Kommoal Sang Doadoahk (Retire)—Ahnsou me Emen Kak Kalaudehla Ah Ahnsoun Kalohk?
1 Aramas tohto me kin doadoahk laud kin kasikasik ahnsou me irail pahn kommoal sang doadoahk (retire) pwehki irail men saledek sang kahpwal kan oh pwunod kan me kin kohsang doadoahk en mwohni. Ahpw, pali laud en ahnsou, ahnsoun kommoal sang doadoahk kin imwikihla soangen pepehm kan duwehte soukautih, sangat, oh mwadang mahla. Pwehki aramaso solahr doadoahk, e kakete wie pwupwunodki pein ih oh irair me e mihmi loale. Nuhspepa nan Brazil ripohtki me irail me kommoal sang doadoahk nan koperment kin kompleinki soangen kahpwal kan duwehte ‘pepehm en sohte itarki irair me emen mihmi loale, pwunod, nsensuwed, oh pepehm me sohte katepen mour oh aramas solahr anahne iuk oh pil lella pepehm me e pahn sahliella pwehki eh mour solahr soandi oh nsenamwahu.’
2 Weksang met, Kristian tohto kin kilangwong ahnsowo—arail mour mwurin kommoal sang doadoahk—nin duwen ahnsou ehu me irail kak kalaudehla arail ahnsoun kalohk. Emen brother me tepida Regular Pioneer wihk riau mwurin e mahki sounpahr 65 koasoia: “Ahi mour en Regular Pioneer erein sounpahr eisek met inenen dirki kapai tohto oh I kak nda me edin nan ahi mour me I ahneki peren mehlel.” Pwopwoud ehu ntingihdi: “Sounpahr kan me se inenen perenki nan aht mour ni aht mahla tepida ahnsou me se tepida Regular Pioneer.” Ehi, ong aramas tohto, ahnsou me irail kommoal sang doadoahk kin kihong irail ahnsou mwahu en kalaudehla arail ahnsoun kalohk oh irail eri kin alehda kapai tohto sang Siohwa.
3 Kedirepwki Soahng Katapan kan: Aramas tohto me kommoal sangehr doadoahk tikida nan mour me sohte soahng kan me mie met me kin kamengeila mour me kitail ahnla oh irail pil kin ese doadoahk oh ahn doadoahk laud sang ahnsou me irail tikitik. Mendahki irail solahr kehlail duwehte ahnsou me irail pwulopwul, irail kin doadoahk laudte. Nan ehu wasa, persent 22 en irail me wia doadoahk en Regular Pioneer—mpen meh 20,000—me mahki sounpahr 60 de sounpahr laud sang sounpahr 60. Irail me mah pwukat kin kihda sawas laud nan doadoahk en kalohk. Arail ekspiriens oh irair en Kristian kan kin kamwekid oh kangoange tohnmwomwohdiso kan me irail kin ieiang papah Siohwa.—Seims 3:17, 18.
4 Kedirepwki doadoahk en kalohk en Kristian kin sewese emen en ahneki roson mwahu oh nsenamwahu nan eh mour. Emen sister me mahki sounpahr 84 tepida Regular Pioneer ni ahnsou me e kommoal sang doadoahk oh e koasoia: “Ahi onop Paipel rehn aramas tohto kin kihong ie ahi roson ong palien madamadau. I sohte waraneki sidohsa, eri I kin kalap alu. Met pil kin sewese ie en ahneki roson mwahu.” Pwopwoud mah ehu me kin wia doadoahk en Regular Pioneer koasoia: “Kalohk kin sewesei kiht en ahneki roson mwahu ni paliwar oh pil palien madamadau. Se kin kalap doadoahkpene kahrehda se kin miniminpene nanpwungat. Se kin kalap kouruhr oh se kin perenki mour.”
5 Kalohk Wasakis Me Anahne Sounkalohk kan: Ekei Kristian me kommoal sangehr doadoahk me itar neirail mwohni en kak sewese irail en kosoula ekis wasa—ekei irail kin pilada en kosoula wasakis me anahne sounkalohk kan pwehn kak kalohki Rongamwahu. Ekei kalaudehla arail ahnsoun kalohk ni arail kalohk wasa kan me aramas kin doadoahngki lokaia tohrohr. Duwehte wahnpoaron Pohl, sounkalohk ngoang pwukat kin “wiewia mehpwukat koaros pwehki Rongamwahu, pwehki irail pahn kak iang pwaisanki kamwahupe kan.”—1 Korint 9:23.
6 Ehu pwopwoud iang doadoahk en Regular Pioneer mwurin neira pwutak riemen laudlahr. Mwurin ira pioneer sounpahr kei, ira nantihong sukuhliki lokaiahn China. Met, ira mahki sounpahr 70 samwa, oh ira inenen peren pwehki ira ahpwtehn kilang pwihn en aramas akan me kin lokaiahki lokaiahn China me ira kin sewese pwehn wiahla mwomwohdiso ehu. Soangen pwopwoud kan me duwehte pwopwoudo me se ahpwtehn koasoia kin wia kapai laud mehlel!
7 Sohte Kommoal Sang Kalohk: Mendahki pali laud en aramas kin kommoal sang arail doadoahk en mwohni, e sohte konehng Kristian kan en kommoal sang arail papah Koht. Kitail koaros anahne lelepek oh “dadaurete lel ni imwi.” (Madiu 24:13, 14) Ahpw, mehlel, pwehki ekei ah wie mahmahla, irail sohte kak wia laud nan doadoahk en papah Siohwa duwehte irail kin wia mahs. Ahpw, e kin kangoange kitail laud en kilang irail kin wia uwen arail kak en papah Siohwa sang arail mohngiong unsek! Mahsen en Koht kin kamehlelehong irail me Siohwa sohte kin likidmeliehla arail doadoahk oh pil limpoak me irail kasalehong mwaren Siohwa.—Luk 21:1-4; Ipru 6:10.
8 Ma ke kereniong pahn kommoal sang doadoahk, dahme ke soh kapakapki dahme ke pahn wia pwehn kak doadoahngki mwahu ahmw ahnsoun kommoal? Ki sawas sang Siohwa, ke pahn diarada me kommoal sang doadoahk kak ritingadahng uhk ahnsou me ke kak kalaudehla ahmw ahnsoun kalohk me pahn kapinga Siohwa oh wahdo kapai tohto.—Melkahka 148:12, 13.