Sewese Irail me Kin Onop Paipel Rehtail en Wehwehki Duwen Pwihn me Adaneki Sounkadehdehn Siohwa kan

¹ “Kalohk en rohng wet kin wiawi ni lokaia 200 samwa. Kalohk en rohng wet kin wiawi nan sahpw 210 samwa. Rohng wet kin kohwong aramas koaruhsie, sohte lipilipil iawasa re kin mih ie. Met kin wiawi pwehki doadoahk en kalohk me keieu laud nan sampah kin wiawi met, oh rohng wet kin kaminiminpene aramas rar rar kei wasa koaros nan sampah. Sangete sounpahr epwiki samwalahr lel met, koasoandi en Sounkadehdehn Siohwa kan kin mwahu pwe doadoahk en kalohk kak pwei­da mwahu!”

² Ih duwen tepin koasoi en video cassette me oaralap koasoia Jehovah’s Witnesses​—The Organization Behind the Name. Video cassette wet kin sapeng peidek pwukat: Ihs irail Soun­kadehdehn Siohwa kan? Iaduwen re kin koasoanehdi arail doadoahk kan? Ihs me kin apwalih arail doadoahk? Mwohni kin kohsang ia pwehn sewese arail doadoahk kan en pweida? Video cassette wet kin kasalehda me “wasa koaros nan sampah Sounkadehdehn Siohwa kan kin ale kaiahn pwehn sewese aramas teikan en kakairada arail pwoson Pwuhk Sarawi,” oh video cassette wet kin kangoange aramas akan en tehk mwahu pwihn wet me adaneki Sounkadehdehn Siohwa kan. Emen lih me kin onop Pai­pel rehn Sounkadehdehn Siohwa kan kilang video cassette wet sengi­sengki eh peren oh kalahngan oh koasoia: “Iaduwen aramas sohte kak kamehlele me met kin wia pwihn en Koht mehlelo, Siohwa?”​—Pil kilang 1 Korint 14:​24, 25.

³ Emen lih me kin onop Paipel wereila ahpw ekeite pak, sohte kak kamehlele me padahk en Trinity kin wia padahk lik­amw. Ahpw, ni ahnsou me lih menet oh eh pwoud kilang neitail video cassette, re inenen pwuriamweiki dahme re kilang kahrehda re kilang video cas­sette wet pak riau ni pwongohte. Ni ahnsou me lih menet onop mwurin eh kilang video cassette, e kasalehda me e men wiahla emen Soun­ka­deh­dehn Siohwa kan. E nda me e nohn medemedewe duwen padahk en Trinity ahpw sohte tehk mwahu duwen pwihn en Sounkadeh­dehn Siohwa kan oh aramas me iangala pwihno. Sang dahme e kilang nan video cassette, e wehwehki me e diarada sapwellimen Koht pwihn mehlel. E men mwadang tepida kalohk ihmw lel ihmw. Mwurin met, emen kawehwe ong ih dahme e anahne wia pwehn wiahla sounkalohk men me saikinte papidais, kahrehda e koasoia: “I pahn mwadang wia dahme I anahne wia pwehn wiahla sounkalohk men.” E kohkohsang eh pelien lamalam​—⁠wehwehki e kihsang ede nan neirail list en tohnmwomwohdiso, oh tepida iang kalohk, oh met e kin kawehwe mwahu duwen padahk en Trinity me e sohte poahsoanda pohn Pwuhk Sarawi.

⁴ E sansal mwahu me irail me kin onop Paipel kin kekeirada mwahu ni pali ngehn oh kak wiahla aramas mah ni pali ngehn ma re pahn pohnese oh miniminiong sapwellimen Siohwa pwihn. E kesempwal en tehk me mwurin irail meh 3,000 papidaisla rahn en Pendekos, “re kin poadidiong ale padahk sang rehn wahnpoaron ko, oh miniminiong me pwosonlahr akan.” (Wiewia 2:​42, ftn.) E kesempwal me kitail pahn sewese irail me kin onop Paipel en wia duwehte re wia mahs. Iaduwen kitail kak wia met?

