Inou kan me Pahn Pweida
Rongamwahu en Wehin Koht kin lolohkseli nan sampah pwon, duwehte me Sises ketin kohpadahr. (Madiu 24:14) Nan Paipel, pwuhken Daniel kin padahkihong kitail me Wehi wet iei sapwellimen Koht koperment. Irelaud 2 en pwuhk wet audaudki kokohp ehu me kawehwehda duwen ekei koperment kehlail en aramas akan, de wehi kan, sangete ni mwehin Papilon en mahso kohdo lel atail ahnsou. Iretikitik 44 kohpada dahme pahn wiawi ni ahnsou kohkohdo, ni eh mahsanih:
“Koht en nanleng pahn ketin kauwada mwehi ehu me sohte imwi. Mwehi wet sohte pahn kak lohdi, ahpw e pahn kauwehla mwehi teikan koaros, oh pahn mihmi kohkohlahte.”
Kokohp wet oh kokohp en Paipel teikan kohpada me Wehin Koht pahn wiliandi kaundahn aramas koaros oh wiahda koasoandi me pahn poatopoat oh soandi mwahu ong aramas akan nin sampah. Ia mwomwen mour pahn kaundahn Wehio? Iet ekei inou kaselel kan me pahn kereniong pweida.
SOHLA MAHWEN
Melkahka 46:9: “[Koht] kin ketin katokehdi mahwen wasa koaros nin sampah; e kin ketin katimpeseng arep kan, oh kauwehla kesik ketieu kan, e kin ketin isikala nein sounpei kan mehn sansar kan.”
Medewehla ia pahn mwomwen sampah ma mwohni koaros oh koahiek laud kan me kin kadoadoahk pwehn wiahda dipwisoun mahwen kan pahn uhd kadoadoahk ong wasa kan me aramas pahn kak paiekihda a kaidehn kemeirailla! Inou wet uhdahn pahn pweida pahn kaundahn Wehin Koht.
SOHLA SOUMWAHU
Aiseia 33:24: “Sohte emen me kin kousoan nan sahpwo pahn kaulimkihla eh soumwahu.”
Medewehla sampah ehu me sohte emen pahn kin medengki soumwahun mohngiong, kanser, malaria, de soumwahu teikan. E sohla pahn mie anahnepen imwen wini oh wini kan. Roson unsek, iei met me tohnsampah kan pahn ahneki ni ahnsou kohkohdo.
SOHLA PAHN MIE LEHK LAPALAP
Melkahka 72:16: “Reken wahn pilawa en kin wiewiawihte nan wehiet; wahnsahpw en kin kipehdi dohl akan.”
E pahn mie mwenge me pahn itar ong koaros nin sampah, oh koaros pahn kin mie kanarail mwenge. Duhpek oh soumwahuki soh itar en mwenge pahn sohla wiawi.
SOLAHR MEDEK, NSENSUWED, OH MEHLA
Kaudiahl 21:4: “[Koht] pahn kin ketin limwihasang pilen masarail koaros. Mehla solahr pahn wiawi, solahr mwahiei, solahr nsensuwed, solahr medek. Soahng mering kan sohralahr.”
Met wehwehki mour unsek oh mour soutuk nan paradais nin sampah! Iei met me Sounkapikpatail limpoak, Siohwa Koht, ketin inoukihda.
“E PAHN KIN KAPWAIADA MEHKOAROS”
Ia duwe, mepwukat mwomwen ngilen me e pahn pweida? Mendahki pali laud en aramas pahn men ahneki mour wet me inoudahr oh sansalda nan Paipel, ahpw pwehki soangsoangen kahrepe kan, me tohto diarada me e apwal en medewe duwen mour kohkohlahte. Met sohte kapwuriamwei, pwehki saikinte emen aramas me ahneki soangen mour wet me kak padahkihong kitail duwen met.
Aramas akan kin mi pahn manaman en dihp oh mehla oh kin ahneki medek, lokolok, oh irair apwal kan erein ahnsou reirei, kahrehda aramas tohto ahnla soangen mour wet de sohla wiahki mehkot. Ahpw met uhdahn weksang dahme Sounkapikpatailo, Siohwa Koht, ketin kupwurki ong aramas akan.
Pwehn sewese kitail en wehwehki mehlelpen soahng koaros me e ketin inoukidahr, Koht ketin mahsaniheki me pid duwen sapwellime mahsen: “E pahn kin kapwaiada audepen kupwurei koaros; e pahn kin kapwaiada mehkoaros me I anahne en pweida.”—Aiseia 55:11.
Paipel kawehwehda me Siohwa iei Koht emen me “sohte kak ketin likamw.” (Taitus 1:2) Pwehki e ketin inoukidahr soahng kaselel pwukat koaros ong ni ahnsou kohkohdo, e pahn wia elen loalokong kitail en medewe: Aramas akan uhdahn pahn kak mour kohkohlahte nan Paradais nin sampah duwen me inoudahr? Dahme kitail anahne wia pwehn paiekihda sapwellimen Koht inowo? Nan ekei pali kan nan kisin pwuhk wet, ke pahn diarada ire mwahu kan me pahn sapengala peidek pwukat.