2005 Kapokon en District me Oaralap Koasoia “Peikiong Koht”

¹ Siohwa Koht, nin duwen atail Sounpadahk Lapalap, kin ketin koasoanehdiong kitail en pokonpene pwehn sukuhliki duwen sapwellime ahl akan. (Aiseia 30:20, 21; 54:13) E kin ketin doadoahngki pwihn en ladu lelepek oh loalokong en kamwenge sapwellime kan ni pali ngehn, oh pwihn wet kin koasoanehdi tuhpene pwukat duwehte atail Kapokon en District kan. (Madiu 24:45-​47) Kitail kin ahneki pepehm kan duwehte sounmelkahka Depit me koulki: “I kin kapinga Siohwa nanpwungen tohnmwomwohdiso kan.” (Melkahka 26:12) E sansal me Depit wehwehki mwahu duwen kesempwalpen en ale kasukuhl sang rehn Siohwa oh e kin nantihong iang sapwellimen Siohwa aramas akan ni ahnsou me irail kin pokonpene.

² Ke pahn iang mih “nanpwungen tohnmwomwohdiso kan” ahnsou me irail pahn pokonpene ni Kapokon en District nan pahr wet me oaralap koasoia “Peikiong Koht”? Ma iei, ke pahn kalahnganki ire pwukat me kitail pahn koasoia met pwe met pahn sewese iuk en kaunopada ong iang towehda Kapokon en District wet.

³ Koasoanehdi Ahnsou wet Pwehn Iang Towehda Rahn Koaros en Kapokono: “Koasoandi kan en me pwerisek men kin inenen wiahda kamwahu laud.” (Lepin Padahk 21:5) Lepin mahsen pwukat sou kin kasalehda duwen kesempwalpen koasoanehdi mwadang en iang towehda Kapokon wet? Pwehn koasoanehdi me ke pahn uhdahn iang rong prokram wet me pahn kakehlailih ahmw pali ngehn, menlau wiahda ahmw koasoandi ahnsou wet pwehn kak iang towehda rahn koaros en kapokono. Ma ke anahne peki rehn ahmw kaun en doadoahk ken kommoal rahn kan en kapokon, mwadang wia met. Ma ke anahne koasoiong ahmw pwoud me sohte iang padahk mehlel duwen met, dehr awih lao pwand. Sohte lipilipil soangen kahpwal dah me ke pahn lelohng, kapakapkihong Siohwa duwen kahpwal pwukat, oh likih me ki sapwellime sawas “ke pahn pweida ni mehkoaros me ke koasoanehdi.” (Lepin Padahk 16:3) Oh pil, e pahn mwahu en sewese aramas akan me ke kin onop Paipel rehrail en koasoanehdi arail koasoandi kan pwehn iang towehda rahn koaros en kapokono.

⁴ Atail Likou oh Kapwat: Ma kitail men kapinga Siohwa, kitail anahne doadoahngki likou oh kapwat me pahn konehng Kristian. (1 Tim. 2:9) Pwuhken Benefit From Theocratic Ministry School Education, pali 132, koasoia: “Aramas emen me kin wehwehki oh doadoahngki lamalam konehng (modest) kin nsenohki madamadau oh pepehm en meteikan oh sohte men kansensuwedih meteikan oh sohte men wia mehkot de wia mwohmw me pahn kahrehiong meteikan en kilangwong ih ni ahl me sohte konehng Kristian.” Nan sahpw tohto, doadoahngki likou me sohte konehng wiahla tiahk me kin kalap wiawi. Ahpw, Siohwa kin kalahnganki nanti me kitail kasalehda pwehn doadoahngki likou oh kapwat me konehng Kristian oh me pahn wauneki Ih. (Wiewia 15:14) Ni atail kin pokonpene mwohn Siohwa, kitail en likouda ni ahl me konehng oh wahu ong Ih me keieu lapalap pohnangin lahng oh sampah.​—1 Kron. 29:11.

