“Kumwail en kin Kasapahlkalahngan”

¹ Pali moron en kitail sukuhliki sang ni ahnsou me kitail tikitik en nda “menlau” oh “kalahngan” ahnsou me emen kin kadek ong kitail. Pohl kaweidkin kitail en ahnsou koaros ‘kasapahlkalahngan,’ keieu kitail en kin kasapahlkalahngan ong Siohwa. (Kolose 3:​15, 16) Ahpw, iaduwen kitail pahn kasalehda atail kalahngan ong atail Sounkapikada Lapalap? Oh ong kahrepe dah kei me kitail en kasapahlkalahngan ong Ih?

² Wahnpoaron Pohl ntingihdi: “Eri, kitail kapingkalahngankihong Koht, me kin ketikihong atail roson en powehdi ni mwaren atail Kaun Sises Krais!” (1 Kor. 15:57) Ni ahnsou me atail Kataman kin wiawi pahr koaros, kitail kin tamataman limpoak unsek me Koht oh Sises kasalehda ni koasoandi en tomw me kihong kitail koapwoaroapwoar en mour soutuk. (Sohn 3:​16) Pwehki pali moron en kitail anehki peneinei de kompoakpatail me mehlahr, kitail kin kalahnganki inou en Sises me pid kaiasada! Mongiongatail kin dirkihla kalahngan ahnsou me kitail kin medemedewe me mie koapwoaroapwoar me kitail pahn pitsang koasoandi suwed wet oh sohte pahn mehla. (Sohn 11:​25, 26) E apwal en kawehwehda atail kalahnganki soangen kapai koaros me Siohwa pahn ketikihong kitail ahnsou me kitail pahn pidelong nan paradais ni ahnsou kohkohdo. (Kaudiahl 21:⁠4) Mie kahrepe mwahusang mehpwukat me pahn kamwekid kitail en men ‘kasapahlkalahngan’ ong Koht?

³ Iaduwen Kitail Pahn Kasalehda Atail Kalahngan ong Koht: E konehng ahnsou koaros en kasalehda atail kalahngan ong Siohwa pwehki sapwellime kamwahu ni atail kin wia kapakap. (Mel. 136:​1-3) Oh pil, kitail kin mwekidki sapwellime kamwahu oh men kasalehda met ni ahl koaros. Karasepe ehu, pwehn sewese anahn akan en mwomwohdiso wasao me ke mihmi ie oh anahn akan en doadoahk en sampah pwon, kitail kak wia atail sawas ni pali en mwohni oh dipwisou kan oh ni ahl wet, kitail pahn ‘wauneki Kauno ni omw pahn meirongkihong wahnsahpw me keieu mwahu.’ (Lepin Padahk 3:⁠9) Nin duwen atail pahn utungada elder kan oh miniminiong irail, kitail pahn kasalehda atail kalahngan ong Siohwa pwehki sapwellime sawas me e kin wia ong irail. (1 Deselonika 5:​12, 13) Rahn koaros, kitail en nantiong ahnsou koaros tiahk mwahu pwehn kapinga mwaren Koht. (1 Pit. 2:​12) Siohwa kin kupwurperenki soahng koaros me kitail kin wia pwehn kasalehda atail kalahngan.​—⁠1 Deselonika 5:⁠18.

⁴ Ahl me Keieu Mwahu en Kasalehda Atail Kalahngan: Ni atail kin wia uwen me kitail kak en utungada doadoahk en kalohk, kawahuwih mwaren Siohwa, kasalehda atail kalahngan ni kapakap, oh atail kin sapeng ni lelepek irail kan me kin peki rehtail kitail en kawehwehiong irail koapwoaroapwoar me mih rehtail​—⁠soahng pwukat me kin kasalehda atail kalahngan me kin keieu kaperenih atail Sounkapikada oh kin kasalehda me kitail kalahnganki soahng koaros me E wia ong kitail. Siohwa kin kupwurperenki kilang atail wiewia mwahu ni atail kin papah Ih oh utungada sapwellime kupwur kan me pid “aramas koaros en ale komourparail oh marainkihla me mehlel.” (1 Tim. 2:​3, 4) Ihme kahrehda sounkalohk tohto kin koasoanehdi en iang doadoahk en auxiliary pioneer nan April oh/de May nin duwen me sansalda nan Atail Doadoahk en Wehio nan sounpwong en March. Ehu ahl mwahu en ‘kasapahlkalahngan ong Koht’ iei en kalaudehla atail nannanti nan doadoahk en kalohk. Ke lemeleme ke kak iang doadoahk en auxiliary pioneer nan April? oh May?

⁵ Siohwa ketikihong kitail koapwoaroapwoar mehlel me kitail kak ale mour soutuk. Ni ahnsou me e pahn pweida, kitail pahn ale pil kahrepe mwahu kei en kasalehda atail kasapahlkalahngan ong Koht rahn koaros.​—⁠Melkahka 79:13.