Esehla Riomw Kristian kan
1 Paipel kin kasalehda me pirien mehlel men iei kompoakepah men me kin keren sang rien emen, me kin mihmihte nan ah limpoak oh kin loaloapwoat, oh kin sewesehda kompoakepah ahnsoun apwal. (Lepin Padahk 17:17; 18:24) Atail soahngen pirien pwukat sohte pahn malaulaula ma kitail kin nantiong esehla oh limpoak ong emen emen.—Sohn 13:35.
2 Mie ahnsou mwahu kan mwohn mihding oh mwurin mihding me kitail kak doadoahngki pwehn kak esehla riatail Kristian kan. Dahme komw soh kin mwadangedo mwohn mihding tepida oh mihmi ekis ahnsou mwurin mihding pwe komw en kak paiekihda werekiong riomw Kristian kan? Rapahkihda soangsoangen Kristian kan me komw kak koasoiong, iangahki irail me mah koahiek kan oh me pwulopwul de irail kan me kin namenek, me komw kak koasoiong.
3 Tepiada Koasoakoasoi kan: E sohte itar en rahnmwahuwihte riomw Kristian kan. Komw kak tepiada ehu koasoakoasoi ni ahmw pahn ehukihong aramaso ehu ekspiriens nan kalohk, de ehu ire nan makasihn kapw, de ire ehu duwen mihdingo me ahpwtehn nek. Komw kak sukuhlkihdi soahng tohto duwen riomw Kristian ni ahmw pahn rong kanaieng dahme e nda, ni ahmw pahn kangoangehkin irail en koasoia arail ekspiriens kan oh soahng kan me re sukusukuhliki. Idekte iaduwen emen esehla Siohwa pahn kasalehda soahng tohto duwen aramaso. Ekei kin ahneki soahngen ekspiriens kan me kin kakehle pwoson, nindoken mehteikan kin dadaurete pahn soahngen irair kan ahnsouwet me pahn apwal ong mehteikan en medemedewe. Atail pohnese duwen ire pwukat pahn sewese kitail, nin duwen pirien mehlel kan, en pehmitikohng oh mwekidiki anahn en mehteikan.
4 Kompoakepahkihda Emen Emen: Mwurin mehlahn nah serio, emen sister kin diarada me e apwal ong ih en koulki koul kan en Wehin Koht me kin koasoia duwen kaiasadao. E tamanda dahme wiawi oh koasoia: “Ehu pako, emen sister me mwomwohd nan sehr me peipeian sehr me I mwomwohd ie kilangada ahi wia sengiseng. E kohdo rehi, pwoaleiepene, oh iang ie koulkihla luhwen koulo. I inenen kin dirkihla ahi limpoakong brother oh sister kan oh inenen perenkihda ahi iang towehda mihding kan, oh wehwehkihda me atail sawas kin kohsang wasaht, nan Kingdom Hall.” Kitail en kompoakepahkihda Kristian kan ni atail pahn kihong irail kamweit ni ahnsou kan me re anahne oh pil iangahki mehn kangoang ahnsou koaros.—Ipru 10:24, 25.
5 Ni en sampah mering wet wia lemlemeila, kitail en nantiong esehla mwahu riatail Kristian kan. Ni atail sawaskihpene kangoange mehlel emen emen, met pahn kapaiada koaros.—Rom 1:11, 12.