Nantihong “Kalohk Ong Aramas Koaruhsie”

1, 2. Dahme ke kin medemedewe duwen Pohl ni ah kin kilangwong eh pwukoah en kalohki Rongamwahu, oh iaduwen kitail kak kahlemengih ah mehn kahlemeng mwahu en “kalohk ong aramas koaruhsie”?

¹ Duwehte Sises oh sapwellimen Siohwa ladu lelepek kan en mahs mahsie, wahnpoaron Pohl wia sounkalohki Rongamwahu men me ngoangki “kalohk ong aramas koaruhsie” sohte lipilipil soangen irair dah kan me irail mihmi loale. Mendahki e selidi, e “kin kasamwo koaros me kin pwarodo reh. E ahpw padapadahkihong aramas akan duwen Wehin Koht; oh e kin eimah oh pil saledek ni eh kin kapahrengki duwen Kaun Sises Krais.”​—Wiewia 28:16-​31.

² Kitail pil kin nantihong “kalohk ong aramas koaruhsie” ahnsou koaros. Met wehwehki me kitail anahne kalohk ong aramas akan me kitail kin tuhwong ni ahnsou me kitail kin seiloak pwehn iang towehda Kapokon en District me oaralap koasoia “Kapinga Koht” oh ahnsou me kitail mihmihseli nan kahnimw me kapokono pahn wiawi ie.​—Wiewia 28:23; Melkahka 145:10-​13.

3. Ia wehwehn kalohk ni ahnsou sohte lipilipil?

³ Ia Wehwehn Kalohk Ni Ahnsou Sohte Lipilipil? Duwehte Pohl, kitail men kapinga Koht ni atail pahn kin wia doadoahk en kalohk pahn kin wia mehkot kesempwal ong kitail, oh kitail pahn nantihong kalohk ahnsou koaros ni ahnsou me kitail kin seiloak nan sounpwong en June, July oh August. Kitail kak nda me wiepe de mwomwen atail kin tuhwong aramas akan kin wia elen kadek, sohte saloh, meleilei, duwehte ahmw kin tuhwong kompoakepahmw men. Met kin wia elen tuhwong aramas me kin inenen pweida mwahu.

4. Dahme sewese Pohl pwehn kak kalohk ni imweo?

⁴ Kaunopada Pwehn Kalohk: Pohl anahne wiahda ahnsou mwahu kan koaros pwehn kak kalohk ahnsou me e selidi nan imweo nan Rom. Sang wasa me e mihmi, e luhke irail kaunen Suhs akan pwehn kohdo ni imweo. (Wiewia 28:17) Edetehn miehier mwomwohdiso en Kristian nan Rom, Pohl esehda me tohnkahnimwo sohte nohn wehwehki duwen dahme Kristian akan kin kamehlele. (Wiewia 28:22; Rom 1:7) E sohte ekihsang irail mehkot ahpw e kin “kalohkihong aramas koaruhsie” soahng koaros me e ese duwen Sises Krais oh Wehin Koht.

5, 6. Soangen ahnsou mwahu dah kan me kitail kin ahneki pwehn kak kalohk ni ahnsou sohte lipilipil, oh iaduwen kitail kak kaunopada pwe kitail en kak pweida nan kalohk?

⁵ Medemedewe mahs duwen aramas koaros me ke pahn tuhwong ni ahmw pahn seiloak oh medemedewe me irail sohte kin nohn wehwehki duwen Sounkadehdehn Siohwa kan. Irail sohte kin pil wehwehki me kitail kin onop Paipel rehn aramas akan ni soh isepe. Wia uwen ahmw kak en kalohk ong aramas akan me ke kin tuhwong ni ahnsou me ke kin seiloak, ni ahnsou me ke kin mihmi nan wasahn kommoal kan, ni ahnsou me ke kin ale kahs ni kahs station kan, ni ahnsoun netinet, ni ahmw mihmi nan hotel kan, mwenge ni wasahn mwenge kan, doadoahngki bus oh taxi kan, oh ni ahnsou mwahu koaros. Koasoanehdi mwowe dahme ke pahn nda pwehn kak koasoiong aramas teikan oh kalohk ong irail ni ahnsou mwotomwot. Mwein ehu rahn ke kak praktis kalohk ni ahnsou sohte lipilipil ni ahmw pahn kalohk ong mehn mpomw kan, ahmw peneinei kan, iengomw tohndoadoahk kan, oh aramas teikan me ke kin ese.

