Padahk kan ong Kihla Ke Kak Kompoakepahnki Koht!
Mwurin ahmw pahn kasalehda duwen rohng en kahpwal laud ehu, ke kak nda:
“Mie pak me ke medemedewe dahme kahrehda Koht kin mweidohng aramas en lokolok ma e kin ketin nsenohkin kitail? [Mweidohng en sapeng.] Brochure wet kin kihda pasapengpen peidek wet oh kin kasalehda dahme Koht pahn ketin wia ni ahnsou kohkohdo. [Kasalehda kilel kan ni pali 8 oh 9, oh wadek Kaudiahl 21:4 sang parakrap 3 ni pali 9.] Met iei inou ehu me Koht ketikihong kompoakepah kan. Ahpw, dahme kitail anahne wia ma kitail men kompoakepahnki Koht? I men sapeng peidek wet ni ahnsou me I pahn pwurodo.” Idek rehn tohnihmw ma e men ale brochure wet, oh koasoanehdi ken pwurala ehu rahn.
Ni ahnsou me ke pahn pwurehng pwurala rehn tohnihmwo, ke kak nda:
“Rahn teio, I tuhwong komwi oh kita wadekpene iren Paipel wet. [Wadek de ndahte mouren Kaudiahl 21:4.] Mwurin ata wadek iren Paipel wet, I kihda peidek wet: Dahme kitail anahne wia ma kitail men kompoakepahnki Koht?” Idek reh ma e kak wahdo nah brochure. Mwurin mwo, koasoia duwen Iren Mehn Kasukuhl 1, parakrap 1 oh 2. Idek rehn tohnihmwo ma e men onop Paipel, de koasoanehdi ahnsou pwehn pwurehng pwurala reh oh pousehla amwa koasoi.
―――◆―――
Emen sounkalohk pwulopwul kak nda:
“Me pwulopwul tohto kin pwunodki dahme pahn wiawiong sampah sounpahr 10 de 15 sang met. Ia ahmw madamadau ong mour nan sampah sounpahr 10 de 15 sang met? [Mweidohng en sapeng.] Kahpwal akan me kitail kilang rahnwet kin kasalehda me kitail memour ni imwin rahn akan. [Kasalehda Iren Mehn Kasukuhl 6 oh wadek 2 Timoty 3:1-3.] Brochure wet pahn kawehwe iaduwen Koht pahn kamwahuwihala sampah pwehn wiahla wasa mwahu ong kousoan. [Kasalehda kilel kan ni pali 8-9, oh kihla brochure.] Ni ahnsou me I pahn pwurehng pwurodo rehmw, ma mie ahmw ahnsou—minit keite, I men ehukihong komwi ire ieu me pid duwen soumwahu oh mahla me ke pahn perenki rong.” Koasoanehdi pwehn pwurehng pwurala reh.
Ni ahnsou me ke pahn pwurehng pwurala, ke kak nda:
“Kita koasoipene rahn teio, I padahkiong komwi me I men ehukihong komwi ire ieu me pid duwen soumwahu oh mahla. Ireo mihmi nan brochure me I kihong komwi rahn teio.” Idek reh ma e kak wahdo nah brochure, oh wadek oh koasoia parakrap 2-3 ni pali 9. Koasoanehdi ken pwurehng pwurala reh oh wadek parakrap en mwuri kan.
―――◆―――
Ni ahnsou me sounkalohk men (aramas laud) oh seri men pahn ehu nan kalohk, sounkalohk menet kak padahkiong tohnihmwo edera oh mwuri e kak nda:
“Ma komw mweidada, ________ (eden serio) men wadek ong komwi iren Paipel ehu. [Serio pahn wadek Melkahka 37:29 oh ekis kawehwe duwen ireo.] Brochure wet kin kasalehda iaduwen Koht pahn kapwaiada kupwure ong aramas en sampah. [Kasalehda kilel kan ni pali 8-9.] Ni ahnsou me se pahn pwurehng pwurodo rehmw, I men kasalehiong komwi inou me kileledi nan Paipel duwen kaiasada me pahn wiawi ni ahnsou kohkohdo.” Kihla brochure, oh koasoanehdi en pwurehng pwurala reh.
Ni ahnsou me kumwa pahn pwurehng pwurala, sounkalohk menet kak nda:
“Se tuhwong komwi rahn teio, oh kitail wadek Melkahka 37:29 oh I nda me I men kasalehiong komwi duwen dahme Paipel kasalehda me pid duwen kaiasada me pahn wiawi ni ahnsou kohkohdo. Menlau tehk dahme ntingihdi nan brochure wet.” Idek reh ma e kak wahdo nah brochure, oh koasoia Iren Mehn Kasukuhl 12, pali 20. Idek reh ma e men onop Pwuhk Sarawi, oh koasoanehdi en pwurehng pwurala reh oh pousehla amwa koasoi.