Pwoaren Masamwail En Mwakelekel oh Marain
1. Ia wehwehn ahneki pwoaren mas me mwakelekel oh marain, oh dahme kahrehda met kesempwal?
1 Nan sapwellime Kapahrek en Pohn Dohl, Sises kasalehda uwen kesempwal pwoaren masatail ni pali ngehn e kin pidada atail mour. E mahsanih: “Ma pwoaren masamwail kan pahn mwakelekel oh marain, paliwaramwail unsek pahn diren marain; a ma pwoaren masamwail kan pahn edied, paliwaramwail kan pahn diren rotorot.” (Madiu 6:22, 23) Pwoaren mas me mwakelekel oh marain kin kilangwohng soahng tehieu—wia kupwuren Koht—e sohte kin kedirepwki pwunopwunodiki kepwehn sampah kan. (Madiu 6:19-21, 24-33) Dahme kak sewese kitail en ahneki pwoaren mas me mwakelekel oh marain?
2. Soangen madamadau dahieu Pwuhk Sarawi kin kangoange kitail en ahneki me pid duwen kepwehn sampah?
2 Kadoahkehda Irair en Itarki Dahme Mie: Mehlel me apwalih anahn en peneinei iei pwukoa ehu me kileledi nan Pwuhk Sarawi. (1 Tim. 5:8) Ahpw, met sohte wehwehki me kitail anahne nantihong ahneki de naineki soahng koaros me kapw oh keieu kaselel. (Lepin Padahk 27:20; 30:8, 9) Weksang met, Pwuhk Sarawi kin kangoange kitail en itarki “dahme mie,” dahme anahn ong mour. (1 Tim. 6:8; Ipru 13:5, 6) Kapwaiada kaweid wet pahn sewese kitail en ahneki pwoaren mas me mwakelekel oh marain.
3. Dahme kak sewese kitail en kihsang nan atail mour soahng kan me pahn kahrehiong kitail en ahneki pwunod?
3 E pahn wia elen loalokong ma kitail pahn liksang wiahda pweipwand me sohte uhdahn anahn oh pil liksang ahneki de naineki dipwisou kan me pahn kihsang atail ahnsou laud. (1 Tim. 6:9, 10) Iaduwen kitail kak wia met? Ni ahnsou me kitail pahn wiahda pilipil ehu, kapakap oh tehk mwahu duwen ireo oh kasawih ni mehlel ma e pahn kauwehla ahmw mehn akadei ngenin kan. Nantihong pwe soahng ngenin kan en kin keieu nan ahmw mour.—Pilipai 1:10; 4:6, 7.
4. Dahme kahrehda kitail kin nantihong en kihsang nan atail mour soahng soh-katepe kan?
4 Kihsang Nan Atail Mour Soahng Soh-Katepe kan: Pil mehkot me pahn sewese kitail en liksang rapahki kepwehn sampah wet iei en kihsang atail mour soahng soh-katepe kan. Emen brother me diarada me ah peneinei kak memour oh sohte anahne en ahneki soahng koaros koasoia: “Ahnsou wet, I kak wia soahng tohto ong riei kan nan mwomwohdiso laud sang mahs. I kamehlele me Siohwa kin kapaiada sapwellime ladu kan koaros ni arail kin koasoanehdi me kaudok mehlel en keieu mahs nan arail mour mwohn pein nsenarail.” Ke kak kihsang ahmw mour soahng soh-katepe kan oh ale kapai kan me kin kohsang wia met?
5. Dahme kahrehda kitail anahne doadoahk laud pwehn tehk ma kitail kin ahneki pwoaren mas me mwakelekel oh marain?
5 Kitail anahne doadoahk laud pwehn dehr lohdi pahn manaman en Sehdan, ah sampah me kin kesempwaliki ahneki oh naineki dipwisou kan, oh pein atail soh-unsek kan. Kitail en dehr mweidohng masatail en kilikilangseli, ahpw kitail en kilangwohngte wia kupwuren Koht oh atail koapworopwor kaselel en mour soutuk.—Lepin Padahk 4:25; 2 Kor. 4:18.