⁶ Ke anahne wahda soangsoangen pwuhk, brochure, makisihn oh tract kan pwe ken kak doadoahngki mehpwukat ni ahmw pahn kalohk ni ahnsou sohte lipilipil. Mehnia me ke anahne? Ke kak doadoahngki tract me oaralap koasoia Ke Men Kalaudehla Ahmw Wehwehki Paipel? Kasalehda ire kesempwal kan nan parakrap keieu lel kelimau, wasao me soangsoangen kahrepe kan me mie ong kesempwalpen wadek Paipel. Kasalehda “coupon” me mihmi ni pali 6 me aramas kak doadoahngki ma irail men pekihda en onop Paipel ni soh isepe. Ni ahnsou me ke pahn diarada emen me mwekidki Rongamwahuwo, idek reh ma e men ale nah brochure Kupwurki. Pwehn kaunopada ong tuhwong aramas akan me kin doadoahngki lokaia ieu me ke sehse, wahda booklet me oaralap koasoia Good News for All Nations. Pali 2 en booklet wet kin kawehwehda iaduwen ke kak doadoahngki booklet wet pwehn kalohk. Ma ke seiloakseli ni ahmw doadoahngki waromw sidohsa, ke kak wahda pil ekei pwuhk, brochure, makisihn oh tract pwehn kihong aramas me kin perenki rong duwen Rongamwahu en Wehio.

7, 8. Soangen kaweid dah kan me kitail idawehn me pid duwen atail likou, kapwat oh wiewia kan ni ahnsou me kitail seiloak oh pil ni ahnsou me kitail kin kommoal?

⁷ Tehk Kanahieng Duwen Ahmw Likou, Kapwat oh Ahmw Wiewia kan: Kitail sehse ma atail wiewia kan oh atail likou oh kapwat akan pahn kakete kahrehong aramas akan en ‘kauwe’ Siohwa oh sapwellime pwihn. (Wiewia 28:22) Kitail anahne tamataman met kaidehn ongete ahnsou me kitail kin iang towehda kapokon akan ahpw pil ahnsou kitail seiloak oh pil ahnsoun kommoal mwurin kapokon. Watchtower (lokaiahn wai) en August 1, 2002, pali 18, parakrap 14, kihda kaweid wet: “E sohte konehng atail likou oh kapwat en wia mehkot me aramas pahn lemeleme me kitail kala, de daulihla, de men kasalehda paliwar, de alasang sidail en sampah kan. Oh pil, kitail anahne doadoahngki soangen likou oh kapwat me kin kasalehda me kitail ‘wauneki Koht.’ Met kin kihong kitail iren madamadau ieu, kaidehn? Met sohte kin wehwehkihte me kitail en doadoahngki likou oh kapwat me konehng Kristian ahnsoun mihding kan de ahnsoun kapokon kan oh mwurin mwo kitail kakehr doadoahngki likou oh kapwat sohte lipilipil ahnsou teikan. Atail likou oh kapwat pahn anahne en ahnsou koaros kasalehda atail lamalam nin duwen sounkalohk kan oh Kristian kan me kin wauneki Siohwa oh aramas teikan ahnsou koaros.”​—1 Tim. 2:​9, 10.

⁸ Kitail anahne doadoahngki likou oh kapwat me konehng Kristian oh pil kin kasalehda me kitail wauneki Siohwa Koht oh aramas teikan. Ma atail likou, kapwat oh wiewia kan pahn kasalehda me kitail kin kamehlele Siohwa Koht oh sapwellime koasoandi kan, kitail sohte pahn pweiek ni ahnsou me kitail men kalohk ong aramas teikan pwe kitail sohte pahn namenengki me kitail wia sounkalohk kei.​—1 Pit. 3:​15.

