Sounkadehde kan en Siohwa—Sounkalohk Mehlel kan
1 Sises Krais ketikihong sapwellime tohnpadahk koaros pwukoah en kalohk, keieu e padahkiong irail en kalohki rongamwahu en Wehio. (Madiu 24:14; Wiewia 10:42) Sapwellime tohnpadahk kan en mahs wia kalemeng mwahu ni ahl wet pwehki re koasoia Wehio ahnsou koaros—kaidehn ihte nan wasahn kaudok ahpw pil wasa koaros me aramas mie oh pil sang ihmw lel ihmw. (Wiewia 5:42; 20:20) Kitail Sounkadehde kan en Siohwa rahnwet kin kasalehda me kitail wia sounkalohk mehlel kan pwehki kitail kin kalohki Wehio nan sahpw 232 oh sang sounpahr siluh samwalahro leldo met, aramas rar samwa papidaisla! Dahme kahrehda atail doadoahk en kalohk kin pweida?
2 Rongamwahu kin Kamwekid Kitail: Sounkalohk kan kin kalohki rongamwahu. Kitail kin pwukoahki pwais kesempwal me kin kamwekid kitail en lohkseli sapwellimen Siohwa Wehi—ihte soangen rongamwahu mehlel wet me kak sewese aramas kan me kin lokolongki kahpwal kan en rahn pwukat. Kitail perenki atail rong mahs duwen lahng kapw me pahn kaunda ni ahl pwung sampah kapw me audaudki aramas lelepek kan me mihmi nan paradais. (2 Pit. 3:13, 17) Kitail kelepw me kin kamehlele duwen koapworopwor wet, oh kitail men ehukihong mehteikan koapworopwor wet.
3 Limpoak Mehlel kin Kamwekid Kitail: Kalohk iei doadoahk ehu me kin sewese aramas en ale komourparail. (Rom 1:16) Ihme kahrehda, kitail kin inenen perenki kalohki rongamwahu en Wehio. Nin duwen sounkalohk mehlel kei, kitail kin limpoak ong aramas akan, oh limpoak wet kin kamwekid kitail en ehukihong mehteikan rongamwahu—atail peneinei oh mehn mpatail kan oh aramas koaros me kitail kin tuhwong. Ma kitail pahn kalohk sang nan mongiongatail unsek, e pahn kasalehda atail limpoak mehlel ong mehteikan ni ahl me keieu mwahu.—1 Deselonika 2:8.
4 Sapwellimen Koht Ngehn Sarawi kin Sewese Kitail: Sapwellimen Koht Mahsen kin padahkiong kitail me ni ahnsou me kitail kin ni karasaras kamwarak oh kalamwur kisin tuhken aramas me kin perenki rong duwen Wehio, Siohwa me kin “kakairada tuhkeo.” (1 Kor. 3:5-7) Sapwellimen Koht ngehn sarawi kin sewese kitail nan doadoahk en kalohk and kin sewese kitail en pweida mwahu nan doadoahk wet.—Soel 2:28, 29.
5 Pwehki kitail kin ale kangoang sang 2 Timoty 4:5 me kin padahkiong kitail en “wia omw pwais en sounkadehde en Rongamwahu” oh pwehki kitail kin limpoak ong aramas koaros, soahng pwukat pahn kamwekid kitail en ehukihong aramas koaros rongamwahu en Wehio ahnsou koaros, oh kitail pahn koapworopworki me Siohwa pahn kapaiada atail doadoahk.