Miniminiong Siohwa oh Sapwellime Ohl ni Peren
Wiewia Ehu me Keieu Kesempwal Nan Pahr Koaros Pahn Wiawi March 28
1 Ni atail pahn kasarawi Saken Soutik en Kauno mwurin kihrlahn ketipin March 28, 2002, kitail kin kasalehda me kitail kin miniminiong Siohwa Koht oh Sises Krais ni peren. Rahno wia rahn tohrohr pwe luwen me keidi kan kin “miniminiong” meteikan me pahn pil iang kaun nan Wehin Koht, oh pil Seme oh sapwellime Ohl. (1 Sohn 1:3; Episos 1:11, 12) Irail me rar rar kei me iang pwihn en “sihpw teikan” pahn medemedewe duwen arail pwais kaselel me re ahneki en miniminiong Siohwa oh sapwellime Ohl, irail koaros kin ehu ni arail nantihong wia doadoahko me Koht ketikihong irail!—Sohn 10:16.
2 Doadoahkpene Nanpwungen Riemen: Sangete mahs mahsie, Siohwa oh Sises kin miniminpene ni peren ahnsou koaros. Re kin perenki kerenpene ni erein sounpahr tohtohie mwohn aramas kepikpikda. (Maika 5:2) Kahrehda, limpoak nanpwungara inenen loal. Rasehng irair en erpit, Sises, me wia sapwellimen Koht Mesenih, kak mahsanih met mwohn e wia aramasala: “I mi limwah, duwehte sounsawas emen, iei ngehi me kin kapakaparanih rahn koaros, oh I pil perenkihda ei patopato rehn [Siohwa].” (Lepin Padahk 8:30) Pwehki Sises kin miniminiong Siohwa, me iei Ih me Utupen limpoak, erein sounpahr tohtohie, e sansal me met kamwekid Sises laud!—1 Sohn 4:8.
3 Pwehki aramas anahne emen en tomwkihda diparail, Siohwa pilada sapwellime Ohl Iehros, me kin inenen poakohng aramas akan, pwehn wiahda meirong tomw me pahn kihong aramas akan arail koapworopwor ong ahnsou kohkohdo. (Lepin Padahk 8:31) Duwehte Siohwa oh sapwellime Ohl kin miniminpene oh ehupene en kapwaiada kupwur tehieu, kitail anahne miniminiong ira oh pil nanpwungatail koaros ni limpoak kehlail, oh wia kupwuren Koht ni peren.
4 Kasalehda Atail Kalahngan Sang Mohngiongatail: Ni atail pahn iang towehda Kataman oh rong kanahieng ni wahu, kitail kak kasalehda me kitail kalahnganki sapwellimen Siohwa limpoak oh pil me Sises tomwki dipatail. Ahnsoun Kataman, brother me pahn wia kapahrek pahn kasalehda duwen kesempwalpen mehn kahlemeng limpoak me Sises wia, oh duwen Sises a lelepek lao lel mehla pwehki e men wia meirong tomw, oh pil sapwellime kaunda nin duwen Nanmwarki en Wehin Koht, iangahki kapai kan me Wehio pahn wahdohng aramas akan. Brothero pahn pil katamankin kitail duwen anahnpen kaukaule kasalehda atail pwoson oh ngoangki kapwaiada kupwuren Siohwa oh “kitail en wiahki ehu ni [atail] doadoahk en me mehlelo.”—3 Sohn 8; Seims 2:17.
5 Sewese Meteikan en Iang Kitail Kalohk: Pwihn en elder kan pahn nantihong kangoange irail koaros me solahr kalohk en iang towehda Katamanpen Kamatalahn Krais. (Madiu 18:12, 13) Re pahn ntingihdi eden irail koaros pwe re pahn luhke irail koaros oh re sohte pahn manokehla emen irail.
6 Ke kin ese ekei aramas me men iang towehda Katamano? Ke kak koasoi ong irail oh sewese irail en kekehlada arail kalahnganki dahme Siohwa oh Sises wia ong irail. Ni kadek, luhke irail oh kasalehda me ke men irail en iang towehda Katamano. Kitail en wia uwen me kitail kak en luhke irail me kitail kin onop Paipel rehrail, aramas akan me kin perenki rong, atail peneinei oh aramas me kitail ese pwe ren kak iang towehda wiewia me keieu kesempwal nan pahr koaros. Aramas koaros me men sukuhliki “loalokong kesempwal me pid duwen Sises Krais” pahn kak ale kamwahupen tomwo. (Pilipai 3:8) Irail koaros me kin pwoson sapwellimen Krais meirong kak ahneki koapworopwor kehlail en ale mour soutuk.—Sohn 3:16.
7 Kitail en dehr lemeleme me Katamano sohte kak kamwekid laud aramas mehlel akan. Sounpahr riau samwalahro, nan deke me adaneki Papua New Guinea, aramas 11, me kin perenki rong Mahsen en Koht, iang kisin pwoht oh seiloak awa 17 nansed me iloakin pwehn iang towehda Kataman. Dahme kahrehda? Re koasoia: “Se men iang meteikan me kin papah Siohwa oh kasarawi Katamanpen Kamatalahn Krais; eri, uhdahn katapan aht wia seiloak wet.” Medewehla duwen ngoang me aramas pwukat kasalehda oh uwen kalahngan me re ahneki sansalda sang arail men miniminiong Siohwa, sapwellime Ohl oh sapwellime pwihn en Kristian pirien!
8 E kesempwal kitail en idek rehn aramas koaros me perenki rong ma re men onop Paipel rehtail. Kangoange irail en kaukaule iang towehda mihding kan koaros oh ehukihong meteikan padahk mehlel me re sukuhliki. Sewese irail en ‘weweid nan marain’ oh ‘doadoahngki padahk mehlel nan arail mour’ ni arail pahn doadoahngki kaweid sang nan Paipel nan arail mour. (1 Sohn 1:6, 7) Sewese irail en wiahda nanpwung keren rehn Siohwa oh pil sewese irail en nantihong kekeirada ni arail kin kalahnganki pwais kaselel me re ahneki en kapwaiada kupwuren Koht.
9 E kin wia pwais kaselel ong kitail en perenki “tengetengkipene kahrepeteieu, oh miniminkipene anahntehieu, ni [atail] kin nantihong pwoson me konehng rongamwahu”! (Pilipai 1:27, 28) Kitail en kasikasik miniminiong meteikan ni atail pahn iang towehda Kataman me pahn wiawi March 28, oh kitail en ahneki kalahngan laud ong dahme Siohwa oh sapwellime Ohl wia ong kitail!—Luk 22:19.