“Koasoi kan me kin Wiawi Ni Ahnsou Konehng”
1 Ke kin apwaliki kasalehong aramas teikan rohng me pid mour? Ke kin pehm me ke anahne nda mehkot me kapwuriamwei pwe irail me pahn rong uhk pahn pwuriamweiki? Ni ahnsou me Sises kadarpeseng sapwellime tohnpadahk ko, e padahkiong irail: “Kumwail kohwei oh kapahrengkihong irail me Wehin Koht kerendohr.” (Madiu 10:7) Padahk wet inenen mengei oh pil mengei en ehukihong mehteikan. E pil duwehte met rahnwet.
2 Pali laud en ahnsou, lepin lokaia keite me anahn pwehn tepida koasoiong aramas akan. Ahnsou me Pilip tuhong ohlen Idiopia, e idek reh: “Ia duwe, komw wehwehki dahme komw wadewadeken?” (Wiewia 8:30) E sansal me “koasoi kan me kin wiawi ni ahnsou konehng” kin imwila mwahu!—Lepin Padahk 25:11.
3 Ke kak pil doadoahngki padahk mengei nan kalohk. Iaduwen? Ni ahmw pahn kilang duwen irair kan en aramaso oh ni ahmw pahn pilada koasoi kan me pahn konehng ahnsowo. Ke kak wia peidek reh oh rong dahme e pahn nda.
4 Ekei Peidek Mengei: Pwehn tepida koasoi ong emen, ke kak song en wia ehu peidek sang peidek pwukat:
◼ “Ke kin kapakapki Kapakap en Kauno (de Kapakap en Samat)?” (Madiu 6:9, 10) Koasoia ekis sang Kapakapo, oh mwurin mwo, ke kak nda: “Ekei aramas kin idek, ‘Ia mwaren Koht me Sises mahsanih me aramas anahne kasarawi?’ Ekei kin idek, ‘Mehnia wehi me Sises mahsanih me kitail pahn kapakapki en pweida wasa koaros?’ Ke diarehr pasapengpen peidek pwukat?”
◼ “Mie pak me ke medemedewe peidek wet: ‘Ia wehwehn mour?’” Kasalehda iaduwen e kin pid loalokongkihla Koht.—Ekl. 12:13; Sohn 17:3.
◼ “Ke lemeleme ahnsou ehu pahn kohdo me mehla sohla pahn wiawi?” Pakalahng Aiseia 25:8 oh Kaudiahl 21:4 pwehn kasalehda me pasapeng me ke kihda uhdahn kohsang Pwuhk Sarawi oh kitail kak likih me sapwellimen Koht inou kan uhdahn pahn pweida.
◼ “Dahme kak kamwahuwihala pali laud en kahpwal kan nan sampah?” Kasalehda me Koht kin padahkiong kitail en “poakohng mehn mpomw.”—Madiu 22:39.
◼ “E pwung en kamehlele me pahn mie ehu pospeseng laud nanleng me pahn kauwehla sampah ehu rahn?” Kasalehda dahme Paipel kin inoukihong kitail me sampah pahn mihmi kohkohlahte.—Melkahka 104:5.
5 Kalohki Rongamwahu ni ahl me mengei oh inen ahpw ni lokaia kadek oh mwahu. Siohwa pahn kapaiada ahmw doadoahk pwehn kasalehong mehteikan padahk mehlel, mendahki ke kin doadoahngki lepin lokaia keite.