Ke Kin Ese Duwen Met?

Dahme kahrehda e konehng Sises en ketin kahdaneki sounkawilian mwohni ko me netiki mahn akan nan tehnpas sarawio nan Serusalem “lipirap akan”?

NIN duwen me kileldi nan Rongamwahu en Madiu, “Sises ahpw ketilong nan Tehnpas Sarawio oh ketin kasarehieisang loale irail koaros me wie netinet oh pwapwain dipwisou. E ahpw ketin wekidedi en sounkawilian mwohni ko ar tehpel oh kiedpeseng dewen sounnet mwuroi ko. E ahpw mahsanihong irail, ‘E ntingdier nan Pwuhk Sarawi me Koht mahsanih, “Tehnpeseiet pahn kin adaneki tehnpas en kapakap,” a kumwail ahpw wiahkilahr dewen lipirap akan!’”​—Mad. 21:12, 13.

Pwuhken poadopoad en mehn Suhs kan kasalehda me sounkawilian mwohni ko nan tehnpas sarawio kin isaneki sounetinet kan sang ni arail kin netikihong irail soahng kan me inenen pweilaud. Karasepe, pwuhken Mishnah (Keritot 1:7) kilelehdi duwen ahnsou ehu mwohn pahr 100 me soundoadoahk men anahne doadoahk rahn 25 pwehn pwainda mwuroi riemen. Koht ketin kupwurki me me semwehmwe kan kak meirongki pitsin de mwuroi kan; ahpw pweinen menpihr pwukat inenen pweilaudla kahrehda e apwal ong irail en pwainda. (Lip. 1:14; 5:7; 12:6-8) Sounpadahk Simeon ben Gamaliel lingeringerkihda koasoandi wet oh katikitikala nempehn pwukoahn tounmetei pwukat, oh met kahrehda emen soundoadoahk anahne doadoahk awahte siluh pwehn pwainda pitsin riemen.

Eri nin duwen me kileldier, e konehng Sises en ketin kahdaneki sounkawilian mwohni ko “lipirap akan” pwehki arail doadoahngki sapwung tehnpaso oh re pil noahrok.