Kalowehdi Imwintihtio Mehla​—Ia Duwen?

MENDAHKI sapeik en atail tepin pahpa nohno, Adam oh Ihp, kahrehda dihp oh mehla ong aramas koaros, met sohte wekidala kupwuren Koht ong aramas akan. Nan sapwellime Mahsen me ntingdi, Paipel, Koht ketin pwurupwurehng kamehlelehda me kupwure saikinte wekidekla.

• “Me pwung kan pahn koukousoan nan sahpwo oh re pahn sapwenikihla kohkohlahte.”​—Melkahka 37:29.

• “KAUN-O, wasa Lapalahpie pahn ketin kamwomwala mehla kohkohlahte! E pahn ketikihsang pilenmesen aramas koaros.”​—Aiseia 25:8.

• “Oh imwintihti me keieu mwuhr, iei mehla, pahn kasohrala.”​—1 Korint 15:26.

• “Mehla solahr pahn wiawi, solahr mwahiei, solahr sengiseng oh solahr medek.”​—Kaudiahl 21:4.

Ia duwen Koht eh “pahn ketin kamwomwala mehla,” kahrehiong imwintihtio en “kasohrala”? Nin duwen eh ntingdier, Paipel ni sansal mahsanih me “me pwung kan pahn koukousoan nan sahpwo . . . kohkohlahte.” Ahpw e pil mahsanih me “sohte aramas emen nin sampah me kin wia me pwung ahnsou koaros.” (Eklesiasdes 7:20) Koht pahn ketin likidmeliehla sapwellime koasoandi kan pwehn ketin kalowehdi mehla? Soh douluhl! E sohte pahn ketin wia met pwehki “Koht . . . sohte kak ketin likamw.” (Taitus 1:2) Eri dahme Koht pahn ketin wia pwehn kapwaiada kupwure limpoak en kapikada aramas?

KALOWEHDI MEHLA SANG NI PWEINEN PWEIPWEI SAPAHL

Siohwa Koht ketikihda koasoandi limpoak ehu pwehn kapitala aramas akan sang mehla​—ni eh ketin pwainla pweinen pweipwei sapahlo. Madamadau en pweinen pweipwei sapahlo iei mehkot me pahn pahrekiong pweinen pweipwei ehu me pahn pwainla dahme ohla de kaitarala pweipwei pwung me koasoandier. Pwehki aramas koaros dipan oh mi pahn kalokepen mehla, Paipel mahsanih ni inen: “Sohte me kak kapitala pein ih; sohte me kak patohwanohng Koht pweinen eh mour, pwe pweinen mour me nohn laud kowahlap. Me emen kak kihda sohte pahn itarohng.”​—Melkahka 49:7, 8.

Ni ahnsou me aramas soh unsek men mehla, e kak pwainla dipeohte; e sohte kak kapwungala pein ih, e pil sohte kak pwainla dipen emen tohrohr. (Rom 6:7) Kitail anahne emen aramas me unsek oh sohte dipe pwehn toukihda pein eh mour, kaidehn ong pein dipe kan, ahpw ong dipatail kan.​—Ipru 10:1-4.

Ih met me Koht ketin koasoanedier pwehn wiawi. E ketin poaronehdo sapwellime Ohl, Sises, sang nanleng pwehn ketin ipwidi sampah nin duwen aramas unsek me sohte dipe men. (1 Piter 2:22) Sises mahsanih me e ketido pwehn “toukihda moure nin duwen pweinen pweipwei sapahl ehu ong aramas tohto.” (Mark 10:45) E ketin pwoula pwehn pwainla dipatail kan oh kasaledekitailla sang mehla, pwe kitail en kak ahneki mour soutuk.​—Sohn 3:16.

IAHD ME MEHLA PAHN LOHDI?

Rahnpwukat, kitail kin momour ni ahnsou me kokohp en Paipel pweidahr duwen “ahnsou apwal oh keper,” me kadehdehda me kitail momour ni “imwin rahn akan” en koasoandi suwed wet. (2 Timoty 3:1) Imwin rahn akan pahn imwikihla “rahn en kadeik oh kasohralahn aramas suwed kan.” (2 Piter 3:3, 7) Ahpw aramas akan me kin poakohng Koht pahn pitsang kasohrala oh pahn paiekihda “mour soutuk.”​—Madiu 25:46.

Meh rar teikan pahn ahneki ahnsou mwahu en alehdi mour soutuk ni ahnsou me re pahn iasada. Sises ketin kaiasada aramas emen ni eh mwemweitla ni kahnimw en Nain. Nein liohdi pwutak iehros men melahr, oh Sises, “ketin poakehla” oh pwurehng kamourada. (Luk 7:11-15) Wahnpoaron Pohl pil nda: “I kin koapworopworki Koht . . . me e pahn mie kaiasada ong me pwung kan oh me sapwung kan.” Koapworopwor kehlail wet iei kasalepen sapwellimen Koht limpoak mwuledek ong aramas akan.​—Wiewia 24:15.

Aramas lik kei kak kasikasik ren mour kohkohlahte. Paipel mahsanih: “Me pwung kan pahn koukousoan nan sahpwo oh re pahn sapwenikihla kohkohlahte.” (Melkahka 37:29) Ni ahnsowo, re pahn uhdahn peren oh ngoangda ni ar kehn pweidahn mahsen me wahnpoaron Pohl ntingihedi mpen sounpar 2,000 samwalahr ako: “Mehla, ia omw kehl en powehdi? Mehla, ia omw keikamedeken?” (1 Korint 15:55) En aramas imwintihti kamasepwehko mehla pahn lohdi douluhl!