Prokram Kapw en Kapokon en Rahn Tohrohr
Siohwa Koht wiahda masatail inenen mwahu. (Melkahka 139:14) Ahpw, masatail kin kak kilang soahng teieu ahnsoukis. Met mehlel ni ahnsou me kitail kin medemedewe duwen uhdahn masatail oh masatail ni pali ngehn. Pwe kitail en kak kilang mwahu ni pali ngehn, kitail anahne kainenehla atail madamadau ohng medemedewehte wia kupwuren Koht. Pwehki ahn Sehdan sampah kin wia soahng kan me pahn kahrehong kitail en sohpeisang atail papah Siohwa, e konehng oaralap en Kapokon en Rahn Tohrohr en pahr en kalohk en 2006 eh koasoia “Pwoaren Masatail en Mwakelekel oh Marain”!—Madiu 6:22.
Dahme kitail kak wia pwehn alehdi kapai kan sang Siohwa? (Lepin Padahk 10:22) Peidek wet pahn pasapengla nan padahk me oaralap koasoia “Paiekihda Kapai kan me Kohsang Pwoaren Masatail me Mwakelekel oh Marain.” Interview kan me pahn wiawi pahn kasalehda iaduwen atail pahn kak paiekihda atail doadoahngki kaweid sang nan Paipel. Oaralap en keieun padahk me brother men pahn wia iei met: “Pwoaren Masatail en Mwakelekel oh Marain Nan Sampah Suwed Wet” oh padahk wet pahn kasalehda duwen soahng kan me kin kedirepwe atail mour oh kin ekis ekis kauwehla atail pali ngehn. Kitail pahn pil sukuhliki duwen dahme kitail kak wia pwehn pilada “dahme mwahu oh kesempwal.”—Luk 10:42, NW.
Iaduwen pahpa oh nohno kan oh meteikan kak kangoange Kristian pwulopwul kan en nantihong arail mehn akadei ngenin kan? Padahk kan me oaralap kan koasoia “Pahpa oh Nohno kan me kin ‘Kainene Neirail Arep kan’ Ni Ahl me Pwung” oh “Irail me Pwulopwul kan me Kin Nantihong Mehn Akadei Ngenin kan” oh pahpa oh nohno kan oh pil me pwulopwul kan pahn kasalehda arail madamadau duwen peidek kesempwal wet. (Melkahka 127:4) Emen brother me pahn wia kaimwiseklahn padahk en rahno pahn kasalehda iaduwen kitail kak iang sapwellimen Siohwa pwihn mwekimwekidwei mwowe nin duwen emen emen kitail, nin duwen peneinei kan, oh nin duwen mwomwohdiso.
Sohte lipilipil ma kitail ahpwtehn pedolong nan padahk mehlel de kitail papah Siohwa erein sounpahr tohto, e kesempwal ‘pwoaren masatail en mwakelekel oh marain.’ Prokram en Kapokon en Rahn Tohrohr pahn sewese kitail en wia met.