Koakon En Peidek

◼ Dahme pahpa oh nohno kan pahn anahne kanahieng ni ahnsou me neirail seri tikitik kan iang kalohk?

E konehng pahpa oh nohno Kristian kan en kahre neirail seri kan ahnsoun kalohk, oh kaiahne irail pwe ren kak pil ehukihong mehteikan rongamwahu. Ni en pahpa oh nohno kan kin wia met, re anahne kilang neirail seri kan ahnsou koaros pwe ren dehr lelohng kahpwal nan wasahn kalohk, iangahki wasahn kalohk kan me “mwahu.” Rahnpwukat, aramas kin mwersuwedih seri tohto ni tiahk lemei oh pil tiahk en nenek pwehki kekeirada en soahng suwed kan nan “ahnsou apwal kan” me kitail kin mihmi loale. (2 Tim. 3:​1-5) Pahpa oh nohno kan anahne wia uwen me re kak pwehn pere neirail seri tikitik kan sang aramas me men mwersuwedih irail. Dahme pahpa oh nohno kak wia?

Pwuhk Sarawi kin kaweidkin kitail en kanahieng oh tehk ma kitail mihmi nan irair en keper de soh. (Lepin Padahk 22:3; Madiu 10:16) Se sohte men wiahda kosonned, ahpw, e pahn mwahu ma pahpa men de nohno men de emen me laud pahn iang seri men ahnsoun kalohk. Ma sounkalohk pwulopwul koahiek riemen kin ehupene ahnsoun kalohk, e pahn mwahu ma emen me laud kak kilang ira ahnsou koaros. Ahpw, ni ahnsou me seri men kin laudla oh koahiekla, pahpa oh nohno kan kak wia ara pilipil ma serio anahne emen me laud en iang ih ahnsou koaros de soh.​—Pil kilang Our Kingdom Ministry en October 1992, Koakon en Peidek.

E pahn mwahu ma kitail en pil kanahieng ni ahnsou me kitail kin tengtengseli nan waratail sidohsa oh pil alialuseli nanial. Ma kitail kin kanahieng, kitail sohte pahn lelohng kahpwal duwehte aksident, oh kitail sohte pahn lokolongki medek de pweipwand en wini de kahpwal en kosonned me kin kohsang kahpwal pwukat.

E konehng me pwulopwul kan en “kapinga mwaren Siohwa.” (Melkahka 148:12, 13) Arail lokaia mwahu oh tiahk mwahu ahnsoun kalohk kin kahrehong aramas teikan en tehk irail oh kapinga Siohwa. Pahpa oh nohno kan, menlau sewese noumw seri kan en kaukaule iang kalohki rongamwahu, ahpw, kumwail en mwasamwasahn ahnsou koaros pwehn pere irail sang keper kan!