Ni Omw Pehm me Ke Solahr Men Momour

Adriana sang Brazil koasoia: “Pepehm pwukat sohte kak uhdi, eri I medewe me e pahn mwahu ma I kauhdi ei mour.”

MIE PAK ME KE ahneki pepehm en mworusala douluhl me kahrehda ke solahr men momour? Eri ele ke pahn wehwehki ia en Adriana pepehm. E lokolongki pwunod laud oh ahneki pepehm en nsensuwed oh sohla eh koapworopwor. Adriana ahneki soumwahu laud ehu me kahrehda e kin uhdahn nsensuwed ahnsou koaros.

Pil tehk ohlen Sapahn men me adaneki Kaoru, me kin apwahpwalih eh pahpa nohno me mahlahr. E koasoia: “Ekei pak I kin pwangada sang ni ei kin doadoahk laud ni ei wasahn doadoahko. Ekei pak I kin sohla men mwenge, oh I sohte kin meir mwahu. I tepida medewe me ei kahpwal akan pahn sohla ma I mehla.”

Ohlen Nigeria men me adaneki Ojebode koasoia: “Ahnsou koaros I kin nsensuwed kahrehda pilen meseie kin kereker, eri I rapahki ahl en kemeiehla.” Kalahngan ieu pwe, Ojebode, Kaoru, oh Adriana sohte pein kemeirailla. Ahpw nan pahr koaros aramas lopw kei kin pein kemeirailla.

IA WASA KE KAK DIAR SAWAS IE

Pali tohtohn irail me kin pein kemeirailla iei ohl akan, oh me tohto nanpwungarail kin namenengki peksawas. Sises ketin mahsanih me aramas soumwahu kin anahne toahkte. (Luk 5:31) Eri ma ke ahneki pepehm en loal ohla (depression) me kahrehda ke men kamwotehla omw mour, menlau ke dehr namenengki rapahki sawas. Aramas tohto me ahneki lokolok sang loal ohla (depression) diarada me palien wini kak sewese irail en nsenamwahula oh kak dadaur pahn arail kahpwal kan. Ojebode, Kaoru, oh Adriana irail koaros alehdi sawas en palien wini oh met irail eseier dahme irail pahn wiahiong arail kahpwal ko.

Toahkte kan ele kin kihda wini de wia elen sawas ieu me kin kamwakid me soumwahwo en koasoiahda eh pepehm koaros oh kin sewese ih en wekidala eh madamadau oh mwekid kan. Irail me loal ohlahr kan (depressed) anahne arail peneinei oh kompoakparail kan en wehwehkin irail, kanengamahiong irail, nsenohkin irail oh utung irail. Kompoakepah keieu mwahu me emen kak ahneki iei Siohwa Koht, me kin ketikihda sawas kaselel kan nan sapwellime Mahsen, Paipel.

MIE WIEPEN SAWAS EHU ME PAHN KAMWAHWIHALA KOHKOHLAHTE?

Irail kan me kin lokolongki loal ohla (depression) ele anahne ale sawas en palien wini ahnsou reirei oh ele pahn anahne wekidala arail wiewia kan. Ahpw ma ke kin lokolongki loal ohla (depression), ke kak kilikilenglahte mwowe ong ahnsou kaperen ehu me kohkohdo, duwehte me Ojebode wia. E koasoia “I kasikasik ien kilang pweidahn kokohp en Aiseia 33:24, me kohpada ahnsou me sohte emen pohn sampah pahn ‘kaulimkihla eh soumwahu.’” Ke sou duwehte Ojebode me nsenamwahukihla inou en “sampah kapw ehu,” wasa me “medek” pahn solahr mie. (Kaudiahl 21:1, 4) Inowo wehwehki me soangen pepehm oh madamadau kamedek koaros solahr pahn mie. Omw pepehm kansensuwed kan pahn sohla mie kohkohlahte. Omw pepehm kamedek de kansensuwed kan “pahn manokonokla douluhl.”—Aiseia 65:17.

Iren Paipel kan me Kak Sawas

Koht ketin mwahngih omw pepehm kan.

“Ngehi, KAUN-O, amwail Koht, . . . kin kakehlakei kumwail, oh mahmahsanihong kumwail, ‘Kumwail dehr masak, pwe I pahn sewesei kumwail.’”—Aiseia 41:13.

Siohwa kin ketin mwahngih atail pepehm kan laudsang kitail koaros, oh e kin ketin kupwurki sewese kitail.

Medemedewe duwen Mahsen en Koht.

“[Elaisa] . . . lemehda en mehla. E ahpw kapakap: ‘Maing KAUN . . . Komw ketin ale ei mour, pwe e konehngete I en mehla.’”—1 Nanmwarki 19:4.

Ojebode koasoia: “Medemedewe duwen Mahsen en Koht kin sewese ie. I tehkada me mie pak soukohp Elaisa ahneki soangen pepehm me I ahneki.”

Sukuhl sang mehn kahlemeng en Paipel kan.

“I [Sises] kin kapakapkin uhk [Piter] ni ngidingid pwe omw pwoson en dehr luwetala.”—Luk 22:32.

Mwurin wahnpoaron Piter eh kahmahmkihla Sises pak siluh, e uhdahn nsensuwedkihla oh sengiseng kowahlap. Kaoru koasoia: “Medemedewe duwen dahme Piter wiahu oh dahme Sises ketin wiahiong ih, sewese ie ien kilang me Siohwa oh Sises ketin nsenohki en Piter eh pepehm kan. Met kangoange ie.”

Omw pepehm kamedek de kansensuwed kan “pahn manokonokla douluhl.”—Aiseia 65:17