Ia Uhdahn Mwomwen Sises?

Sohte emen me kolokol kilel en Sises. Sohte pak me e koasoanehdi paliwereo pwe emen en kak mahlenihada ih de parada mwomweo. Ahpw, erein sounpar epwiki kei sounmahlen tohto kin mahlenihada mwomwen ih nan arail mahlen.

Mehlel me sounmahlen pwukat sohte uhdahn ese ia mwomwen Sises. Tiahk kan, dahme pelien lamalam kan kamehlele, oh madamadau en irail kan me peki sounmahlen kan en mahlenihada Sises kin kalapw koasoanehdi mwomwen Sises nan mahlen kan. Ahpw arail mahlen pwukat kak kamwakid en aramas madamadau duwen Sises oh sapwellime padahk kan de kahrehda en sohla sansal.

Ekei sounmahlen kan mahlenihada Sises mwomwen aramas luwet men me moang reirei oh alis mosul de mwomwen nsensuwed. Ekei mahlen kan kasalehda Sises mwomwen aramas manaman, mie kilelen marain pwonopwon ehu pohn moangeo, de mwomwen tohrohrasang aramas teikan me mi limwah. Ia duwe, mahlen pwukat pwung ni ar kasalehda duwen Sises? Ia duwen atail kak ese? Ehu ahl iei en tehk koasoi kan nan Paipel me kak sewese kitail en wehwehki ele ia mwomwen Sises. Mepwukat pil kak sewese kitail en ahneki madamadau pwung duwen Sises.

“PALIWAR EHU ME KOMW KETIN KAUNOPOHNG IE”

Iei mahsen pwukat me Sises mahsanih nan eh kapakap ele ni ahnsou me e ketin papidaisla. (Ipru 10:5; Madiu 3:13-17) Ia mwomwen paliwereo? Sounpar 30 samwalahro, tohnleng Kapriel mahsanihong Mery: “Komw pahn liseianda oh naitikihada pwutak emen . . . Sapwellimen Koht.” (Luk 1:31, 35) Eri, Sises ketin ipwidi wia aramas unsek men, duwehte Adam ni eh kapikipikdao. (Luk 3:38; 1 Korint 15:45) Ele Sises wia ohl paliwar mwahu men, oh ele mwomweo duwehte eh nohno Mery mehn Suhso.

Mie en Sises alis, pwehki ih met tiahk en mehn Suhs kan me weksang ahn mehn Rom kan. Alis pwukat kin wia kasalepen wahu; e sohte reirei oh ping. E uhdahn sansal me Sises pil iang ahneki met de kin sehk eh alis oh sehk pitenmoange. Ihte irail kan me wia mehn Nasaraid, me duwehte Samson me sohte kin sehkasang pitenmoangarail kan.​—Nempe 6:5; Sounkopwung 13:5.

Pali laud en sounpar 30 ko Sises ketin wia kapinte men, e sohte kin doadoahngki dipwisoun doadoahk kan en rahnpwukat. (Mark 6:3) Eri, ele paliwere uhdahn kehlail. Erein ahnsou ko me e tepida kalohk, e kelehpw pwakihieisang irail koaros me netiki sihpw oh kou nan tehnpas sarawio, oh e ketin wekidedi en sounkawilian mwohni ko ar tehpel kan oh wudekihdi nair mwohni ko. (Sohn 2:14-17) E anahne wia aramas kehlail men pwehn wia mepwukat. Sises ketin doadoahngki paliwaro me Koht ketikihong pwehn kapwaiada sapwellime pwukoa me kohsang rehn Koht: “I uhdahn pahn pil kapahrengki Rongamwahu en Wehin Koht ong kahnimw teikan, pwe ih me Koht ketin poaronekiniehdo.” (Luk 4:43) E anahne kehl laud pwehn alu seiloakseli nan Palestin oh lohkiseli rohngo.

“KUMWAIL KOHDO REHI . . . I AHPW PAHN KOMMOALEIKUMWAILLA”

Mwomwen silangin Sises oh mwomwen eh mwekid ele kahrehiong aramas akan me ‘pwangadahr oh toutoulahr’ ren men kohla reh. (Madiu 11:28-30) Eh kadek kasansalehda sapwellime inou en kansenamwahwihala koaros me kin men sukuhl sang ih. Me pwulopwul kan pil kin men karanih Sises, Paipel mahsanih: “Ih eri pwoalehdi seri ko oh ketikidahng lime ko pohn emenemen irail.”​—Mark 10:13-16.