9. Iaduwen en Pohl eh kalohk nan Rom kin imwila mwahu?

⁹ Kalohk Ni Ahnsou Sohte Lipilipil Kin Imwikihla Wah Mwahu: Erein sounpahr riau me Pohl selidi nan pein imweo nan Rom, e kilang me eh kalohk ong meteikan kin imwila mwahu. Luk ripohtki me “ekei irail kamehlele eh koasoi kan.” (Wiewia 28:24) Pil pein Pohl kasawihada duwen imwila mwahu kan me kin kohsang eh “kalohk ong aramas koaruhsie” ni ahnsou me e ntingihdi: “I men kumwail en ese mwahu soahng kan me wiawihongieier inenen sewese mehlel pweida mwahu en rongamwahu. Eri, pwehki mepwukat, irail koaros me sinsile tehnpas wet, oh pil irail teikan wasaht, re ese kahrepen ei mihmi nan imweteng wet, pwehki ei wia ladun Krais. Oh ei mi nan imweteng wet pil kahrehiong pali tohtohn riatail Kristian kan eh laudla ar koapworopworki Kauno. Eri, re sohte masepwehk, re kin eimah ahnsou koaros ni ar kin padapadahngkiseli mahseno.”​—Pilipai 1:​12-​14.

10. Iaduwen pwopwoud ehu me kalohk nan pahr me ahpwtehn neko ah imwila mwahu?

¹⁰ Nan pahr me ahpwtehn neko, pwopwoud ehu, mwurin ara iang towehda Kapokon en District, ehu rahn, ira ahneki ekpiriens mwahu ni ara kalohk ong emen lih me papah ira nan wasahn mwenge ieu pwehki liho idek rehra duwen kilel me ira doadoahngki me kin kasalehda duwen kapokono. Ira padahkiong liho duwen kapokon me kin wiawi oh pil duwen koapworopwor me Paipel kin kasalehda duwen dahme pahn wiawiong aramas akan ni ahnsou kohkohdo. Ira kihong ih tract me oaralap koasoia Ke Men Kalaudehla Ahmw Wehwehki Paipel? oh kawehwehda duwen koasoandi en onop Paipel rehn aramas ni soh isepe. Liho ndaiong pwopwoudo me e mwahuki emen en kohla reh pwehn onop Paipel, oh e audehda pali 6 en tracto oh ntingihdi edeo oh nah address, oh idek rehn pwopwoudo ma ira kak koasoanehdi emen en kohla reh. Ke pahn kak pweida mwahu nan pahret ni ahmw pahn wia uwen me ke kak en “kalohk ong aramas koaruhsie”?

11. Soangen irair dah kan me kitail anahne ahneki pwehn kak kalohki Rongamwahu nan pahret ni atail pahn wia uwen atail kak en “kalohk ong aramas koaruhsie”?

¹¹ Wia Uwen Me Ke Kak en Kalohki Rongamwahu Ong Aramas Koaruhsie: Medewehla uwen peren me Pohl ahneki ni ahnsou me e rong me ienge Kristian akan kin kahlemengih mehn kahlemeng en ngoang me e kin kasalehda! Kitail en wia uwen atail kak en kalohki Rongamwahu ni ahnsou sohte lipilipil oh ehukihong meteikan duwen dahme kitail kamehlele sang nan Paipel ni atail pil paiekihda Kapokon en District me pahn wiawi nan pahret.

[Kaokon nan Pali 3]

Dahme Kitail Anahne Wahda Ong Kalohk Ni Ahnsou Sohte Lipilipil

■ Ke Men Kalaudehla Ahmw Wehwehki Paipel? (tract)

■ Dahme Koht Kupwurki Kitail en Wia? (brochure)

■ Good News for All Nations (booklet)

■ Pwuhk, brochure, makisihn oh tract teikan

[Kaokon nan Pali 4]

Ke Dehpa Manokehla Irail!

Manokehla ihs? Aramas koaros me iang towehda Katamanpen Kamatalahn Krais de pil iang towehda Kapahrek Tohrohr. Kitail luhkeier irail en iang towehda Kapokon en District nan pahret? Mwein irail pahn iang towehda ma kitail pahn kangoange irail ni kadek. Ni arail pahn perenki miniminiong meteikan ni kapokon oh rong prokram me pahn kangoange irail en kekeirada ni pali ngehn, irail pahn karanih Siohwa oh sapwellime pwihn. Dahme ke soh luhke irail oh kilang ma irail pahn mwekidki luhk wet? Ndaiong irail soahng koaros me irail anahne ese pwehn iang towehda, iangahki rahn oh iawasa me kapokon pahn wiawi oh pil kuloak depe prokram en kapokon pahn tepida oh kaimwisekla.