‘Dahme I Kak Wia?’
1 ‘Dahme I kak wia?’ Mehlel, mwein ih peideko me mihmi nan madamadau en irail me iang kisin pwihn en onop Paipel me Charles Taze Russell koasoanehdi nan 1870 samwa. Ni arail marainla oh wehwehkihla kupwuren Koht, mwein re kin medemedewe dahme re kak wia pwehn sewese aramas teikan en pil sukuhliki kupwuren Koht. Ahpw, ni arail kin medemedewe duwen kalohkihong tohnsampah koaros dahme re sukuhliki sang nan Pwuhk Sarawi, ele mwein re lemeleme me doadoahk en kalohk wet pahn wia doadoahk me inenen laud.
2 Ahpw, kitail kak peren pwe, nan atail ahnsou, doadoahk en kalohk pil lellahngehr kereniong sahpw koaros nan sampah. Iaduwen? Emen emen sounkalohk wia uwen me e kak, mendahki dahme e wia kin mwomwen doadoahk tikitik, oh rahnwet, pali laud en tohnsampah ese ihs Sounkadehdehn Siohwa kan—me iang sounkalohk kan en Sounkadehdehn Siohwa kan lellahngehr sounkalohk 6,000,000 samwa oh re kin papah nan mwomwohdiso 90,000 nan sahpw 234 iangahki deke kan me kin mihmi nansed!—Aiseia 60:22.
3 Wia Uwen Me Ke Kak Pwehn Utungada Doadoahk en Kalohk: E inenen kesempwal ong emen emen kitail en wia uwen me kitail kak en iang doadoahk en kalohk me Sises kohpada me pahn wiawi ni imwin rahn akan. (Mark 13:10) Ni mehlel, kitail sohte kak lemeleme me elder kante de pioneer kante me pahn wia doadoahk wet oh lelohng aramas koaros. Ni mehlel, emen emen kitail Kristian kan me inoukihong Siohwa atail mour kin ahneki pwukoah en iang doadoahk kesempwal wet. Emen emen kitail kak iang doadoahk en kalohk (ihmw lel ihmw, kalohk ni ahnsou soh lipilipil, kalohk doadoahngki telephone, kalohk nan wasahn sukuhl, kalohk nan wasahn doadoahk oh kalohk wasa teikan). (1 Tim. 1:12) Ni atail wia uwen me kitail kak nan doadoahk en kalohk, kitail kin wia kamwahu ong pein kitail oh meteikan.—1 Tim. 4:16.
4 Emen emen kitail pil kak wia uwen me kitail kak ni atail kin utungada riatail Kristian teikan ni ahl kei. Kitail kak utungada mihding en mwomwohdiso kan ni atail pahn iang towehda mihding kan ahnsou koaros oh ngoangki iang pasepeng. (Melkahka 122:1, 8, 9) Kitail kak wia uwen me kitail kak ni atail pahn tiahk mwakelekel ahnsou koaros. Kitail kak pil kihda atail sawas en mwohni, uwen me kitail kak, pwehn utungada doadoahk en kalohk me kin wiawi wasa koaros nan sampah. Kitail pil kak iang kamwakelehda Kingdom Hall. Emen emen kitail pil kak wia uwen me kitail kak en miniminiong riatail kan nan mwomwohdiso ni limpoak, oh pil sewese me kapw kan, me pwulopwul kan, oh me mah kan.—Kolose 3:12, 14.
5 Mwein ke pahn idek, ‘Dahme I kak wia?’ Mendahki dahme kitail kin wia kin mwomwen tikitik, ma emen emen kin wia uwen me kitail kak, e pahn sewese mwomwohdiso pwon en kehlail, pwerisek oh roson mwahu ni pali ngehn. Ihme kahrehda, emen emen kitail kak nda me kitail kin iang kasarawi mwaren Siohwa!