Prokram Kapw en Kapokon en Circuit
1 Atail Soumas kohpada me sapwellime tohnpadahk kan pahn lelohng uhwong oh kalokolok. (Madiu 24:9) Iaduwen kitail pahn kilangwong kahpwal akan? Dahme pahn sewese kitail en dadaurete mendahki uhwong oh kasongosong kan? Prokram en Kapokon en Circuit en pahr en kalohk en 2004 pahn sapeng peidek pwukat. Oaralap en Kapokon wet iei “Amwail Koapworopwor en Kaperenkumwailda. Dadaurete Mendahki Kahpwal akan.”—Rom 12:12.
2 Symposiums Riau: Keieun symposium, me oaralap en padahk kan koasoia “Kapwarehda Wah kan Ni Ahmw Kasalehda Kanengamah,” pahn kasalehda me kitail kak “kapwarehda wah kan.” Interview en ekei sounkalohk kan pahn wiawi pwehn kasalehda iaduwen irail kin kalohk oh padahk ni ngoang. E pahn mwahu ma pahpa oh nohno kan pahn rong kanahieng padahko me oaralap koasoia “Ni Ahnsou me Siohwa Kin Kaweid oh Kaiahne Aramas,” me pahn kasalehda iaduwen pahpa oh nohno kan kak kawehwe ong neirail seri kan kaweid kesempwal kan. Brother me pahn wia kaimwiseklahn padahk en symposium pahn kasalehda dahme kitail kak wia pwehn dehr mweidohng sampah en ekis ekis kauwehla atail pwoson oh kahrehong kitail en solahr kapwarehda wah kan.—Mark 4:19.
3 Oaralap en keriaun symposium iei “Dadaurete Nan Ahmw Tang Nan Weiren Tang en Mour.” E pahn kasalehda me atail elen mour duwehte weiren tang. Dahme kahrehda kitail anahne tang nin duwen kosonned akan? Iaduwen kitail kak kesehsang kitail mehkoaros me kin kerempwa kitail oh dehr pwangahkihda nan weiren tang en mour? Kaweid en Paipel me konehng atail ahnsou pahn kohda pwehn sewese kitail koaros en dadaurete nan atail tang nan weiren tang en mour.
4 Koht Kin Kupwurperenki Atail Kanengamah oh Dadaur: Padahk kan me Sounapwalih en Circuit oh District pahn wia kin kakehlailihala atail pwoson—keieu ong irail me rong kanahieng padahk kan oh kapwaiada kaweid kan me kohda. Oaralap en ehu padahk me Sounapwalih en District pahn wia iei “Kanengamah Kin Kahrehong Koht En Ketin Kupwuramwahuwih Kitail.” Kapahrek Ong Wehi Pokon pahn sapeng peidek pwukat: Wehi kan en koapworopworki mwaren ihs, oh dahme met kin pidada? Ni kaimwiseklahn padahko me oaralap koasoia: “Kumwail en Kanengamah Pwehn Kak Ale Komourpamwail,” oh padahk wet pahn kasalehda iaduwen Sises kanengamah oh dadaurete mendahki kopwung sapwung me e lelohng oh e sohte ahnekihda lamalam suwed ong irail me kaloke ih.
5 Tamatamante en wahdo noumw pwuhken Benefit From Theocratic Ministry School Education oh pil noumw Kahn Iroir me kitail doadoahngki nan wihko. Ntingihdi note kan pwehn kak sewese iuk en doudouloale duwen padahk kan oh pil en kak kousapahlih mwuhr. Mwuhr, kitail pahn kousapahlih prokram en kapokon wet ni ehu mihding.
6 Pein Siohwa me ketin kaunopada kamadipw en mwengehn ngehn wet. E pahn mwahu ma koaros pahn iang towehda oh iang kang mwengehn ngehn pwukat! Kitail pahn ahneki peren laud ma kitail pahn iang towehda kapokon wet oh kitail pahn paiekihda prokramo pwon.—Aiseia 65:14.