Mesomwen Kin Mwakelekel?
1. Ia wehwehn mesomw en kin mwakelekel?
1 Dahme masatail kin kilang, kin kamwakid atail wiewia kan. Ia uwen e konehng mahsen en Sises pwukat: “Ma pwoaren masamwail kan pahn mwakelekel oh marain, paliwaramwail unsek pahn diren marain.” (Mad. 6:22) Ma masatail kin “mwakelekel,” e kin uhlahng soahng ehute iei en wia kupwuren Koht. Kitail kin mwohneki Wehio oh sohte kedirepwkihla dipwisou kan de wiewia kan me kin kerempwa doadoahk en kalohk.
2. Dahme kak kerempwa atail lamalam? Dahme kak sewese kitail?
2 Anahnepen Kasawih Pein Kitail: Dahme kin pwarada nan nuhs de TV kan oh pil soahng kan me meteikan kin ahneki kak kerempwa atail lamalam. Mwohn atail pahn wia mehkot de pwain mehkot me pahn kihsang atail ahnsou laud, mwohni, de atail kehl, e pahn mwahu en “medemedewe uwen pweine” ni omw pahn pein idek rehmw, ‘Met pahn kamwahwihala ei papah Siohwa de e pahn kauwehla?’ (Luk 14:28; Pil. 1:9-11) E pil wia elen loalokong en kin kasawih atail mour en dehr kedirepwkihla soahng kan me sohte nohn kesempwal pwehn kalaudehla atail ahnsoun kalohk.—2 Kor. 13:5; Ep. 5:10.
3. Dahme kitail sukuhlki sang emen sister me wiahda wekidekla kan pwehn katikala eh anahn kan?
3 Ni emen Sister eh tepida iang doadoahk en pioneer, e pilada en kolokolete eh doadoahk en rahn koaros mendahki doadoahk en lepin ahnsou kak apwalihala eh anahn kan. Ih eri nda: “Sohte me kak papah soumas riemen. I anahne tounmeteikihla dahme I mwahuki pwehn apwalihala ei anahn kan. I kilang me dipwisou kan kin meringla oh I pahn pwangada ni ei pahn nannanti en alehdi mepwukat.” Eh irair kan mweidohng en kak wekidala eh mour pwehn katikala eh anahn akan oh pil wekidala eh doadoahk. Met kahrehiong en kak pousehlahte eh pioneer.
4. Dahme kahrehda e kesempwal en kolokolete mas mwakelekel?
4 Karuwaru en atail ahnsou kahrehiong e kesempwalsang mahs en kin kolokolete mas mwakelekel. Rahn koaros kitail kin kerenlahng imwin koasoandi wet oh koasoandi kapw en Koht. (1 Kor. 7:29, 31) Ni atail kin nannanti nan doadoahk en kalohk, kitail kak doarekitailla oh pil irail kan me kin rong.—1 Tim. 4:16.