Mendahki Sises ketin lelohng medek laud mwohn eh pwoula, e sohte wia aramas nsensuwed men. Karasepe, e ketin sawas ni kamadipw en kapwopwoud ehu nan Kana ni eh ketin wekidala pihl ong ni wain. (Sohn 2:1-11) Pil nan kamadipw teikan e kin ketikihda iren mehn kasukuhl kan me aramas akan pahn tamatamante.​—Madiu 9:9-13; Sohn 12:1-8.

Laudsang koaros, Sises kin ketin kalohk ni ahl ehu me kin kahrehiong aramas koaros en ahneki koapworopwor kaselel ong mour soutuk. (Sohn 11:25, 26; 17:3) Ni ahnsou me sapwellime tohnpadahk 70 ko pwurodo oh padahkihong duwen arail kalohk, e ketin direkihla “peren laud” oh mahsanih: “Kumwail en perenkihda adamwail kan eh ntingdier nanleng.”​—Luk 10:20, 21.

“E SOHTE PAHN DUWEHTE REHMWAIL”

Kaunen pelien lamalam kan ni mwehin Sises kin kahrehiong meteikan ren tehk irail oh kasansalehda ar manaman. (Nempe 15:38-40; Madiu 23:5-7) Weksang irail, Sises ketin kaweidki sapwellime wahnpoaron ko ren dehr kin “kaunda” meteikan. (Luk 22:25, 26) Ni mehlel, Sises ketin mahsanih: “Kumwail kalekeikumwailsang sounkawehwehn Kosonnedo kan me kin mwahuki kohseli mi nan likou reirei oh kin mwahuki aramas en rahnmwahwih irail nan pokon kan.”​—Mark 12:38.

Weksang irail, Sises kin ketiket rehn pokon kan oh ekei pak aramas akan sohte kin kasawihada ih. (Sohn 7:10, 11) Pil nanpwungen sapwellime wahnpoaron 11 ko mwomwen paliwereo sohte weksang meteikan. Sudas me sounpangalao metik Sises pwehn “kihong pokono kilel ehu” pwehn kasansalehda Sises.​—Mark 14:44, 45.

Mendahki oaritik tohto duwen ih eh sohte sansal, kitail kak kamehlele me Sises sohte duwehte mwomwen me aramas kin kalapw mahlenihada duwen ih. Me kesempwalsang uhdahn mwomwen Sises, iei mwomwen atail kin kilengwohng ih met.

“MWURIN AHNSOU KIS SAMPAH WET SOLAHR PAHN KILANG IE”

Sises pwoula oh seridi ni rahnohte me e ketin mahsanih mepwukat. (Sohn 14:19) E ketikihda sapwellime mour nin duwen meirong “pwe me ngeder en maiauda.” (Madiu 20:28) Ni kesiluhn rahn, Koht ketin kaiasada Sises “ni pali ngehn” oh ‘mweidohng ih en sansalda’ rehn sapwellime tohnpadahk kan. (1 Piter 3:18; Wiewia 10:40) Ia mwomwen Sises ni ahnsou me e ketin pwarohng sapwellime tohnpadahk kan ahnsowo? E sansal me mwomweo weksang mwohn eh pwoula, pwehki sapwellime tohnpadahk kan me uhdahn karanih ih sohte mwadangete kasawihada ih. Mery Makdala medewehki me ih soumwet men; oh tohnpadahk riemen me kohkohlahng Emaus medewehki me ih mehn liki men.​—Luk 24:13-18; Sohn 20:1, 14, 15.

Ia duwen atail pahn kilengwohng Sises rahnwet? Daulih sounpar 60 mwurin Sises ketin pwoula, wahnpoaron Sohn kilangada kaudiahl ehu duwen Sises. Sohn sohte kilang kilel en pwoula pohn lohpwu. Ahpw, e kilang “Nanmwarkien nanmwarki kan oh Kaunen kaun akan,” Nanmwarkien Wehin Koht, me pahn kereniong kalowehdi en Koht imwintihti kan, ngehn kan oh aramas akan, oh wahdo kapai en mour soutuk rehn aramas akan.​—Kaudiahl 19:16; 21:3, 4.