “Se sohte kepwehpwe, oh sohte pein imwat, ahpw se ahneki anahne akan en mour oh se nsenamwahu.”

Ni Ahnsou me Kapakap Koaros Pahn Pasapengla

Mie mehkot katapan me kapakap wiahiong aramas pwukat? Ehi, uhdahn! Oh ke pil tehk me pali laud en arail kapakap kan kin pasapengla ni ahnsou me emen sang mwomwohdisohn Kristian sewese irail en karanihla Siohwa Koht ni ahr onop Paipel?​—Wiewia 9:11.

Eri, mie kahrepe mwahu kan kitail en kapakap. Ahnsou keren, kapakap me Wehin Koht en kaunda sampah oh kupwuren Koht en wiawi sampah pahn pasapengla. (Madiu 6:10) Mwurin Koht pahn kamwakelehsang sampah irail ko me kin uhwong Ih, “sampah pahn uhdahn dirkihla loalokong en Siohwa.” (Aiseia 11:9, New World Translation) Eri, irail koaros me poakohng Siohwa pahn paiekihda “saledek lingan en seri en Koht”​—oh arail kapakap kan uhdahn pahn pasapengla.​—Rom 8:18-21.

[Kilel nan pali 7]

Ke ese dahme kahrehda ke anahne kapakap?