⁵ Kitail pil anahne tehk mwahu duwen soangen likou oh kapwat kan me kitail kin doadoahngki mwurin ehuehu rahn en kapokon. Mehnda ma kitail men doadoahngki likou me kansenamwahu ni ahnsoun kommoal de ahnsoun mwenge nan wasahn mwenge, e kesempwal en tamataman me atail likou oh kapwat anahne “konehng pwehn wauneki Koht.” (1 Tim. 2:​10) Likou me konehng sohte kin sansal sang dahme sampah wet kin pwungki. (1 Sohn 2:​16, 17) Neitail sawaspen Paipel kan kin kasalehda kilel kan me ohl oh lih me mihmi nan soangsoangen irair kan kin doadoahngki likou oh kapwat me konehng Kristian. Ni ahnsou me kitail pahn doadoahngki neitail badge card kan pahn katamankin kitail me kitail wia sounkalohk Kristian kan ahnsou koaros.​—2 Kor. 6:​3, 4.

⁶ Wauneki Sapwellimen Siohwa Tehpel: Kaunepen Lahng oh Sampah kaunopadahr kamadipw ehu ong kitail. (Aiseia 25:6; 1 Kor. 10:21) Ma kitail kin kesempwaliki dewetail ni sapwellimen Siohwa tehpel en pali ngehn, kitail pahn rong kanahieng prokram en rahno oh kitail sohte pahn koasoiong meteikan ma sohte katepe, mwenge, de aluseli mwahl likin Kingdom Hall. Siohwa kin ketin doadoahngki pwihn en “ladu lelepek oh loalokong” pwehn kihpeseng mwengehn ngehn me kitail anahne ahnsou wet. (Madiu 24:45) E kesempwal kitail en rong prokram en kapokono pwon. E pil kesempwal pahpa oh nohno kan en mwohndi rehn neirail seri kan oh sewese irail pwehn paiekihda prokram ni unsek.​—Deud. 31:12.

⁷ Kaweid kohda me kitail en wahdo kenatail mwengehn souwas ni wasahn kapokon oh kitail en dehr kohkohla sang wasahn kapokon pwehn ale kenatail mwenge. Kaping kohwong pali laud en irail me iang towehda kapokon en pahr me ahpwtehn nek pwehki irail idawehn kaweid wet. E pahn mwahu ma koaros pahn idawehn kaweid wet pil pahret! (Ipru 13:17) Koasoandi wet pahn kihong kitail ahnsou mwahu en werekiong riatail brother oh sister kan oh met pahn kalaudehla ngehnen minimin oh popohl me kin wahdohng Siohwa kaping oh wahu.​—Melkahka 133:1.

⁸ Anahn en Irail me Pahn Toukihda Sawas: Sises kasalehda mehn kahlemeng mwahu ong kasalehda ia mwomwen aramas emen, ni lamalam karakarahk, kak nsenohki anahn en meteikan. (Luk 9:​12-​17; Sohn 13:​5, 14-​16) Irail me kin toukihda arail sawas ni kapokon pil kin kasalehda soangen ngehnohte. Pwehn sewese anahn en kapokono, pwihn kan me kin koasoanehdi koasoandi en kapokono pahn luhke tohnmwomwohdiso kan en sewese irail. Uhdahn mie anahn en elder kan me pahn toukihda arail ahnsou oh ale pwukoa kan. Arail ngehnen tounmetei pahn wia mehn kahlemeng mwahu ong tohnmwomwohdiso kan koaros.​—1 Pit. 5:​2, 3.

⁹ Kalohk ni Ahnsou Sohte Lipilipil: Ni ahnsou me kitail seiloaklahng wasahn kapokon, kitail pahn ahneki ahnsou mwahu tohto en kapinga Siohwa sang awatail. (Ipru 13:15) Kitail en rapahki ahl akan me kitail kak kalohk. Atail lamalam oh mohngiong pahn audaudki soahng ngehnin kesempwal tohto sang kapokono. Kitail en ehukihong meteikan soahng mwahu pwukat ni ahnsou me kitail kin kalohk ong irail.​—1 Pit. 3:​15.

¹⁰ Siohwa Koht kin doadoahngki pwihn en “ladu lelepek oh loalokong” en koasoanehdiong sapwellime aramas akan kapokon wet me audaudki kaweid sang nan Mahsen en Koht nan September 2005. (Luk 12:42) Soahng koaros me kitail pahn wia pwehn kaunopada en iang towehda kapokon wet pahn katapan. Kapokon en District en pahr wet me oaralap koasoia “Peikiong Koht” pahn kakehlailihala atail ineng en papah Siohwa ahnsou wet oh ahnsou kohkohlahte. Eri, kitail en ngoangki kapwaiada kaweid en sounmelkahkao: “Kumwail kapinga Koht nan pokon en sapwellime aramas akan.”​—Melkahka 68:26.