⁵ Ale Ahmw Pwukoa: Emen emen kitail me kin wia doadoahk en katohnpadahkih aramas akan anahne wehwehki me e kin wia atail pwu­koa en kahluwa irail me kin onop Paipel rehtail ong sapwellimen Koht pwihn. (1 Tim. 4:​16) Ehu ehu onop akan kin wia ewen kahk mehn kakerenihala tohnihmwo ong rahn kaperen me e pahn inoukihong Siohwa eh mour oh papidaisla. Ehu peidek me kin kohwong irail me pahn papidaisla iei: “Ke wehwehki me ahmw inoukihda ahmw mour oh papidaisla kin kasalehda ahmw iangehr wiahla Sounkadehdehn Siohwa oh iangalahr pwihn me ngehn en Koht kin ketin kamwekid?” Eri, e kesempwal me aramaso wehwehki me e sohte kak papah Koht ma e sohte kin kaukaule iang towehda mihding kan koaros oh miniminiong mwomwohdiso en Kristian mehlel kan.​—Madiu 24:​45-​47; Sohn 6:​68; 2 Kor. 5:​20.

⁶ Nantihong padahkiong aramaso me ke kin onop Paipel reh duwen mwomwohdiso nan pein ahmw wasa iangahki pwihn en Soun­ka­dehdehn Siohwa kan me kin mihmi wasa koaros nan sampah. Wia met ni ehu ehu ahnsou me kumwa kin onop, oh tepida sang ahnsou me ke tepin onop reh. Sang nin tepio, luhke ih en iang towehda mihding kan, oh luhke ih ahnsou koaros.​—Kaudiahl 22:17.

⁷ Doadoahngki Mehn Doadoahk kan Me Mie: Dahme keieu mwahu en onop Paipel rehn aramas akan iei brochure me oaralap koasoia Dahme Koht Kupwurki Kitail en Wia? oh pwuhken Knowledge That Leads to Everlasting Life oh pwuhken Ke Kak Mour Kohkohlahte Nan Paradais Nin Sampah. Brochure oh pwuhk pwukat kin kasalehda kesempwalpen miniminiong mwomwohdiso en Sounkadehdehn Siohwa kan. Ni imwin Iren Mehn Kasukuhl 5 nan brochure Kupwurki, e koasoia: “Ke anahne kau­kaule sukuhliki duwen Siohwa oh kapwaiada sapwellime kosonned akan. Kaukaule iang towehda mihding kan nan Kingdom Hall en Sounkadehdehn Siohwa kan pahn sewese iuk en wia met.” Pwuhken Mour Kohkohlahte kin kalap kangoange aramaso me kin onop Paipel en iang towehda mihding kan oh miniminiong Sounkadehdehn Siohwa kan. Ni pali 190 en pwuhko, mie kilel en Kingdom Hall oh nting me mihmi pah koasoia: “Luhk kohwong uhk en iang towehda mihding kan en Sounkadehde kan en Siohwa.” Oh pil, nan pwuhken Mour Kohkohlahte, irelaud 26, parakrap 17, e koasoia: “Ma ke onop Paipel ekis werei rehn Sounkadehde kan en Siohwa, ele ke iang­ehr towehda mihding kan nan Kingdom Hall. En wiahki ahmw tiahk kau­kaule en mwohdong mihding pwukat.” Ni atail kin onop Paipel rehn aramas akan, e kin wia atail pwukoa en ka­san­sal­eh­da mwahu soangen wasa kan nan neitail pwuhk kan.

⁸ Brochure me oaralap koasoia Jehovah’s Witnesses​—Unitedly Doing God’s Will Worldwide kin wia mehn doadoahk mwahu me kin sewese aramas akan en wehwehki me ihte pwihn en Sounkadehdehn Siohwa kan me Siohwa kin doadoahngki pwehn kapwaiada kupwure. Brochure wet kin koasoia, ni oaritik, duwen dahme kin wiawi ahnsoun kalohk, mihding kan, oh soahng kan me pid duwen sapwellimen Siohwa pwihn sansal oh e pahn sewese aramaso en miniminiong pwihn en Sounkadehdehn Siohwa kan ong kaudok. Ahnsou me kitail kin tepida onop Paipel rehn aramas men, e pahn mwahu en kihong ih nah brochure pwe e kak pein wadek. Kitail sohte anahne onop rehn aramaso brochure wet duwehte kitail wia mahs.

⁹ Ekei video cassette kan me Society wiahda kin wia mehn doa­doahk mwahu kan ong kahluwa irail me kin onop Paipel rehtail ong pwihn en Sounkadehdehn Siohwa kan. E pahn mwahu ma re pahn kilang (1) The New World Society in Action, me kin kousapahlih 1954 film me koasoia duwen soandi mwahu oh limpoak me kin kamwekid sapwellimen Siohwa pwihn sansal; (2) United by Divine Teaching, me kin kasawih­ada Kapokon en International kan me wiawi nan Eastern Europe, South America, Africa oh Asia oh minimin oh meleilei me kin wiawi nan kapokon pwukat; (3) To the Ends of the Earth, me wiawihda mwurin pahr 50 me Watchtower Bible School of Gilead tepida oh e kin kasa­leh­da lipwen doadoahk en kalohk me misineri kan wia wasa koaros nan sampah; (4) Jehovah’s Witnesses Stand Firm Against Nazi Assault, me kin koasoia iaduwen Sounkadehde kan kin eimah, lelepek oh pweida mwahu mendahki kalokolok me Hitler kin wia ong irail; oh, mehlel pil kasalehong irail: (5) Jehovah’s Witnesses​—The Organization Behind the Name.

