Siohwa Kin Ketin Kesempwalki Omw “Amen”

“KOAROS PAHN SAPENG PATOHWAN, ‘AMEN!’”

Ni lokaiahn wai, “amen” kin wehwehki “en pweida,” de “uhdahn.” E kohsang ni lokaiahn Ipru ehu me wehwehki “en lelepek,” oh “en likilik.” Ekei pak e kin kadoadoahk ni ahnsoun kopwung kan. Mwurin emen eh wiahda inou ehu, e pahn ndahla “amen” pwehn kadehdehda me dahme e ndao pwung oh me e pahn pwukoahki imwilahn met. (Nemp. 5:22) E kin mie kahrepe laud en kolokol eh inowo ni eh ndahla “amen” mwohn wehipokon.​—Neh. 5:13.

Ehu karasepe keieu mwahu me doadoahngki “amen” kileldi nan Deuderonomi irelaud 27. Mwurin mehn Israel kan pedolong nan Sapwen Inowo, re pokonpene nanpwungen Nahna Epal oh Nahna Kerisim pwehn rong wadawad en Kosonnedo. Irail mi mwo kaidehn ihte pwehn rong ahpw en pil kasalehda me re pwungki Kosonnedo. Re wia met ni arail sapengki “Amen!” ni ahnsou me wadawadohng irail dahme pahn wiawi ma re sapeik. (Deud. 27:15-26) Medewehla ngilen ohl, lih, oh seri kidkid kei ar ngihl laud sapeng! (Sos. 8:30-35) Irail uhdahn sohte manokehla dahme re ndahla rahno. Oh mehn Israel pwukat kolokolete arail inowo pwehki Paipel mahsanih: “Mehn Israel koaros kin papah KAUN-O erein ahnsou me Sosua momour. Oh mwurin eh mehla, irail pil kadakadaurete arail papah KAUN-O erein ahnsou me arail kaun akan pil momour me kin wehwehki sapwellimen KAUN-O wiewia kan koaros.”​—Sos. 24:31.

Sises pil ketin doadoahngki “amen” pwehn kadehdehda mehlelpen koasoi ehu, ahpw e ketin wia met ni ahl tohrohr ehu. E sohte ketin mahsanih “amen” mwurin ahn emen tohrohr eh koasoia mehkot, ahpw Sises mahsanih “amen” mwohn eh mahsanih mehkot pwehn kasalehda me met uhdahn mehlel. Ekei pak, e kin ketin pwurupwurehng mahsanih lepin lokaiao, mahmahsanih “amen amen.” (Mad. 5:18; Sohn 1:51) Eri, e ketin kamehlelehiong irail kan me wie rongorong me sapwellime mahsen kan uhdahn mehlel. Sises uhdahn kak ketin kamehlele met pwehki ih me sapwellimanki manaman en kapwaiada sapwellimen Koht inou kan koaros.​—2 Kor. 1:20; Kaud. 3:14.

“ARAMAS KOAROS AHPW PATOHWAN, ‘AMEN,’ OH KAPIKAPINGA [SIOHWA]”

Mehn Israel ko pil kin doadoahngki “amen” ni ahnsou me re kin patohwan kapinga oh kapakap ong Siohwa. (Neh. 8:6; Mel. 41:13) Ni arail ndahla “amen” mwurin kapakap ehu, me rongorong kan kin kasalehda me re pwungki. Koaros me mi mwo kak iang pidada oh perenki kaudokiong Siohwa ni ahl wet. Ih met me wiawi ni ahnsou me Nanmwarki Depit wahla sapwellimen Siohwa Kohpwahn Inowo nan Serusalem. Erein kamadipwo me wiawi mwurin mwo, Depit kapakap sang nan eh mohngiong ni mwomwen koul ehu me kileldi nan 1 Kronikel 16:8-36. Irail ko me towehda uhdahn mwekidki eh koasoi ko me kahrehda “aramas koaros ahpw patohwan, ‘Amen,’ oh kapikapinga KAUN-O.” Ei, irail perenki ehupene kaudokiong Siohwa.

Tepin Kristian kan pil kin doadoahngki “amen” ni ahnsou me re kin kapinga Siohwa. Sounnting en Paipel kan kin kalapw doadoahngki nan neirail kisinlikou kan. (Rom 1:25; 16:27; 1 Pit. 4:11) Pwuhken Kaudiahl pil kin kasalehda me tohnleng kan nanleng kin kapinga Siohwa sang arail kin nda: “Amen! Kapinga Siohwa!” (Kaud. 19:1, 4, ntp.) Tepin Kristian kan pil kin nda “amen” mwurin kapakap kan me kin wiawi ni arail mihting kan. (1 Kor. 14:16) Ahpw, e sohte wia lepin lokaia ehu me re kin pwurupwurehng nda ni arail sohte medewe.

DAHME KAHREHDA OMW “AMEN” KIN KESEMPWAL

Mwurin atail sukuhlki ia duwen sapwellimen Siohwa ladu kan ar doadoahngki lepin lokaiao “amen,” kitail kak kilang dahme kahrehda “amen” wia ahl mwahu ehu en kaimwisekala kapakap ehu. Ni atail kin ndahla “amen” ni imwin atail kapakap, kitail kin kasalehda me kitail uhdahn mehlelki dahme kitail ndahla. Oh ni atail kin mwekidki en ndahla “amen” nan kapakap ehu ong wehipokon, mehnda ma pil ni ngihl tikitik, kitail kin kasalehda me kitail pwungki kapakapo. Pil tehk ehu kahrepe atail “amen” kin kesempwal.

Kitail kin rong kanahieng ni emen eh kin kapakap pwehki e wia kisehn atail kaudok. Kitail kin kaudokiong Siohwa erein atail kapakap kaidehn ihte sang dahme kitail kin nda ahpw pil sang mwomwen atail wiewia. Pwehki kitail kin men mehlel ni ahnsou me kitail ndahla “amen,” met kin sewese kitail en kolokolete madamadau pwung oh rong mwahu kapakapo.

Kitail kin miniminpene nin duwen tohnkaudok kei. Kapakap nan mwomwohdiso kin kahrehiong kitail en ehupene rong kapakapo. (Wiewia 1:14; 12:5) Ni atail kin ehupene rehn riatail kan ndahla “amen,” atail miniminpene kin pil laudla. Ni atail ehupene ndahla “amen,” mehnda ma ngihl laud de tikitik, atail kapakap kak kamwakid Siohwa en ketin wia dahme kitail peki reh.

Kitail kin kapinga Siohwa. Siohwa kin ketin tehk soahng koaros me kitail kin wia nan atail kaudok. (Luk 21:2, 3) E ketin mwahngih dahme kitail men wia oh dahme mi nan mohngiongitail. Mehnda ma kitail anahne doadoahngki delepwohn pwehn rong mihting ehu, kitail kak kamehlele me Siohwa kin ketin pohnese atail “amen.” Ni atail kin ndahla “amen,” kitail kin iang irail kan ni mihtingo kapikapinga Siohwa.

E mwomwen me e sohte nohn kesempwal atail “amen,” ahpw e uhdahn katapan. Ehu pwuhk me koasoia duwen oaralap kan en Paipel nda, “ni arail doadoahngki lepin lokaia wet,” sapwellimen Koht ladu kan kak kasalehda “arail kin uhdahn kamehlele, uhdahn pwungki, oh ahneki koapworopwor laud nan arail mohngiong.” “Amen” koaros en wia mehkot me Siohwa kin ketin kupwurperenki.​—Mel. 19:14.