Wia Emen Me Semen en Koasoi!

¹ Pwehn kapwaiada atail pwukoa en kalohk oh katohnpadahk, kitail anahne koasoiong meteikan oh padahkiong irail duwen Rongamwahu. (Madiu 24:14; 28:19, 20) Ahpw, e kin apwal en koasoiong meteikan, ekei pak pil nanpwungen kitail oh kompoakpatail kan. Dahme pahn sewese kitail en koahiekla ni atail kin padahkiong aramas me kitail sehse duwen Rongamwahu?

² Sewese Tohnihmw en Kilangwong Uhk Nin Duwen Kompoakpah Kaidehn Emen me E Sehse: Ke song en medewehda pepehm en irail me ke kin tuhwong nan kalohk. Pwehki irair en sampah suwed rahnwet, kitail kak wehwehki me ekei aramas kin masak aramas teikan oh perki dahme re pahn wia, keieu aramas me irail sehse. Pepehm wet kak kauwehla atail saledek en koasoiong meteikan. Dahme ke kak wia ma ke pehm me aramas me ke tuhwong ahneki pepehm en masak de perki dahme ke pahn nda de wia? Mwohn kitail pil nda mehkot, kitail kak kehsehkin aramas teikan duwen soangen aramas dah kitail ni atail pahn doadoahngki likou oh kapwat me konehng Kristian. Atail likoukihda likou me mwahu oh kin kasalehong aramas teikan wahu iangahki atail meleilei oh mehlel ong atail doadoahk en kalohk pahn sewese irail en dehr perkin kitail.​—1 Tim. 2:​9, 10.

³ Pil ehu sawas ong koasoiong meteikan iei en koasoiong irail ni elen meleilei oh kadek. Met kin kahrehong meteikan en pil meleilei oh re sohte pahn perki dahme kitail pahn nda oh wia oh re pahn kak rong kitail. Ma kitail men wia met, kitail anahne kaunopada mwahu. Ma e sansal nan atail madamadau dahme kitail pahn nda, met kin katikitikla atail saloh oh atail sohte saloh pahn sansal nan atail koasoi. Oh atail meleilei oh popohl me pahn sansal nan atail koasoi pahn kamwekid aramas en men rong dahme kitail pahn nda. Emen lih koasoiahki duwen Sounkadehde men me kalohk reh: “Dahme I tamataman duwen ih ahnsou me e kin pohkomwokomw​—⁠I kak kilang popohl oh meleilei nan meseo. I men ese dahme e pahn ndaiong ie.” Met kamwekid liho en men rong duwen Rongamwahu.

⁴ Irair kan me Kin Kahrehong Tohnihmw en Men Rong Kitail: Kitail anahne kasalehda me kitail nsenohki meteikan. (Pilipai 2:4) Ehu ahl me kitail kak wia met iei en dehr lemeleme me ke kelepw me pahn koasoakoasoi. Ni mehlel, ke anahne pil rong dahme meteikan men koasoia. Ni ahnsou me kitail mweidohng tohnihmw en kasalehda pein arail pepehm oh kitail rong kanahieng dahme re koasoia, re kak pehm me kitail nsenohkin irail. Eri, ni ahnsou me tohnihmw pahn kasalehda eh pepehm oh koasoia mehkot, ken dehr pehm me ke anahne mwadang pwurehng koasoia ahmw padahk me ke kaunopada. Ma ke kak kalahngankihong irail dahme re koasoia, wia met ni mehlel, oh nantihong koasoia duwen oaralap me re koasoia. Ma re kasalehda sang arail koasoi duwen kahpwal de kapwunod de mehkot me re kin nsenohki, e pahn mwahu ma ke pahn kawekila ahmw padahk oh koasoia duwen dahme tohnihmw kasalehda.

⁵ Lamalam karakarahk oh aktikitik pahn pil sewese kitail en koasoiong meteikan. (Lepin Padahk 11:2; Wiewia 20:19) Aramas akan kin men karanih Sises pwehki e kin “opampap oh nan kapehd karakarahk.” (Madiu 11:29) Ni pali teio, aramas sohte men karanih de rong sang aramas me ahneki lamalam aklapalap. Kahrehda, mendahki kitail uhdahn kamehlele me kitail ahneki padahk mehlel, kitail en loalokong oh dehr koasoiong aramas ni elen akpwung oh aklapalap.

⁶ Dahme kitail pahn wia ma tohnihmw kin kasalehda me e kamehlele padahk kan me sohte pahrekiong dahme Paipel kin padahki? Kitail anahne kapwungala ih? Ei, ehu rahn e pahn mwahu en kapwungala ih, ahpw kitail sohte anahne kapwungala ih rahno me kitail tepin tuhwong ih. Pali laud en ahnsou, e pahn keieu mwahu en koasoia duwen ire kan me kitail oh tohnihmw kin pwungkipene mwohn kitail pahn koasoia duwen padahk en Paipel me kin apwal en kamehlele. Met kin wehwehki me kitail anahne kasalehda kanengamah oh kadek. Pohl wia mehn kahlemeng mwahu ni ahl wet ahnsou me e kalohk ong irail sounkopwung kan nan mwoalen kopwung en Areopakus.​—Wiewia 17:18, 22-​31.

⁷ Ahpw, keieu kesempwal, kitail anahne kasalehda limpoak oh limpoak me pahn sewese kitail en koahiekla koasoiong meteikan oh kalohk ong irail. Duwehte Sises, kitail poakpoake aramas akan me “sohte epwelparail, pwe re rasehng sihpw me sohte silepahr.” (Madiu 9:​36) Met kin kamwekid kitail en men wahwei rehrail Rongamwahu oh sewese irail en kekeid nan ahl me kahluwalahng mour soutuk. Rohng me kitail kin kalohki iei rohng en limpoak, eri kitail en kasalehda limpoak ni atail kin pakairkihong aramas akan rohng wet. Ni atail wia met, kitail kin kahlemengih Siohwa Koht oh Sises Krais me kin keieu samanih wia kawehwe ong aramas oh wehwehki arail pepehm oh madamadau kan.