Ni Ahnsou me Ke Ahneki Soumwahu Laud Ehu

“Ni ahnsou me I diarada me I ahneki soumwahu kanser nan ngolungol oh mwasahl laud (colon), I kamehlele me I uhdahn pahn mehla. Ahpw mwurin ei lella ni ihmwo sang ei tuhwong toahkte, I medewe, ‘OK, kaidehn met me I kasik, ahpw I anahne rapahkihda ehu ahl me I pahn kak wiahiong met.’”—Linda, sounpar 71.

“I lokolok pwehki soumwahu kamedek ehu me kauwehla selen palimaun en meseiet. Ekei pak, I kin medek laud me kahrehda loaleiet kin ohla (depression). Pak tohto I kin pehm me I kelekelehpw oh I pil kin medewehda ien kemehla pein ngehi.”—Elise, sounpar 49.

Ohl soumwahu men mi nan wheelchair nanpwungen me e kin poakohng kan

MA KOWE de emen me ke poakepoake ahneki soumwahu ehu me pahn kahrehiong kowe de ih en mehla, ke wehwehki ia uwen kapwunod en met. Patehng met, ke anahne dadaur pahn keh lingeringer, pepehm en lidor, de pwunod pwehki soangen irair wet. Masak oh pwunod kak laudla sang ni omw kin masak kohla tuhwong toahkte, apwalki diar de pwain wini de wiepen kamwahwihala soumwahwo, de soahng teikan me kin pwarada sang ni kang winio de epwelpen soumwahwo. Kapwunod kan me pidada soumwahu laud kan kak kahrehiong uhk ken sehsehla dahme ke pahn wia.

Ia wasa kitail kak diar sawas ie? Me tohto diarada me arail kin koapworopworki Koht ni kapakap oh wadek ire kansenamwahu kan sang nan Paipel kin wia arail mehn kamweit keieu laud. Pil ehu sawas ele kak kohsang ni limpoak oh utuht me atail peneinei oh kompoakepatail kan kak kihda.

DAHME EKEI ARAMAS WIAHIER NAN SOANGEN IRAIR WET

Robert me sounpar 58 kaweidki: “Pwoson Koht oh e pahn ketin seweseiuk ken dadaurete mendahki ke soumwahu. Kapakap ong Siohwa. Padahkihong ih duwen omw pepehm. Peki sapwellime manaman. Peki en ketin seweseiuk ken ahneki madamadau pwung oh kangoange omw peneinei oh en ahneki meleilei ni omw pahn dadaur pahn omw soumwahu.

“E uhdahn sawas laud ni omw peneinei ar kin seweseiuk ken dehr kin nsensuwed de pwunod. Rahn koaros I kin sapeng delepwohn kan sang aramas emen de riemen me kin idek, ‘Ia iromw?’ Kompoakepahi kan sang soangsoangen wasa kan kin kangoange ie. Irail kin uhdahn kansenamwahwihiehla, oh sewese ie ien nantihongete.”

Ma kowe kompoakepah men me mwemweitla rehn aramas soumwahu men, tehk dahme Linda koasoia: “Aramas soumwahwo uhdahn men ahneki mour me duwehte ahn meteikan oh ele sohte kin men koasoakoasoia duwen soumwahwo. Eri koasoia duwen soahng kan me ke kin kalapw koasoakoasoia duwe.”

Pwehki kehl sang rehn Koht oh kamweit sang nan Paipel, oh pil sawas sang rehn peneinei oh kompoakepah limpoak kan, kitail kak koapworopworki me mour mie katepe, mehnda ma kitail pil dadaur pahn soumwahu laud ehu.

Iren Paipel kan me Kak Sawas

Koapworopworki Koht.

“I kapakapohng KAUN-O, e ahpw ketin sapeng ie; e ketin kasaledekihiehla sang nan ei masak koaros. Me sohte sawasaparail akan kin likweriong, oh e kin ketin sapeng irail; e kin ketin doareirailla sang ar apwal akan koaros.”—Melkahka 34:4, 6.

Linda me koasoiepe wiawiher mwowe, koasoia: “I sohte kin kapakapki, ‘Kamwahwihiehla.’ Ahpw, I kin ahnsou koaros kapakapki, ‘Sewese ie ien kehlail, oh sewese ie ien dadaurete pahn ei soumwahu.’”

Wadek Mahsen en Koht pwehn seweseiuk ken kehlail.

“Sohte emen . . . pahn kaulimkihla eh soumwahu.”—Aiseia 33:24.

Medemedewe duwen sapwellimen Koht inou kan ong ahnsou kohkohdo. Met pahn kihong uhk koapworopwor me pahn kakehleiuk ken dadaurete.

Peki rehn omw peneinei oh kompoakepahmw kan ren seweseieuk.

“Kompoakepah kan kin kasalehda ar limpoak ahnsou koaros. Ia katepen eh mie kompoakepahmw ma e sohte seweseiuk ni ahnsou apwal?”—Lepin Padahk 17:17.

Elise me koasoiepe wiawiher mwowe, kaweidki: “Ke dehr tohrohrala. Mweidohng kompoakepahmw kan ren seweseiuk. Ele e pahn mie ahnsou kan me ke pahn pehm me ke kelekelehpw oh ke sohte pil kin medewe me Koht kin ketin rong uhk, ahpw ke dehr tohrohrala.”