Wia Uwen Me Ke Kak Ni Ahmw Papah Siohwa
1 Pwehki kitail wia sapwellimen Sises tohnpadahk kan, kitail alehier aht pwukoah en kalohki rongamwahu en Wehin Koht oh katohnpadahkih aramas akan pwe ren pil wiahla sapwellimen Sises tohnpadahk kan. (Madiu 24:14; 28:19, 20) Sohte pil ehu doadoahk nan sampah me kesempwalsang de karuwaru sang doadoahk wet. E pid mour en aramas rar rar kei. E pwung kitail en wia uwen me kitail kak nan doadoahk wet. Kaweid en Pohl pil konehng: “Sohte lipilipil soahng dah me kumwail wia, kumwail loalenohng duwehte ma kumwail wie doadoahk ong Kauno [“Siohwa,” New World Translation].” (Kolose 3:23)
2 Ia wehwehn “wia uwen me ke kak”? “Wia uwen me ke kak” kin wehwehki “ngoangki” de “loalenohng.” Dahme kitail kin wia ni atail kin papah Siohwa pahn kasalehda uwen loal en atail kin poakohng Siohwa oh pil atail nanpwung mwahu rehn Siohwa. Emen me kin wia uwen me e kak pahn papah Siohwa oh kihong ih me keieu mwahu me ah roson oh irair kan pahn mweidong.
3 Pohl kin kapinga Kristian kan me kin “nantiong oh doadoahk laud” pwehki koapworopwor. (1 Tim. 4:10) Siohwa kin kapaiada irail, ihme ‘re paiamwahu.’ (Lepin Padahk 10:22, NW) Ni pali teio, irail me sohte kin wia uwen me re kak de re kin wia ni pweiek sohte kak pehm peren mehlel me kin kohsang kihwei. (Wiewia 20:35)
4 Wia Uwen Me Kitail Kak: Kaunopada mwahu oh nannanti kin anahn ma kitail men pweida mwahu nan kalohk. Wia uwen me kitail kak kin wehwehki me kitail kin kihong Siohwa dahme keieu mwahu nin duwen atail kehl oh atail ahnsou oh soahng teikan. Ma emen kin wia uwen me e kak, e sohte pahn ihte kalohk ahnsou sohte lipilipil, ahpw e pahn iang kalohk ihmw-lel-ihmw.
5 Pohl kin kangoange kitail en doadoahk laud pwehn dehr dangahngahla. (Ipru 6:11, 12) E inenen kansenamwahu ni atail kin kousapahlih dahme kitail wiahier ni atail papah Siohwa oh kitail sohte anahne namenek—pwe kitail ese me kitail kin wia uwen me kitail kak! (2 Tim. 2:15) Dahme pahn kihong kitail peren me keieu laud pahn wiawi ahnsou me kitail kilang irail kan me pein kitail sewese pitsang kahn kamakam kohwahlap. Ni mehlel, Siohwa kin kapaiada irail me kin wia uwen me re kak ni arail kin papah Ih.