Padahk kan me Mengei oh Sansal me kin Keieu Mwahu
1 Dahme kahrehda aramas tohto kin perenki rong padahk kan sang rehn me pwulopwul kan? Ehu kahrepe met kin wiawi iei pwehki arail padahk kan kin mengei oh sansal. Ekei sounkalohk kan kin lemeleme me aramas akan pahn rongete padahk apwal akan. Ahpw, ni mehlel, padahk kan me mengei oh sansal me kin keieu mwahu.
2 Sises kin kalohki duwen Wehin Koht ni ahl me mengei oh sansal oh e pil kin padahkiong sapwellime tohnpadahk kan en wia duwehte. (Madiu 4:17; 10:5-7; Luk 10:1, 9) E kin doadoahngki tepin koasoi kan, peidek kan oh karasaras kan me irail me kin rong ih kin perenki oh e kin lel mohngiongarail. (Sohn 4:7-14) E pahn mwahu ma kitail pahn kahlemengih sapwellime mehn kahlemeng mwahu oh wia padahk kan me sansal oh mengei en wehwehki.
3 Kitail anahne kalohki “Rongamwahu en Wehin Koht.” (Madiu 24:14) Ma ke pahn tamataman ahnsou koaros me ahmw oaralap en koasoi iei Wehin Koht: met pahn sewese iuk en wiahda padahk me mengei oh sansal. Koasoia soahng kan me irail me kin rong uhk pahn perenki. Lih kan kin perenki rong oaralap kan me pid duwen peneinei sang oaralap kan me pid duwen politik kan. Pahpa kan kin perenki rong duwen oaralap me kin pid doadoahk oh pil soahng kan me kin pid nsenamwahu en eh peneinei. Me pwulopwul kan kin perenki rong oaralap kan me kin pid duwen ahnsou kohkohdo; a me mah kan kin perenki rong oaralap kan me kin pid duwen roson en paliwar oh pil ma re pahn nsenamwahu ni ahnsou kohkohdo. Pali laud en aramas akan kin perenki rong duwen dahme wiawi nan pein arail wasa sang dahme kin wiawi nan wasa doh kan. Mwurin ahmw pahn koasoia dahme re kin perenki rong, kasalehda duwen kapai kan me aramas peik kan pahn paiekihda pahnangin kaundahn Wehin Koht. Ma ahmw padahk kin mwotomwot oh ke pilada mwahu dahme ke pahn koasoia iangahki iren Paipel me ke pahn doadoahngki: mehpwukat kin kak kamwekid irail me kin rong uhk.
4 Ke kak tepida koasoi ong tohnihmw ni ahmw pahn nda:
◼ “I lemeleme me ke pahn pwungki me soumwahu laud tohto (me aramas akan sohte kak kamwahuwihala) kin lelohng aramas akan rahn pwukat. Ahpw, ke kin wehwehki me Koht inoukihda me e pahn kereniong kasohrala soangsoangen soumwahu kan iangahki mehla?” Mweidohng tohnihmw en sapeng, oh mwurin mwo, wadek Kaudiahl 21:3, 4.
5 Ma ke pahn doadoahngki padahk kan me mengei oh sansal, ke pahn kak lel mohngiong oh madamadau en aramas tohto nan ahmw wasahn kalohk, oh ke pahn kak sewese irail en sukuhliki duwen Siohwa oh pil sukuhliki iaduwen re kak ale mour soutuk ni ahnsou kohkohdo.—Sohn 17:3.