¹⁰ Wiahda Mehn Akadei Mwahu kan me Pid Mihding kan me Pahn Sewese Aramaso en Kekeirada: E pahn mwahu en kawehwe ong irail me kin onop Paipel rehtail me re anahne sawas sang pali riau pwukat: (1) sawas sang arail onop Paipel nan imwarail; oh pil (2) sawas sang mihding kan. (Sohn 6:​45) Irail me kapw kan anahne kekeirada ni arail kin sukuhliki Pwuhk Sarawi iangahki arail sukuhliki duwen sa­pwe­lli­men Siohwa pwihn sansal. Ihme kahrehda, e sansal me e anahne iang towehda mihding kan koaros oh wehwehki kesempwalpen mihding pwu­kat. (Ipru 10:​23-​25) Mwadang luhke aramaso en iang towehda mihding kan. Ekei aramas me kin perenki rong kin tepida iang mihd­ing kan mwohn re tepida onop Paipel rehn Sounkadehde kan. Ahpw, ni mehlel, pein kitail anahne wia mehn kahlemeng mwahu ni atail pahn iang towehda mihding kan koaros.​—Luk 6:​40; Pilipai 3:​17.

¹¹ Kasalehong aramaso duwen dahme kin wiawi ahnsoun mihding kan oh iaduwen padahk kan kin wiawi pwe e pahn perenki mihding ahn­sou me e pahn tepin iang. Ekei aramas sohte kin nohn perenki kohla wasakis me re sehse, eri, e pahn mwahu en iang ih ahnsou me e pahn tepida iang mihding. E pahn perenki ma ke pahn iang ih ahnsou me e pahn tepida tuhwong tohnmwomwohdiso kan. Wia uwen me ke kak en kasamwo ih ni mihding kan oh sewese ih en tuhwong mehteikan oh tehk ma e nsenamwahu.​—Madiu 7:​12; Pilipai 2:​1-4.

¹² Mwadang luhke aramas me ke kin onop Paipel reh en iang towehda Kapokon en Rahn Tohrohr, Kapokon en Circuit de Kapokon en District. Mwein ke kak luhke ih en iang uhk de iang ahmw peneinei ma kumwail kin sidohsa lel wasahn kapokon.

¹³ Nantihong en Lel Mohngiong en Aramaso Pwehn Kalahnganki Sapwellimen Siohwa Pwihn: Pwuhken Organized to Accomplish Our Ministry, pali 92, kawehwe: “Ma ke kin kasalehda pein ahmw kalahng­an­ki sapwellimen Siohwa pwihn ni ahnsou me ke kin kalohk ong aramas me kin perenki rong, e pahn mengei ong irail en pil kekeirada ni arail kin kasalehda kalahngan oh pil kamwekid irail en kekeirada mwadang ni arail men esehla Siohwa.” Ahnsou koaros koasoi duwen soahng kan me mwahu me pid tohn ahmw mwomwohdiso, oh ieremen kauwe irail. (Mel. 84:10; 133:​1, 3b) Nan ahmw kapakap kan me ke kin wia ahnsou me ke kin onop Paipel reh, koasoia duwen mwomwohdiso oh ke­sem­pwal­pen aramaso en kaukaule iang towehda mihding kan koaros oh miniminiong tohnmwomwohdiso.​—Episos 1:​15-​17.

¹⁴ Kitail anahne sewese aramas kapw kan en kekeirada arail ka­lahnganki miniminpene oh nsenamwahu me mihmi nanpwungen sa­pwe­lli­men Koht aramas akan. (1 Tim. 3:​15; 1 Pit. 2:​17; 5:⁠9) Nin duwen Sounkadehdehn Siohwa kan, kitail en wia uwen me kitail kak en kah­luwa aramas me kin onop Mahsen en Koht rehtail en wehwehki duwen pwihn me adaneki Sounkadehdehn Siohwa kan.

[Blurb]

Aramas me kin onop Paipel rehtail pahn mwadang kekeirada ma re pahn pein kilang oh wehwehki duwen sapwellimen Siohwa pwihn sansal

Mwadang luhke irail me kin onop Paipel rehtail ong iang towehda mihding kan