Kasalehda Atail Nsenohki Aramas—Sang Ni Atail Kin Kilang Irail Ni Arail Kin Lokaia
1 Ni atail kin kalohk wasa sohte lipilipil kan oh pil kalohk sang ihmw lel ihmw, kitail kin kilang mahs mesen aramas mwohn atail tepida koasoi. Ni erein ahnsou mwotomwot kis, kitail kakehr ese arail pepehm ohng kitail de ma irail nsenamwahu de soh sang ni mwomwen masarail. Irail pil kak kasawih kitail. Emen lih ndahki Sounkadehde men me tuhwong ih: “Dahme I taman sang eh mas pohkomwokomw iei duwen ah meleilei. I inenen mwekidkihda met.” Met elehda liho en rong Rongamwahuo.
2 Mwomwen mesatail ong meteikan kin wiahiong kitail en kak wia padahk ni atail kin kalohk nanial kan de wasa teikan. Emen brother kin kilang mesen irail me kin alialu kohdo reh. Ni ah kin wia met, e kin ahneki ahnsou mwahu en kak koasoiong aramas tohto oh pil kihla makisihn, brochure oh pwuhk tohto.
3 Kasawihada Pepehm en Meteikan: Kilang mesen meteikan pahn sewese kitail en kak kasawihada arail pepehm. Karasepe, ma aramas emen pahn apwaliki en wehwehkin kitail de sohte pwungki mehkot me kitail nda, e kin kalap sansalda dah sang pohn meseo. Ma e kedirepw de solahr kak kanengamah, kitail kak pehm met sang ni atail pahn kilang meseo. Eri, kitail kak uhd wekidala de kamwotehla atail padahk. Ni atail kin nsenohki pepehm en meteikan, met kin kasalehda me kitail kin uhdahn nsenohkin irail.
4 Mehlel ong Aramas oh Kasalehda me Ke Kamehlele Dahme Ke Koasoia: Nan tiahk en sahpw tohto, en kilang nan mesen aramas emen kin wia kilel en mehlel. Tehk mwomwen en Sises mahsen ni ahnsou me sapwellime wahnpoaron kan idek reh: “Ihs me uhdahn pahn mourla?” Paipel mahsanih: “Sises sohpeila kilang masarail oh mahsanih ong irail: ‘Met sohte kak pahn aramas, ahpw rehn Koht mehkoaros kak pweida.’” (Madiu 19:25, 26) Sansal me soh peikasal me mih pohn silangin Sises kin kahrehiong sapwellime mahsen kan en kehlail. Duwehte met, ma kitail pahn kilang mesen aramas ni atail koasoiong irail, met pahn sewese kitail en kawehwe duwen Rongamwahu en Wehio ni mehlel oh ni ahl me pahn kamwekid meteikan.—2 Korint 2:17; 1 Deselonika 1:5.